ၾႆးမႆႈႁိူၼ်း လုင်းၵူတ်ႈၸွႆႉလႄႈ ပႃႈဢူၺ်ႈ ၼႂ်းဢိူင်ႇမိူင်းၼုင်း ၸႄႈဝဵင်းမိူင်းၶၢၵ်ႇ ၵူၼ်းထဝ်ႈယိင်းၵေႃႉၼိုင်ႈ ႁိမ်းႁိူၼ်းၾႆးမႆႈၼၼ်ႉ လူႉတၢႆယွၼ်ႉပၢႆႈၾႆး။


ဝၼ်းတီႈ 19/05/2017 ယၢမ်းၵၢင်ဝၼ်း 12:00 မူင်း ၾႆးမႆႈႁိူၼ်း လုင်းၵူတ်ႈၸွႆႉလႄႈ ပႃႈဢူၺ်ႈ ဝၢၼ်ႈၶမ်းၼွႆႉ ဢိူင်ႇမိူင်းၼုင်း ၸႄႈဝဵင်းမိူင်းၶၢၵ်ႇ ၸႄႈတွၼ်ႈၵဵင်းတုင် ၸိုင်ႈတႆး ပွတ်းဢွၵ်ႇၶူင်း။ ပဵၼ်ၽွင်းၸဝ်ႈႁိူၼ်း ဢမ်ႇယူႇ ႁိူၼ်းလႄႈ ၶူဝ်းၶွင်လူႉသုမ်းၸွမ်းၾႆးမူတ်း။

ၸၢႆးယီႈ ၵူၼ်းယူႇႁိမ်းၵိၼ်ၸမ် ၽူႈၸွႆႈၶႄၾႆး လၢတ်ႈဝႃႈ “ ၾႆးၼႆႉ မၼ်းတႄႇလုၵ်ႉမႆႈမႃးတီႈ လႂ်တႄႉတႄႉ ၽွင်းၾႆးမႆႈၼၼ်ႉ ဢမ်ႇမီးၽႂ်ယူႇႁိူၼ်းယေးသေၵေႃႉ၊ ၸဝ်ႈႁိူၼ်း ၵႂႃႇႁဵတ်းၵၢၼ်မူတ်း၊ ၶူဝ်းၶွင်ၼႂ်းႁိူၼ်းယေးတႄႉ ဢမ်ႇတၼ်းလႆႈသင်သေဢိတ်း။ ၵူၼ်းဝၢၼ်ႈဢၼ်ႁဵတ်းၵၢၼ် ယူႇၼႂ်းတူင်ႈၼႃးၼၼ်ႉ မုင်ႈႁၼ်ၾႆးမႆႈႁိူၼ်းလႄႈ၊ ၸင်ႇဢွၼ်ၵၼ်လႅၼ်ႈမႃး ႁူမ်ႈၵၼ်ၸွႆႈၵၼ်ၶႄၾႆး၊ လူတ်ႉၶႄၾႆးတႄႉၾႆးမွတ်ႇယဝ်ႉ ၸင်ႇႁွတ်ႈမႃး ႁူတ်းၸွႆႈ” ဝႃႈၼႆ။


ၽွင်းၾႆးတိုၵ်ႉမႆႈယူႇၼၼ်ႉ မႄႈထဝ်ႈလႃႈ ဢႃယု 75 ပီ ၵူၼ်းယူႇႁိမ်းၵိၼ်ၸမ် ႁိပ်ႈၼႅတ်ႈၵဵပ်းၶူဝ်းသေ တေပၢႆႈၾႆး၊ ၵူၺ်းၵႃႈ ပဵၼ်လူမ်း လူမ်ႉလူင်းႁူဝ်ၽတ်ႉပိုၼ်ႉသေ လူႉတၢႆပႅတ်ႈ။ ၵူၺ်းၵႃႈ ၶၢပ်ႈတူဝ် မႄႈထဝ်ႈလႃႈတႄႉ ၵူၼ်း ဝၢၼ်ႈၶမ်းၼွႆႉ တေဢွၼ်ၵၼ်လုမ်းလႃး ပူၼ်ႉၶၢပ်ႈတူဝ် ၼႂ်းဝၼ်းမိူဝ်ႈၼႆႉ ဝၼ်းတီႈ 19/05/2017 ၼႆႉ ၵမ်းလဵဝ် ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈႁိူၼ်းၵေႃႈ လၢတ်ႈဝႃႈ မိူဝ်ႈယၢမ်းၵၢင်ၼႂ်ၸဝ်ႉၼႆႉ လႆႈတူမ်ႈႁုင်ၶဝ်ႈၽၵ်းသေ၊ ၵွၼ်ႇ တေၵႂႃႇႁဵတ်းၵၢၼ်ၼၼ်ႉ လႆႈႁူတ်းၾႆးမွတ်ႇယဝ်ႉ ၸင်ႇဢွၵ်ႇၵႂႃႇႁဵတ်းၵၢၼ် ဝႃႈၼႆ။


ႁိူၼ်းလုင်းၵူတ်ႈၸွႆႉတင်း ပႃႈဢူၺ်ႈၼႆႉ ပဵၼ်ႁိူၼ်းမႆႉ တိၼ်သုင်၊ ဝၢၼ်ႈၶမ်းၼွႆႉၼႆႉ မီးလင်ႁိူၼ်းၵူၼ်း 24 လင်။