ၵူၼ်းမိူင်း ၼႂ်းၸႄႈဝဵင်းၼမ်ႉတူႈ ပၢႆႈၽေးသိုၵ်းယူႇသဝ်းဝႆႉတီႈ ပၢင်သဝ်းၵူၼ်းပၢႆႈၽေး 5 တီႈ ၼႂ်းၸႄႈဝဵင်းၼမ်ႉတူႈ  ႁူဝ်ၵူၼ်းတင်းမူတ်း 681 ၵေႃႉ။


ပူၼ်ႉမႃး ဝၼ်းတီႈ 11/05/2017 ၵူၼ်းဝၢၼ်ႈပၢင်ဝူဝ်း၊ ဝၢၼ်ႈမႅင်းသေႃႉ၊ ဝၢၼ်ႈသၢႆးၶၢဝ်၊ ဝၢၼ်ႈၼမ်ႉၵၢၼ်ႇ ဝၢၼ်ႈႁၢၼ်ႇလႅင်၊ ဝၢၼ်ႈပၢင်မၢၵ်ႇၶိူဝ်၊ ဝၢၼ်ႈၵုင်းသႃႇလႄႈ ဝၢၼ်ႈပိင်းၺွင်း ၼႂ်းဢိူင်ႇသၢႆးၶၢဝ် ၸႄႈဝဵင်းၼမ်ႉတူႈ ဢွၼ်ၵၼ်ပၢႆႈၽေးမႃးသွၼ်ယူႇ တီႈဝတ်ႉဝိႁၢရ်ၶမ်းမုင်ႈသႃႇ (သူၺ်ႇမိၼ်ႇတႃႇ) ၼႂ်းဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။ တေႃႈလဵဝ် သဵၼ်ႈသၢႆမၢႆ ၵူၼ်းမိူင်းပၢႆႈၽေးသိုၵ်းဢၼ်ထိုင်မႃးထႅင်ႈ မီးလင်ႁိူၼ်း 32 လင်၊ ႁူဝ်ၵူၼ်း 147 ၵေႃႉ။ ယွၼ်ႉပၢင်တိုၵ်း တပ်ႉသိုၵ်း လူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA။

လုင်းၸၢႆးပၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇၸွႆႈထႅမ်ၵူၼ်းပၢႆႈၽေး ၸႄႈဝဵင်းၼမ်ႉတူႈ လၢတ်ႈဝႃႈ “ ပၢင်တိုၵ်းမၢၼ်ႈတင်းသိုၵ်းတဢၢင်းတႄႉ ၶဝ်ပဵၼ်ၵၼ်မႃးပီယၢဝ်းၶၢဝ်းႁိုင်ယဝ်ႉ။ ၵူၼ်းပၢႆႈၽေးၵေႃႈ ဢမ်ႇၸၢင်ႈပွၵ်ႈႁိူၼ်းၶိုၼ်း။ ယူႇတီႈႁဝ်းၶႃႈတုၵ်းယွၼ်းတီႈၸုမ်း RCSS/SSA ႁဝ်း ပေႃးဝႃႈတေဢမ်ႇ ဢၢၼ်းပၵ်းပၢင်သဝ်းသေ ႁႄႉၵင်ႈပၼ်ၵူၼ်းမိူင်းၸိုင် တႃႉဢမ်ႇလူဝ်ႇၶိုၼ်ႈမႃးတၢင်းၼႆႉ။ ပေႃးဝႃႈၶိုၼ်ႈမႃးပၵ်း ပၢင်သဝ်းယူႇဝႆႉတႃႇသေႇ၊ ယႃႇပေထွႆၵႂႃႇၶိုၼ်း ႁဝ်းၶႃႈၵူၼ်းမိူင်းတႄႉ တုၵ်းယွၼ်းၼင်ႇၼႆ။ ၶိုၼ်ႈမႃးတိုၵ်းသေ ဢမ်ႇပၵ်းယူႇဝႆႉလႆႈသေ ၶိုၼ်းထွၼ်ဢွၵ်ႇၶိုၼ်း ဝၢႆးမႃးၵူၼ်းမိူင်းဢၼ်ယူႇၾၢႆႇလင် ထူပ်းၺႃးတၢင်းယၢပ်ႇ ၶႃႈဢိူဝ်ႈ။ ၵွပ်ႈပိူဝ်ႈၸိူင်ႉၼႆ သင်ပဵၼ်လႆႈ ပေႃးၶႂ်ႈဢဝ်ၼႃႈတီႈ တိုၵ်းႁႂ်ႈပေႉ ပေႃးပေႉယဝ်ႉ ၶိုၼ်းၵႅတ်ႇပၼ် ယႃႇႁူၼ်” ဝႃႈၼႆ။


