ၵူၼ်းမိူင်းမၢၼ်ႈဝဵင်းလူင် ႁူမ်ႈလူႇတၢၼ်းယၢတ်ႇၼမ်ႉ ပၢင်ထမ်းတြုး ဢၼ်ၸတ်းႁဵတ်းၼႂ်းလိူၼ်ႁႃႈၶဝ်းတၢင်း 10 ဝၼ်း ပဵၼ်လွင်ႈယဝ်ႉတူဝ်ႈလီငၢမ်း။

ၸဝ်ႈတူၼ်ၶူးဢႃႇရိယ လၢႆးသႂ် ဢႃႇယု 61 ပီ ဝတ်ႉၵမ်ႇမထမ်းၸွမ်သႅင် မၢၼ်ႈၼွင်သႅင် ဝဵင်းၸေႈလၢၼ်ႉ ဢွၼ်ႁူဝ်ၸတ်းႁဵတ်းပၢင်ႁေႃးထမ်းတြုး လႄႈတိုဝ်းၵမ် ၵမ်ႇမထၢၼ်း  တီႈဝတ်ႉဢူမုၼ်ထမ်းႁူမ်ႈသႃႇ မၢၼ်ႈဝဵင်းလူင် ဝဵင်းမၢၼ်ႈၸေႈ ၼႂ်းဝၼ်းတီႈ 11-20/4/2017 ၶၢဝ်းတၢင်း 10 ဝၼ်း၊ ပီႈၼွင်ႉတႆး ၵိူဝ်းလီပုတ်ႉထၽႃသႃ မၢၼ်ႈဝဵင်းလူင် မႃးၶဝ်ႈႁူမ်ႈတိုဝ်းၵမ် 135 ၵေႃႉ ဝႃႈၼႆ။

ပၢင်တိုဝ်းၵမ်ထမ်းတြုး တီႈမၢၼ်ႈဝဵင်းလူင်ၼႆႉ ၸတ်းႁဵတ်းမႃးၵူႈပီ၊ ၼိုင်ႈပီမီး 2 ပွၵ်ႈ ၶၢဝ်းလိူၼ်ႁႃႈ သွၼ်းၼမ်ႉလႄႈ    ၶၢဝ်းၼႂ်းဝႃႇၼႂ်းၵမ်။ ၼိုင်ႈပၢင်ႁိုင် 10 ဝၼ်းထိုင် 15 ဝၼ်း။ ပၢင်ထမ်းတြႃး ဢၼ်ၸတ်းႁဵတ်းတီႈမၢၼ်ႈဝဵင်းလူင်ပွၵ်ႈၼႆႉ ပဵၼ်ၵမ်းထူၼ်ႈ 8  ၊ ပွၵ်ႈၼႆႉ ၽူႈၶဝ်ႈတိုဝ်းၵမ်ထမ်းတြုး  ဢေႇယွမ်းမႃး ဢမ်ႇမိူၼ်ပၢင်တြႃး ၶၢဝ်းသွၼ်းၼမ်ႉလိူၼ်ႁႃႈပီၵၢႆ - ဝႃႈၼႆ။

ၸဝ်ႈတူၼ်ၶူး ဢႃႇရိယ လၢတ်ႈထႅင်ႈဝႃႈ -ယိူင်းဢၢၼ်းတႄႉ ၼင်ႇႁိုဝ် သႃသၼႃပေႃးတေႁိူဝ်ႈႁိူင်း၊ ပီႈၼွင်ႉတႆးၸၢဝ်းပုတ်ႉ ပေႃးတေဢမ်ႇလူင်လိုမ်း ၵၢၼ်တိုဝ်းၵမ်ထမ်းတြုး၊ ၼႂ်းၵႄႈလေႃးၵတင်းထမ်ႇမ ၸဵမ်ၸိူဝ်းၼႆႉ ဝႃႈၼႆ။

မၢၼ်ႈဝဵင်းလူင်ၼႆႉ မီးၼႂ်းၸႄႈဝဵင်းမၢၼ်ႈၸေႈ ၼႂ်းမိူင်းၶၢင်။ တိတ်းၸပ်းၸႄႈဝဵင်းၼမ်ႉၶမ်း။ ပီႈၼွင်ႉတႆးလႄႈပီႈၼွင်ႉၶၢင် ယူႇႁူမ်ႈလူၺ်ႈၵၼ်။

ၽူႈတွႆႇႁွၵ်ႈ - ၸၢႆးၶိူဝ်းႁၢၼ်

ဝၼ်းတီႈ 21-4-2017