ဢေႃႈၶႃႈမႂ်ႇသုင်ၶႃႈ။ ၼႂ်းသွင်သၢမ်ဝၼ်းၼႆႉ မီးပၢင်ၵုမ်လွင်ႈငမ်းယဵၼ်မိူင်းႁူမ်ႈတုမ် ပၢင်လူင်ၸူဝ်ႈပၢၵ်ႇပီ 21 ၊ ၼႂ်းပၢၼ်လူင်ပွင်ၸိုင်ႈ NLD ၼႆႉ ႁဵတ်းထႅင်ႈပွၵ်ႈၵမ်း 2 ယဝ်ႉ။ ပေႃးဢဝ်ႁူဝ်ၶေႃႈ ပၢင်ၵုမ်လွင်ႈငမ်းယဵၼ် 

မိူင်းႁူမ်ႈတုမ် ဝႃႈတႄႉ မိူဝ်ႈၼႂ်းပၢၼ်ၸွမ်ၸိုင်ႈတဵင်းၸဵင်ႇၼၼ်ႉ ႁဵတ်းၵႂႃႇပွၵ်ႈၼိုင်ႈ၊ မိူဝ်ႈလဵဝ်သမ်ႉ ႁဵတ်းထႅင်ႈသွင်ပွၵ်ႈ၊ တေမီးၵႂႃႇသွင်ပွၵ်ႈသၢမ်ၵမ်းယဝ်ႉ။ 

ၵူၺ်းၵႃႈ ပေႃးဢဝ်ႁူဝ်ၶေႃႈဢၼ်ဝႃႈ ပၢင်လူင်ၸူဝ်ႈပၢၵ်ႇပီ 21 ၼၼ်ႉတႄႉ ပဵၼ်ၵမ်းထူၼ်ႈ 2 ၵူၺ်း၊ 

ၼႂ်းပၢင်ၵုမ်ဢၼ်ၼႆႉၼႆႉ မၼ်းတေမီးၽွၼ်းလီဢီႈသင် ပိူဝ်ႈတႃႇၸၢဝ်းတႆးႁဝ်း၊ မၼ်းတေမီးၽွၼ်းလီ 

ပိူဝ်ႈတႃႇၵူၼ်းမိူင်းၸၢဝ်းၶိူဝ်း တင်းမူတ်းတင်းသဵင်ႈ သမ်ႉတေပဵၼ်ႁိုဝ်မႃး ဢၼ်ဝႃႈၼၼ်ႉ ႁဝ်းၶႃႈယွၼ်းထတ်းသၢင်တၢင်ႇၼႄၵၼ်ဢိတ်းၼိုင်ႈ။

တီႈပၢင်ၵုမ်ဢၼ်ၼႆႉ တေၵႂႃႇၸွမ်းလၢႆးတၢင်း NCA ဢၼ်ႁွင်ႉဝႃႈ ၵၢၼ်ၵိုတ်းတိုၵ်းတူဝ်ႈမိူင်း သေႁဵတ်းမႃး။ ၵူၺ်းၵႃႈ ၸိူဝ်းဢၼ်ပိုၼ်ၽၢဝ်ႇဝႆႉဝႃႈ တေၵႂႃႇၸွမ်းလၢႆးတၢင်း NCA ယူႇဢၼ်ဝႃႈၼၼ်ႉ မိူၼ်ၸိူင်ႉၸုမ်း UNFC ၸိူဝ်းပဵၼ် လုၵ်ႈၸုမ်းမၼ်း မိူၼ်ၼင်ႇ KNPP, NMSP ၶဝ်ၸဵမ်ၵႂႃႇၸိူဝ်းၼႆႉ သမ်ႉဢမ်ႇမႃးၶဝ်ႈႁူမ်ႈ၊ 

