သင်ၶၸဝ်ႈလႄႈ ၵူၼ်းမိူင်း ဢဵၼ်ႁႅင်း 4,000 ပၢႆ ႁူမ်ႈၵၼ်ဢွၵ်ႇမႃး သၢၼ်ၶတ်း လွင်ႈဢၼ် ၶွမ်ႊပၼီႊ မႃးၶုတ်းထၢၼ်ႇႁိၼ် တီႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။

 ဝၼ်းတီႈ 11/04/2016 သင်ၶၸဝ်ႈ ၽူႈတႅၼ်းၵူၼ်းမိူင်း၊ ၸဝ်ႈၼႃႈတီႈ၊ ၽူႈၵွၼ်းဢိူင်ႇ၊ ၵူၼ်းၼုမ်ႇ လႄႈ ၼၢင်းယိင်းၶဝ် ၶွၼ်ႈတုမ်ၵၼ် တီႈၸဝ်ႈမိူင်း ၾၢႆႇၼိူဝ်ဝၢၼ်ႈလွႆသဵဝ်ႈ ဢိူင်ႇဝၢၼ်ႈယၢတ်ႇ ၸႄႈဝဵင်းမိူင်းၵိုင် တုၵ်းယွၼ်းႁႂ်ႈၵိုတ်းယိုတ်းလွင်ႈၶုတ်းထၢၼ်ႇႁိၼ်လႄႈ ပၢင်ၵၢဝ်ႇၵိၼ်ႇၵူၼ်းဢၼ် ၶုတ်းထၢၼ်ႇႁိၼ် ၸဵမ်ၸိူဝ်းၼၼ်ႉ။

ၸဝ်ႈတူၼ်ၶူးလူင် ဢၵ်ႉၵသေၼ ဝတ်ႉ/ၵျွင်းလွႆလႅင် ပွၵ်ႉ 6 ဝဵင်းမိူင်းၵိုင် လၢတ်ႈဝႃႈ “ ယိူင်းဢၢၼ်း ဢၼ်လႆႈ
ၸတ်းႁဵတ်းပၢင်ယွၼ်းသူး/ ၵၢဝ်ႇၵိၼ်ႇၼႆႉ ၵူဝ်ထိူၼ်ႇၶိူဝ်းၽိူဝ်မႆႉ သၽႃႇဝ ႁဝ်းလူႉလႅဝ်၊ ပေႃးယဝ်ႉၵေႃႈ
ၵူၼ်းမိူင်းၵိုင်ႁဝ်းၶႃႈၼႆႉ ႁဵတ်းၵိၼ်ၼႃး ယွၼ်ႉၵူဝ်ၼႃးႁဝ်းလူႉလႅဝ်၊ ၵူဝ်ၵူၼ်းမိူင်းႁဝ်း ထူပ်းၽေးသၽႃႇဝ
လွင်ႈဢမ်ႇလီ၊ ၵူဝ်လွႆၾႆးတႅၵ်ႇမိူင်းႁဝ်း ၸဵမ်ၸိူဝ်းၼႆႉ” ဝႃႈၼႆ။

မၼ်းၸဝ်ႈ သိုပ်ႇလၢတ်ႈထႅင်ႈဝႃႈ ၶေႃႈၵၢဝ်ႇၵိၼ်ႇ သင်ၶၸဝ်ႈတင်းၵူၼ်းမိူင်း ဢၼ်ႁဝ်းၵၢဝ်ႇၵိၼ်ႇဝႃႈ
ၸုမ်းဢၼ် ၶုတ်းထၢၼ်ႇႁိၼ်တီႈၼႂ်းမိူင်းႁဝ်း ႁႂ်ႈမၼ်းထူပ်းၽေးၶဵၼ်သေၵမ်း ဝႃႈၼႆသၢမ်ၵမ်း၊ ၵူၼ်း မႃးၶုတ်း ထၢၼ်ႇႁိၼ်သၽႃႇဝ တီႈမိူင်းၵိုင်ႁဝ်း ႁႂ်ႈမၼ်းၸဵဝ်းလူႉလႅဝ်သေၵမ်း၊ ၵူၼ်းမႃးၶုတ်း ထၢၼ်ႇ ႁိၼ် ယႃႉႁူဝ်ၼမ်ႉ တႃႇႁဵတ်းၼႃး မိူင်းၵိုင်ႁဝ်း ႁႂ်ႈမၼ်းၸဵဝ်းတၢႆသေၵမ်း၊ ၵူၼ်းမႃးၶုတ်း ထၢၼ်ႇႁိၼ် ယႃႉထိူၼ်ႇမႆႉ ပႃႇထိူၼ်ႇ
တီႈမိူင်းၵိုင်ႁဝ်း ႁႂ်ႈမၼ်းၵွတ်းၽၢၼ်သေၵမ်း ဝႃႈၼႆ။

