ဝၢႆးၸုမ်းၶၢင်ထွၼ်တူဝ်ဢွၵ်ႇ UNFC ယူႇတီႈလုၵ်ႈၸုမ်း မီးၶေႃႈထၢမ်လၢႆလၢႆၶေႃႈ
ဝၢႆးလင်ၸုမ်းၶၢင် KIO/KIA ထွၼ်တူဝ်ဢွၵ်ႇ ၶွင်ႊသီႊၾႅတ်ႊၻရႄႊ ႁူမ်ႈတုမ်ၵူႈၸၢဝ်းၶိူဝ်း (UNFC) ဢၼ်ၸုမ်းၶၢင်
ႁဵတ်းႁူဝ်ပဝ်ႈယူႇၼၼ်ႉ ယူႇတီႈလုၵ်ႈၸုမ်း UNFC မီးၶေႃႈထၢမ်မႃး လၢႆလၢႆၶေႃႈ- ၽူႈပၵ်းတႃပႂ်ႉတူၺ်းၶဝ်လၢတ်ႈ။
ၵဵဝ်ႇၵပ်းလွင်ႈၼႆႉ မိူဝ်ႈဝူင်ႈပူၼ်ႉ ယူႇတီႈၸုမ်းၶၢင် KIO/KIA ႁဵတ်းလိၵ်ႈ ထွၼ်တူဝ်ဢွၵ်ႇတီႈၸုမ်း ၶွင်ႊသီႊၾႅတ်ႊၻရႄႊႁူမ်ႈတုမ်ၵူႈၸၢဝ်းၶိူဝ်း (UNFC) ဢၼ်ၸုမ်းၶၢင် KIO/KIA ႁပ်ႉႁဵတ်းႁူဝ်ပဝ်ႈဝႆႉ။ ယၢမ်းလဵဝ် လုၵ်ႈၸုမ်း UNFC ၼႆႉမီးမိူၼ်ၼင်ႇ ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP), ပႃႇတီႇမိူင်းမွၼ်းမႂ်ႇ (NMSP) ၊ ၸုမ်းရၶႅင်ႇ (ANC)၊ မူႇၸုမ်း
ၸိူဝ်ႉၸၢတ်ႈဝႃႉ (WNO) ဢိၵ်ႇတင်းၸုမ်းလႃးႁူႇ ၸိူဝ်းၼႆႉ။
မိူဝ်ႈပၢင်ၵုမ် ဢၼ်ၸုမ်းဝႃႉ UWSP/UWSA ဢွၼ်ႁူဝ်ၸတ်းႁဵတ်း တီႈပၢင်ၶမ်း ငဝ်ႈငုၼ်းပၢင်သၢင်း မိူဝ်ႈလိူၼ်
ဢေႊပရိူဝ်ႊပူၼ်ႉမႃးၼၼ်ႉ ၸုမ်းၶၢင်လွတ်ႈလႅဝ်း KIO/KIA ဢၼ်ယွၼ်းထွၼ်တူဝ်ဢွၵ်ႇ UNFC တင်းၸုမ်း
ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) လႆႈၵႂႃႇၶဝ်ႈႁူမ်ႈၸွမ်း။ သွင်ၸုမ်းၼႆႉ မီးၼႃႈလိၼ်တူင်ႉၼိုင် ဢၼ်ဢိူမ်ႈၸမ် /တိတ်းၸပ်းၵၼ်တင်း ပွတ်ႈတွၼ်ႈၼႃႈလိၼ် ဢၼ်ၸုမ်းဢူၺ်းလီပွတ်းႁွင်ႇၶဝ် တူင်ႉၼိုင်ယူႇသဝ်း။