ၸိူဝ်းဢၼ်သၢၼ်ၶတ်းဝႃႈ လၢႆးတၢင်း NCA ၼႆႉ ဢမ်ႇမႅၼ်ႈ၊ ၵႂႃႇၸွမ်းလၢႆးတၢင်း NCA ၼႆႉ 

တေဢမ်ႇႁၼ်ၽွၼ်းၵၢၼ်ဢၼ်တေလီမႃး ပိူဝ်ႈတႃႇတေသၢင်ႈလႆႈမိူင်းႁူမ်ႈတုမ် ၸိူဝ်းၼႆႉ ပဵၼ်ၸုမ်းဢၼ်ဝႃႉဢွၼ်ႁူဝ်သေ မီး 7 ၸုမ်း။ ၵူၺ်းၵႃႈ 7 ၸုမ်းဢၼ်ဝႃႉဢွၼ်ႁူဝ်ၼၼ်ႉ သမ်ႉမႃးၶဝ်ႈႁူမ်ႈပၢင်ၵုမ်၊ 

ၸိူဝ်းဢၼ်ဝႃႈ တေၵႂႃႇၸွမ်းလၢႆးတၢင်း NCA သမ်ႉဢမ်ႇမီးသုၼ်ႇ တေလႆႈမႃးၶဝ်ႈႁူမ်ႈပၢင်ၵုမ် ဢၼ်ဝႃႈၼၼ်ႉ ပဵၼ်လွင်ႈလၢၵ်ႇလၢႆးလူင်ဝႆႉဢၼ်ၼိုင်ႈၶႃႈ။

ၵမ်းၼႆႉပေႃးမႃးတူၺ်း 7 ၸုမ်းဢၼ်ဝႃႉဢွၼ်ႁူဝ်ၼၼ်ႉ ၵၢၼ်မႃးၶဝ်ႈႁူမ်ႈပၢင်ၵုမ်ၼႆႉ ၸမ်ၸမ်ပၢင်ၵုမ်မႃး 

ၸင်ႇတေတႅပ်းတတ်းဝႃႈ တေမႃးၶဝ်ႈႁူမ်ႈယူႇၼၼ်ႉ ၵွပ်ႈသင်ၶႃႈလႃႇ?။ ယွၼ်ႉပိူဝ်ႈလူင်ပွင်ၸိုင်ႈမိူင်းၶႄႇ ပၼ်ႁႅင်းဢီး၊ ဝႃႈတီႈတိူၵ်ႈမၼ်းၵေႃႈ ယွၼ်ႉပိူဝ်ႈလူင်ပွင်ၸိုင်ႈမိူင်းၶႄႇလႄႈ လူင်ပွင်ၸိုင်ႈ ဢၼ်ၼၢင်း 

ဢွင်ႇသၢၼ်းၸုၵျီႇဢွၼ်ႁူဝ်ၼၼ်ႉ မိပ်ႇငႅၼ်းလႄႈ ၶဝ်ၸင်ႇလႆႈမႃးၶဝ်ႈႁူမ်ႈၼႆ ၸွမ်းၼင်ႇၼႂ်းၶေႃႈပိုၼ်ၽၢဝ်ႇ ၶဝ်ၵေႃႈ လႆႈႁူႉတႅၵ်ႇတႅၵ်ႇလႅင်းလႅင်း။

ႁိုၼ်း ၵႃယၢင်း

တႃႇတေမႃးၶဝ်ႈႁူမ်ႈၼၼ်ႉ 1.တေမွၵ်ႇမႃးၸုမ်းလႂ်ၸုမ်းၼၼ်ႉ၊ မိူၼ်ၼင်ႇဝႃႈ ဝႃႉၼိုင်ႈၸုမ်း၊ တႆးၼိုင်ႈၸုမ်း ၸိူင်ႉၼၼ်ၵူၺ်းတႄႉၶဝ်တေဢမ်ႇႁပ်ႉ၊ ၵွပ်ႈပိူဝ်ႈၶဝ်ၽွတ်ႈႁႅၼ်းဝႆႉ ၶွမ်ႊမတီႊဢၼ် 7 မူႇ 7 ၸုမ်းႁူမ်ႈၵၼ်

