ၼႂ်းၸိုင်ႈတႆးပွတ်းႁွင်ႇ  ၸႄႈဝဵင်းမိူင်းမိတ်ႈ ၸုမ်းသိုၵ်းလွႆ TNLA  တီႉဢဝ်ၵူၼ်းဝၢၼ်ႈၵႂႃႇၵေႃႉ ၼိုင်ႈ သေ တဵင်ၵႂၢမ်းၼၵ်းဝႃႈ ပေႃးဢမ်ႇဢဝ်ငိုၼ်း 70 သႅၼ်ပျႃး  မႃးလႅၵ်ႈဢဝ်တူဝ် တေၶႃႈ ႁႅမ်ပႅတ်ႈ ဝႃႈၼႆ  လႄႈ ႁဵတ်း ႁႂ်ႈၵူၼ်းမိူင်းတူၵ်းၸႂ် ၵူဝ်ႁႄ သေ ၸိူဝ်းပၢႆႈ ယၢၼ်ႁိူၼ်းယေး တီႈယူႇၵေႃႈမီး။

ဝၼ်းတီႈ 2/4/2017 ယၢမ်း 7 မူင်းၵၢင်ၶမ်ႈ သိုၵ်းလွႆ TNLA  မႃးတီႉၺွပ်း ၸၢႆးဢၢႆႈတုမ်ႇ ပဵၼ်လုၵ်ႈၸၢႆး လုင်းတေၸ/ ပႃႈမၼီ ယူႇဝၢၼ်ႈပၢတ်ႈ  ၸႄႈဝဵင်းမိူင်းမိတ်ႈ ၊ ၸုမ်းသိုၵ်းလွႆ TNLA တီႉဢဝ်တူဝ် ၸၢႆးဢၢႆႈတုမ်ႇ ၵႂုႇတၢင်း သၢႆၼမ်ႉမွင်း   ယၢၼ်ၵႆဝၢၼ်ႈပၢတ်ႈ 5  လၵ်းပၢႆ ။  သိုၵ်းလွႆ ၸီႉသင်ႇၸူး ၵူၼ်းတၢင်းႁိူၼ်းဝႃႈ ပေႃးဢမ်ႇဢဝ်ငိုၼ်း 70 သႅၼ်ပျႃး မႃးပၼ် တေႁႅမ်တၢႆပႅတ်ႈဝႃႈၼႆ။


ပေႃႈဝၢၼ်ႈမႄႈၼႃး လုင်းၸၢႆးၺုၼ်ႉမွင်ႇ ၵေႃႉလႆႈၵႂႃႇထွမ်ႇၸွမ်းၼၼ်ႉလၢတ်ႈဝႃႈ -  ႁူဝ်ၼႃႈၸုမ်း သိုၵ်းလွႆ TNLA တႃႉၵုင်းသႃႇ ဝဵင်းၼမ်ႉၶမ်း  ဢၼ်မႃးၵုမ်းသိုၵ်း တၢင်းမိူင်းမိတ်ႈ ၼၼ်ႉ ၸီႉသင်ႇ တီႈၵူၼ်းဝၢၼ်ႈဝႃႈ ဝၼ်းတီႈ 4/4/2017 ယၢမ်း 11 မူင်း  ႁႂ်ႈပေႃႈ/မႄႈမၼ်း  ဢဝ်ငိုၼ်းမႃးထုတ်ႇတူဝ် ၸၢႆးဢၢႆႈတုမ်ႇ  7,000,000  (ၸဵတ်းသိပ်း သႅၼ်ပျႃး) ပေႃးထိုင်ၶၢဝ်းယ၊မ်းလၢတ်ႈၵၼ်ဝႆႉ သေ တူဝ်ငိုၼ်းဢမ်ႇႁွတ်ႈၸိုင် တေဢၢၼ်းႁႅမ် ၸၢႆးဢၢႆႈတုမ်ႇ ပႅတ်ႈ   - ဝႃႈၼႆ။


ၸၢႆးဢၢႆႈတုမ်ႇၼႆႉမီးပီၼွင်ႉ  4 ၸၢႆး၊ ၸၢႆးလႃႉတဵင်း၊ ၸၢႆးမိၼ်ႉဢွင်ႇ၊ ၸၢႆးၶူဝ်ႇလူဝ်ႉ တင်း ၸၢႆးဢၢႆႈတုမ်ႇ ဝႃႈၼႆ။  ဢွၼ်ၼႃႈၼၼ်ႉၵေႃႈ ၸုမ်းသိုၵ်းလွႆ TNLA ယၢမ်ႈမႃးတီႉ ဢဝ် ၵူၼ်းဝၢၼ်ႈ ၸၢႆးဢၢႆႈယွၼ်း ၼႆ ၵႂႃႇၵေႃႉၼိုင်ႈ။


ၽူႈၵွၼ်းႁွင်ႈၵၢၼ်ၾၢႆႇပွင်ႇၶၢဝ်ႇ မၢႆးဢၢႆႈၵျေႃႇ ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - “ဢမ်ႇမီးၽႅၼ်ၵၢၼ် ၶီႇၼဵၵ်းတဵၵ်းတဵင် ၵူၼ်းဝၢၼ်ႈ ၵူၼ်းမိူင်း” - ဝႃႈၼႆ။


ၵူၼ်းမိူင်းမိတ်ႈၸိူဝ်းပၢႆႈႁွတ်ႈထိုင် ဝၢၼ်ႈၼႃးယႆး ၼႂ်းၸႄႈဝဵင်း ၵျွၵ်ႉမႄး ၶဝ်လၢတ်ႈဝႃႈ  ဢိင်ၼိူဝ်သိုၵ်းလွႆ ၶၢၼ်းငိုၼ်း ၶၢၼ်းၵူၼ်း၊ တီႉဢဝ်ၵူၼ်းဝၢၼ်ႈၵူၼ်းသေ လႆႈဢွၼ်ၵၼ်ပၢႆႈ  မႃးတၢင်းဝၢၼ်ႈၼႃးယႆး  မီး ၵူၼ်းၼပ်ႉသိပ်းယဝ်ႉ ဝႃႈၼႆ။


ၼႂ်းထုင်ႉမိူင်းမိတ်ႈၼႆႉ -  လိူဝ်သေသိုၵ်းလွႆ TNLA ယင်းမီး တပ်ႉသိုၵ်း ပႃႇတီႇမႂ်ႇသုင်ၸိုင်ႈတႆး SSPP/SSA ၊ ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA  သေဢမ်ႇၵႃး သိုၵ်းလူင်ပွင်ၸိုင်ႈမၢၼ်ႈ တပ်ႉပလိၵ်ႈမၢၼ်ႈ ၸိူဝ်းၼႆႉၵေႃႈမီး။