ဢူးတတ်ႉမူး ၽူႈမီးပုၼ်ႈၽွၼ်းၼႂ်း ပႃႇတီႇပိူင်ၵူၼ်းမႂ်ႇ (လူႉပွင်ႇတိတ်ႉပႃႇတီႇ)၊ ပဵၼ်ၽူႈၶဝ်ႈၸုမ်းၵဝ်ႇ တပ်ႉသိုၵ်းလုၵ်ႈႁဵၼ်းလၢတ်ႈဝႃႈ- "KIA တေဢွၵ်ႇ UNFC ၼႆႉ တေဢွၵ်ႇၸုမ်းမၼ်းၸုမ်းလဵဝ်ၵူၺ်းႁႃႉ၊ တေၸၢင်ႈပႃးၸုမ်းဢူၺ်းလီပွတ်းႁွင်ႇႁိုဝ်။ တၢင်းႁၼ်ထိုင်ႁဝ်းၶႃႈတႄႉ ပိူင်ပဵၼ်ဢၼ်ပဵၼ်ယူႇမိူဝ်ႈလဵဝ်ၼႆႉ UNFC ၼႆႉ ၶဝ်ၶႂ်ႈဢုပ်ႇဢူဝ်းၵၢၼ်မိူင်း။ ပေႃးမႃးတူၺ်းယၢမ်းလဵဝ်ၼႆႉ တႃႇ UNFC တေမႃးဢုပ်ႇဢူဝ်းတင်းတပ်ႉသိုၵ်းၼႆႉ ႁၼ်ဝႃႈႁႅင်းတိုၵ်ႉဢေႇယူႇ။ မၼ်းမိူၼ်ၼင်ႇဝႃႈ တပ်ႉသိုၵ်းမၢၼ်ႈ ပၼ်ႁႅင်းဢီးမႃး သူၼ်းႁႂ်ႈ UNFC ၶဝ်တႅၵ်ႇၵၼ်ၵေႃႈပဵၼ်လႆႈ"- ဝႃႈၼႆ။
ယူႇတီႈတပ်ႉသိုၵ်းၸိုင်ႈတႆး SSPP/SSA တႄႉ ၸဝ်ႈၸၢႆးထူး လၢတ်ႈၼႄတီႈၸုမ်းသိုဝ်ႇ (Media) ၶဝ်ဝႃႈ တေဢမ်ႇထွၼ်တူဝ်ဢွၵ်ႇ UNFC ။ ၵူၺ်းၵႃႈ ၸုမ်းပၵ်းတႃၶဝ်လၢတ်ႈဝႃႈ- SSPP/SSA ၼႆႉ ယွၼ်ႉပိူဝ်ႈယူႇၼႂ်းၵႄႈ ၸုမ်းတပ်ႉသိုၵ်းဢူၺ်းလီပွတ်းႁွင်ႇၶဝ် လႄႈ တေထွၼ်တူဝ်ဢွၵ်ႇႁိုဝ် ဢမ်ႇထွၼ်ၼၼ်ႉ ပဵၼ်ဢၼ်လီပၵ်းတႃ ပႂ်ႉတူၺ်းဢၼ်ၼိုင်ႈ- ၼႆယူႇ။
ၸုမ်း UNFC ၼႆႉၾၢႆႇတၢင်းလူင်ပွင်ၸိုင်ႈ ႁၼ်ထိုင်ဝႃႈ တႃႇတေမႃးလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼႆႉ ငဝ်းလၢႆးမၼ်းၶႅမ်ႉလီယူႇ။ ၵူၺ်းၵႃႈ ပၢင်ၵုမ်ၶွမ်ႊမတီႊငဝ်ႈငုၼ်းၶဝ်တႄႉ ယင်းတိုၵ်ႉႁဵတ်းသၢင်ႈၵႂႃႇ ၸွမ်းၶၵ်ႉတွၼ်ႈ ၸုမ်းလႂ်ၸုမ်းၼၼ်ႉယူႇ။
ၼၢႆႇပၺ်ၺႃးဢွင်ႇ ၽူႈထတ်းထွင်လိၵ်ႈ ၸုမ်းၶၢဝ်ႇမွၼ်း (IMNA) လၢတ်ႈဝႃႈ- NMSP တေႁဵတ်းပၢင်ၵုမ်ယဝ်ႉ ဝၼ်းတီႈ 8 လိူၼ်မေႊ။ KNPP သမ်ႉတေႁဵတ်းပၢင်ၵုမ်ယဝ်ႉၼႂ်းဝၼ်းတီႈ 10 ။ လုၵ်ႉတီႈပၢင်ၵုမ်ၼႆႉသေ တေလူင်းလၢႆးမိုဝ်း
ဢမ်ႇလူင်းမိုဝ်းၼႆၼၼ်ႉ တေဢိင်ၼိူဝ်ပၢင်ၵုမ်ၼႆႉသေ ၸင်ႇၵွႆႈတႅပ်းတတ်းထႅင်ႈ။ ယူႇတီႈ NMSP သေ တေလူင်း
