ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU တေၸတ်းႁဵတ်းပၢင်ၵုမ် ႁူဝ်ႁုပ်ႈပီ ၼႂ်းလိူၼ်မေႊသေ တေ ပုတ်ႈလၢႆႈႁူဝ်ပဝ်ႈ ၸွမ်းၼင်ႇပိူင် ၸုမ်းမီးၼၼ်ႉ ၶွပ်ႈၶူပ်ႇၼိုင်ႈပီလႂ် ၼိုင်ႈပွၵ်ႈ။ ယၢမ်းလဵဝ် ၸုမ်း SSJAC လႆႈႁပ်ႉတၼ်းႁဵင်း ပဵၼ်ႁူဝ်ပဝ်ႈဝႆႉ။

ၸဝ်ႈပိုၼ်ၶမ်း ၽူႈပွင်ၵၢၼ်ၼႂ်းၸုမ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး လၢတ်ႈဝႃႈ “ ပေႃးဢဝ်ပိူင် ၸုမ်းဝႃႈၸိုင် ဢႃယု ႁူဝ်ပဝ်ႈၸုမ်းၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ဢၼ်ပဵၼ်ယူႇတေႃႈလဵဝ်တႄႉ မူတ်းယဝ်ႉ ယွၼ်ႉဝႃႈ ၼိုင်ႈပီ ပၼ်ႇပုတ်ႈၵၼ်ၼိုင်ႈၵေႃႉ။ ၵူၺ်းၵႃႈ တေလိူၵ်ႈၸုမ်းလႂ်ၶိုၼ်ႈ ပဵၼ် ႁူဝ်ပဝ်ႈ ဢၼ်ဝႃႈၼၼ်ႉ တေဢုပ်ႇဢူဝ်းၵၼ်ၼႂ်းပၢင်ၵုမ်ဢၼ်တေထိုင်မႃးၼႆႉ” ဝႃႈၼႆ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ၼႆႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) ၊ ၵေႃႁူမ်ႈ သၢင်ႈၸိုင်ႈတႆး SSJAC ဢၼ်မီး SSPP/SSA၊ ပႃႇတီႇႁူဝ်သိူဝ် SNLD ၊ တပ်ႉသိုၵ်းၵူၼ်းမိူင်း (ၸုမ်းပီႇတုၸိတ်ႉသႅင်ၵႅဝ်ႉ)၊ ၸုမ်းတူင်ႇဝူင်းၵူၼ်းတႆး CBOs ၼႂ်းမိူင်းၼွၵ်ႈမိူင်း ၸဵမ်ၸိူဝ်းၼႆႉ ႁူမ်ႈၸႂ်ၵၼ်ၵေႃႇတင်ႈမႃး မိူဝ်ႈဝၼ်းတီႈ 17/10/2013။


ၵၢၼ်လိူၵ်ႈတင်ႈ ႁူဝ်ပဝ်ႈCSSU ၼႆႉ တေလႆႈၵႂႃႇၸွမ်းတူဝ်မႄႈလိၵ်ႈၸိုဝ်ႈလုၵ်ႈၸုမ်း။ ၵွပ်ႈၼၼ်  RCSS/SSA လႆႈႁပ်ႉပဵၼ်ႁူဝ်ပဝ်ႈ ဢွၼ်တၢင်းသုတ်း။ ပွၵ်ႈၵမ်းသွင်သမ်ႉ တူၵ်းပုၼ်ႈၽွၼ်း ပႃႇတီႇ သိူဝ်ၽိူၵ်ႇ SNDP။ ယဝ်ႉၸင်ႇမႃး SSJAC ။ မိူဝ်ႈပီ 2015 ၼၼ်ႉ တူၵ်းပုၼ်ႈၽွၼ်း ပႃႇတီႇသိူဝ်ၽိူၵ်ႇ SNDP ပဵၼ် ႁူဝ်ပဝ်ႈ။ ၵူၺ်းၵႃႈ ပႃႇတီႇသိူဝ်ၽိူၵ်ႈသမ်ႉ ဢမ်ႇပႆႇတူဝ်ႈတၼ်းလႄႈ ၸင်ႇလႆႈ ၶၢမ်ႈၵႂႃႇ ပၼ်ၸုမ်း SSJ AC ပဵၼ်ႁူဝ်ပဝ်ႈ။ တေႃႈလဵဝ် SSJAC ပဵၼ်ႁူဝ်ပဝ်ႈ တဵမ်ၼိုင်ႈပီယဝ်ႉလႄႈ တေသိုပ်ႇ ပုတ်ႈပၼ် ထႅင်ႈၸုမ်းၼိုင်ႈ။ ၵွပ်ႈၼႆ ပေႃးဢဝ်ပိူင်ဝႃႈတႄႉ SSPP/SSA တၵ်းလႆႈႁပ်ႉပုၼ်ႈၽွၼ်း ႁူဝ်ပဝ်ႈ။