မိူဝ်ႈပီ 2014 မႃးၼၼ်ႉ ၶွမ်ႊပၼီႊပျေႉဢွင်ႇႁဵင်း တင်းႁဵင်းမဵတ်ႉတႃႇ လႆႈၶႂၢင်ႉၶုတ်းထၢၼ်ႇႁိၼ် တီႈ
လူင်ပွင်ၸိုင်ႈ ၼေႇပျီႇတေႃႇ တႃႇမႃးၶုတ်းတီႈမိူင်းၵိုင်။ ပိုၼ်ႉတီႈထၢၼ်ႇႁိၼ်ဢၼ်ၶဝ် လႆႈၶႂၢင်ႉႁဵတ်းၼၼ်ႉ
မီးမွၵ်ႈ 1000 ဢေႊၵိူဝ်ႊ ဝႃႈၼႆ။

ၵဵဝ်ႇၵပ်းလွင်ႈၶွမ်ႊပၼီႊ ဢၼ်မႃးၶုတ်းထၢၼ်ႇႁိၼ် တီႈၼႂ်းၸႄႈဝဵင်းမိူင်းၵိုင်ၼႆႉ  ၽူႈတႅၼ်းသၽႃး ၵူၼ်းမိူင်း ၸၢႆးသႅင်မိူင်း လႆႈတၢင်ႇလၢတ်ႈထိုင် ၼႂ်းသၽႃးၵူၼ်းမိူင်း တီႈၼေႇပျီႇတေႃႇဝႆႉ မိူဝ်ႈလိူၼ် ၾႅပ်ႊၿိဝ်ႊဝႃႊရီႊ ဝၼ်းတီႈ 26 ၼၼ်ႉ။

“ ယူႇတီႈၶႃႈႁဝ်းသေ လႆႈထွမ်ႇသဵင်ႁူဝ်ၸႂ်ၵူၼ်းမိူင်းၸႄႈဝဵင်းမိူင်းၵိုင်ႁဝ်း တၢင်ႇလၢတ်ႈမႃးၼၼ်ႉ ၶႃႈ ႁဝ်းလႆႈတၢင်ႇထိုင်ပိုတ်ႇၵႂၢမ်းထၢမ် တီႈၼႂ်းပၢင်ၵုမ်သၽႃးၵူၼ်းမိူင်း တီႈၽွင်းလူင် တီႈၼေႇ ပျီႇတေႃႇ ၼႂ်းဝၼ်းတီႈ 26/02/2017။ တေႃႈလဵဝ် ၼႆႉ ပဵၼ်ၽွင်းယၢမ်းဢၼ်တိုၵ်ႉတၢင်ႇဝႆႉ တီႈၽွင်း လူင်/ တွင်ႈထၢမ်ဝႆႉတီႈၽွင်းလူင်။ ၵူၺ်းၵႃႈ ၶဝ်ပႆႇမႃးတွပ်ႇ၊ ပေႃးထိုင်မႃး ပၢင်ၵုမ်သၽႃး ၵူၼ်းမိူင်း ပွၵ်ႈၵမ်း 5 တႄႇၶိုၼ်းတႄႉ ၸၢင်ႈၶဝ်ႈမႃးပႃး ၼႂ်းၶပ်ႉမၢႆဢၼ်ႁဝ်းၶႃႈလႆႈတၢင်ႇထၢမ်တွင်ႈဝႆႉၼၼ်ႉ ” ဝႃႈၼႆ။

မၼ်းၸၢႆးၵေႃႈ ယင်းလၢတ်ႈဝႃႈ လွင်ႈၶုတ်းထၢၼ်ႇႁိၼ်ၼႆႉ မၼ်းတေတုမ်ႉတိူဝ်ႉသၽႃႇဝၾိင်ႈတိုၼ်း ၵွပ်ႈၼၼ်လႄႈ ဢမ်ႇႁၼ်လီ ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 11/04/2017