လၢႆးမိုဝ်းၼႆႉ တေလူင်းၸုမ်းလဵဝ်ဢမ်ႇၸႂ်ႈ၊ တေယူႇတီႈၸိုဝ်ႈ UNFC သေ လူင်းလၢႆးမိုဝ်းၼႆ လႆႈငိၼ်းၶၢဝ်ႇဝႆႉၼင်ႇၼၼ်ယူႇ။ ပေႃးထိုင်မႃးဝၼ်းတီႈ 14 ထိုင်ဝၼ်းတီႈ 18 ၼႆႉ UNFC တေၵႂႃႇႁူပ်ႉၵၼ်တင်း လူင်ပွင်ၸိုင်ႈ၊ ဝၢႆးၼၼ်ႉမႃး ၸင်ႇတေၸၢင်ႈႁူႉလႆႈၶေႃႈတွပ်ႇမၼ်းလီလီ- ဝႃႈၼႆ။
ၾၢႆႇၼိုင်ႈတၢင်းၼိုင်ႈ တပ်ႉၽွမ်ႉႁူမ်ႈ ဢၼ်ၸုမ်းဝႃႉဢွၼ်ႁူဝ်သေ တေဢွၼ်ႁူဝ်ၼမ်းၼႃႈၵၢၼ်မိူင်းၵႂႃႇ၊ ဢမ်ႇၶႂ်ႈၵႂႃႇၸွမ်း NCA ၸွမ်းၼင်ႇဢၼ်ဝႃႉလႆႈပိုၼ်ၽၢဝ်ႇဝႆႉၼၼ်ႉ ယူႇတီႈၾၢႆႇလူင်ပွင်ၸိုင်ႈၵေႃႈ ဢမ်ႇႁပ်ႉလႆႈ။ လူင်ပွင်ၸိုင်ႈ
တေႁဵတ်းၵႂႃႇၸွမ်းလိၵ်ႈႁူမ်ႈမၢႆ NCA ၵူၺ်းၼႆ ပိုၼ်ၽၢဝ်ႇမိူဝ်ႈဝၼ်းတီႈ 6 လိူၼ်မေႊ။
ထႅင်ႈၾၢႆႇၼိုင်ႈၵေႃႈ မိူၼ်ၼင်ႇ UNFC တၢင်ႇယိုၼ်ႈဝႆႉ 9 ၶေႃႈၸိူဝ်းၼၼ်ႉ တေႃႇထိုင်ဝၼ်းမိူဝ်ႈလဵဝ် ပႆႇဢုပ်ႇဢူဝ်း တူၵ်းလူင်းၵၼ်သင်လႆႈ။ လုၵ်ႈၸုမ်းၼႂ်း UNFC ဢၼ်ၶႂ်ႈလူင်းလၢႆးမိုဝ်းယူႇမိူဝ်ႈလဵဝ် မီးမိူၼ်ၼင်ႇၸုမ်းယၢင်းလႅင် KNPP လႄႈၸုမ်းမွၼ်း NMSP ၸိူဝ်းၼႆႉ။
ဢူးမွင်ႇမွင်ႇၸူဝ်း ၽူႈလဵပ်ႈႁဵၼ်းလွင်ႈၸၢဝ်းၶိူဝ်း၊ သမ်ႉပဵၼ်ပႃးၽူႈပၵ်းတႃပိူင်ပဵၼ် ၼႂ်းၸိုင်ႈတႆးပွတ်းႁွင်ႇ လႄႈပဵၼ်ပႃးၽူႈၶဝ်ႈၸုမ်းၵဝ်ႇ ပႃႇတီႇၶွမ်ႊမိဝ်ႊၼိတ်ႉမိူင်းမၢၼ်ႈ (ပၵပ)ၼၼ်ႉ တႅမ်ႈဝႆႉၼႂ်းပွင်ႈၵႂၢမ်းမၼ်းဝႃႈ- ၸုမ်းဝႃႉ WNO ဢၼ်ပဵၼ်ၽူႈၶဝ်ႈပႃးၼႂ်းၸုမ်း UNFC ၼႆႉ ဢမ်ႇၸၢင်ႈတူၵ်းပဵၼ်ၶိူင်ႈမိုဝ်းၸုမ်းဝႃႉ UWSA လႆႈႁႃႉ။ ၸုမ်းဝႃႉ UWSA ဢၼ်ႁူမ်ႈၵၼ်တင်း ပၵပ မိူဝ်ႈၵွၼ်ႇၼႆႉ ပိူၼ်ႈႁွင်ႉဝႃႈဝႃႉလႅင်။ ဢၼ်ပဵၼ် WNO ဢၼ်ဢမ်ႇႁူမ်ႈၵၼ်တင်း ပၵပ သမ်ႉပိူၼ်ႈႁွင်ႉၶဝ်ဝႃႈဝႃႉၽိူၵ်ႇ။ ၵူၺ်းၵႃႈ ၶၢဝ်းယၢမ်းမိူဝ်ႈလဵဝ်ၼႆႉ WNO ဢၼ်ႁွင်ႉဝႃႈဝႃႉၽိူၵ်ႇၼႆႉ သင်ဝႃႈၶဝ်ဢမ်ႇၵႂႃႇၸွမ်း UNFC ထႅင်ႈသေ ၵႂႃႇႁူမ်ႈၵၼ်တင်း UWSA ၼႆၵေႃႈ မၼ်းတေဢမ်ႇမီး လွင်ႈလီဢၢမ်းလူင်လၢင်။
