သင်ၶၸဝ်ႈ ႁူမ်ႈလူၺ်ႈၵူၼ်းမိူင်း ဝဵင်းလွၵ်ႉၸွၵ်ႇ ၸတ်းႁဵတ်းပွႆးလူင်းပၢင်သွၼ် လိၵ်ႈတႆး ၶၢဝ်းမႆႈလႄႈ ၾိင်ႈငႄႈပုတ်ႉထ ၽူႈယႂ်ႇၵူၼ်းလူင် ၵူၼ်းမိူင်းၶဝ်ႈႁူမ်ႈၸမ် 300 ၵေႃႉ။

ဝၼ်းတီႈ 19/04/2017 သင်ၶၸဝ်ႈလႄႈ ၵူၼ်းမိူင်းႁူမ်ႈၵၼ် ၸတ်းႁဵတ်းပွႆးလူင်းပၢင်သွၼ် လိၵ်ႈတႆး ၶၢဝ်းမႆႈလႄႈ ၾိင်ႈငႄႈပုတ်ႉထ တီႈ ဝၢၼ်ႈၺွင်ႇပွၵ်ႈ ဝဵင်းလွၵ်ႉၸွၵ်ႇ ၸႄႈတွၼ်ႈ တူၼ်ႈတီး ၸိုင်ႈတႆးပွတ်းၸၢၼ်း။

ၼႂ်းပၢင်ၼႆႉမီးၽူႈယႂ်ႇၵူၼ်းလူင် မိူၼ်ၼင်ႇ ၸဝ်ႈၶူးဢုတ်တမ  ဝတ်ႉၸလၢႆး ၊ ၸဝ်ႈၶူးရႃႇၸိင်ႇတ  ဝတ်ႉလွႆၸၢင်ႉ ၊ ၸဝ်ႈၶူးၵေႃဝိတ  ဝတ်ႉၼမ်ႉၵူတ်ႉ ၊ လုင်းဝိၼ်းၸေႃႇ  ႁူဝ်ပဝ်ႈၽူႈၵွၼ်းဢိူင်ႇ ႁူၺ်း ၊ လုင်းၸၢႆးလႃႈသွၼ်  ႁူဝ်ပဝ်ႈၸုမ်းၵူၼ်းၼုမ်ႇတႆး ၊ လုင်းသၢင်ႇၵူဝ်ႇ ဝၢၼ်ႈၺွင်ႇပွၵ်ႈ၊ လုင်းသၢင်ႇၶေႃႇ ပူႇၵၢင်ႉဝၢၼ်ႈၺွင်ႇပွၵ်ႈ ၽူႈယႂ်ႇၵူၼ်းလူင် ၵူၼ်းဝၢၼ်ႈ ပေႃႈမႄႈလုၵ်ႈႁဵၼ်း ဢိၵ်ႇလုၵ်ႈႁဵၼ်း ၶဝ်ႈႁူမ်ႈ ၸမ် 300 ၵေႃႉ။

ၸဝ်ႈၶူးၵေႃးဝိတ ဝတ်ႉၼမ်ႉၵူတ်ႉ ၸဝ်ႈၽူႈပွင်ပဵၼ်ပၢင်သွၼ် လၢတ်ႈဝႃႈ -“ ပေႃးမႃးတူၺ်းမိူဝ်ႈ လဵဝ်ၼႆႉ ၵူၼ်းၶဝ်ႈၸႂ်လိၵ်ႈလၢႆးလႄႈၵၢၼ်ၵူၼ်းၼမ်ၼႆႉ ယင်းတိုၵ်ႉမီးဢေႇယူႇ ၊ ၸွမ်းၼင်ႇၵႂၢမ်း ထုင်းမီးဝႆႉဝႃႈ ၸဝ်ႈဢမ်ႇယွင်ႈၶွင်ဢမ်ႇၵႃႈ ဢၼ်ဝႃႈၼၼ်ႉ လိၵ်ႈႁဝ်း၊ ၵႂၢမ်းႁဝ်း၊ ထုင်းႁဝ်း ပေႃးႁဝ်း ဢမ်ႇဢွၼ်ၵၼ်သွၼ် ဢွၼ်ၵၼ်ႁဵၼ်း ဢွၼ်ၵၼ်ၸႂ်ႉၸိုင် ၽႂ်သမ်ႉတေမႃးၸႂ်ႉ၊ ၵွပ်ႈၼၼ်လႄႈ ယွၼ်းႁႂ်ႈပေႃႈမႄႈပီႈၼွင်ႉႁဝ်း ဢွၼ်ၵၼ်သႂ်ႇၸႂ် လဵပ်ႈႁဵၼ်းလႄႈၸွႆႈၵၼ်ပူၵ်းပွင် လိၵ်ႈလၢႆးတႆး ႁဝ်းၵႂႃႇၼမ်ၼမ် သေၵမ်း” ဝႃႈၼႆ။

လုင်းဝိၼ်းၸေႃႇ  ႁူဝ်ပဝ်ႈၽူႈၵွၼ်းဢိူင်ႇ ႁူၺ်း လၢတ်ႈဝႃႈ - “ မိူဝ်ႈၵူႈပွၵ်ႈ တႃႇတေႁဵၼ်းလိၵ်ႈတႆးၼႆႉ ဢမ်ႇၸႂ်ႈငၢႆႈငၢႆႈ လႆႈလၵ်ႉသွၼ် လၵ်ႉႁဵၼ်းဢဝ် မိူဝ်ႈလဵဝ်တႄႉ မီးလွင်ႈထၢင်ႇႁၢင်ႈလွတ်ႈလႅဝ်းယဝ်ႉ လႄႈႁႂ်ႈဢွၼ်ၵၼ် လဵပ်ႈႁဵၼ်းၵၼ်ၼမ်ၼမ်သေၵမ်း” ဝႃႈၼႆ။

ပၢင်သွၼ်ၼႆႉ တႄႇဝၼ်းတီႈ 06/03/2017 – 09/04/2017 ပူင်သွၼ်ပၼ် လိၵ်ႈတႆး၊ ၾိင်ႈငႄႈပုတ်ႉ ထ၊ ပၢႆးယူႇလီ၊ ပိုၼ်း ၸိူဝ်းၼႆႉ။  မီးၶူးသွၼ် 27 ၵေႃႉ ပူင်သွၼ်တႃႇ19 ဝၢၼ်ႈ ၼႂ်းဝဵင်းလွၵ်ႉၸွၵ်ႇ  မိူၼ်ၼင်ႇ ဝၢၼ်ႈတပ်ႉဢူး၊ ဝၢၼ်ႈၼမ်ႉႁူး၊ ဝၢၼ်ႈၼမ်ႉၵူတ်ႉ၊ ဝၢၼ်ႈႁူၺ်း၊ ဝၢၼ်ႈၺွင်ႇပွၵ်ႈ ၸိူဝ်းၼႆႉ မီးလုၵ်ႈ ႁဵၼ်းၼႂ်းဢိူင်ႇဝၢၼ်ႈ မႃးႁဵၼ်းဢဝ်ႁူမ်ႈတင်းမူတ်း 300 ၵေႃႉပၢႆ။