ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး   SSPP/SSA ပၼ်တိုဝ်ႉတၢင်း ၸတ်းႁဵတ်းပၢင်လိူၵ်ႈ တင်ႈသွမ်ႈ တီႈငဝ်ႈငုၼ်းဝၢၼ်ႈႁႆး ထၢင်ႇႁၢင်ႈလွတ်ႈလႅဝ်းသေတႃႉ ၵူၼ်းသိုၵ်း သမ်ႉ ဢမ်ႇမီးသုၼ်ႇ တွတ်ႈၶႅပ်းၵၢင်ၸႂ် ၸိူင်ႉၼင်ႇသိုၵ်းလူင်ပွင်ၸိုင်ႈမၢၼ်ႈ။

ပၢင်လိူၵ်ႈတင်ႈသွမ်ႈ ဢၼ်ၸတ်းႁဵတ်း ၼႂ်းဝၼ်းတီႈ 1/4/2017 ဝၼ်းမိူဝ်ႈၼႆႉ တီႈဝဵင်းမႂ်ႇဝၢၼ်ႈႁႆး မီးႁူင်းတွတ်ႈၶႅပ်းၵၢင်ၸႂ် တီႈႁူင်းႁဵၼ်းၸၼ်ႉသုင် တင်း တီႈတၢင်းၽႄပႃၶီး။ တီႈပၢင်လိူၵ်ႈတင်ႈ ၼၼ်ႉ သိုၵ်းတႆးတင်းလၢႆ ဢမ်ႇၵွမ်ႉၵႃႈဝႃႈ တေလႆႈသႂ်ႇသိူဝ်ႈၶူဝ်းသိုၵ်း သႂ်ႇသိူဝ်ႈၶူဝ်းၵူၼ်းႁိူၼ်းၵေႃႈ ဢမ်ႇ လႆႈၵႂႃႇၵၢႆၸမ်၊ ၶႅပ်းၵၢင်ၸႂ် ၶႅၼ်းဢမ်ႇမီးသုၼ်ႇလႆႈတွတ်ႈ။ တီႈဝဵင်းၵေးသီး ၼႂ်းတပ်ႉ ၶလယ 131 ၊ တီႈဝဵင်းမိူင်းသူႈသမ်ႉ တီႈ တပ်ႉပၢင်ႇၸွႆး မီးႁူင်းတွတ်ႈၶႅပ်းၵၢင်ၸႂ် တႃႇသိုၵ်းလူင်ပွင်ၸိုင်ႈမၢၼ်ႈ ၶေႃၶေႃ။


ၽူႈမီးၸၼ်ႉသိုၵ်း SSPP/SSA ၸဝ်ႈၼိုင်ႈလၢတ်ႈဝႃႈ - “ငဝ်းလၢႆးဝၢၼ်ႈမိူင်းတေႃႈလဵဝ်ၼႆႉ သိုၵ်းလူင်ပွင် ၸိုင်ႈမၢၼ်ႈ ဢဝ်သုၼ်ႇလႆႈၶိုၵ်ႉတွၼ်း လိူဝ်ၵူႈမူႇၵူႈၸုမ်း။ သိုၵ်းမၢၼ်ႈသမ်ႉမီးသုၼ်ႇလႆႈတွတ်ႈၶႅပ်းၵၢင်ၸႂ်  ၊ သိုၵ်းတႆးသမ်ႉ ဢမ်ႇမီးသုၼ်ႇလႆႈတွတ်ႈၶႅပ်း။ ၼႆႉမၼ်းၸီႉၸမ်ႈ ၼႄဝႃႈ ဝၢၼ်ႈမိူင်း ဢမ်ႇမီးလွင်ႈၽဵင်ႇပဵင်း၊ ႁဝ်းၵေႃႈ ပဵၼ်လုၵ်ႈပေႃႈမႄႈၵူၼ်းမိူင်းၵူၺ်း သမ်ႉဢမ်ႇမီးသုၼ်ႇ တွတ်ႈၶႅပ်းၵၢင်ၸႂ်လႄႈ ပဵၼ်ဢၼ်ၸႂ်လဵၵ်ႉၸွမ်းယူႇ”- ဝႃႈၼႆ။


ပေႃးဢဝ်ၶေႃႈပိုၼ်ၽၢဝ်ႇ ၽိုၼ်ဢၢင်ႈဢိင် လွင်ႈငမ်းယဵၼ်မိူင်းမၢၼ်ႈ ၼႂ်းပီ 2016 ၶွင်ၸုမ်း BNI ၼၼ်ႉ ဝႃႈ - ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၼႆႉ ႁႅင်းသိုၵ်း 8000 ပၢႆ။


ၵူၺ်းၵႃႈ ယူႇတီႈၸုမ်းၶၢဝ်ႇၽူႈတွႆႇႁွၵ်ႈသေ ဢၼ်ယိုၼ်ယၼ်လႆႈၶေႃႈမုလ်း ၵဵဝ်ႇၵပ်းႁႅင်းသိုၵ်း SSPP/SSA တႄႉဢမ်ႇပႆႇမီး။


ဝဵင်းမႂ်ႇဝၢၼ်ႈႁႆး ၼႆႉၶဝ်ႈပႃးၼႂ်းၸႄႈဝဵင်းၵေးသီး။ ပႃးၸဵမ်ထုင်ႉမိူင်းၼွင်၊ မိူင်းၸၢင်၊ မိူင်းသူႈၸိူဝ်းၼႆႉ ဢၼ်ဢမ်ႇလႆႈတိုဝ်ႉတၢင်း ၸတ်းႁဵတ်းပၢင်လိူၵ်ႈတင်ႈ ပီ 2015 ။ ၵူၼ်းမိူင်း ႁိမ်းသႅၼ် ႁၢမ်းသုၼ်ႇလႆႈတွတ်ႈၶႅပ်းၵၢင်ၸႂ်။ ၵူၺ်းၵႃႈ ပၢင်လိူၵ်ႈတင်ႈ ၵမ်းလႂ်ၵေႃႈလီ ပႃးၸဵမ်မိူဝ်ႈပီ 2010 ယူႇတီႈ ပႃႇတီႇမႂ်ႇသုင်ၸိုင်ႈတႆးသေ ဢွၵ်ႇၶေႃႈပိုၼ်ၽၢဝ်ႇ တႅၵ်ႇလႅင်း ဝႃႈ တိုၼ်းတေဢမ်ႇၵဵဝ်ႇၶွင်ႈ၊ ပၼ်တိုဝ်ႉတၢင်း ၸတ်းႁဵတ်းလွတ်ႈလႅဝ်းထၢင်ႇႁၢင်ႈ မႃးၵူႈၵမ်း - ဝႃႈၼႆ။