ႁဵတ်းၵၢၼ်ၼၼ်ႉလႄႈ တေလႆႈမွၵ်ႇထိုင်မႃးတီႈၶွမ်ႊမတီႊ ႁႂ်ႈ 7 ၸုမ်းလႆႈၶဝ်ႈႁူမ်ႈၵၼ်။

2.ပေႃးတေဝႆႉပဵၼ်ၶႅၵ်ႇၶိုၵ်ႉတွၼ်းသေ တေႃႉတႄႉမႃးၶဝ်ႈႁူမ်ႈသေယဝ်ႉ ပၢႆႈမိူဝ်းၵူၺ်း ဢမ်ႇလႆႈတၢင်ႇ လၢတ်ႈသင်ၼႆၵေႃႈ ၶဝ်တေဢမ်ႇၽွမ်ႉ၊ ၸင်ႇဝႃႈႁႂ်ႈလႆႈမီးလွင်ႈတၢင်ႇလၢတ်ႈဢုပ်ႇဢူဝ်းၸွမ်း။

3.ပေႃးဝႃႈလႆႈမႃးၶဝ်ႈႁူမ်ႈယဝ်ႉၼႆ ၽွမ်ႉသေၵေႃႈလီ၊ ဢမ်ႇၽွမ်ႉသေၵေႃႈလီ၊ ႁႂ်ႈလူင်းလၢႆးမိုဝ်း

ၸိူင်ႉၼၼ်ၵေႃႈ ၶဝ်တေဢမ်ႇႁဵတ်း၊ ပွင်ႇဝႃႈယႃႇႁႂ်ႈလႆႈလူင်းလၢႆးမိုဝ်း။

4.ၵဵဝ်ႇလူၺ်ႈလွင်ႈႁူမ်ႇလူမ်ႈၶဝ် ၽွင်းမႃးၶိုၼ်ႈပၢင်ၵုမ် တေႃႇၽႅဝ်မိူဝ်းႁွတ်ႈထိုင်တီႈႁိူၼ်းတီႈယေး တီႈဢွင်ႈ တီႈသဝ်းၶဝ်ၼၼ်ႉ ယူႇတီႈလူင်ပွင်ၸိုင်ႈမိူင်းၶႄႇ တၵ်းလႆႈဢဝ်ႁူမ်ႇလူမ်ႈပၼ်၊ ဢဝ်ပုၼ်ႈၽွၼ်းပၼ်တဵမ်တီႈ၊ တူၵ်းလူင်းၵၼ်ၸိူင်ႉၼင်ႇၼႆသေ ၸင်ႇတေၽႅဝ်မႃး။

ၵမ်းၼႆႉ ၽိူဝ်ႇမႃးၽႅဝ်တီႈၼႂ်းပၢင်ၵုမ်ယဝ်ႉ ၾၢႆႇၼိုင်ႈ UNFC ဢမ်ႇမႃးၶိုၼ်ႈ။ ၾၢႆႇၼိုင်ႈသမ်ႉ ဢၼ်ဝႃႉ

ဢွၼ်ႁူဝ်ၼႆႉ မႃးၶိုၼ်ႈ။ ၽိူဝ်ႇမႃးၶိုၼ်ႈ ဝၼ်းပိုတ်ႇပၢင်မၼ်းပိူင်လဵဝ်ၵူၺ်း ပေႃးလႆႈႁၼ်လွင်ႈတႅၵ်ႇငၢၵ်ႈၵၼ် 

ၸတ်ႉယၢႆႈၵၼ်ယဝ်ႉ။ ပဵၼ်ၸိူင်ႉႁိုဝ်ၶႃႈလႃႇ၊ ၸွမ်ပွင်ၵၢၼ်သိုၵ်း မိၼ်းဢွင်ႇလၢႆႇ လၢတ်ႈၵႂႃႇဝႃႈ- ပေႃးဝႃႈႁဝ်းတေသၢင်ႈမိူင်းႁူမ်ႈတုမ်ၼၼ်ႉ တၵ်းတေလႆႈၵႂႃႇၸွမ်းလၢႆးတၢင်း NCA ၊ ဢမ်ႇၵႂႃႇၸွမ်းလၢႆးတၢင်း NCA ဢမ်ႇလႆႈ။ လိူဝ်သေၼၼ်ႉၵေႃႈ တေႁဵတ်းၸွမ်းမူႇပိူင်တပ်ႉမတေႃႇ တမ်းဝၢင်းဝႆႉ 6 ၶေႃႈၼၼ်ႉၵူၺ်း။

