လုင်းႁဵင်သူၺ်ႇမူဝ်း ၽူႈႁၢပ်ႇၵၢၼ်ပဵၼ် ၽူႈၼမ်းၼႃႈ ၼႂ်းငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး တင်ႈတႄႇၶွတ်ႇၽွတ်ႈပႃႇတီႇမႃး။ လုင်းႁဵင်သူၺ်ႇမူဝ်းၼႆႉ လႆႈလူႉသဵင်ႈၵမ်ႇသုတ်းမုၼ်ၵႂႃႇ လူၺ်ႈ တၢင်းပဵၼ်ၵူၼ်းထဝ်ႈ တီႈႁိူၼ်းမၼ်းၸဝ်ႈ ၼႂ်းၸႄႈဝဵင်းမၢတ်ႉတယႃႇ ၼႂ်းတိူင်းဝဵင်းလိူဝ်ႇ (မၢၼ်း တလေး) ၼႆယဝ်ႉ။

ဝၼ်းတီႈ 06/04/2017 လုင်းႁဵင်သူၺ်ႇမူဝ်း လူႉသဵင်ႈသုတ်းမုၼ် ဢႃယု 91 ပီ တီႈၸႄႈဝဵင်းမၢတ်ႉ တယႃႇ ၼႂ်းတိူင်းဝဵင်းလိူဝ်ႇ၊ တေပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ ၼႂ်းဝၼ်းတီႈ 08/04/2017 ၼႆယဝ်ႉ။

ၸၢႆးလဵၵ်ႉၽူႈၶၢၼ်ပၢၵ်ႇ ပႃႇတီႇႁူဝ်သိူဝ်လၢတ်ႈဝႃႈ “ လုင်းႁဵင်သူၺ်ႇမူဝ်းၼႆႉ ပဵၼ်ၵူၼ်းၸႃတိ ၼမ်ႉသၼ်ႇ၊ ပဵၼ်ၸၢဝ်းၶိူဝ်းတဢၢင်း(ပလွင်ႈ)၊ ၵူပ်ႉၵူႈပၢင်ၶႅၵ်ႇ တႄႇၼႃႈႁိူၼ်းၵိုၵ်းၸွမ်း ၼၢင်းဢီႇ ၶမ်းလႅင် ပဵၼ်ၵူၼ်းမူႇၸေႊ၊ မီးလုၵ်ႈလၢၼ်ၸွမ်းၵၼ် 6 ၵေႃႉ။ ၼၢင်းဢီႇၶမ်းလႅင်ၼႆႉ လူႉသဵင်ႈၵႂႃႇ မိူဝ်ႈပူၼ်ႉမႃး ၶၢဝ်းတၢင်း 10 ပီပၢႆယဝ်ႉ။ လုင်းႁဵင်သူၺ်ႇမူဝ်းၼႆႉ ယူႇၸွမ်းလုၵ်ႈယိင်း မၼ်းၸဝ်ႈ ၼၢင်းၶမ်းဢိင်ႇတင်းလုၵ်ႈၶူၺ်မၼ်းၸဝ်ႈ တွၵ်ႊတိူဝ်ႊၸၢႆးၶမ်းဢွၼ်ႇ တေႃႇထိုင်ပေႃးလူႉ သဵင်ႈ သုတ်းမုၼ်။ ႁၢပ်ႇၵၢၼ်ၽူႈၼမ်းၼႃႈပႃႇတီႇႁူဝ်သိူဝ်၊ ႁဵတ်းၵၢၼ်ၵႃႉၶၢႆၼဵင်ႈႁႅင်ႈလႄႈ ပိုတ်ႇႁွင်ႈ ၵၢၼ်ၶၢႆၵႃႇၾီႇ” ဝႃႈၼႆ။

