ႁူင်းပွႆႇသဵင်ႁႅင်းၵၢၼ်ယၢၼ်မိူင်း MAP – Radio “သဵင်ထႅမ်ႁႅင်းမႂ်ႇ” ပဵၼ်ငဝ်ႈၵၼ်းသေ ၸတ်းႁဵတ်းပၢင်သွၼ် ၾိုၵ်းလပ်ႉၼမ်ႉၵတ်ႉၵူၼ်းပွႆႇသဵင် ၶၢဝ်းတၢင်း 2 ဝၼ်း ဝၼ်းတီႈ 29-30/5/2017 တီႈႁူင်းႁႅမ်း AmoraTapae Hotel Chiangmai ၵဵင်းမႂ်ႇ၊ ၸိုင်ႈထႆး မီးၽူႈၸတ်းလၢႆးၵၢၼ် ၶဝ်ႈႁူမ်ႈ 20 ပၢႆ။

ပၢင်သွၼ်ဢၼ်ၸတ်းႁဵတ်းၵၢင်ၼႂ် 9 မူင်း  ထိုင်ဝၢႆးဝၼ်း 4 မူင်းၶိုင်ႈၼၼ်ႉ ပူင်သွၼ်ပၼ်လၢႆယၢင်ႇ - မိူၼ်ၼင်ႇ လၢႆးဝႆႉဝၢင်းတူဝ် မိူဝ်ႈပွႆႇသဵင်၊ လၢႆးႁႃၶေႃႈမုလ်းၶၢဝ်ႇ တႃႇပွႆႇသဵင်၊ ၶေႃႈတိုဝ်းၵမ် ၽူႈသိုဝ်ႇၶၢဝ်ႇ၊ လွင်ႈလၢတ်ႈလွင်ႈၸႃ မိူဝ်ႈပွႆႇသဵင် - ၸဵမ်ၸိူဝ်းၼႆႉ။


ၽူႈၸတ်းၵၢၼ် ႁူင်းပွႆႇသဵင်ႁႅင်းၵၢၼ်ယၢၼ်မိူင်း MAP – Radio ၸၢႆးသႅင်မိူင်း မင်းၵွၼ်း လၢတ်ႈဝႃႈ - “ၽူႈသိုဝ်ႇၶၢဝ်ႇၼႆႉ (1) သိုဝ်ႇ- မၼ်းမိူၼ်ၼင်ႇမႃ ပႂ်ႉၾၢင်ႉတိုၼ်ႇပၼ်ၵူၼ်းမိူင်း ႁူႉၸွမ်းၵူႈၸွၵ်ႉၵူႈၸဵင်ႇ။ (2) သိုဝ်ႇ -  မိူၼ်ၶူဝ်ႉမွၵ်ႇ မွပ်ႈယိုၼ်ႈယုၵ်ႉယွင်ႈ ၽူႈၵတ်ႉၶႅၼ်ႇ ၶဝ်သေၸဝ်ႈၸဝ်ႈ၊ (3) သိုဝ်ႇ - မိူၼ်ၶူးပူင်သွၼ် ၸီႉၼႄတၢင်း၊ (4) သိုဝ်ႇ - မိူၼ်ၽူႈၸၼ်ႁၢင်ႈ ႁႂ်ႈပိူၼ်ႈပေႃးႁူႉဝႃႈ ပဵၼ်ႁၢင်ႈသင်၊ (5)သိုဝ်ႇ - မိူၼ်ၶူဝ်ၵၢႆႇႁႂ်ႈမိုတ်ႈၵိုဝ်း ၵွင်ႉသၢၼ်ၵၼ်၊ ႁူႉၸၵ်းၵၼ်” - ၸဵမ်ၸိူဝ်းၼႆႉ။


