ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် ႁိုဝ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ဢၼ်ၸတ်းႁဵတ်း တီႈၼေႇပျီႇတေႃႇ၊ ဝၼ်းလိုၼ်းသုတ်း ဝၼ်းတီႈ 29/05/2017 ယၢမ်းၵၢင်ၼႂ် 11:00 မူင်းၼၼ်ႉ တူဝ်တႅၼ်းတင်းလၢႆ လႆႈၸႂ်လူင်းလၢႆးမိုဝ်း လိၵ်ႈၵိၼ်ၵႅၼ်ႇ လိၵ်ႈႁူမ်ႈမၢႆမိူင်းႁူမ်ႈတုမ်။


ၼႂ်းလိၵ်ႈႁူမ်ႈမၢႆမိူင်းႁူမ်ႈတုမ် တွၼ်ႈ 1 ၼၼ်ႉ မီးၶေႃႈလႆႈၸႂ် ၵဵဝ်ႇၵပ်းၵၢၼ်မိူင်း 12 ၶေႃႈ၊ ပၢႆးမၢၵ်ႈမီး 11 ၶေႃႈ၊ ပၢႆးပိူင်ၵူၼ်း 4 ၶေႃႈ၊ ၵၢၼ်ၸႂ်ႉတိုဝ်းတီႈလိၼ်လႄႈၶူဝ်းႁႄႈၶူဝ်းတိုၼ်း 10 ၶေႃႈ။ တွၼ်ႈၵၼ် ၵဵဝ်ႇၵပ်းလွင်ႈ ၾၢႆႇႁူမ်ႇလူမ်ႈတႄႉ ယွၼ်ႉပိူဝ်ႈဢုပ်ႇထဵင်ၵၼ် ဢမ်ႇယဝ်ႉဢမ်ႇတူဝ်ႈလႄႈ ပႆႇမီးၶေႃႈလႆႈၸႂ်၊ တေဢုပ်ႇဢူဝ်းၵၼ်ထႅင်ႈတၢင်းၼႃႈ- ၼႆယဝ်ႉ။

ၶေႃႈလႆႈၸႂ်ၸိူဝ်းၼၼ်ႉ ပဵၼ်တူဝ်တႅၼ်းမုၵ်ႉမူႇၸုမ်း ဢၼ်ၶွတ်ႇၽွတ်ႈဝႆႉ မိူၼ်ၼင်ႇတူဝ်တႅၼ်းၸုမ်းယိပ်း ၵွင်ႈၵၢင်ႇၸၢဝ်းၶိူဝ်း ပတူဝ်ႇၸေႃးၵွႆႇထူးဝိၼ်း၊ တူဝ်တႅၼ်းၾၢႆႇလူင်ပွင်ၸိုင်ႈ ၻွၵ်ႊတိူဝ်ႊတိၼ်ႇမဵဝ်းဝိၼ်း၊ တူဝ်တႅၼ်းၾၢႆႇပၢႆးၵၢၼ်မိူင်း ဢူးတူႉဝူၺ်ႇ၊ တူဝ်တႅၼ်းၾၢႆႇသၽႃး ဢူးထုၼ်းထုၼ်းႁဵင်ႇ၊ တူဝ်တႅၼ်းၾၢႆႇတပ်ႉသိုၵ်းသမ်ႉ ၸွမ်သိုၵ်းတိၼ်ႇမွင်ႇဝိၼ်း ၶဝ်ၸိူဝ်းၼႆႉလူင်းလၢႆးမိုဝ်း- ၼႆယဝ်ႉ။


မိူၼ်ၼင်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢၼ်ယၢမ်ႈဢွၵ်ႇၶေႃႈပိုၼ်ၽၢဝ်ႇဝႃႈ- ယွၼ်ႉပိူဝ်ႈဝႃႈပၢင်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ပႆႇလႆႈၸတ်းႁဵတ်းလႄႈ တေဢမ်ႇလူင်းလၢႆးမိုဝ်း ၶေႃႈလႆႈၸႂ်သင် သေၸိူဝ်ႉသေပိူင် ဝႃႈၼႆသေတႃႉၵေႃႈ ၶဝ်ႈပႃးၵႂႃႇၸွမ်းၼႂ်းၸုမ်းၸိူဝ်း ယိပ်းၵွင်ႈၵၢင်ႇ ဢၼ်လူင်းလၢႆးမိုဝ်းၼၼ်ႉဝႆႉ-ၼႆယဝ်ႉ။