ၽူႈယႂ်ႇၵူၼ်းလူင် မၢင်ၸဝ်ႈ ထတ်းသၢင်ဝႃႈ မိူဝ်ႈပူၼ်ႉမႃး တၼ်းႁဵင်းပဵၼ် ႁူဝ်ပဝ်ႈၼၼ်ႉ တူၵ်းပႃႇတီႇသိူဝ်ၽိူၵ်ႇ။ ၵူၺ်းၵႃႈ ၶဝ်ဢမ်ႇတူဝ်ႈတၼ်းသေ ဢမ်ႇပဵၼ် ႁပ်ႉ၊ ၸင်ႇၶၢမ်ႈၵႂႃႇၸုမ်း  SSJAC ႁပ်ႉ။ ၵမ်းၼႆႉ တၵ်းလႆႈၶိုၼ်းမႃးတူၵ်းပဵၼ်ပႃႇတီႇသိူဝ်ၽိူၵ်ႇ ဝႃႈၼႆ။


မၢင်ၸဝ်ႈသမ်ႉ ထတ်းသၢင်ဝႃႈ သင်ဢဝ်ၸွမ်းပိူင်ၸုမ်း ဢမ်ႇၼၼ် ပိူင်ဢႃႊသီႊယမ်ႊ ဝႃႈၸိုင် ၵႂႃႇၸွမ်း ပဵၼ်ႁွပ်ႈ။ သင်ဝႃႈ မိူဝ်ႈၽွင်းယၢမ်းတူၵ်းပုၼ်ႈၽွၼ်းၼၼ်ႉ ဢမ်ႇတူဝ်ႈတၼ်း ႁပ်ႉပဵၼ် ႁူဝ်ပဝ်ႈၸိုင် တၵ်းလႆႈပႂ်ႉထႅင်ႈႁွပ်ႈၼိုင်ႈၸင်ႇတေလႆႈႁပ်ႉ ဝႃႈၼႆ။


ယၢမ်းလဵဝ် ယူႇတီႈႁူဝ်ပဝ်ႈပႃႇတီႇသိူဝ်ၽိူၵ်ႇ SNDP လုင်းၸၢႆးဢၢႆႈပဝ်းတႄႉ လၢတ်ႈဝႃႈ တူဝ်ႈတၼ်း ႁၢင်ႈႁႅၼ်း တႃႇႁပ်ႉပဵၼ်ႁူဝ်ပဝ်ႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ဝႃႈၼႆ။
ၵဵဝ်ႇၵပ်းလွင်ႈၼႆႉ လုင်းၸၢႆးဢၢႆႈပဝ်း လၢတ်ႈဝႃႈ “ ပေႃးပိူၼ်ႈပၼ်တႄႉ ႁပ်ႉႁဵတ်းဢိူဝ်ႈ ၵမ်းၼႆႉတႄႉ ပဵၼ်ပုၼ်ႈၽွၼ်းႁဝ်း ယဝ်ႉၼႃႇ” ဝႃႈၼႆ။


