ပၢင်ဢုပ်ႇၵုမ်ၵၢၼ်မိူင်း ၸၼ်ႉတူင်ႇတၢင်ႇပိုၼ်ႉတီႈ ဢၼ်ၾၢႆႇလူင်ပွင်ၸိုင်ႈ တေၸတ်းႁဵတ်းတီႈဝဵင်းလူင်

တူၼ်ႈတီး ငဝ်ႈဝဵင်းလူင်ၸိုင်ႈတႆး၊ ၼႂ်းၶၢဝ်းတၢင်းဢမ်ႇႁိုင်ဢမ်ႇၼၢၼ်းၼႆႉ ၸဝ်ႈၼႃႈတီႈ ၶွင်ႇသီႇဢဝ်ၶိုၼ်း

ၸိုင်ႈတႆး RCSS/SSA လၢတ်ႈဝႃႈ- တႃႇတေၶဝ်ႈႁူမ်ႈပၢင်ၵုမ်ၼၼ်ႉ ပႆႇတူဝ်ႈတၼ်း။

ပၢင်ဢုပ်ႇၵုမ်ၵၢၼ်မိူင်း ၸၼ်ႉတူင်ႇတၢင်ႇပိုၼ်ႉတီႈ တေၸတ်းႁဵတ်းၼႂ်းဝၼ်းတီႈ 23-25/05/2017 ၶၢဝ်းတၢင်းသၢမ်ဝၼ်း။ ယူႇတီႈၸုမ်း ငဝ်ႈငုၼ်းၵေႃႇသၢင်ႈလွင်ႈငမ်းယဵၼ်လႄႈ လွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈ (NRPC) လူင်ပွင်ၸိုင်ႈ ဢွၼ်ႁူဝ်ၼမ်းၼႃႈၸတ်းႁဵတ်းသေ ႁွင်ႉမွၵ်ႇထိုင် ၸုမ်းၽူႈထုၵ်ႇလီၶဝ်ႈႁူမ်ႈပႃး မိူၼ်ၼင်ႇၸုမ်းယိပ်းၵွင်ႈၵၢင်ႇၸၢဝ်းၶိူဝ်းတႆးလႄႈ ပႃႇတီႇၵၢၼ်မိူင်းတႆး ဢိၵ်ႇၵူႈမူႇၵူႈၸုမ်းၸိူဝ်းၼႆႉၶဝ်ႈႁူမ်ႈ။

ၸဝ်ႈသိုၵ်းၸၢႆးငိုၼ်း ၽူႈၶၢၼ်ပၢၵ်ႇ RCSS/SSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ- "ပၢင်ၵုမ်ၵၢၼ်မိူင်း ၸၼ်ႉတူင်ႇတၢင်ႇပိုၼ်ႉတီႈၼႆတႄႉ ၸၢဝ်းၶိူဝ်းၵေႃႈတေမႃးၶဝ်ႈႁူမ်ႈၸွတ်ႇၸေးၵၼ်။ ၵူၺ်းၵႃႈ တွၼ်ႈတႃႇ

ႁဝ်းၶႃႈတႄႉ ၵွပ်ႈပိူဝ်ႈဢမ်ႇပႆႇလႆႈၸတ်းပၢင်ၵုမ်လူင် ၸၼ်ႉၸိူဝ်ႉၸၢတ်ႈတႆးလႄႈ ႁဝ်းၶႃႈပႆႇလႆႈ 

ၵၢင်ၸႂ်ၵူၼ်းမိူင်းတႆး။ ပေႃးဢမ်ႇလႆႈၵၢင်ၸႂ်ၵူၼ်းမိူင်းတႆးၵေႃႈ တႃႇတေၶိုၼ်ႈတီႈၸၼ်ႉတူင်ႇတၢင်ႇပိုၼ်ႉတီႈၼႆႉ မၼ်းဢမ်ႇလၢၵ်ႇလၢႆးသင်၊ ႁဝ်းၶႃႈပႆႇတူဝ်ႈတၼ်း။ လွင်ႈၼႆႉ မၼ်းတေၵႂႃႇယၢပ်ႇၽိုတ်ႇတွၼ်ႈတႃႇႁဝ်းၶႃႈ 

တီႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၼၼ်ႉၵူၺ်း။ ၵွပ်ႈၼၼ် ၼင်ႇႁိုဝ်တေလႆႈၸတ်းပၢင်ၵုမ် ၸၼ်ႉၸိူဝ်ႉၸၢတ်ႈတႆးၵမ်းၼိုင်ႈ ၵွၼ်ႇၼႃႈပႆႇၸတ်းပၢင်ၵုမ်လူင်ၼႆႉ ႁဝ်းၶႃႈၵေႃႈတိုၵ်ႉဢုပ်ႇၵုမ်ၵၼ်ယူႇ- ဝႃႈၼႆ။

ၸုမ်း NRPC ၶဝ် တေၸတ်းႁဵတ်းပၢင်ၵုမ်လူင် ၸၼ်ႉတူင်ႇတၢင်ႇပိုၼ်ႉတီႈ (ဒေသအလိုက်) ဝဵင်းလူင်တူၼ်ႈတီး။ ၵူၺ်းၵႃႈ တွၼ်ႈတႃႇမူႇၸုမ်းၸၢဝ်းၶိူဝ်းတႆးတႄႉ တုၵ်းယွၼ်းၶႂ်ႈႁဵတ်းပၢင်ၵုမ်လူင် ၸၼ်ႉၸိူဝ်ႉၸၢတ်ႈတႆး တီႈတူၼ်ႈတီးသေတႃႉၵေႃႈ ဢမ်ႇလႆႈဢၼုၺၢတ်ႈ တေႃႇထိုင်ဝၼ်းမိူဝ်ႈၼႆႉ။

ၵဵဝ်ႇၵပ်းလွင်ႈပၢင်ၵုမ်လူင် ၸွမ်းလူၺ်ႈပိုၼ်ႉတီႈၼႆႉ ပေႃးမႃးတူၺ်းၼႆ ၾၢႆႇလူင်ပွင်ၸိုင်ႈၵေႃႈ ၶိုင်ပွင်ႁဵတ်း 

ႁိပ်ႈႁိပ်ႈၼႅတ်ႈၼႅတ်ႈဝႆႉလႄႈ  လႅပ်ႈတေဢမ်ႇပဵၼ်လႆႈ ပၢင်ၵုမ်ဢၼ်ၵုမ်ႇထူၼ်ႈ ဢၼ်ဢွင်ႇမၢၼ်ပဵၼ်ၵၢၼ်- 

ပႃႇတီႇႁူဝ်သိူဝ် SNLD လၢတ်ႈ။

ၽူႈၶၢၼ်ပၢၵ်ႇပႃႇတီႇႁူဝ်သိူဝ် ၸၢႆးလဵၵ်ႉ လၢတ်ႈဝႃႈ- "ဢၼ်ၶဝ်တေႁဵတ်းပၢင်ၵုမ်လူင် ၸၼ်ႉၸွမ်းလူၺ်ႈပိုၼ်ႉတီႈ တီႈတူၼ်ႈတီးၼႆႉ ႁဝ်းၶႃႈပႆႇလႆႈႁူႉၶၵ်ႉတွၼ်ႈ ဢၼ်ၶဝ်တေႁဵတ်းၵႂႃႇ၊ ပႆႇလႆႈႁူႉၶပ်းမၢႆၸႅၼ်ႇမၼ်း။ တေႃႇထိုင်ဝၼ်း မိူဝ်ႈၼႆႉၵေႃႈ (20/04/2017) လိၵ်ႈၽိတ်ႈမွၵ်ႇမၼ်းပႆႇႁွတ်ႈထိုင် ပႃႇတီႇႁူဝ်သိူဝ် SNLD ။ ၵွပ်ႈၼၼ် တွၼ်ႈတႃႇႁဝ်းၶႃႈတေၵႂႃႇၶဝ်ႈႁူမ်ႈၼၼ်ႉ ႁဝ်းၶႃႈၵေႃႈပႆႇလႆႈၶိုင်သင်၊ ႁဝ်းၶႃႈတေၶဝ်ႈႁူမ်ႈႁႃႉ 