ၼႂ်းလိၵ်ႈႁူမ်ႈမၢႆမိူင်းႁူမ်ႈတုမ် 12 ၶေႃႈၼၼ်ႉ ၵဵဝ်ႇၵပ်းၵၢၼ်မိူင်းတွၼ်ႈ 1 ၼၼ်ႉ ၶဝ်ႈပႃးဝႆႉမိူၼ်ၼင်ႇ 1.လွင်ႈဢႃႇၼႃႇၸိၵ်းၸွမ်ဝၢၼ်ႈမိူင်း။ 2. လွင်ႈၸႂ်ႉတိုဝ်းဢႃႇၼႃႇၸိၵ်းၸွမ်ဝၢၼ်ႈမိူင်း။ 3.လွင်ႈသုၼ်ႇလႆႈၽဵင်ႇပဵင်း။ 4.လွင်ႈၵေႃႇတင်ႈမိူင်းႁူမ်ႈတုမ်ၾႅတ်ႊၻရႄႊ။ 5.လွင်ႈလွၵ်းပိူင်ၻီႊမူဝ်ႊၶရေႊသီႊ ဢၼ်မီးပႃႇတီႇလၢၵ်ႇလၢႆ၊ ၸိူဝ်းၼႆႉတင်းမူတ်း 5 ၶေႃႈ။


ၵဵဝ်ႇၵပ်းဢႃႇၼႃႇၸိၵ်းၸွမ်ဝၢၼ်ႈမိူင်းၼၼ်ႉ  တၵ်းတေလႆႈလုၵ်ႉတီႈၵူၼ်းမိူင်း ၼႂ်းၸိုင်ႈမိူင်းႁူမ်ႈတုမ် ပတ်းပိုၼ်ႉမႃး။ ၵဵဝ်ႇၵပ်းလွင်ႈၵၢၼ်မၢၵ်ႈမီးသမ်ႉ လွင်ႈၵူၼ်းၵေႃႉလဵဝ်ၵေႃႈယဝ်ႉ၊ ပဵၼ်ၵူၼ်းၼႂ်းမုၵ်ႉမူႇၸုမ်း ၵေႃႈယဝ်ႉ၊ ယူႇတီႈသုၼ်ႇတူဝ်ၵေႃႈလီ၊ သုၼ်ႇၸုမ်းၵေႃႈလီ ၵုမ်းၵမ်ပၢႆးမၢၵ်ႈမီးဝႆႉၵေႃႉလဵဝ်ၸုမ်းလဵဝ်ၸိူဝ်းၼႆႉ ၼင်ႇႁိုဝ်တေဢမ်ႇမီးလွင်ႈတုမ်ႉတိူဝ်ႉ ၶူဝ်းၶွင်ၵူၼ်းဝၢၼ်ႈၵူၼ်းမိူင်းၼၼ်ႉ တေဢဝ်ပၵ်းပိူင်မၢႆမီႈၸိူင်ႉႁိုဝ်ၵႅတ်ႇၵင်ႈ။ လွင်ႈၼႆႉမီးၶေႃႈလႆႈၸႂ် 11 ၶေႃႈ။


တွၼ်ႈပၢႆးပိူင်ၵူၼ်းၼၼ်ႉ ၵဵဝ်ႇၵပ်းလွင်ႈယိပ်းၵွင်ႈၵၢင်ႇ၊ လွင်ႈယႃႈမဝ်းၵမ်၊ ပိူဝ်ႈတႃႇၵႄႈလိတ်ႈပၼ်ႁႃယႃႈမဝ်းၵမ် ၸိူဝ်းၼႆႉ တင်းမူတ်း 4 ၶေႃႈ။ တွၼ်ႈၵၢၼ်တီႈလိၼ်လႄႈၶူဝ်းႁႄႈၶူဝ်းတိုၼ်းသမ်ႉ လွင်ႈၸတ်းၽႅၼ်ၵၢၼ်ၸႂ်ႉသွႆ တီႈလိၼ်၊ ထုၵ်ႇလီတမ်းၽႅၼ်ၸိူင်ႉႁိုဝ်ၸိူဝ်းၼႆႉ တင်းမူတ်းမီးၶေႃႈလႆႈၸႂ် 10 ၶေႃႈ။


ၵဵဝ်ႇၵပ်းလွင်ႈ တိုၼ်းတေဢမ်ႇလႆႈၽၢတ်ႇဢွၵ်ႇ (မိူင်းႁူမ်ႈတုမ်)၊ လွင်ႈဝၢၼ်ႈမိူင်းၼိုင်ႈလုၵ်ႈ တပ်ႉသိုၵ်းဢၼ်လဵဝ် ၸိူဝ်းၼႆႉ ယွၼ်ႉပိူဝ်ႈဢုပ်ႇဢူဝ်းၵၼ် တွပ်ႇထဵင်ၵၼ်ဢမ်ႇယဝ်ႉဢမ်ႇတူဝ်ႈလႄႈ ဢမ်ႇမီးၶေႃႈတႅပ်းတတ်း၊ တေဢုပ်ႇၵုမ်ထႅင်ႈၼႂ်းပၢင်ၵုမ် ဢၼ်တေၸတ်းႁဵတ်းထႅင်ႈတၢင်းၼႃႈ- ၼႆယဝ်ႉ။