ၸဝ်ႈပိုၼ်ၶမ်း လၢတ်ႈဝႃႈ “ယူႇတီႈတၢင်းႁၼ်ထိုင်ၶႃႈတႄႉ တေႃႈလဵဝ် ၼႂ်းၸုမ်းပွင်ၵၢၼ် ၵေႃပွင်ၵၢၼ် ၽွမ်ႉႁူမ်ႈၸိုင်ႈတႆး CSSU တႄႉ ႁဵတ်းၵၢၼ်ၶဝ်ႈတိၼ်ၶဝ်ႈမိုဝ်းၵၼ်တႄႉတႄႉ ၵၢၼ်ငၢၼ်းၵေႃႈလႆႈ ဝႃႈၶိုပ်ႈၼႃးၶိုၼ်ႈသင်ႉမႃးလိူဝ်ၵဝ်ႇ။ ယွၼ်ႉၼၼ်  ႁူဝ်ပဝ်ႈတႄႉ ၼိုင်ႈပီၼိုင်ႈပွၵ်ႈ ပုတ်ႈၶၢႆႉလၢႆႈပိၼ်ႇ ၵၼ်ႁဵတ်းၵေႃႈလႆႈ ၵူၺ်းၵႃႈ ၸုမ်းပွင်ၵၢၼ်တႄႉ ပေႃးဢမ်ႇပုတ်ႈယိုင်ႈၶႅၼ်းလီ ၶိုၼ်းသိုပ်ႇႁဵတ်းၵႂႃႇ မိူၼ်ပၵ်းၵဝ်ႇပိူင်ၵဝ်ႇၶိုၼ်း ဝႃႈၼႆ။


မိူဝ်ႈပူၼ်ႉမႃးလိူၼ် February ၼၼ်ႉၵေႃႈ တႃႇၵဵပ်းၵၢင်ၸႂ်ၵူၼ်းမိူင်း- တႃႇလႆႈၶေႃႈမုလ်း ဢဝ်ၵႂႃႇဢုပ်ႇၵၢၼ်မိူင်းၼႆသေ CSSU ဢွၼ်ဢဝ်ၵူၼ်းၼုမ်ႇႁူပ်ႉထူပ်းၵူၼ်းမိူင်းတႆး ၵူႈၸႄႈဝဵင်း။


ၵဵဝ်ႇၵပ်းပၢင်ၵုမ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ဢၼ်တေၸတ်းႁဵတ်းၼႂ်းလိူၼ်မေႊ တေ ထိုင်မႃးၼႆႉ ဢွင်ႈတီႈလႄႈဝၼ်းတီႈ ယင်းပႆႇႁူႉတႅတ်ႈတေႃးလီ ဝႃႈတေၸတ်းႁဵတ်း တီႈလႂ်လႄႈ ဝၼ်းတီႈလႂ် ၼႆယဝ်ႉ။


မိူဝ်ႈပၢင်ၵုမ် CSSU လိူၼ်မၢတ်ႊၶျ် ပီ 2016 ၼၼ်ႉ ပႃႇတီႇမႂ်ႇသုင်တီႇမူဝ်ႇၶရႅတ်ႉတိၵ်ႉမိူင်းတႆး ပွတ်းဢွၵ်ႇ (ESSDDP) ႁိုဝ် ပႃႇတီႇၵွင်ၸႆး ၵေႃႈၶဝ်ႈပႃး ပဵၼ်လုၵ်ႈၸုမ်းမႃးလႄႈ ယၢမ်းလဵဝ် CSSU မီးလုၵ်ႈၸုမ်း တင်းမူတ်း  10 ၸုမ်း။


ယိူင်းဢၢၼ်းလူင် CSSU ပိူဝ်ႈတႃႇၵႅတ်ႇၶႄႁႄႉၵင်ႈ သုၼ်ႇလႆႈၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း။ မီးယိူင်း ဢၢၼ်း လႄႈ လၵ်းၵၢၼ် သွင်ပိူင်- 1.ပိူဝ်ႈတႃႇ ၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း ၽွမ်ႉ ႁူမ်ႈၵၼ်ၵႄႈ လိတ်ႈ ၵမ်ၸႃတႃ (ၵၢမ်ႇၵျမ်ႇမႃႇ) ၸိုင်ႈတႆး။ 2.ပိူဝ်ႈတႃႇႁူမ်ႈၵၼ် ႁၢင်ႈႁႅၼ်း ယူင်ႉ ၶၢပ်ႈၵၢၼ်မိူင်း (Political frame-work) တႃႇဢုပ်ႇဢူဝ်း ၵၢၼ်မိူင်းၸိုင်ႈတႆးၼႂ်းဝၼ်းမိူဝ်းၼႃႈ။

ၸုမ်းၶၢဝ်ႈၽူႈတွႆႇႁွၵ်ႈ/ ၸၢႆးယွတ်ႈၶမ်း 21/04/2017