သင်ၶၸဝ်ႈ ၼႂ်းၸႄႈဝဵင်းလႃႈသဵဝ်ႈ ဢွၼ်ႁူဝ်ၼမ်းၼႃႈ ပိုတ်ႇႁူင်းႁဵၼ်းထမ်ႇမ ပၼ်လုၵ်ႈဢွၼ်ႇတႆး တႃႇႁူင်းႁဵၼ်း 10 ႁူင်းႁဵၼ်း ၼႂ်းၸႄႈဝဵင်းလႃႈသဵဝ်ႈ  ဝႃႈၼႆ။


ဝၼ်းတီႈ 30/05/2017 ယၢမ်းၵၢင်ၼႂ် 9 မူင်း သင်ၶၸဝ်ႈတင်း ပေႃႈမႄႈပီႈၼွင်ႉၵူၼ်းမိူင်း ႁူမ်ႈၵၼ်သေ ပိုတ်ႇႁူင်း ႁဵၼ်းထမ်ႇမ တီႈဝတ်ႉၶိူဝ်းၼိမ်း ဢိူင်ႇမၢၼ်ႈပႅၼ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ၼင်ႇႁိုဝ် လုၵ်ႈဢွၼ်ႇတႆး ပေႃးတေမေႃၶဝ်ႈဝတ်ႉဝႃး၊ ႁႂ်ႈႁူႉလွင်ႈထမ်ႇမလႄႈ တၢင်းယၢမ်ႈလီ ၸဵမ်ၸိူဝ်းၼႆႉ ဝႃႈၼႆ။

ၸဝ်ႈၶူးထမ်ႇမထၸ ဝိႁၢရ်တေႃးယ ၽူႈၼမ်းၼႂ်း ႁူင်းႁဵၼ်းထမ်ႇမ ဝဵင်းလႃႈသဵဝ်ႈ လၢတ်ႈၼႄယိူင်း ဢၢၼ်းႁူင်း ႁဵၼ်းဝႃႈ “ ယိူင်းဢၢၼ်းဢၼ်လႆႈပိုတ်ႇႁူင်းႁဵၼ်းထမ်ႇမၼႆႉ 1) ႁႂ်ႈလုၵ်ႈဢွၼ်ႇႁဝ်း မေႃမႃးတီႈဝတ်ႉဝႃး ၼပ်ႉယမ် ရတၼႃႇသၢမ်ၸဝ်ႈ၊ 2) ႁႂ်ႈမီးတၢင်းႁူႉၼႂ်းထမ်ႇမလႄႈ တၢင်းယၢမ်ႈလီး၊ 3) ႁႂ်ႈဢဝ်ထမ်ႇမသေ ပူၵ်းပွင် ၽဝၸဝ်ႈၵဝ်ႇ၊ 4) ႁႂ်ႈမီးလွင်ႈၽွမ်ႉႁူမ်ႈ၊ 5) ႁႂ်ႈမေႃႁၵ်ႉသႃထိင်းသိမ်း ၽႃသႃ သႃသၼႃ၊ လိၵ်ႈလၢႆးလႄႈ ၾိင်ႈငႄႈၸဝ်ႈၵဝ်ႇ ၸဵမ်ၸိူဝ်းၼႆႉ” ဝႃႈၼႆ။


ႁူင်းႁဵၼ်းထမ်ႇမ တီႈဝတ်ႉၶိူဝ်းၼိမ်း လွႆၸၢင်ႉၼႆႉ တေႃႈလဵဝ် လုၵ်ႈဢွၼ်ႇဢၼ်တေမႃးၶိုၼ်ႈႁဵၼ်းသွၼ် ပၼ်သၢႆမၢႆဝႆႉ မီး 64 ၵေႃႉယဝ်ႉ။ ဝၼ်းႁပ်ႉသဵၼ်ႈသၢႆမၢႆ တႃႇလုၵ်ႈဢွၼ်ႇၶိုၼ်ႈႁူင်းႁဵၼ်းထမ်ႇမ တႄႇႁပ်ႉ ဝၼ်းတီႈ 26/05/2017- 02/06/2017၊ တေပူင်သွၼ်ၽႃသႃလိၵ်ႈတႆးၵႂႃႇ ၵူႈဝၼ်းဢႃးတိတ်ႉ၊ တေတႄႇပူင်သွၼ် လုၵ်ႈဢွၼ်ႇၵႂႃႇ လိူၼ်ၼႃႈ ဝၼ်းတီႈ 04/06/2017 ၶၢဝ်းယၢမ်း 09 မူင်း ထိုင် ဝၢႆးဝၼ်း 3 မူင်း ဝႃႈၼႆ။


