ႁူင်းႁဵၼ်းၸိူဝ်ႉၸၢတ်ႈတႆး ဝဵင်းၵဵင်းတုင် လူဝ်ႇတၢင်းၸွႆႈထႅမ် ငိုၼ်းတွင်း 1800 သႅၼ်ပျႃးပၢႆ၊ တႃႇပူၵ်းပွင်ၵေႃႇသၢင်ႈႁူင်းႁဵၼ်းမႂ်ႇ ပၼ်လုၵ်ႈဢွၼ်ႇၶိုၼ်ႈႁဵၼ်း။

ႁူင်းႁဵၼ်းၸိူဝ်ႉၸၢတ်ႈတႆး ဝဵင်းၵဵင်းတုင် ၵေႃႇသၢင်ႈႁူင်းမႂ်ႇမႃး ၸဵမ်မိူဝ်ႈ ပီ 2016 ထိုင်ယၢမ်းလဵဝ် ပႆႇယဝ်ႉတူဝ်ႈ။ တိုၵ်ႉလူဝ်ႇတၢင်းၸွႆႈထႅမ် လွင်ႈငိုၼ်းတွင်းတင်းၼမ်။ ႁူင်းႁဵၼ်းၼႆႉ ၵေႃႇသၢင်ႈဝႆႉတီႈ ဝၢၼ်ႈၵုင်း ဢိူင်ႇၵၢတ်ႇၾႃႉ ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။

လုင်းၸၢႆးသၢမ်တိပ်ႉသိူဝ် ၽူႈၼမ်းႁူင်းႁဵၼ်းၸိူဝ်ႉၸၢတ်ႈတႆး လၢတ်ႈဝႃႈ “ တေႃႈလဵဝ် ႁူင်းႁဵၼ်း ၼႆႉ ၵေႃႇသၢင်ႈဝႆႉပဵၼ်သွင်ၸၼ်ႉ ဢွၼ်တၢင်းတႄႉ ႁႂ်ႈလႆႈသိူဝ်ႇပူပိုၼ်ႉၸၼ်ႉတႂ်ႈဢွၼ်တၢင်း၊ ယဝ်ႉၵေႃႈ ၵၢင်ၽႃၸၼ်ႉတႂ်ႈသေ လေႃႇသလိပ်ႉတၢင်းၼိူဝ်မၼ်း ပေႃးႁဵတ်းၼႆယဝ်ႉ လုၵ်ႈဢွၼ်ႇ ႁဵၼ်းၵေႃႈ ၶဝ်ႈႁဵၼ်းသွၼ်တၢင်းတႂ်ႈၵေႃႈလႆႈ။ ၸၼ်ႉတၢင်းၼိူဝ် ထႅင်ႈၸၼ်ႉၼိုင်ႈတႄႉ တေလႆႈ ပႂ်ႉၽူႈမီးၼမ်ႉၸႂ်တၵ်ႉၵႃႇသတ်ႉထႃးၶဝ်မႃးၸွႆႈထႅင်ႈၵူၺ်းယဝ်ႉ။ သင်ဝႃႈ မီးၸဝ်ႈတႃႇၼၶဝ် မႃးၸွႆႈ ထႅမ်ပၼ်တင်းမူတ်းတင်းသဵင်ႈၸိုင် ယိုင်ႈၶႅၼ်းၶႅမ်ႉယဝ်ႉ လုၵ်ႈဢွၼ်ႇႁဵၼ်းႁဝ်းၵေႃႈ တေလႆႈၶိုၼ်ႈ ႁဵၼ်း ၼႂ်းႁူင်းမႂ်ႇၵႂႃႇၵမ်းလဵဝ်။ ယွၼ်ႉၼၼ် တေႃႈလဵဝ်ၼႆႉ ႁဝ်းၶႃႈ ၶၢတ်ႇငိုၼ်းတွင်းဝႆႉ တင်းၼမ်” ဝႃႈၼႆ။

သိုပ်ႇလၢတ်ႈထႅင်ႈဝႃႈ ႁူင်းႁဵၼ်းၸိူဝ်ႉၸၢတ်ႈတႆး ဝဵင်းၵဵင်းတုင်ၼႆႉ ဢမ်ႇၸႂ်ႈတႃႇသုၼ်ႇတူဝ် ၵေႃႉလႂ်ၵေႃႉၼၼ်ႉ မၼ်းပဵၼ်တႃႇတႆးႁဝ်းတင်းမူတ်း၊ ယွၼ်ႉၼၼ် ၸင်ႇလႆႈယွၼ်းလူႇၶၢမ်ႇ ထိုင်တီႈၽူႈမီး ၼမ်ႉၸႂ်ၸေႇတႃၼႃႇ မႃးၸွႆႈၵမ်ႉထႅမ်ယူႇ ဝႃႈၼႆ။

