ဢိင်ၼိူဝ်ပၼ်ႁႃလူင် ၵူၼ်းသူႇ/သမ်း/ၵိၼ်/ၶၢႆ/ ယႃႈမဝ်းၵမ် ၼႆႉသေ ငဝ်းငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်းတႆး SSPP/SSA    ၽႅၼ်ၵၢၼ်  ႁႄႉၵင်ႈၽေး   ယႃႈမဝ်းၵမ် ၸွမ်းတပ်ႉ ႁွင်ႈၵၢၼ်  လႄႈၼႃႈတီႈၸႄႈဝဵင်း ဢိၵ်ႇတင်းၵူၼ်းမိူင်းၼႂ်းပိုၼ်ႉတီႈ။

ဝၼ်းတီႈ 3/4/2017 ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး  SSPP/SSA လူင်းႁႃ ၵူတ်းထတ်းၵူၼ်းသူႇ/သမ်း/ ၵိၼ်/ၶၢႆယႃႈမဝ်းၵမ်  ၵူၼ်းၸိူဝ်းဢၼ်ယူႇ သဝ်းၵိၼ်သၢင်ႈ ႁိမ်းႁွမ်းဝၢၼ်ႈႁႆးၼၼ်ႉ ၵူတ်းထတ်း ယဝ်ႉၵႂုႇ 200 ၵေႃႉ၊ လႆႈထတ်းႁၼ် ၵူၼ်းသူႇသမ်းယႃႈမဝ်းၵမ် မီး 26 ၵေႃႉ ဝႃႈၼႆ။


ၸွမ်းၼင်ႇ ပၵ်းပိူင် ငဝ်ႈငုၼ်း SSPP/SSA  မီးဝႆႉၼၼ်ႉသေ ၵူၼ်းသူႇသမ်းယႃႈမဝ်းၵမ် 26 ၵေႃႉၼၼ်ႉ ၵူတ်ႇထတ်းၺႃးၵမ်းထူၼ်ႈၼိုင်ႈ တေပၼ်ပိုၼ်ႉႁူႉၵဵဝ်ႇၵပ်းယႃႈမဝ်းၵမ်သေ ပွႆႇပၼ်ၶိုၼ်း၊ ပေႃးပဵၼ် ၵူတ်ႇထတ်းၺႃးၵမ်းထူၼ်ႈသွင် တေဢဝ်လိူင်ႈ ပၼ်တူတ်ႈတၢမ်ႇသေ တေတတ်းပၼ်ယိၼ်ႉယႃႈၵႂႃႇ - ဝႃႈၼႆ။

 
ၸၢႆးၽူင်းႁၢၼ် ၽူႈၶၢၼ်ပၢၵ်ႇ SSPP/SSA  လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ - “ပၼ်ႁႃလူင် ၽေးယႃႈမဝ်းၵမ်ၼႆႉ….   ၽူႈယႂ်ႇၵူၼ်းလူင် ငဝ်ႈငုၼ်းၵေႃႈတႅမ်ႈလိၵ်ႈပိုၼ်ၽၢဝ်ႇ ၽဵဝ်ႈမူၺ်ႉယႃႈမဝ်းၵမ် မႃးယူႇၵူႈပီ ။ ၵူၺ်းၵႃႈ ယင်းပႆႇၽဵဝ်ႈမူၺ်ႉလႆႈပႅတ်ႈတင်းမူတ်း။  ၼႂ်းပီ 2017 ၼႆႉ မီးၽႅၼ်ၵၢၼ်ဝႆႉ တေတူင်ႉၼိုင်ၽဵဝ်ႈမူၺ်ႉ ႁၢဝ်ႈႁႅင်း  ဢမ်ႇၵိုတ်းဢမ်ႇယင်ႉ၊ တေဢၢၼ်းလူင်းၵူတ်ႇထတ်းၽႅဝ်ထိုင် ၼႂ်းပိုၼ်ႉတီႈ ႁွင်ႈၵၢၼ်ၵူႈတပ်ႉလႄႈ ၵူၼ်းမိူင်းၵူႈၸႄႈဝဵင်း” ။


“ယႃႈမဝ်းၵမ်ၼၼ်ႉ   ဢမ်ႇပၼ်ၽွၼ်းလီသင် ပႃးၸဵမ်တႃႇၵူၼ်းမိူင်း ၊ တႃႇတပ်ႉသိုၵ်း။ ပဵၼ်ၽေးလူင် ၵိတ်ႇၶႂၢင် တႃႇဝၢၼ်ႈမိူင်း၊ တႃႇၸိူဝ်ႉၶိူဝ်းႁဝ်းတေၶိုၼ်ႈယႂ်ႇၼၼ်ႉၵူၺ်းလႄႈ .. ၼင်ႇႁိုဝ်ယႃႈမဝ်းၵမ် တေႁၢႆလႆႈၼၼ်ႉ ၸွမ်းၼင်ႇၶေႃႈယိူင်းဢၢၼ်းလႄႈၶေႃႈပိုၼ်ၽၢဝ်ႇႁဝ်းမီး ၼၼ်ႉ တေသိုပ်ႇၽဵဝ်ႈမူၺ်ႉၵူတ်ႇထတ်းၵႂႃႇႁၢဝ်ႈႁႅင်း   ”  ဝႃႈၼႆ။


တီႈငဝ်ႈငုၼ်းဝၢၼ်ႈႁႆးၼႆႉ မိူဝ်ႈပီၵၢႆ 2016 လိူၼ်ထူၼ်ႈ 8  ၼၼ်ႉၵေႃႈ မီးၵၢၼ်ၵူတ်ႇ ထတ်းယဵဝ်ႈၵူၼ်းသိုၵ်း  ၼႂ်းတပ်ႉ/ႁွင်ႈၵၢၼ် ၽႂ်မၼ်း ယဝ်ႉၵမ်းၼိုင်ႈ။ မိူဝ်ႈၼၼ်ႉ ၶိူင်ႈၵူတ်ႇထတ်းယဵဝ်ႈလႆႈၸႂ်ႉၵႂႃႇ 100 ဢၼ်၊ ၵူတ်ႇထတ်းၺႃး ၽူႈသူႇၵိၼ်သမ်းယႃႈမဝ်းၵမ် 60 ၵေႃႉ ဝႃႈၼႆ။