တူၵ်းပုၼ်ႈၽွၼ်းမႃးလႄႈ ပႃႇတီႇသိူဝ်ၽိူၵ်ႇ တေႁပ်ႉႁဵတ်းႁူဝ်ပဝ်ႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ။ လွင်ႈၵၢၼ်လိူၵ်ႈတင်ႈပီ 2020 ၵေႃႈ သိူဝ်ၽိူၵ်ႇတေၶတ်းၸႂ်ၵႂႃႇ ၵွပ်ႈမီးၸႂ်ၶႂ်ႈၸွႆႈထႅမ်ပေႃႈမႄႈၵူၼ်းမိူင်းတႆး- လွင်ႈၼႆႉ ႁူဝ်ပဝ်ႈပႃႇတီႇသိူဝ်ၽိူၵ်ႇ ၸၢႆးဢၢႆႈပဝ်း တွပ်ႇလၢတ်ႈဝႆႉတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

 

ထၢမ် - ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ၸွင်ႇပႃႈၵၢႆႇၵႂၢမ်းမႃးၶႃႈ ဝႃႈႁႂ်ႈႁဵတ်းႁူဝ်ပဝ်ႈ CSSU  ?။

တွပ်ႇ - ဢမ်ႇပႆႇလၢတ်ႈမႃး၊ ၵွပ်ႈပိူဝ်ႈမၼ်းမီးပၢင်လိူၵ်ႈတင်ႈသွမ်ႈ။ ထႅင်ႈဢၼ်ၼိုင်ႈသမ်ႉပဵၼ်ၶၢဝ်းသွၼ်းၼမ်ႉ၊ ၵွပ်ႈပိူဝ်ႈၼႆႉယူဝ်ႉၶဝ်ၵေႃႈဢမ်ႇလၢတ်ႈမႃး။

ထၢမ် - ပေႃးၾၢႆႇ CSSU ၵၢႆႇၵႂၢမ်းမႃးဝႃႈႁႂ်းႁပ်ႉႁဵတ်းႁူဝ်ပဝ်ႈၼႆ ၸွင်ႇတေႁပ်ႉႁဵတ်းၶႃႈ?။

တွပ်ႇ - ႁပ်ႉႁဵတ်းဢိူဝ်ႈ၊ ၵမ်းၼႆႉတႄႉပဵၼ်ပုၼ်ႈၽွၼ်းႁဝ်းၼႃႇ။

ထၢမ် - ပေႃးမီးပၢင်လိူၵ်ႈတင်ႈ 2020 မႃးၶႂ်းလၢတ်ႈသင်ၽွင်ႈၶႃႈ?။

တွပ်ႇ - ႁဝ်းတေၶတ်းၸႂ်၊ တေႃႇထိုင် 2020 မႃးတႄႉ ႁဝ်းတေၶတ်းၸႂ်တႄႉတႄႉဝႃႈဝႃႈဢိူဝ်ႈၼႃ။ တေၶတ်းၸႂ်ပၼ်ပေႃႈမႄႈၵူၼ်းမိူင်း၊ တေၸွႆႈပေႃႈမႄႈၵူၼ်းမိူင်းယူႇ၊ မီးၼႂ်းၸႂ်ဝႆႉယူႇ။ ပုၼ်ႈတႃႇတေၸွႆႈပေႃႈမႄႈၵူၼ်းမိူင်းၼၼ်ႉ ၵိၼ်ၵေႃႈၶုၵ်းၸႂ်လႆႈ၊ ၼွၼ်းၵေႃႈၶုၵ်းၸႂ်လႆႈ။ ၵွပ်ႈပိူဝ်ႈသင်ၼႆ မိူင်းတႆးၼႆႉဢေးလူပိူၼ်ႈၼႃႇ၊ မိူၼ်ႁဝ်းယူႇတႃႈၵုင်ႈၼႆႉ ႁဝ်းဢမ်ႇမီးလွင်ႈမႆႈသင်၊ မိူင်းတႆးႁဝ်းၼႆႉ လွင်ႈတုၵ်ႉယၢၵ်ႈမၼ်းၼမ်ၼႃႇ၊ လႆႈပၢႆႈၽေးသိုၵ်း၊ ၵၢၼ်ငၢၼ်းၵေႃႈဢမ်ႇလႆႈႁဵတ်းလီလီ၊ ပၢႆႈၵႂႃႇမိူင်းထႆး ၵႂႃႇႁဵတ်းၵၢၼ်မိူင်းထႆး။ ပေႃးပဵၼ်ၼႆယူႇတိၵ်းတိၵ်းတႄႉတႆးႁဝ်းတေတုၵ်ႉၶ၊ ပေႃးတႆးႁဝ်းတုၵ်ႉၶၵေႃႈ တႆးႁဝ်းတေႁၢႆၵႂႃႇတိၵ်းတိၵ်းယဝ်ႉ။