သိုပ်ႇလၢတ်ႈထႅင်ႈဝႃႈ ပေႃႈထဝ်ႈလုင်းႁဵင်သူၺ်ႇမူဝ်းၼႆႉ ပဵၼ်ၵူၼ်းႁဵတ်းၵၢၼ်ႁၢပ်ႇႁၢမ်ပုၼ်ႈပၢင်ႈၸိူဝ်ႉ ၶိူဝ်းတႆး ၵေႃႉၼိုင်ႈ၊ မိူဝ်ႈပီ 1988 ၼၼ်ႉ ပႃႇတီႇႁူဝ်သိူဝ် SNLD လႆႈၶွတ်ႇၽွတ်ႈ ပႃႇတီႇတီႈ ယၢၼ်ႇ ၵုင်ႇ မိူဝ်ႈၼၼ်ႉ ႁူဝ်ပဝ်ႈမၼ်းပဵၼ် ဢူးတႅတ်ႉဝိၼ်း/ လုင်းၸၢႆးတႅတ်ႉဝိၼ်း (ၵမ်ႇပေႃးၸ)။ ဝၢႆးလင် ၼၼ်ႉမႃး ၶႂ်ႈႁႂ်ႈပီႈၼွင်ႉတႆး တၢင်းတႃႈၵုင်ႈ၊ ဝဵင်းလိူဝ်ႇ ၵူႈတီႈတီႈတေလႆႈၶဝ်ႈပႃးၸွမ်းၼႆ ထိုင်မႃး ပီ 1989 ၸင်ႇလႆႈၵႂႃႇႁဵတ်းပၢင်ၵုမ်ၵၼ်တီႈဝဵင်းလိူဝ်ႇထႅင်ႈၵမ်းၼိုင်ႈ မိူဝ်ႈၽွင်းၼၼ်ႉ လုင်းႁဵင်သူၺ်ႇ မူဝ်းၵေႃႈ ၶဝ်ႈမႃးၼႂ်းပႃႇတီႇသေ တႄႇမိူဝ်ႈၼၼ်ႉမႃး တႄႇႁၢပ်ႇၵၢၼ်ပဵၼ် ၽူႈၼမ်း ၼႃႈပႃႇတီႇ။ ပီၼၼ်ႉၵူၺ်းၼင်ႇၵဝ်ႇ ၸဝ်ႈၶုၼ်ထုၼ်းဢူးၵေႃႈ ၶိုၼ်ႈမႃးႁၢပ်ႇ ၵၢၼ်ပဵၼ် ႁူဝ်ပဝ်ႈပႃႇတီႇ ဝႃႈ ၼႆ။

လုင်းႁဵင်သူၺ်ႇမူဝ်းၼႆႉ ၾၢႆႇၼိုင်ႈၵေႃႈႁၢပ်ႇၵၢၼ်ၽူႈၼမ်းၼႃႈပႃႇတီ ႇႁူဝ်သိူဝ်သေ ၾၢႆႇၼိုင်ႈၵေႃႈ လႆႈၶဝ်ႈပႃးၶွတ်ႇၽွတ်ႈၸုမ်းၶႅၵ်ႇလီပၢင်ၸႃႉသေ ပဵၼ်ႁူပဝ်ႈၸုမ်းၶႅၵ်ႇလီပၢင်ၸႃႉ ဝဵင်းလိူဝ်ႇထႅင်ႈ လူးၵွၼ်ႇ၊ မၼ်းၸဝ်ႈၼႆႉ ၸွႆႈထႅမ်ပၼ်ၶႅၵ်ႇလီပၢင်ၸႃႉ၊ ယူႇတီႈပီႈၼွင်ႉတႆးၵမ်ႈပႃႈၼမ် လႆႈပိုင်ႈဢိင် ၸႂ်ယႂ်ႇ ပေႃႈထဝ်ႈလုင်းႁဵင် သူၺ်ႇမူဝ်းၼႆႉ တႄႉတႄႉဝႃႈဝႃႈ။