ၼႂ်းၸႄႈဝဵင်းလႃႈသဵဝ်ႈ ဢၼ်ပိုတ်ႇႁူင်းႁဵၼ်းထမ်ႇမ တင်းမူတ်း မီး 10 တီႈ၊ မိူၼ်ၼင်ႇ ဝိႁၢရ်ၵၢင်မိူင်း၊ တႃႈပုင်ႇ၊ ဝတ်ႉတေႃးယ၊ ဝတ်ႉလူင်မူၼ်း၊ ဝတ်ႉမိူင်းယၢင်း၊ ဝတ်ႉၵုင်းသႃႇ၊ ဝတ်ႉပၢင်ထူဝ်ႇလိၼ်(ဝၢၼ်ႈၵဝ်ႇ)၊ ဝတ်ႉၵွင်းၵေး၊ ဝတ်ႉဢီႇၼၢႆး၊ ဝတ်ႉၶိူဝ်းၼိမ်း လွႆၸၢင်ႉ ၸဵမ်ၸိူဝ်းၼႆႉ။


လွင်ႈလႆႈပဵၼ်မႃးႁူင်းႁဵၼ်းထမ်ႇမၼႆႉ လုၵ်ႉမႃးတီႈငဝ်ႈငုၼ်းမုၵ်ႉၸုမ်းလူင် သင်ၶၸဝ်ႈၸိုင်ႈတႆး ဢွၼ်ႁူဝ်တႄႇ တင်ႈမႃး ၼင်ႇႁိုဝ်ပီႈၼွင်ႉၸၢဝ်းၶိူဝ်း ဢၼ်ယူႇၼႂ်းမိူင်းၸိုင်ႈတႆး၊ ပေႃးတေႁူႉၸၵ်းၵိူဝ်းယမ် ပုတ်ႉထၽႃသႃ ဝတ်ႉဝႃးမုၼ်ၸဝ်ႈ ပဵၼ်တီႈပိုင်ႈဢိင်သွၼ်ႁဵၼ်းတၢင်းႁူႉ-ဝႃႈၼႆ။


မိူဝ်ႈလဵဝ်ၼႆႉ ဝတ်ႉဝႃးလႄႈၵူၼ်းၼုမ်ႇ ႁၢင်ႇၵႆၵၼ်မႃး ၵူႈမိုဝ်ႉၵူႈဝၼ်းလႄႈ ၼင်ႇႁိုဝ်ပေႃး တေၽိူမ်ႉထႅမ်ပၼ်တီႈယူပ်ႈ ယွမ်းၼႆသေ ၸင်ႇသၢင်ႈမႃးႁူင်းႁဵၼ်းထမ်ႇမၼႆႉ- ဝႃႈၼႆ။


ႁူင်းႁဵၼ်းထမ်ႇမၼႆႉ ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆးပဵၼ်ငဝ်ႈသေ ၸဝ်ႈၶူးၸိူဝ်းၵႂႃႇႁဵၼ်း လိၵ်ႈတီႈ သီႇႁူဝ်ပွၵ်ႈမႃး  ၶဝ်ၸဝ်ႈပၢၵ်ႈတၢင်း-ၶဵၼ်ႇတႅမ်ႈလၵ်းသုတ်ႇၵၢၼ်ႁဵၼ်းတႄႇပူင်သွၼ်မႃး မိူဝ်ႈပီ 2014။ ယၢမ်းလဵဝ် ၶႂ်ႈတူဝ်ႈၸိုင်ႈတႆးယဝ်ႉ ဝႃႈၼႆ။