ထႅင်ႈၾၢႆႇၼိုင်ႈၵေႃႈ ၸုမ်းလႃးႁူႇ LDU ၵေႃႈ ၵွင်ႉၵၢႆႇၵၼ်တင်းၸုမ်းဝႃႉ UWSA ၼႃႈလိၼ်သိုၵ်း 171 ဢၼ်မီးၼႂ်း ၸႄႈတွၼ်ႈမိူင်းသၢတ်ႇ။ ဢၼ်ပဵၼ်ၸုမ်းရၶႅင်ႇ ANC ၵေႃႈ တေလူင်းလၢႆးမိုဝ်း NCA ႁိုဝ် ဢမ်ႇၼၼ်ၵေႃႈ တေၵႂႃႇႁူမ်ႈမိုဝ်းၵၼ်တင်းၸုမ်းရၶႅင်ႇ ULA ႁွင်ႉ AA ဢၼ်မႃးပဵၼ်ဢူၺ်းလီၵၼ်တင်းဝႃႉ UWSA ၼၼ်ႉႁိုဝ်၊ ၼႆႉၵေႃႈ ပဵၼ်ဢၼ်လီပၵ်းတႃပႂ်ႉတူၺ်းဢၼ်ၼိုင်ႈ။
မိူၼ်ၼင်ႇၸုမ်းယၢင်းလႅင် KNPP ၼႆႉ ဢဵၼ်ႁႅင်းၶဝ်ဢေႇ ဝႃႈၼႆသေတႃႉၵေႃႈ ပေႃးဝႃႈၶဝ်ၶႂ်ႈၸုၵ်းၼိူဝ်ၶႅင်ႈၶႃၶဝ် ၼႆၵေႃႈ ၸုၵ်းလႆႈယူႇ၊ ၵူၺ်းၵႃႈ ယၢမ်းလဵဝ်တႄႉ UNFC ၼႆႉ မၼ်းဢွၼ်ႁူဝ် DPN (တူဝ်တႅၼ်းၸုမ်းၶၢဝ်းၶိူဝ်း ၾၢႆႇဢုပ်ႇဢူဝ်းၵၢၼ်မိူင်း) ဝႆႉယူႇ။ ငဝ်းလၢႆးၸုမ်းမွၼ်း NMSP တင်းယၢင်းလႅင် KNPP သွင်ၸုမ်းၼႆႉတႄႉ လႆႈႁူပ်ႉပၼ်ႁႃတၢင်းယၢပ်ႇၽိုတ်ႇ
ၵဵဝ်ႇၵပ်းဢၼ်ၶဝ်ယွၼ်းဝႆႉ 9 ၶေႃႈ တႃႇလႅၵ်ႈလၢႆႈၼႂ်းၶေႃႈၵိၼ်ၵႅၼ်ႇ NCA ။ ႁႂ်ႈလႅၵ်ႈလၢႆႈပၼ်ၼႆၼၼ်ႉ ပိူၼ်ႈတေ
ႁဵတ်းႁိုဝ်မႃး။ သင်ၸိူဝ်ႉဝႃႈၶဝ်ဢမ်ႇၵႄႈ လႅၵ်ႈလၢႆႈပၼ်ၼႆ ၶဝ်တေလႆႈထူပ်းလွင်ႈယၢပ်ႇၽိုတ်ႇ ၼႂ်းၵၢၼ်မိူင်းလႄႈ
ၵၢၼ်သိုၵ်း ၵႂႃႇတိၵ်းတိၵ်းယူႇ- ၼႆယဝ်ႉ။
ပဵၼ်ႁိုဝ်ၵေႃႈယဝ်ႉ ဢၼ်ပဵၼ်လုၵ်ႈၸုမ်း UNFC ႁႃႈၸုမ်း ၸိူဝ်းၵိုတ်းဝႆႉၼၼ်ႉ တႃႇၶဝ်တေလူင်းလၢႆးမိုဝ်း NCA
တင်းမူတ်းၼၼ်ႉ တေဢမ်ႇလႅပ်ႈပဵၼ်လႆႈ- ဢူးမွင်ႇမွင်ႇၸူဝ်း တႅမ်ႈသေတၢင်ႇဝႆႉပွင်ႈၵႂၢမ်း ၸိူင်ႉၼင်ႇၼႆ။
Tags: News, Politic
