ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸတ်းပၢင်ပၼ်တၢင်းႁူႉ ၵူၼ်းမိူင်း လွင်ႈယႃႈမဝ်း ၵမ်၊ လွင်ႈၵၢၼ်ၽွမ်ႉႁူမ်ႈ၊ လွင်ႈတီႈလိၼ်ၸိူဝ်းၼႆႉ လၢႆဝၢၼ်ႈလၢႆဝဵင်း ၵူၼ်းမႃးထွမ်ႇငိၼ်းၼပ်ႉႁူဝ်ႁဵင်။

တႄႇဝၼ်းတီႈ2/04/2017 မႃးတေႃႇထိုင်ယၢမ်းလဵဝ် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/ SSA ၸတ်းပၢင်ပၼ်တၢင်းႁူႉၵူၼ်းမိူင်း ၽိတ်ႈပၢင်းဢဝ်သင်ၶၸဝ်ႈ မိူၼ်ၼင်ႇၸဝ်ႈၶူး သီရိထမ်မ 

ဝတ်ႉၾႃႉ ဝဵင်းဢိၼ်း ၊ ၸဝ်ႈၵေႃးသၼ်လ ၵျွင်းပွင်ဢုတ်ႇ ဝဵင်းလၢႆးၶႃႈ ။ ႁူမ်ႈပွၼ်ႈထမ်း ပၼ်ၵူၼ်းဝၢၼ်ႈ ၵူၼ်းမိူင်း ဢၼ်RCSS ၸတ်းႁဵတ်းၼၼ်ႉလၢႆတီႈ မိူၼ်ၼင်ႇ ၼႂ်းဝဵင်းၵျွၵ်ႉမႄး3 ဝၢၼ်ႈ - ဝၢၼ်ႈႁူးသူၼ်၊ဝၢၼ်ႈမိူင်းတၢင်ႈ၊ ဝၢၼ်ႈမိူင်းလူင်။ ဝဵင်းမိူင်းၵုတ်ႈ ပဵၼ်တီႈဝၢၼ်ႈၵွင်းသႅင်လႄႈ ထႅင်ႈတီႈၼိုင်ႈသမ်ႉ တီႈၵျွင်းဢႃႇသၼ်ႇ 

ၵၢင်ဝဵင်း မိူင်းမိတ်ႈ ၸိူဝ်းၼႆႉ- ဝႃႈၼႆ။

ၼႂ်းပၢင်ၼႆႉပွၼ်ႈလၢတ်ႈပၼ်မိူၼ်ၼင်ႇ လွင်ႈၽွၼ်းၸႃႉယႃႈမဝ်းၵမ်၊ လွင်ႈတီႈလိၼ်၊ လွင်ႈၵၢၼ်ၽွမ်ႉႁူမ်ႈ 

ၸိူဝ်းၼႆႉ။

ယိူင်းဢၢၼ်း ၼင်ႇႁိုဝ်ၵူၼ်မိူင်းတေၵႆယၢၼ်ယႃႈမဝ်းၵမ်၊ ႁူႉၽွၼ်းၸႃႉယႃႈမဝ်းၵမ်၊ ႁႂ်ႈၵူၼ်းမိူင်းမေႃဝႆႉၵႃႈၶၼ် တီႈလိၼ်တူဝ်ၸဝ်ႈၵဝ်ႇ ႁႂ်ႈၸူဝ်ႈလုၵ်ႈပၢၼ်လၢၼ်ပေႃး တေလႆႈသိုပ်ႇယူႇသဝ်းၵႂႃႇလႄႈ လွင်ႈၽွၼ်းလီၵၢၼ် ၽွမ်ႉႁူမ်ႈၵၼ် ပေႃးၽွမ်ႉၵၼ်ၸိုင် ၼႃႈၵၢၼ်သင်သေဢမ်ႇဝႃႈ တိုၼ်းတေၶိုၼ်ႈယႂ်ႇ - ဝႃႈၼႆ။