တေႃႈလဵဝ်ၼႆႉ ႁူင်းႁဵၼ်းၸိူဝ်ႉၸၢတ်ႈတႆး ဝဵင်းၵဵင်းတုင်ၼႆႉ ၵေႃႇသၢင်ႈဝႆႉၼိုင်ႈၸၼ်ႉလႂ် 6 ႁွင်ႈ၊ မီးသွင်ၸၼ်ႉ၊ ႁူင်းႁဵၼ်းၼႆႉ မီးၾၢႆႇဢွၵ်ႇၵဵင်းတုင် ယၢၼ်ႇၵႆၵဵင်းတုင် မွၵ်ႈ 3 လၵ်း မီးႁိမ်းထၢတ်ႈ ႁူဝ်သိူဝ် သဵၼ်ႈတၢင်းမိူင်းလႃးၵဵင်းတုင် ၼႆယဝ်ႉ။

ႁူင်းႁဵၼ်းၸိူဝ်ႉၸၢတ်ႈ ဝဵင်းၵဵင်းတုင်ၼႆႉ လုၵ်ႈဢွၼ်ႇမႃးၶိုၼ်ႈႁဵၼ်း ၼိုင်ႈပီလႂ် 100 ပၢႆ၊ ၶူးပူင် သွၼ်ပၼ်သမ်ႉ မီး 7-8 ၵေႃႉ။ လိၵ်ႈၽႃသႃဢၼ်သွၼ်ၼႂ်းႁူင်းႁဵၼ်းသမ်ႉ မိူၼ်ၼင်ႇ လိၵ်ႈတႆး၊ လိၵ်ႈတႆးၶိုၼ်၊ လိၵ်ႈမၢၼ်ႈ၊ ပၢႆးၼပ်ႉ၊ ဢိင်ႊၵလဵတ်ႊ၊ ပိုၼ်း ၸဵမ်ၸိူဝ်းၼႆႉ။ ၸၼ်ႉလိၵ်ႈသမ်ႉ မီး (4) ၸၼ်ႉ မိူၼ်ၼင်ႇ ၸၼ်ႉငဝ်ႈ၊ ၸၼ်ႉဢွၼ်ႇ၊ ၸၼ်ႉၵၢင်လႄႈ ၸၼ်ႉသုင်။ ၼွၵ်ႈလိူဝ်ၼၼ်ႉ ပေႃးထိုင် မႃး ၶၢဝ်းမႆႈၸိုင် ပိုတ်ႇပၢင်သွၼ်လိၵ်ႈတႆး ၶၢဝ်းမႆႈ တႃႇ 2 လိူၼ်၊ ၽွင်းဢိုတ်းႁဵၼ်း လူင်ပွင်ၸိုင်ႈ မၢၼ်ႈ။ ပီၼႆႉ လုၵ်ႈဢွၼ်ႇမႃးၶိုၼ်ႈႁဵၼ်းသွၼ်လိၵ်ႈတႆး မီးယူႇ 300 ပၢႆ။

သင်ဝႃႈ ၽူႈလႂ်ၽႂ်လႂ် ၽူႈမီးၼမ်ႉၸႂ်ၸေႇတၼႃႇ တၵ်ႉၵႃႇသတ်ႉထႃး တီႈၸမ်တီႈၵႆ ၼွၵ်ႈမိူင်းၼႂ်းမိူင်း ၶႂ်ႈၵမ်ႉထႅမ်ၼႆၸိုင် ၵပ်းသိုပ်ႇတိတ်းတေႃႇ လႆႈတီႈ

လုင်းၸၢႆးသၢမ်တိပ်ႉသိူဝ် ၽူႈၼမ်းၼႂ်းႁူင်းႁဵၼ်းၸိူဝ်ႉၸၢတ်ႈ +959778856384

လုင်းၸၢႆးယွတ်ႈၶမ်း ၾၢႆႇၵေႃၵမ်ၵၢၼ် ႁူင်းႁဵၼ်းၸိူဝ်ႉၸၢတ်ႈ +95949030375

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 07/04/2017