ႁူင်းႁဵၼ်းဝတ်ႉ ဝတ်ႉဝၢၼ်ႈငႅၼ်း ပိုတ်ႇႁပ်ႉသဵၼ်ႈသၢႆမၢႆ လုၵ်ႈဢွၼ်ႇ ၸိူဝ်းတေၶဝ်ႈႁဵၼ်း ၼႂ်းႁူင်းႁဵၼ်းဝတ်ႉ (ႁူင်း ႁဵၼ်းၵျွင်းမုၼ်ၸဝ်ႈ) တီႈဝၢၼ်ႈငႅၼ်း တႄႇဢဝ်ႁၢင်လိူၼ်မေႊၼႆႉမႃး ယူႇတီႈၾၢႆႇၶွမ်ႊမတီႊႁူင်းႁဵၼ်းလၢတ်ႈ။


ဝၼ်းတီႈ 05/06/2017 ႁူဝ်လိူၼ်ၵျႃၼ်ႊၼႆႉ ႁူင်းႁဵၼ်းဝတ်ႉ “ဝတ်ႉဝၢၼ်ႈငႅၼ်း” တေပိုတ်ႇပူင်သွၼ်ပၼ် လုၵ်ႈဢွၼ်ႇ ႁဵၼ်းၵႂႃႇ တႄႇႁပ်ႉလုၵ်ႈႁဵၼ်းၸၼ်ႉငဝ်ႈထိုင်ၸၼ်ႉသီႇ တီႈႁူင်းႁဵၼ်းဝတ်ႉဝၢၼ်ႈငႅၼ်း ဢိူင်ႇၵၢတ်ႇတဝ်ႇ ၸႄႈဝဵင်း ၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၼႆယဝ်ႉ။

ၸဝ်ႈၶူးၼၼ်ႇတိသေႇၼ ၾၢႆႇၶွမ်ႊမတီႊႁူင်းႁဵၼ်း ဝတ်ႉဝၢၼ်ႈငႅၼ်း လၢတ်ႈဝႃႈ “ တေႃႈလဵဝ်ၼႆႉ လုၵ်ႈဢွၼ်ႇ ဢၼ်တေမႃးၶိုၼ်ႈႁူင်းႁဵၼ်း လႆႈႁပ်ႉသဵၼ်ႈသၢႆမၢႆဝႆႉ မီးယူႇ 60 ပၢႆယဝ်ႉ။ ယိူင်းဢၢၼ်းတႄႉ တေပိုတ်ႇ ၸၼ်ႉ ငဝ်ႈ(ၸၼ်ႉမူႇလ) ဢွၼ်တၢင်း ၶၢဝ်းတၢင်း 3-5 ပီ။


ပေႃးမီး ဢဵၼ်ႁႅင်းၶိုၼ်ႈၵႂႃႇထႅင်ႈၵေႃႈ တေပဵၼ်ၸၼ်ႉၵၢင်လႄႈ ၸၼ်ႉသုင် တေဢဝ်ၸွမ်းဢဵၼ်ႁႅင်းႁဝ်းဝႃႈ။ ၼွၵ်ႈလိူဝ်ၼၼ်ႉ လုၵ်ႈႁဵၼ်းပေႃးၶဝ်ယူႇ ၸၼ်ႉၼိုင်ႈယဝ်ႉ မႃးသိုပ်ႇၶိုၼ်ႈၸၼ်ႉသွင်ၵေႃႈလႆႈ၊ ယဝ်ႉၸၼ်ႉသၢမ်ယဝ်ႉ သိုပ်ႇၶိုၼ်ႈၸၼ်ႉသီႇၵေႃႈလႆႈ၊ တီႈႁဝ်းၵေႃႈမိူၼ်ၵၼ် သင်လုၵ်ႈဢွၼ်ႇႁဝ်း ယဝ်ႉၸၼ်ႉသီႇတီႈၼႆႈယဝ်ႉ ၵႂႃႇသိုပ်ႇၶိုၼ်ႈတၢင်ႇတီႈ တီႈႁူင်းႁဵၼ်းလူင်ပွင်ၸိုင်ႈ ၸၼ်ႉႁႃႈ ၵေႃႈလႆႈ၊ ယဝ်ႉတီႈပိူၼ်ႈသေ မႃးသိုပ်ႇၶိုၼ်ႈတီႈႁဝ်းၵေႃႈလႆႈ ယဝ်ႉတီႈႁဝ်းသေ ၵႂႃႇသိုပ်ႇၶိုၼ်ႈတီႈပိူၼ်ႈၵေႃႈလႆႈ” ဝႃႈၼႆ။