မိူဝ်ႈၽွင်းလူင်းလၢႆးမိုဝ်းၼၼ်ႉ ယူႇတီႈၼၢင်းဢွင်ႇသၢၼ်းၸုၵျီႇၵေႃႈ မွၵ်ႇလၢတ်ႈၶေႃႈၵႂၢမ်း ယိၼ်းၸူမ်းၶွပ်ႈၸႂ် ဝႃႈ-  "ဢၼ်လူင်းလၢႆးမိုဝ်းၵၼ်ၼႂ်းဝၼ်းမိူဝ်ႈၼႆႉၼႆႉ ပဵၼ်ၵၢၼ်ၵမ်ႉထႅမ်ပိူဝ်ႈတႃႇ သၢင်ႈလွင်ႈမႄးလီၵၼ် ၼႂ်းၸိူဝ်ႉၸၢတ်ႈ၊ ပိူဝ်ႈတႃႇတေပႆၵႂႃႇၸွမ်းသဵၼ်ႈတၢင်းလူင် ၵၢၼ်ၵေႃႇတင်ႈမိူင်းႁူမ်ႈတုမ်ၾႅတ်ႊၻရႄႊ ၻီႊမူဝ်ႊၶရေႊသီႊ လူၺ်းလၢႆးၵတ်းၵတ်းယဵၼ်ယဵၼ်၊ ပဵၼ်ယၢင်ႈလူင်ဢၼ်ပႆၵႂႃႇၼိူဝ်သဵၼ်ႈတၢင်းလူင်ယဝ်ႉ။ ၵူႈၵေႃႉၼႆႉ မီးလွင်ႈၸဵပ်းသႅပ်ႇမႃးႁင်းၽႂ်ႁင်းမၼ်းလႄႈ တႃႇတေယူတ်းယႃလႆႈလွင်ႈၸဵပ်းသႅပ်ႇၸိူဝ်းၼၼ်ႉသေ ႁႂ်ႈပေႃးဢမ်ႇထိုင်ၵႂႃႇၸူးၸူဝ်ႈလုၵ်ႈပၢၼ်လၢၼ်ႁဝ်း ဢၼ်တေမႃးတၢင်းၼွင်ႈတၢင်းလင်ၼၼ်ႉ မၼ်းႁႃယႃႈယႃမၼ်းယၢပ်ႇတႄႉတႄႉ၊ ဢၼ်ၼႆႉပဵၼ်ဢၼ်လီတီႈသုတ်းယဝ်ႉ"- ဝႃႈၼႆ။


ပၢင်ၵုမ်လူင်ငမ်းယဵၼ် မိူင်းႁူမ်ႈတုမ်ႁိုဝ် ပၢင်ၵုမ်လူင်ႁူဝ်ပၢၵ်ႇပီ 21 ၼႆႉ တႅပ်းတတ်းဝႆႉဝႃႈ တေႁဵတ်းႁူၵ်းလိူၼ် ၼိုင်ႈပွၵ်ႈ။ ၵွပ်ႈၼၼ် ၼႂ်းၶၢဝ်းတၢင်းႁူၵ်းလိူၼ်တၢင်းၼႃႈၵေႃႈ တေၸၢင်ႈၸတ်းႁဵတ်းထႅင်ႈၵမ်းထူၼ်ႈ 3 ။ ၵူၺ်းၵႃႈ ဢၼ်တႅပ်းတတ်းပူၼ်ႉမႃး မိူဝ်ႈႁဵတ်းပၢင်ၵုမ်လူင်ၵမ်းထူၼ်ႈ 1 ၽွင်းႁူဝ်လိူၼ်သႅပ်ႊထႅမ်ၿိူဝ်ႊ (2016)ၼၼ်ႉဝႃႈ တေၸတ်းႁဵတ်းထႅင်ႈၼႂ်းလိူၼ်ၾႅပ်ႊၿိဝ်ႊရီႊ (2017)ၼၼ်ႉ ယွၼ်ႉပိူဝ်ႈဢမ်ႇပဵၼ်ႁဵတ်းလႄႈ တိုၵ်ႉလႆႈႁဵတ်း ဝၼ်းတီႈ 24-29/05/2017 ပွၵ်ႈၵမ်းၼႆႉ။