ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တင်း လူင်ပွင်ၸိုင်ႈမၢၼ်ႈ ႁူမ်ႈၵၼ်ပိုတ်ႇလုမ်း ၶွမ်ႊမတီႊလူလွမ်ပႂ်ႉတူၺ်းလွင်ႈငမ်းယဵၼ် JMC-S ၸၼ်ႉၸႄႈမိူင်း တီႈၸႄႈဝဵင်းၶူဝ်လမ် ၸိုင်ႈတႆးပွတ်းၸၢၼ်း။


ဝၼ်းတီႈ 30/05/2017 တူဝ်တႅၼ်းတပ်ႉသိုၵ်း RCSS/SSA ၊ တူဝ်တႅၼ်းတပ်ႉသိုၵ်းလူင်ပွင်ၸိုင်ႈမၢၼ်ႈ တိူင်းသိုၵ်း ဝၼ်းဢွၵ်ႇၵၢင်(ၶူဝ်လမ်) လႄႈတူဝ်တႅၼ်းၵူၼ်းမိူင်း ၸဵမ်ၸိူဝ်းၼႆႉ ႁူမ်ႈၵၼ်ပိုတ်ႇလုမ်းလူလွမ် ပႂ်ႉတူၺ်းလွင်ႈ ငမ်းယဵၼ် ၸၼ်ႉၸႄႈမိူင်း တီႈၸႄႈဝဵင်းၶူဝ်လမ်(ၶူဝ်ၶမ်း) ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၸၢႆးသႅင်မိူင်း ၽူႈၶၢၼ်ပၢၵ်ႇ RCSS/SSA လၢတ်ႈဝႃႈ “ ဢၼ်ၼႆႉတႄႉ လုၵ်ႉတီႈ ၶေႃႈတူၵ်းလူင်း NCA  မႃး၊ ဝၢႆးမႃး ၸင်ႇၶွတ်ႇၽွတ်ႈ မိူၼ်ၼင်ႇ JMC၊ UPDJC ဢၼ်ဢုပ်ႇဢူဝ်းၵၢၼ်မိူင်းလႄႈသင်၊  ယဝ်ႉၵေႃႈ တွၼ်ႈတႃႇတေ လူလွမ် တူၺ်း ၵၢၼ်ငမ်းယဵၼ်၊ ၸုမ်းယိပ်းၵွင်ႈၵၢင်ႇ ၸိူဝ်းၼႆႉ။ တေမီး JMC ၶွတ်ႇၽွတ်ႈဝႆႉ ဢၼ်ၼိုင်ႈ၊ ဢၼ်ၼၼ်ႉ တေမီးဝႃႈ ၸၼ်ႉမိူင်းႁူမ်ႈတုမ်၊ ၸၼ်ႉၸႄႈမိူင်းလႄႈ ၸၼ်ႉပိုၼ်ႉတီႈ၊ ဢၼ်လႆႈပိုတ်ႇ လုမ်း ၵႂႃႇၼႆႉ ပဵၼ်ၸၼ်ႉၸႄႈမိူင်း JMC-S။ မိူဝ်ႈဢွၼ်တၢင်းတႄႉၵေႃႈ လုမ်းၾၢႆႇႁဝ်းၶႃႈ မီးဝႆႉတီႈတူၼ်ႈတီး။ ၵမ်းၼႆႉတႄႉ ႁဝ်းၶႃႈႁူမ်ႈၵၼ်သေပိုတ်ႇ ပႃးၾၢႆႇတပ်ႉသိုၵ်းမၢၼ်ႈ တင်းၾၢႆႇလူင်ပွင်ၸိုင်ႈ၊ ပႃးတင်းၸုမ်းႁဝ်းလႄႈ တူဝ်တႅၼ်းၵူၼ်းမိူင်း။ လုမ်းၼႆႉ ႁဝ်းႁူမ်ႈၵၼ်သေပိုတ်ႇ ယွၼ်ႉဝႃႈ တႃႇတေလူလွမ်ပႂ်ႉတူၺ်း လွင်ႈငမ်းယဵၼ် ၸွမ်းၵၼ်” ဝႃႈၼႆ။


ဝၢႆးသေ ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA လူင်းလၢႆးမိုဝ်းလိၵ်ႈႁူမ်ႈမၢႆ ၵိုတ်းတိုၵ်းတူဝ်ႈမိူင်း NCA  မိူဝ်း ဝၼ်းတီႈ 15/10/2015 ယဝ်ႉ ၸင်ႇႁူမ်ႈၵၼ်ၶွတ်ႇၽွတ်ႈ ၶွမ်ႊမတီႊတႃႇလူလွမ်ပႂ်ႉတူၺ်း လွင်ႈငမ်း ယဵၼ် ၸၼ်ႉမိူင်းႁူမ်ႈတုမ် ၸွမ်းၵၼ် ဝႃႈၼႆ။