ၸၢႆးလဵၵ်ႉသိုပ်ႇလၢတ်ႈထႅင်ႈဝႃႈ ပေႃႈထဝ်ႈလုင်းႁဵင်သူၺ်ႇမူဝ်းၼႆႉ ပဵၼ်ၵူၼ်းလၢတ်ႈသိုဝ်ႈ ပဵၼ်ၵူၼ်းၸွႆႈထႅမ်ပႃရႁိတ ပဵၼ်ၵူၼ်းၸွႆႈထႅမ်ပုၼ်ႈပၢင်ႈၵူၼ်းတင်းၼမ်မႃးတႃႇသေႇ ပေႃးဝႃႈ ၸွႆႈထႅမ်ပိူၼ်ႈၵေႃႈ ဝႆႉၸႂ်ၸေႇတၼႃႇတဵမ်တဵမ်ထူၼ်ႈထူၼ်ႈသေ သႂ်ႇဢဵၼ်သႂ်ႇႁႅင်း ၸွႆႈထႅမ် တႄႉတႄႉဝႃႈဝႃႈ ပဵၼ်ၵူၼ်းၸႂ်လီ ဢမ်ႇလိူၵ်ႈၼႃႈလဵၵ်ႉၼႃႈယႂ်ႇ။ ၵွပ်ႈၼၼ်လႄႈ ပဵၼ်တီႈၵူၼ်းမိူင်းတႆးလႆႈၸႂ်ယႂ်ႇတႄႉတႄႉ ဝႃႈၼႆ။

လုင်းႁဵင်သူၺ်ႇမူဝ်းၼႆႉ ပဵၼ်ၵူၼ်းၸၢဝ်းၶိူဝ်းတဢၢင်းၵေႃႉၼိုင်ႈ မိူဝ်ႈတေသႂ်ႇၸိုဝ်ႈပႃႇတီႇ SNLD ၵေႃႈ မၼ်းၸဝ်ႈပၼ်တၢင်းၶႆႈၸႂ်ဝႃႈ ႁႂ်ႈမၼ်းပေႃးတၢင်တူဝ်လႆႈ ၸၢဝ်းၶိူဝ်းၼႂ်းမိူင်းတႆး တင်းမူတ်းတင်း သဵင်ႈ ၼႆသေ ၸင်ႇၸႂ်ႉသႂ်ႇဝႃႈ ငဝ်ႈငုၼ်းတီႇမူဝ်ႇၶရေၸီႇ ၸိူဝ်ႉၶိူဝ်းတႆး ႁႂ်ႈပေႃးႁူမ်ႈပႃး ပီႈၼွင်ႉၸၢဝ်း ၶိူဝ်းၼႂ်းမိူင်းတႆးၼႆ မၼ်းၸဝ်ႈပၼ်တၢင်းၶႆႈၸႂ်ၵႂႃႇၸိူင်ႉၼႆ။

ၸၢႆးၺုၼ်ႉလုၼ်ႇ ၽူႈၼမ်းၼႂ်းၵူႈလွင်ႈလွင်ႈပႃႇတီႇႁူဝ်သိူဝ် လၢတ်ႈဝႃႈ လုင်းႁဵင်သူၺ်ႇမူဝ်းၼႆႉ ပဵၼ်တီႈ ပႃႇတီႇ ႁူဝ်သိူဝ် လႆႈၸႂ်ယႂ်ႇတႄႉတႄႉဝႃႈဝႃႈ၊ ပေႃႈထဝ်ႈလုင်းႁဵင်သူၺ်ႇမူဝ်း လႆႈလူႉသဵင်ႈၵႂႃႇၼႆႉၵေႃႈ ယူႇတီႈပႃႇတီႇႁူဝ်သိူဝ် လႆႈသေလၢႆမွင်ၸႂ်ၸွမ်းတႄႉတႄႉဝႃႈဝႃႈ။  

ၸုမ်းၶၢဝ်ႇၽူႈတွႆႇႁွၵ်ႈ 07/04/2017