ၽူႈမႃးလႅၵ်ႈလၢႆႈပၼ်တၢင်းႁူႉ ပူင်သွၼ် ပၼ်တႄႉ ၼွၵ်ႈသေ ၸၢႆးသႅင်မိူင်း မင်းၵွၼ်း ယင်းမီး ၽူႈမီးပုၼ်ႈၽွၼ်း AM 1476 ၼၢင်းၵၼူၵ်ႇရတ်း ၼၢင်းမူဝ်ၶၢဝ်ၼူၼ်း၊ ၽူႈၵွၼ်းႁွင်ႈၵၢၼ်ၾၢႆႇသိုဝ်ႇ  ၸုမ်း MAP - ၸၢႆးတုမ်ႇမွၵ်ႇႁၢၼ် ၸိူဝ်းၼႆႉ။


ၽူႈၶဝ်ႈပၢင်သွၼ် ၽူႈသိုဝ်ႇၶၢဝ်ႇၸုမ်းၶၢဝ်ႇၽူႈတွႆႇႁွၵ်ႈ၊ ၽူႈၸတ်းလၢႆးၵၢၼ် ပွႆႇသဵင်တီႈ FM 99 MhZ ၊ ဢိၵ်ႇၵူၼ်းၼုမ်ႇၽူႈသူၼ်ၸႂ် လၢႆလၢႆၵေႃႉ ၶဝ်ႈႁူမ်ႈၸွမ်း။


ၼၢင်းမူဝ်ၶၢဝ်ၼူၼ်း AM 1476 KhZ ၵဵင်းမႂ်ႇ လၢတ်ႈဝႃႈ - “ၵၢၼ်ၸႂ်ႉၽႃသႃ ၵႂၢမ်းလၢတ်ႈ ဢၼ်လႂ်ၵေႃႈယဝ်ႉ ပေႃးဝႃႈၸႂ်ႉတိုဝ်းၼႂ်းႁူင်းၵၢၼ်သိုဝ်ႇၼႆ လူဝ်ႇႁႂ်ႈမၼ်းမီးလွင်ႈထုၵ်ႇမႅၼ်ႈ ၊ ပဵၼ်ၵူၼ်းပွႆႇသဵင်ၼိုင်ႈၵေႃႉ ပွႆႇလႆႈဢမ်ႇပွႆႇလႆႈႁဝ်းလူဝ်ႇလႆႈႁူႉ၊ ဢမ်ႇၸႂ်ႉၶေႃႈၵႂၢမ်းႁုၵ်းႁၢႆႉ၊ ဢမ်ႇၸႂ်ႉၵႂၢမ်းတဵၵ်းတဵင်သီႈၵႄႉၵၼ်၊ ပေႃးတွင်ႈထၢမ်ၵူၼ်းတၢင်ႇၵေႃႉ ပေႃးၶဝ်ဢမ်ႇၶႂ်ႈလၢတ်ႈ ယႃႇတဵၵ်းၸႂ်ႉၶဝ်လၢတ်ႈ၊ ႁႂ်ႈပဵၼ်ၵၢၼ်ပၼ်တၢင်းႁူႉၵူၼ်းဝၢၼ်ႈ ၵူၼ်းမိူင်း ၵဵဝ်ႇၵပ်းလွင်ႈသိုဝ်ႇ” - ၸဵမ်ၸိူဝ်းၼႆႉ။


ၸုမ်းMAP -  Migrant Worker Association Foundation ၼႆႉ ပိူဝ်ႈတႃႇပူၵ်းပွင်၊ ၵႅတ်ႇၵင်ႇ ႁႅင်းၵၢၼ် ယၢၼ်မိူင်း ဢၼ်မႃးႁဵတ်းၵၢၼ်ၼႂ်းမိူင်းထႆး။ ၼွၵ်ႈသေ ႁူင်းပွႆႇသဵင် FM 99 Mhz တီႈၵဵင်းမႂ်ႇ၊ ယင်းမီး ႁူင်းပွႆႇသဵင် FM 102.5 Mhz တီႈဝဵင်းမႄႈသွတ်ႇ။ ၸုမ်း MAP ၼႆႉ ၵႆႉႁဵတ်းပၢင်သွၼ်ၸိူင်ႉၼႆသေ ပူၵ်းပွင်ၼမ်ႉၵတ်ႉၵူၼ်းပွႆႇသဵင် ယူႇၵူႈပီ။


ဝုၼ်းတုၺ်ႈမိူင်းလႃး/ဝၢၼ်ႈယၢင်း