ဢမ်ႇၶဝ်ႈႁူမ်ႈၼၼ်ႉၵေႃႈ ယူႇတီႈလိၵ်ႈၽိတ်ႈမွၵ်ႇမၼ်းၵူၺ်း- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 19/04/2017  ဢိင်ၼိူဝ်ၶေႃႈၸီႉသင်ႇၸၼ်ႉၸႄႈတွၼ်ႈသေ ၼႂ်းလၢႆလၢႆၸႄႈဝဵင်းၼႂ်း 

ၸိုင်ႈတႆးၼၼ်ႉ ၾၢႆႇၵွၼ်းၸႄႈဝဵင်းၶဝ် ႁွင်ႉဢဝ်ဢၼ်ပဵၼ်ၽွင်းတႅၼ်းသၽႃးၸႄႈဝဵင်းၽႂ်မၼ်းလႄႈ ပေႃႈဝၢၼ်ႈမႄႈမိူင်း ၼႂ်းၸႄႈဝဵင်းၽႂ်မၼ်းသေ ႁွင်ႉႁဵတ်းပၢင်ၵုမ်၊ သပ်းလႅင်းလၢတ်ႈၼႄ ၵဵဝ်ႇၵပ်းလွင်ႈ

ပၢင်ၵုမ်လူင်ၵၢၼ်မိူင်း ၸၼ်ႉတူင်ႇတၢင်ႇပိုၼ်ႉတီႈ ဢၼ်တေၸတ်ႁဵတ်းပွၵ်ႈၵမ်းၼႆႉယူႇ- ၵူၼ်းၼႂ်းပိုၼ်ႉတီႈၶဝ်လၢတ်ႈ ၼင်ႇၼႆ။

ပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆးတႄႉ ၸုမ်းတႆးလၢႆလၢႆၸုမ်း ယိူင်းဢၢၼ်းၶႂ်ႈၸတ်းႁဵတ်း တီႈဝဵင်းပၢင်လူင် ဢမ်ႇၼၼ် တီႈဝဵင်းတူၼ်ႈတီး။ လွင်ႈၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး RCSS လႆႈတုၵ်းယွၼ်း

မိူဝ်ႈလိူၼ်ၾႅပ်ႊၿိဝ်ႊရီႊပူၼ်ႉမႃး၊ ၵူၺ်းၵႃႈ ၾၢႆႇတၢင်းတပ်ႉသိုၵ်းမၢၼ်ႈ (တပ်ႉမတေႃႇ) လႄႈလူင်ပွင်ၸိုင်ႈ 

ဢမ်ႇဢၼုၺၢတ်ႈပၼ်။ ၸီႉၸမ်ႈၼႄႉၼမ်းဝႃႈ ပၢင်ၵုမ်ၸၼ်ႉၸိူဝ်ႉၸၢတ်ႈတႆးၼႆႉ ႁႂ်ႈႁဵတ်းတီႈမိူင်းပၼ်ႇ 

ဢမ်ႇၼၼ် တီႈမိူင်းတေႃႉ-မိူင်းထႃး၊ ဢၼ်ပဵၼ်ၼႂ်းၼႃႈလိၼ်ၸိုင်ႈတႆးပွတ်းဢွၵ်ႇ ႁိမ်းႁွမ်းလႅၼ်လိၼ်ထႆး။ ယွၼ်ႉလွင်ႈၼႆႉသေ ႁဵတ်းႁႂ်ႈပၢင်ၵုမ်လူင်ၸၼ်ႉၸိူဝ်ႉၸၢတ်ႈတႆး ပႆႇၸၢင်ႈၸတ်းႁဵတ်း တေႃႇထိုင်ဝၼ်း

မိူဝ်ႈလဵဝ်။

ၸုမ်းၶၢဝ်ႇၽူႈတွႆႇႁွၵ်ႈ (21/04/2017)