ဝႃႈၼႆၼႆႉ မိူၼ်တင်းဝႃႈ ဢၼ်တူၵ်းလူင်းၵၼ်မႃး ဢၼ်ပီႈၼွင်ႉဝႃႉဢွၼ်ႁူဝ်ၼၼ်ႉတႄႉ မၼ်းပၢႆႈပိူင်ႈၵၼ်ၵႂႃႇ၊ ပိၼ်ႈၽူၼ်ၵၼ်ၵႂႃႇပႅတ်ႈယဝ်ႉ။ ၵွပ်ႈပိူဝ်ႈၸိူင်ႉၼႆ ပၢင်ၵုမ်ဢၼ်သိုပ်ႇႁဵတ်းၵႂႃႇ တႄႇဢဝ်မိူဝ်ႈၼႆႉ 

မိူဝ်ႈၽုၵ်ႈၼၼ်ႉၵေႃႈ ယူႇတီႈၸုမ်းဝႃႉဢွၼ်ႁူဝ်ၼၼ်ႉ ၶိုၼ်ႈသေၵေႃႈလီ၊ ဢမ်ႇၶိုၼ်ႈသေၵေႃႈလီ၊ မၼ်းတေ

ဢမ်ႇမီးၽွၼ်းလီ၊ မၼ်းတေဢမ်ႇမီးလွင်ႈတေငူပ်ႉငီႉၵၼ်လႆႈယဝ်ႉ ႁဝ်းၶႃႈႁၼ်ထိုင်ၸိူင်ႉၼၼ်။

ၵွပ်ႈပိူဝ်ႈယူႇတီႈတပ်ႉမတေႃႇ တိုၼ်းဢမ်ႇလူတ်းယွမ်း ပိူဝ်ႈတႃႇတေပိၼ်ႇပႅင် NCA ၊ ယဝ်ႉၵေႃႈ မူႇပိူင်

တပ်ႉမတေႃႇ ဢၼ်တမ်းဝၢင်းဝႆႉ 6 ၶေႃႈၼၼ်ႉဝႃႈဝႆႉ ၶေႃႈတီႈ 5 ဢုပတေႇၸိုင်ႈမိူင်း ဢၼ်တမ်းဝၢင်းမီးဝႆႉ

ယၢမ်းလဵဝ်ၼႆႉ တၵ်းလႆႈႁဵတ်းၸွမ်းသဵင်ႈသဵင်ႈ။ ၶေႃႈတီႈ 6 တၵ်းတေလႆႈၵႂႃႇၸွမ်းတႂ်ႈ ပၵ်းပိူင်လၵ်းမိူင်း 2008 သေ ႁဵတ်းသၢင်ႈ ၵႂႃႇၵူၺ်း ဝႃႈဝႆႉၸိူင်ႉၼၼ်လႄႈ ႁဵတ်းႁႂ်ႈၸုမ်းၸၢဝ်းၶိူဝ်း ၸုမ်းလုၵ်ႉၽိုၼ်ႉၶဝ် တိုၼ်းတေ

ဢမ်ႇၸၢင်ႈယွမ်းႁပ်ႉလႆႈ။ ပွင်ႇဝႃႈ ဢိုတ်းတၢင်းပႅတ်ႈ ပိူဝ်ႈတႃႇတေဢုပ်ႇၵုမ်ၵၢၼ်မိူင်းၵၼ်ယဝ်ႉၼႆ ႁဝ်းၶႃႈ

ထတ်းႁၼ်ၼင်ႇၼႆ။

ၸင်ႇဝႃႈ ယူႇတီႈၸုမ်းဢၼ်ဝႃႉဢွၼ်ႁူဝ် 7 ၸုမ်းၼၼ်ႉတႄႉ တၵ်းတေဢမ်ႇမီးလွင်ႈဢုပ်ႇလၢတ်ႈၵၼ်သေ တေလႆႈမိူဝ်းၵႂႃႇၵူၺ်း။ ၼမ်သုတ်းၵေႃႈ တေၸၢင်ႈလႆႈဢုပ်ႇၵၼ်တင်းၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ်ၸိုင်ႈမိူင်းသေ ဢမ်ႇမီးၶေႃႈတူၵ်းလူင်းသေယဝ်ႉ ႁူပ်ႉထူပ်းၵၼ်သေ မိူဝ်းၵႂႃႇၸိူင်ႉၼင်ႇၼၼ်ၵူၺ်း ႁဝ်းၶႃႈ