ၸဝ်ႈၶူး သီရိထမ်မ ဝတ်ႉၾႃႉဝဵင်းဢိၼ်း လၢတ်ႈဝႃႈ “ ယႃႈမဝ်းၵမ်ဢၼ်ဝႃႈၼႆႉ မၼ်းႁဵတ်းႁၢႆႉ ၽဝၸၢတ်ႈ ပၢၼ်ၸဝ်ႈၵဝ်ႇ ၼႃႈႁိူၼ်းၸဝ်ႈၵဝ်ႇ ၊ ဝၢၼ်ႈမိူင်း ၸဝ်ႈၵဝ်ႇယဝ်ႉ ၊ မၼ်းပဵၼ်မၢၵ်ႇၵွင်ႈလူင်ဢၼ်ၽူႈၶဵၼ်ႁဝ်း 

ယိုဝ်းႁဝ်းယူႇၵူႈဝၼ်း လူၺ်ႈတီႈႁဝ်းဢမ်ႇႁူႉတူဝ် ၽေးႁၢႆႉယႃႈမဝ်းၵမ်ၼႆႉၼမ်မႃးလိူဝ်ၵဝ်ႇ ၵူႈမိုဝ်ႉၵူႈဝၼ်း ။ ၵူၼ်းမိူင်းတႆးၵူၼ်းၼုမ်ႇႁဝ်းၵေႃႈ ဢွၼ်ၵၼ်တိတ်းၸပ်း ယႃႈမဝ်းၵမ် ယၢမ်းလဵဝ်ၵႃႈၶၼ်ယႃႈၵေႃႈထုၵ်ႇ။ လွင်ႈတီႈလိၼ်ၸိူဝ်းၼႆႉၵေႃႈလီမႆႈၸႂ် ယႃပေတူၺ်းႁၼ်ငိုၼ်းသေၶၢႆပၼ်ၵူၼ်းတၢင်ႇၶိူဝ်းတိၵ်းတိၵ်း ဝၢႆးမႃးၵူဝ်လုၵ်ႈလၢၼ်ႁဝ်းဢမ်ႇမီးတီႈယူႇ” ။

မၼ်းၸဝ်ႈသို်ပ်ႇလၢတ်ႈထႅင်ႈဝႃႈ -“ လွင်ႈၽွမ်ႉႁူမ်ႈၼႆႉ ဢမ်ႇဝႃႈၵၢၼ်ၼႃႈႁိူၼ်း၊ ၵၢၼ်မုၵ်ႉၸုမ်း၊ ၵၢၼ်ဝၢၼ်ႈမိူင်း ၸိူဝ်းၼႆႉ ပေႃးမီးလွင်ႈၽွမ်ႉႁူမ်ႈၵွၼ်ႇၸင်ႇၶိုၼ်ႈယႂ်ႇ” ဝႃႈၼႆ။

ပၢင်တြႃးတိုၵ်းတေႃးယႃႈမဝ်းၵမ်ၼႆႉ ယူႇတီႈၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်းဢွၼ်ႁူဝ်သင်ၶ ၸဝ်ႈ ၽူႈမီးပုၼ်ႈၽွၼ်း ၵူၼ်းမိူင်းၼႂ်းပိုၼ်ႉတီႈသေ ႁူမ်ႈၵၼ်ၸတ်းႁဵတ်းမႃးတႃႇသေႇ မိူၼ်ၼင်ႇ တၢင်ႉယၢၼ်း ၊ 

ထုင်ႉပူင်း ၊ သီႇသႅင်ႇ ၊ ပၢင်လူင် ၊ မိူင်းၼွင် ၊ လႃႈသဵဝ်ႈ ၊ ၼမ်ႉၸၢင် ၊ ၵူတ်ႉၶၢႆ ၵျွၵ်ႉမႄး၊ မိူင်းၵုတ်ႈ၊ မိူင်းမိတ်ႈ 

ၸဵမ်ၸိူဝ်းၼႆႉ။