ပၢင်လိူၵ်ႈတင်ႈသွမ်ႈ ၼႂ်းၸႄႈဝဵင်းၵေးသီးၼၼ်ႉ ပႃႇတီႇႁူဝ်သိူဝ် လႆႈၶႅပ်းၵၢင်ၸႂ် ၵူၼ်းမိူင်းၵမ်ႉထႅမ် ၼမ်လိူဝ်ပိူၼ်ႈ ၸိူဝ်းပဵၼ်ပႃႇတီႇၵူႈၶႅင်ႇၵၼ် မိူၼ်ၼင်ႇပႃႇတီႇ သိူဝ်ၽိူၵ်ႇ၊ ၼူၵ်ႉယုင်း၊ လႃးႁူႇ၊ သၢင်ႇသီႈ ၸိူဝ်းၼႆႉ လႆႈလူင်းလၢႆးမိူဝ်း မၵ်းမၼ်ႈပႃႇတီႇႁူဝ်သိူဝ် ပဵၼ်ၽူႈဢွင်ႇပေႉ။

ၵဵဝ်ႇၵပ်းပၢင်လိူၵ်ႈတင်ႈသွမ်ႈ ဢၼ်ၸတ်းႁဵတ်း ၼႂ်းဝၼ်းတီႈ 1/4/2017 ၼႂ်းၵေးသီး- မိူင်းၼွင်ၼႆႉသေ ႁူဝ်ပဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈ ဝဵင်းၵေးသီး လုင်းသေႃးသူၺ်ႇလၢတ်ႈ - “ ၼႂ်းၸႄႈဝဵင်းၵေးသီး ၼႆႉပႃႇတီႇႁူဝ်သိူဝ် SNLD ပေႉပိူၼ်ႈမူတ်းယဝ်ႉၶႃႈ” - ဝႃႈ ၼႆ။


ပၢင်လိူၵ်ႈတင်ႈသွမ်ႈ ၼႂ်းၸႄႈဝဵင်းၵေးသီးၵမ်းၼႆႉ - ပႃႇတီႇၸိူဝ်းၶဝ်ႈၶႅင်ႇ ၸၼ်ႉသၽႃးၵူၼ်းမိူင်း - ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး SNLD ပႃႇတီႇႁူဝ်သိူဝ် 18882 ၶႅပ်း၊ တီႇမူဝ်ႇၶရႅတ်ႉတိၵ်ႉ ပႃႇတီႇၸၢဝ်းၶိူဝ်းတႆး SNDP ပႃႇတီႇသိူဝ်ၽိူၵ်ႇ 736 ၶႅပ်း ၊ ပႃႇတီႇၼူၵ်ႉယုင်း NLD 1668 ၶႅပ်း၊ ပႃႇတီႇသၢင်ႇသီႈ  USDP 3235 ၶႅပ်း - ဝႃႈၼႆ။


ၶဵတ်ႇလိူၵ်ႈတင်ႈ မၢႆ1 သၽႃးၸႄႈမိူင်း ၼၼ်ႉသမ်ႉ - ပႃႇတီႇႁူဝ်သိူဝ် SNLD 11542 ၶႅပ်း၊ ပႃႇတီႇ သိူဝ်ၽိူၵ်ႇ SNDP 335 ၶႅပ်း၊ ပႃႇတီႇၼူၵ်ႉယုင်း NLD 652 ၶႅပ်း၊ ပႃႇတီႇသၢင်ႇသီႈ USDP 877 ၶႅပ်း၊ ၶဵတ်ႇလိူၵ်ႈတင်ႈ မၢႆ2 သၽႃးၸႄႈမိူင်း ၼၼ်ႉသမ်ႉ - ပႃႇတီႇႁူဝ်သိူဝ် 7832 ၶႅပ်း၊ ပႃႇတီႇသိူဝ် ၽိူၵ်ႇ 370 ၶႅပ်း၊ ပႃႇတီႇၼူၵ်ႉယုင်း NLD 456 ၶႅပ်း၊ ပႃႇတီႇသၢင်ႇသီႈ 1756 ၶႅပ်း၊ ပႃႇတီႇလႃးႁူႇ 1419 ၶႅပ်း ဝႃႈၼႆ။


ႁူဝ်ပဝ်ႈ ၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈဝဵင်းၵေးသီး လုင်းၸၢႆးသေႃးသူၺ်ႇ လၢတ်ႈဝႃႈ-“ဢၼ်ၵူၼ်းဝၢၼ်ႈၵူၼ်းသူၼ် ၼႂ်းၸႄႈဝဵင်းၵေးသီးႁဝ်းၶႃႈ ဢွၼ်ၵၼ်မႃးတွတ်ႈၶႅပ်းၵၢင်ၸႂ် မႃးလိူၵ်ႈၽူႈတႅၼ်းသၽႃး ၶဝ်ၸဝ်ႈၸိူင်ႉၼႆ ယူႇတီႇၶႃႈႁဝ်းသေ ဢဝ်ၵုင်ႇမုၼ်ၸွမ်း ပဵၼ်ဢၼ်  ယိၼ်းၸူမ်းတႄႉၶႃႈ” -  ဝႃႈၼႆ။


ၸႄႈဝဵင်းၵေးသီး ဢၼ်ပႃး ၵိင်ႇၸႄႈဝဵင်းမိူင်းၼွင်ၼႆႉ ၽူႈမီးသုၼ်ႇလႆႈ တွတ်ႈၶႅပ်းၵၢင်ၸႂ် မီး 50000 ၵေႃႉ ပၢႆ။ ၵူၼ်းဢၼ်မႃးတွတ်ႈၶႅပ်း ၵၢင်ၸႂ် တေၼမ်လိူဝ်  75%။ မိူဝ်ႈပၢင်လိူၵ်ႈတင်ႈ ပတ်းပိုၼ်ႉတူဝ်ႈမိူင်း ဢၼ်ၸတ်းႁဵတ်း မိူဝ်ႈပီ 2015 ၼၼ်ႉ ၵူၼ်းမိူင်းၵေးသီး၊ မိူင်းၼွင်၊ မိူင်းသူႈ၊ မိူင်းၸၢင် ဢမ်ႇလႆႈတိုဝ်ႉတၢင်း တွတ်ႈၶႅပ်းၵၢင်ၸႂ် ၸိူင်ႉပိူၼ်ႈ။