လၢမ်းႁၼ်ၸိူင်ႉၼၼ်ၶႃႈ။

ၵမ်းၼႆႉၾၢႆႇၼိုင်ႈတၢင်းၼိုင်ႈ မိူၼ်ၸိူင်ႉၼင်ႇ KNPP ပီႈၼွင်ႉယၢင်းလႅင်၊ NMSP ပီႈၼွင်ႉမွၼ်း ဢၼ်ၼၢႆႇႁၢၼ်ႇတႃႇၶဝ်၊ ၶူးဢူးရႄႇၶဝ်၊ ၵုၼ်ႇမေႃႇၶဝ်ဢွၼ်ႁူဝ်ဝႆႉၸိူဝ်းၼၼ်ႉသမ်ႉ ဢမ်ႇမႃးၶဝ်ႈပၢင်ၵုမ်ၼႆ မိူဝ်းၼႃႈထႃႇပၢႆ တေႁဵတ်းႁိုဝ်ငူပ်ႉငီႉၵၼ်ၵႂႃႇထႅင်ႈ ဢၼ်ဝႃႈၼၼ်ႉၵေႃႈ တိုၵ်ႉပဵၼ်လွင်ႈယုင်ႈယၢင်ႈလူင်ဝႆႉ ဢၼ်ၼိုင်ႈ။

တီႈၼႂ်းပၢင်ၵုမ်လူင်ဢၼ်ၼႆႉ ႁူဝ်ၼႃႈပႃႇတီႇၸၢဝ်းၶိူဝ်း ၸိူဝ်းဢၼ်ၵူၼ်းမိူင်းၼပ်ႉယမ်လႄႈ ၸိူဝ်းဢၼ်လႆႈ ၸုၼ်ႉတူဝ်ၸုၼ်ႉၶၢဝ်းယၢမ်းမႃး ပီယၢဝ်းၶၢဝ်းႁိုင် မိူၼ်ၸိူင်ႉၼၢႆႇငူၺ်ႇတဵင်း ႁူဝ်ၼႃႈမွၼ်း၊ ၶုၼ်ထုၼ်းဢူး 

ႁူဝ်ၼႃႈတႆး၊ ၸဝ်ႈႁၢၼ်ယွင်ႁူၺ်ႈ ဢၼ်ပဵၼ်ႁူဝ်ၼႃႈၵၢၼ်မိူင်း ဢၼ်တူင်ႉၼိုင်ႁဵတ်းသၢင်ႈမႃး တႃႇၵူၼ်းမိူင်းတင်းၼမ်ၼၼ်ႉ ဢမ်ႇလႆႈထုၵ်ႇၽိတ်ႈမွၵ်ႇၶဝ်ႈၼႂ်းပၢင်ၵုမ်၊ ဢမ်ႇမီးလွင်ႈၶဝ်ႈႁူမ်ႈ၊ ၼႆႉၵေႃႈပဵၼ်လွင်ႈယူပ်ႈယွမ်းပၢင်ၵုမ်ၼႆႉဢၼ်ၼိုင်ႈ။