ပေႃးလူင်ပွင်ၸိုင်ႈ ဢမ်ႇၶတ်းၸႂ်ပၼ်တႄႉၶႂ်ႈယၢပ်ႇယဝ်ႉ။ ပေႃးတႆးႁဝ်းဢမ်ႇပဵၼ်လူင်ပွင်ၸိုင်ႈတႄႉတႆးႁဝ်းတေယၢပ်ႇၸႂ်ယဝ်ႉ၊ မိူင်းတႆးႁဝ်း တႆးႁဝ်းၵူၼ်းၼမ်သေပိူၼ်ႈ၊ တႆးသမ်ႉဢမ်ႇလႆႈၽွင်းငမ်းၼႆႉ ႁဝ်းလီႁူႉတူဝ်ယဝ်ႉ။ တႆးလူဝ်ႇလိူၵ်ႈတႅၼ်းၽွင်းတႆးၵူၺ်း၊ ပေႃးတႅၼ်းၽွင်းတႆးပေႉၼမ်ၵေႃး မၼ်းလႆႈပဵၼ်လူင်ပွင်ၸိုင်ႈယဝ်ႉ၊ တႆးႁဝ်းၵႂႃႇသႂ်ႇပႃႇတီႇပိူၼ်ႈယူႇတိၵ်းတိၵ်းတႄႉ ႁဝ်းႁိုဝ်ပဵၼ်လႆႈ၊ သိူဝ်ၽိူၵ်ႇတႄႉၶႂ်ႈၸွႆႈပေႃႈမႄႈၵူၼ်းမိူင်းဢိူဝ်ႈ၊ ပေႃးၵူၼ်းမိူင်းဢမ်ႇလိူၵ်ႈႁဝ်း ႁဝ်းတေၸၢင်ႈၸွႆႈသင်လႃႇ။

ထၢမ် - ဢၼ်ပႃႇတီႇႁူဝ်သိူဝ်ဢွင်ႇပေႉပၢင်လိူၵ်ႈတင်ႈသွမ်ႈၼႆႉ ၶႂ်ႈလၢတ်ႈသင်ၽွင်ႈၶႃႈ?။

တွပ်ႇ - ဢၼ်ၼႆႉတႄႉ ဢၼ်ၶႂ်ႈလၢတ်ႈၵေႃႈဢမ်ႇမီး။ ပႃႇတီႇၶဝ်ပေႉၵေႃႈႁဝ်းဝႃႈပဵၼ်ပႃႇတီႇတႆးၵူၺ်း၊ ဢၼ်ၼႆႉတႄႉမၼ်းၵေႃႈလီသေဢၼ်ပႃႇတီႇမိူင်းမၢၼ်ႈၶဝ်မႃးပေႉႁဝ်းဢိူဝ်ႈ။ ပၢႆးမိူင်းၼႆႉ ၵႂႃႇႁၼ်ၸႃႉတႄႉဢမ်ႇလႆႈ၊ မၢၵ်ႇႁူဝ်ၸႂ်လူဝ်ႇၵႂၢင်ႈ၊ ပေႃးႁၼ်ၵႅပ်ႈတႄႉယႃႇပေႁဵတ်းပၢႆးမိူင်းယဝ်ႉ။ ပၢႆးမိူင်းၼႆႉ ႁဝ်းတေပေႉတႃႇသေႇဢမ်ႇၸႂ်ႈ၊ ႁဝ်းတေသုမ်းတႃႇသေႇၵေႃႈဢမ်ႇပဵၼ်လႆႈ၊ ၵမ်ႉပေႉၵမ်ႉသုမ်းမၼ်းပဵၼ်ၼႆယဝ်ႉ။