ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇတႆး ပွၵ်ႈၵမ်းတီႈ 2 ၸတ်းႁဵတ်းတီႈ ၸႄႈဝဵင်းမိူင်းယႆ တင်းမူတ်းမေႃသွၼ်ၶဝ်ႈႁူမ်ႈလဵပ်ႈႁဵၼ်း 235 ၵေႃႉ။


တႄႇဢဝ် ဝၼ်းတီႈ 05-20/05/2017 ယၢမ်းၵၢင်ၼႂ် 08:00-16:00 မူင်းဝၢႆးဝၼ်း ပႃႇတီႇႁူဝ်သိူဝ် SNLD ၸႄႈဝဵင်းမိူင်းယႆ ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ၾိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉ ၵူၼ်းၼုမ်ႇ ပွၵ်ႉ 3 တီႈဝတ်ႉဝိႁၢရ်သႅင်မိူင်း ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်း ႁွင်ႇ။ ၼင်ႇႁိုဝ် ၵူၼ်းၼုမ်ႇၼႂ်းၸႄႈဝဵင်းမိူင်းယႆ တေမီးၼမ်ႉၵတ်ႉတႃႇပူင်သွၼ် ႁႂ်ႈလႆႈတင်းႁူႉ ပၢႆးႁၼ် လႄႈ ႁႂ်ႈလႆႈပဵၼ်ၽူႈဢွၼ်ႁူဝ်လီ ၸဵမ်ၸိူဝ်းၼႆႉ ဝႃႈၼႆ။

ၸၢႆးသိူဝ်ဢွၼ်ႇမိူင်း ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းမိူင်းယႆ လၢတ်ႈဝႃႈ “  မေႃသွၼ် ဢၼ် မႃး လဵပ်ႈႁဵၼ်းၾိုၵ်းၽွၼ်ႉ ၵမ်ႈၼမ် ပဵၼ်မေႃသွၼ် ယူႇၼႂ်း 28 ဢိူင်ႇ ၸႄႈဝဵင်းမိူင်းယႆ ႁဝ်းၶႃႈ။ လိူဝ်ၼၼ်ႉ မိူၼ်ၼင်ႇ တၢင်းၸႄႈဝဵင်းမိူင်းသူႈ၊ ၸႄႈဝဵင်းလႃႈသဵဝ်ႈလႄႈ ၸႄႈဝဵင်း သီႇပေႃႉၵေႃႈ မႃးၶဝ်ႈႁူမ်ႈပႃး။ ယူႇတီႈပႃႇတီႇႁူဝ်သိူဝ် ၸႄႈဝဵင်းမိူင်းယႆ မီးၽႅၼ်ၵၢၼ်ဝႆႉဝႃႈ ၼိုင်ႈပီ ၼိုင်ႈပွၵ်ႈ ပူၵ်းပွင်ပၼ်ၵူၼ်းၼုမ်ႇႁဝ်း ၵဵဝ်ႇလူၺ်ႈပၺ်ၺႃ၊ လွင်ႈၽူႈဢွၼ်ႁူဝ်၊ လွင်ႈပဵၼ် ၵူၼ်းမိူင်းလီ ၸဵမ် ၸိူဝ်းၼႆႉ” ဝႃႈၼႆ။


ပၢင်ၾိုၵ်းၽွၼ်ႉၼႆႉ ၶူးၽူႈပူင်သွၼ်ပၼ် ပဵၼ်မေႃသွၼ်ၸၢႆးၾႃႈ ဢွၼ်ႁူဝ်ၼမ်းၼႃႈ၊  မေႃသွၼ်လၢႆလၢႆၵေႃႉ ၸွႆႈဢဝ်ပုၼ်ႈၽွၼ်းသေ ပူင်သွၼ်ပၼ်ပႃး ဝႃႈၼႆ။


ၼႂ်းပၢင်ၾိုၵ်းၽွၼ်ႉလၢႆးပူင်သွၼ်လိၵ်ႈလၢႆးတႆး ပွၵ်ႈၵမ်းတီႈ 2 တီႈၸႄႈဝဵင်းမိူင်းယႆၼႆႉ ပူင်သွၼ်ပၼ်ပႃး လွင်ႈပိုၼ်းတႆး၊ သိူၵ်ႈပိုၼ်းလုမ်ႈၽႃႉ ၵၢၼ်ပဵၼ်ၵူၼ်းမိူင်းလီ၊ ပပ်ႉႁဵၼ်းပူင်သွၼ်ၼႂ်းႁူင်းႁဵၼ်း၊ ပၢႆးသၢႆႊ၊ ၵၢၼ်တႅပ်းတတ်း၊ လွင်ႈဢွၼ်ႁူဝ်လႄႈ လွင်ႈၵႃႈ ပၼ်ႇၵွင် ၸဵမ်ၸိူဝ်းၼႆႉ ဝႃႈၼႆ။


ၼႂ်းဝၼ်းတီႈ 5 ဝၼ်းပိုတ်ႇပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆးၼႆႉ ၸတ်းႁဵတ်း ပႃးပၢင် ဢုပ်ႇၶႆႈ လိၵ်ႈလၢႆးပၢႆးႁူႉ ပၢႆးႁၼ်။ မီးၽူႈယႂ်ႇၵူၼ်းလူင် ၶိုၼ်ႈႁွတ်ႈမွၵ်ႈလၢတ်ႈၶေႃႈၵႂၢမ်း ဢုပ်ႇၶႆႈ ၵႂႃႇမိူၼ်ၼင်ႇ ၸဝ်ႈတူၼ်ၶူး ၽူႈၵွၼ်းဝတ်ႉဝိႁၢရ်သႅင်မိူင်း ဝဵင်းမိူင်းယႆ၊ ၽူႈတႅၼ်းသၽႃးၸႄႈမိူင်း ဝဵင်းမိူင်းယႆ၊ မေႃသွၼ်လူင်ၸၢႆးၾႃႈလႄႈ ၽူႈၸွႆႈထႅမ်ပၢင်ၾိုၵ်းၽွၼ်ႉ ၸဵမ်ၸိူဝ်းၼႆႉ။ တင်းမူတ်း ပေႃႈမႄႈပီႈ ၼွင်ႉၵူၼ်းမိူင်းလႄႈ မေႃသွၼ်ၶဝ်ႈႁူမ်ႈ မီးႁိမ်းၸမ် 400 ၵေႃႉ ဝႃႈၼႆ။


ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး မိူဝ်ႈပီ 2016 ၼၼ်ႉၵေႃႈ မေႃသွၼ် ၼ်ႂ်းဢိူင်ႇ 28 ဢိူင်ႇ ၸႄႈဝဵင်းမိူင်းယႆ မႃးၶဝ်ႈႁူမ်ႈလဵပ်ႈႁဵၼ်းမီးယူႇ 218 ၵေႃႉ ၼႆယဝ်ႉ။