ၵူႈၵေႃႉႁႂ်ႈလႆႈၶဝ်ႈႁူမ်ႈဢၼ်ဝႃႈၼၼ်ႉ ဢမ်ႇၸႂ်ႈသေတႃႉၵေႃႈ မၼ်းထုၵ်ႇလႆႈပဵၼ်လၢႆးၵၢၼ် ဢၼ်ၵူႈမူႇၵူႈၸုမ်း ၶဝ်ႈႁူမ်ႈဢုပ်ႇဢူဝ်းလႆႈ ၸႅင်ႈၸႅင်ႈလႅင်းလႅင်း ပိုတ်ႇပိုတ်ႇပၢင်ႇပၢင်ႇ တိူဝ်ႉတိူဝ်ႉယမ်ယမ် လီလႆႈပဵၼ်လၢႆးၼၼ်ႉ။ မိူဝ်းလဵဝ် လၢႆးၸတ်းပၢင်ၵုမ်ၸူဝ်ႈပၢၵ်ႇပီ 21 ၵမ်းထူၼ်ႈ 2 ၼႆႉ မိူၼ်တင်းဝႃႈ ၸိူဝ်းလႂ်ၸမ်ၸႂ်ၵေႃႈ ႁႂ်ႈလႆႈမႃးၶိုၼ်ႈ၊ ၸိူဝ်းလႂ်လႅပ်ႈတေဢမ်ႇဢဝ်ၵႂၢမ်း တေမႃးထတ်းသၢင်ထဵင်ထွင်ၵေႃႈ တေဢမ်ႇႁပ်ႉ မိူၼ်ၸိူင်ႉၼၼ်ဝႆႉ။

ႁၢႆႉၸႃႉသုတ်းတႄႉ မိူၼ်ၸိူင်ႉၸွမ်ပွင်ၵၢၼ်သိုၵ်း မိၼ်းဢွင်ႇလၢႆႇ လၢတ်ႈၵႂႃႇမိူဝ်ႈဝႃးၼႆႉ ယူႇတီႈၸုမ်းၸၢဝ်းၶိူဝ်း ၵမ်ႈၽွင်ႈ ယိုၼ်ႈယွၼ်းတၢင်ႇလၢတ်ႈမႃးၼႆႉ ပဵၼ်ဢၼ်ပူၼ်ႉပႅၼ် (ကိုယ်ပိုင်ပြဌာန်းခွင့်) ဢၼ်ဝႃႈ သုၼ်ႇလႆႈၸတ်းသၢင်ႈႁၢင်ႈပွင်ၼၼ်ႉၵႂႃႇယဝ်ႉ။ ၵွပ်ႈပိူဝ်ႈၶဝ်ယိုၼ်ႈယွၼ်း ပူၼ်ႉပႅၼ်ဢၼ်ၼၼ်ႉၵႂႃႇလႄႈ မိူၼ်တင်းဝႃႈႁဵတ်းႁႂ်ႈ လွင်ႈႁူမ်ႇလူမ်ႈမိူင်းႁူမ်ႈတုမ်ၼႆႉ တိူဝ်ႉသၢင်ႈၵႂႃႇ။ ပွင်ႇဝႃႈ မိူၼ်တင်းဝႃႈတေမႃးတိူဝ်ႉသၢင်ႈ ဢႃႇၼႃႇသၢင်ႈပွင်ၶွင်ၸိုင်ႈမိူင်းယဝ်ႉ၊ မၼ်းလၢတ်ႈပႃးၵႂႃႇ။

တီႈၼႆႈၼႆႉ ပေႃးဝႃႈထတ်းသၢင်တူၺ်း (ကိုယ်ပိုင်ပြဌာန်းခွင့်) ဢၼ်ဝႃႈသုၼ်ႇၸတ်းသၢင်ႈႁၢင်ႈပွင်ႁိုဝ် သုၼ်ႇတႅပ်းတတ်းမၵ်းမၼ်ႈႁင်းၶေႃၼၼ်ႉ မၼ်းဢိင်ၼိူဝ်ၼမ်ႉၸႂ်ပၢင်လူင်၊ မူႇပိူင်ပၢင်လူင်၊ ၵႂၢမ်းမၼ်ႈပၢင်လူင် 3 ၶေႃႈၼၼ်ႉသေ ၵိူတ်ႇပဵၼ်မႃး။ ပေႃးတင်းဝႃႈ ဢမ်ႇမီးသုၼ်ႇၸတ်းသၢင်ႈႁၢင်ႈပွင်ႁင်းၶေႃ၊ ဢမ်ႇမီးသုၼ်ႇ တႅပ်းတတ်းမၵ်းမၼ်ႈႁင်းၶေႃၼႆ မိူၼ်တင်းဝႃႈပိုၼ်ႉပႅတ်ႈၼမ်ႉၸႂ်ပၢင်လူင်၊ လိုမ်းပႅတ်ႈၵႂၢမ်းမၼ်ႈပၢင်လူင် ႁဝ်းၶႃႈထတ်းႁၼ်ၼင်ႇၼႆ။