ႁူင်းႁဵၼ်း ဝတ်ႉဝၢၼ်ႈငႅၼ်းၼႆႉ ပဵၼ်ႁူင်းႁဵၼ်းဢၼ်ၶဝ်ႈပဵၼ်တၢင်းၵၢၼ်လူင်ပွင်ၸိုင်ႈလင်ၼိုင်ႈ။ ၶူးဢၼ် တေပူင် သွၼ် တင်းမူတ်းမီး 6 ၵေႃႉ။ ၵၢၼ်သွၼ် တေဢဝ်လၵ်းသုတ်ႇ  ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈသေပူင်သွၼ်ပၼ်၊ ယဝ်ႉၵေႃႈ တေၽိူမ်ႉထႅမ်သႂ်ႇထႅင်ႈ လိၵ်ႈတႆး၊ လိၵ်ႈတႆးၶိုၼ်/ လိၵ်ႈမိူင်းလႄႈ လွင်ႈၾိင်ႈငႄႈႁိတ်ႈႁွႆးတႆး ၸဵမ်ၸိူဝ်းၼႆႉ ဝႃႈၼႆ။


ထႅင်ႈပိူင်ၼိုင်ႈသမ်ႉ လွင်ႈၶိူင်ႈၸႂ်ႉ ၼႂ်းႁူင်းႁဵၼ်း မိူၼ်ၼင်ႇ ပပ်ႉတႅမ်ႈ/ဢၢၼ်ႇ၊ ၵမ်တႅမ်ႈ၊ ၵမ်ၸိုမ်း ၸိူဝ်းၼႆႉသမ်ႉ ယူႇတီႈတၢင်းၾၢႆႇႁူင်းႁဵၼ်းသေ တေၵမ်ႉထႅမ်ၸွႆႈပၼ်လုၵ်ႈႁဵၼ်း။ ႁူင်းႁဵၼ်း ဝတ်ႉဝၢၼ်ႈ ငႅၼ်းၼႆႉ ၵမ်ႉထႅမ်ပၼ် လုၵ်ႈဢွၼ်ႇႁဵၼ်း ၸိူဝ်းပေႃႈမႄႈ ဢမ်ႇပွင်ပဵၼ်လႆႈ ၸဵမ်ၸိူဝ်းၼႆႉ ဝႃႈၼႆ။


တင်ႈတႄႇဢဝ် ဝၼ်းတီႈ 21/05/2017 ႁပ်ႉလုၵ်ႈႁဵၼ်း တေႃႈထိုင် ႁူဝ်လိူၼ်ၵျႃၼ်ႊ ဝႃႈၼႆ။


ႁူင်းႁဵၼ်း ဝတ်ႉဝၢၼ်ႈငႅၼ်းၼႆႉ ပူၵ်းတင်ႈဝႆႉတီႈ ဝတ်ႉဝၢၼ်ႈငႅၼ်း ဢိူင်ႇၵၢတ်ႇတဝ်ႇ ၸဝ်ႈၶူးဢၵ်ႉၵသေၼလႄႈ ဢိၵ်ႇထႅင်ႈၽူႈယႂ်ႇၵူၼ်းလူင်လၢႆလၢႆၵေႃႉ ႁူမ်ႈၵၼ်သေ ပူၵ်းတင်ႈႁႂ်ႈလုၵ်ႈဢွၼ်ႇ ပေႃးတေလႆႈၶိုၼ်ႈႁူင်း ႁဵၼ်းဢၼ် ပႃးလိၵ်ႈတႆး/ မိူင်းသေ ပဵၼ်ႁူင်းႁဵၼ်းၵွင်ႉသၢၼ်လႆႈႁူင်းႁဵၼ်းလူင်ပွင်ၸိုင်ႈ။ ႁူင်းႁဵၼ်းၼႆႉ ၵေႃႇသၢင်ႈမႃး ပူၼ်ႉမႃး မိူဝ်ႈလိူၼ်ၵမ် ပီ 2017 ၼႆႉ ဝႃႈၼႆ။