တေႃႈလဵဝ် ၵူၼ်းပၢႆႈၽေးသိုၵ်းဢၼ်မႃးယူႇသဝ်းဝႆႉတီႈ ၸႄႈဝဵင်းၼမ်ႉတူႈၼႆႉ တင်းမူတ်း မီး 5 တီႈ မိူၼ်ၼင်ႇ 1) တီႈဝၢၼ်ႈၵိဝ်ႇသေႃႉ လင်းႁိူၼ်းမီး 60 လင် ႁူဝ်ၵူၼ်း ၽူႈၸၢႆး 125 ၵေႃႉ၊ ယိင်း 127 ၵေႃႉ ႁူမ်ႈ 252 ၵေႃႉ။ 2) ၵျွင်းၶရိတ်ႉ လီႇသူး ပွၵ်ႉ 8 လင်ႁိူၼ်းမီး 23 လင်၊ ၸၢႆး 47 ၵေႃႉ၊ ယိင်း 50 ၵေႃႉ ႁူမ်ႈ 97 ၵေႃႉ။ 3) ၵျွင်းၶရိတ်ႉ (K.B.C 1 ) ၶၢင် လင်ႁိူၼ်း 36 လင်၊ ၸၢႆး 72 ၵေႃႉ၊ ယိင်း 88 ၵေႃႉ ႁူမ်ႈ 160 ၵေႃႉ။ 4) ၵျွင်းၶရိတ်ႉ(K.B.C 2) ၶၢင် လင်ႁိူၼ်းမီး 7 လင်၊ ၽူႈၸၢႆး 9 ၵေႃႉ၊ ၽူႈယိင်း 16 ၵေႃႉ ႁူမ်ႈ 25 ၵေႃႉ ပၢင်သဝ်းၵူၼ်းပၢႆႈၽေးသိုၵ်း 4 တီႈၼႆႉ ပဵၼ်ပီႈၼွင်ႉၼႂ်းၸႄႈဝဵင်းမၢၼ်ႈတူင်ႈ ဢွၼ်ၵၼ်ပၢႆႈၽေးမႃး မိူဝ်ႈပီ 2016 လိူၼ်ၵျႃၼ်ႊတင်း လိူၼ်ၵျူႊလၢႆႊ ၸဵမ်ၸိူဝ်းၼႆႉ။


တီႈဝတ်ႉဝိႁၢရ် ၶမ်းမုင်ႈသႃႇသမ်ႉ ပီႈၼွင်ႉၵူၼ်းမိူင်း ၼႂ်းဢိူင်ႇသၢႆးၶၢဝ် တိုၵ်ႉပၢႆႈၽေးသိုၵ်းမႃးယူႇ ၼႂ်းႁူဝ်လိူၼ်မေႊပီ 2017 ၼႆႉ ဝႃႈၼႆ။


လုင်းၸၢႆးပၺၢၼ်ႇ လၢတ်ႈဝႃႈ လွင်ႈၶဝ်ႈၼမ်ႉတင်းၵိၼ် တႃႇၵူၼ်းပၢႆႈၽေးတႄႉ တေႃႈလဵဝ် မီးပီႈၼွင်ႉ ၸုမ်းတူင်ႉ ၼိုင်တူင်ႇဝူင်း တီႈၸမ်/ ၵႆဢွၼ်ၵၼ် မႃးၸွႆႈၵမ်ႉထႅမ်ပၼ်ယူႇ။ သင်ဝႃႈ တႃႇၶၢဝ်းယၢဝ်းတႄႉ လွင်ႈ လဵင်ႉလူ တေဢမ်ႇလႅပ်ႈၵုမ်ႇ တေယၢပ်ႇၽိုတ်ႇယူႇ။ ဢၼ်ပီႈၼွင်ႉၵူၼ်းမိူင်းပၢႆႈၽေးမႃးတၢင်း ၸႄႈဝဵင်းမၢၼ်ႈတူင်ႈၼၼ်ႉ ယူႇတီႈႁဝ်းၶဝ် လႆႈႁၢင်ႈႁႅၼ်းပၼ်တႄႉတႄႉဝႃႈဝႃႈ လႆႈၸွႆႈၵမ်ႉထႅမ်ပၼ် ၶဝ်ႈသၢၼ်ၵူၺ်း တႃႇၽၵ်းတႄႉ ယူႇတီႈပီႈၼွင်ႉ ၵူၼ်းပၢႆႈၽေးႁဝ်း ၶိုၼ်းဢွၼ်ၵၼ်ႁႃၵိၼ်ၽႂ်ၵိၼ်မၼ်း ဝႃႈၼႆ။