ပေႃးမႃးတူၺ်းၼမ်ႉၸႂ်ပၢင်လူင် ဢၼ်ဝႃႈၼၼ်ႉ ပဵၼ်သင်?၊ ပွင်ႇဝႃႈၸၢဝ်းၶိူဝ်းၼင်ႇၵၼ် ယူႇတီႈမိူင်းၽႂ် မိူင်းမၼ်းသေ မႃးႁူမ်ႈၵၼ်သေယဝ်ႉ တေယူႇၸွမ်းၵၼ်ၵႂႃႇၵတ်းၵတ်းယဵၼ်ယဵၼ်၊ ၼႆႉပဵၼ်ၼမ်ႉၸႂ်ပၢင်လူင်။ မူႇပိူင်ပၢင်လူင်သမ်ႉပဵၼ်သင်?၊ တေတင်ႈပဵၼ်မိူင်းႁူမ်ႈတုမ်ၾႅတ်ႊၻရႄႊ ဢၼ်ၸိုၼ်ႈၸၢင်ႇၼၼ်ႉသေယဝ်ႉ ယူႇၸွမ်းၵၼ်ၵႂႃႇ။ ၼႆႉပဵၼ်မူႇပိူင်ပၢင်လူင်။ ၵႂၢမ်းမၼ်ႈပၢင်လူင်သမ်ႉ ပဵၼ်ဢီႈသင်?၊ ဢွင်ႇသၢၼ်းလႄႈပႃးတင်း ႁူဝ်ၼႃႈၸၢဝ်းၶိူဝ်းၶဝ် မီးလွင်ႈတူၵ်းလူင်း ၵိၼ်ၵႅၼ်ႇၵၼ်မႃး ၽႂ်တေဢမ်ႇလႆႈယူႇၼိူဝ် မီးတႂ်ႈၽႂ်၊ တေဝႆႉထၢၼ်ႈ ၽဵင်ႇပဵင်းၵၼ် မိူၼ်ၼင်ႇမၢၼ်ႈလႆႈၼိုင်ႈပျႃးၵေႃႈ တႆးတေလႆႈၼိုင်ႈပျႃး။ ဢဝ်လွတ်ႈလႅဝ်းသဝ်းၶေႃၸွမ်းၵၼ် ယူႇႁူမ်ႈၸွမ်းၵၼ်သေယဝ်ႉ ယူႇတီႈၸၢဝ်းၶိူဝ်းမၢၼ်ႈ သမ်ႉတေလႆႈမႃးပဵၼ်ယႂ်ႇ၊ မိူၼ်ၼင်ႇတၢင်ႇၸၢဝ်းၶိူဝ်းသမ်ႉ တေလႆႈပဵၼ်မိူၼ်ၼင်ႇၶီႈၶႃႈ ဢၼ်ဝႃႈၼၼ်ႉၵေႃႈ တေဢမ်ႇႁႂ်ႈလႆႈမီး။ ဢဝ်ၸဵမ်ၸိူဝ်းၼႆႉၵႂႃႇ ပဵၼ်ၵတိၵဝုတ်ႉ ၵႂၢမ်းမၼ်ႈပၢင်လူင်။

