ပီႈၼွင်ႉတႆး ၸိူဝ်းႁွတ်ႈၽႅဝ် မိူင်းထႆး ႁူမ်ႈၵၼ်ႁဵတ်းၻွၵ်ႇမႆႉၸၼ် (ဢၼ်ၼႂ်းဝၢင်းႁေႃႁွင်ႉဝႃႈ ၻွၵ်ႇမႆႉ ၻႃႊရႃႊရတ်ႉ) ဢမ်ႇၼၼ် မွၵ်ႇမွင်ၸႂ် ဢၼ်ဝၢင်းၸွမ်းၵူၼ်းတၢႆ ၼႂ်းပၢင်ၸႃပၼၼိုင်ႈ မိုၼ်ႇလူင်ႇ တႃႇလူႇတၢၼ်း ၼႂ်းဝၼ်းပူၼ်ႉၶၢပ်ႈတူဝ် ၸဝ်ႈမုၼ်ယႂ်ႇၶုၼ် ႁေႃၶမ်းထႆး တူၼ်တီႈ 9 ။

ပူၼ်ႉမႃး ဝၼ်းတီႈ 07/05/2017 ယၢမ်းၵၢင်ၼႂ် 10:00-16:00 မူင်းဝၢႆးဝၼ်း ပီႈၼွင်ႉတႆး ၸိူဝ်းယူႇ သဝ်း ၼႂ်းၵဵင်းမႆႇ ႁူမ်ႈၵၼ်တႄႇႁဵတ်းမွၵ်ႇမႆႉၸၼ် ဢမ်ႇၼၼ်လူင်ႇမွၵ်ႇမွင်ၸႂ် တႃႇလူႇတၢၼ်း ၼႂ်းဝၼ်း ပူၼ်ႉၶၢပ်ႈတူဝ် ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၼႂ်းဝၼ်းတီႈ 26 လိူၼ်ဢွၵ်ႊထူဝ်ႊပိူဝ်ႊ ပီ 2017 တေထိုင်မႃးၼႆႉ။ ဢွင်ႈတီႈပီႈၼွင်ႉတႆး ႁူမ်ႈၵၼ်ႁဵတ်းမွၵ်ႇမႆႉၸၼ်သမ်ႉ ပဵၼ်တီႈ သုၼ်လဵပ်ႈႁဵၼ်း ၵဵဝ်ႇလူၺ်း ပၢႆးယူႇလီ တႃႇပီႈၼွင်ႉႁႅင်းၵၢၼ်ယၢၼ်မိူင်း ၾၢႆႇလင်လူဝ်ႊတတ်ႊ (Lotus) ၶမ်းတဵင်ႈ ဝဵင်းၵဵင်းမႆႇ ၸိုင်ႈထႆး။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် Radio FM 99.00 MHZ လၢတ်ႈဝႃႈ “ ၸွမ်းၼင်ႇလူင် ပွင်ၸိုင်ႈထႆး ပိုၼ်ၽၢဝ်ႇဝႃႈ တေႁႂ်ႈၵူႈမူႇၵူႈၸုမ်း ၼႂ်းၸိုင်ႈထႆး ၽႂ်သေဢမ်ႇဝႃႈ ႁႂ်ႈလႆႈမီးသုၼ်ႇႁူမ်ႈပႃး ဢၼ်တေႁဵတ်းမွၵ်ႇမွင်ၸႂ် လူႇတၢၼ်းပၼ်ၸဝ်ႈမုၼ်ယႂ်ႇၶုၼ်ႁေႃၶမ်းထႆး။ ၵွပ်ႈၼႆလႄႈ ႁဝ်းၶႃႈၵေႃႈပဵၼ်တႆး ဢၼ်မႃးပိုင်ႈဢိင်ပႃႇရႃႇမီႇၸဝ်ႈမုၼ်ယႂ်ႇၶုၼ်ႁေႃၶမ်းသေ ၸင်ႇလႆႈႁွင်ႉၽိတ်ႈမွၵ်ႇပီႈၼွင်ႉတႆး ၵူႈမူႇၵူႈ ၸုမ်း ၼႂ်းမိူင်းထႆး မႃးႁူမ်ႈႁဵတ်းၻွၵ်ႇမႆႉ/မွၵ်ႇမွင်ၸႂ် ႁဝ်းၶႃႈယိူင်းဢၢၼ်း တေလူႇမွၵ်ႇမႆႉမွင်ၸႂ် ၸွမ်းၸဝ်ႈ မုၼ်ယႂ်ႇၶုၼ်ႁေႃႈၶမ်း” ဝႃႈၼႆ။


ပေႃးထိုင်မႃး ၼႂ်းဝၼ်းတီႈ 17 လိူၼ်ဢွၵ်ႊထူဝ်ႊပိူဝ်ႊ ပီ 2017 ၼႆႉ ပီႈၼွင်ႉတႆး ၸိူဝ်းယူႇသဝ်း ၼႂ်းၵဵင်းမႆႇ တေႁူမ်ႈၵၼ်ဢဝ် မွၵ်ႇမႆႉမွင်ၸႂ်ၼႆႉ ၵႂႃႇလူႇတၢၼ်းမွပ်ႈယိုၼ်ႈပၼ်တီႈ ၽူႈၵွၼ်းၸႄႈ တွၼ်ႈဝဵင်းၵဵင်းမႆႇ ၸိုင်ႈထႆး ဝႃႈၼႆ။


ၵဵဝ်ႇၵပ်းလွင်ႈႁဵတ်းမွၵ်ႇမႆႉၸၼ်ၼႆႉသေ သင်ဝႃႈ ပီႈၼွင်ႉတႆး/ ပီႈၼွင်ႉႁႅင်းၵၢၼ်ယၢၼ်မိူင်း ၵေႃႉလႂ် သေဢမ်ႇဝႃႈ ၶႂ်ႈႁူမ်ႈၸွႆႈလူႇတၢၼ်းဢမ်ႇၼၼ် ၶဝ်ႈႁူမ်ႈၸွႆႈႁဵတ်းၸိုင် ၵပ်းသိုပ်ႇမႃးလႆႈတီႈ မၢႆၾူၼ်း 088-1373630၊ 089-7589837 သေၵမ်း-ဝႃႈၼႆ။


ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၽူးမိၽူလ်း ဢၻုလ်းယၻဵတ်ႇၼႆႉ ၼွၼ်းၽႄးသဵင်ႈမုၼ်ၵႂႃႇ မိူဝ်ႈဝၼ်းတီႈ 13/10/2016 ၶၢဝ်းယၢမ်း 15:52 မူင်း၊ တီႈႁူင်းယႃလူင်သီရိရၢတ်ႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး။ ၽွင်းဢႃယုၸဝ်ႈလႆႈ 89 ပီ၊ ဢႃယုၽိသိၵ်ႈၶိုၼ်ႈႁၢင်ႈၸၢမ်ႇ ႁေႃ ၽွင်းငမ်းဝၢၼ်ႈမိူင်း လႆႈ 70 ပီ။ တေလုမ်းလႃးသၢင်းၵဵဝ်ႇ ၼႂ်းဝၼ်းတီႈ 26/10/2017 ၼႆယဝ်ႉ။