ၸင်ႇဝႃႈၼမ်ႉၸႂ်ပၢင်လူင်ၵေႃႈ ဢမ်ႇၼပ်ႉယမ်၊ မူႇပိူင်ပၢင်လူင်ၵေႃႈ တေလိုမ်းပႅတ်ႈ၊ ၵတိၵႂၢမ်းမၼ်ႈပၢင်လူင်ၵေႃႈ သမ်ႉတေဢမ်ႇႁဵတ်းၸွမ်းသေယဝ်ႉ တေၼႄးသႂ်ႇတီႈၸၢဝ်းၶိူဝ်းၶဝ်ဝႃႈ ယိုၼ်ႈယွၼ်းပူၼ်ႉပႅၼ် (ကိုယ်ပိုင်ပြဌာန်းခွင့်)ၵႂႃႇယဝ်ႉ ဢၼ်ဝႃႈၼၼ်ႉ မိူၼ်တင်းဝႃႈ တပ်ႉမတေႃႇတပ်ႉသိုၵ်းမၢၼ်ႈယၢမ်းမိူဝ်ႈလဵဝ် ဢမ်ႇၼပ်ႉယမ်ပၢင်လူင်၊ ဢမ်ႇၼပ်ႉယမ်ၼမ်ႉၸႂ်ပၢင်လူင်၊ တေပူၼ်ႉပႅၼ်ပၢင်လူင်။ ပွင်ႇဝႃႈ တေထိုမ်ႈပႅတ်ႈ ၵႂၢမ်းမၼ်ႈပၢင်လူင်၊ ၵတိပၢင်လူင်၊ မူႇပိူင်ပၢင်လူင် ဢၼ်လူင်းလၢႆးမိုဝ်းၵၼ်မႃးမိူဝ်ႈပီ 1947 ၼၼ်ႉယဝ်ႉ။

ပေႃးပဵၼ်ၸိူင်ႉၼႆ ယူႇတီႈၼၢင်းဢွင်ႇသၢၼ်းၸုၵျီႇၵေႃႈ လႆႈလၢတ်ႈပၼ်ၵႂၢမ်းမၼ်ႈဝႆႉဝႃႈ လၢႆးတၢင်း NCA မိူဝ်ႈလဵဝ်ၼႆႉ ဢမ်ႇၸႂ်ႈဝႃႈႁႂ်ႈမၼ်းၶၢမ်ႈပူၼ်ႉပႅတ်ႈ ပၢင်လူင် 1947 ၊ လႆႈလၢတ်ႈဝႆႉယူႇသေတႃႉၵေႃႈ မိူဝ်ႈလဵဝ်လၢႆးႁဵတ်းတႄႉပိူင်ႈႁွႆႈၵႂႃႇယဝ်ႉ။ ၵွပ်ႈပိူဝ်ႈၸိူင်ႉၼႆလႄႈ ယူႇတီႈႁဝ်းၶႃႈ တေၸၢင်ႈမုင်ႈမွင်းဝႃႈ ၸုမ်းၸၢဝ်းၶိူဝ်းၸိူဝ်းဢၼ်တေဢုပ်ႇၵုမ်ၵၢၼ်မိူင်းၵၼ်ၼႆႉ တႄႇဢဝ်မိူဝ်ႈၼႆႉၵႂႃႇမိူဝ်းၼႃႈ တေမီးတၢင်း ၸမ်ၸႂ်ၵၼ်မႃးႁႃႉ၊ တေႁၼ်လွင်ႈတႅၵ်ႇငၢၵ်ႈၵၼ်ၵူၺ်းႁိုဝ်ၼႆၼၼ်ႉ တေလႆႈပႂ်ႉတူၺ်းထႅင်ႈယူႇ။ 

တႃႇတေမီးသၢႆငၢႆငဝ်းလၢႆးလီမႃး ဢၼ်ဝႃႈၼၼ်ႉၵေႃႈ သွင်ပႃႈသွင်ၾၢႆႇ ပေႃးပႆႇမူၼ်ႉမႄးလၢႆးဢုပ်ႇဢူဝ်းၵၼ် လႄႈသင်၊ လၢႆးၶဝ်ႈႁႃၵၼ်လႄႈသင်၊ လၢႆးတၢင်းပၢင်ၵုမ်လႄႈသင် ၸိူဝ်းၼႆႉတင်းမူတ်းတင်းသဵင်ႈတႄႉ ဢမ်ႇႁၼ်တေမီးလွင်ႈတေၶိုပ်ႈၼႃႈၼႆ ႁဝ်းၶႃႈထတ်းႁၼ်ၼင်ႇၼႆသေ ယွၼ်းၶွတ်ႇယွတ်ႈပၢႆၵႂၢမ်းတီႈၼႆႈၶႃႈ။ 

ႁိုၼ်း ၵႃယၢင်း (25/05/2017)