ဢၼ်လူင်ပွင်ၸိုင်ႈ ဢွၵ်ႇၶၢဝ်ႇဝႃႈ မုၵ်ႉၸုမ်းဝႃႉ WNO တေလူင်းလၢႆးမိုဝ်း NCA ၼၼ်ႉဢမ်ႇၸႂ်ႈ။ ယူႇတီႈၸုမ်းဝႃႉ ဢၼ်ပဵၼ်လုၵ်ႈၸုမ်း UNFC ၼႆႉ တိုၵ်ႉၶတ်းၸႂ်ၵႂႃႇၸွမ်းၶေႃႈတူၵ်းလူင်း ဢၼ်တုၵ်းယွၼ်းဝႆႉ 9 ၶေႃႈၼၼ်ႉယူႇ- ၸဝ်ႈႁၢၼ်တႃႉဢၢႆႈၺုၼ်ႉ ၽူႈၼမ်းၼႂ်းၵူႈလွင်ႈလွင်ႈ မုၵ်ႉၸုမ်းၸိူဝ်ႉၸၢတ်ႈဝႃႉ (WNO) တွပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

ထၢမ်-လႆႈမႃးၶဝ်ႈႁူမ်ႈပၢင်ၵုမ်ၶၢဝ်းတၢင်း 2 ဝၼ်းၼႆႉ လႆႈၽွၼ်းလီသင်ၽွင်ႈၶႃႈ?။

တွပ်ႇ-လွင်ႈၽွၼ်းလီၼႆႉ မိူၼ်ၼင်ႇၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉႁဝ်း ၵူႈမူႇၵူႈၸုမ်း၊ ဝႆႉၸႂ်မိူၼ်ၼင်ႇ ႁဝ်းလႆႈၽၢတ်ႇယၢၼ်ၵၼ်ၵႂႃႇႁိုင်သေ ၶိုၼ်းလႆႈမႃးႁူပ်ႉထူပ်းၵၼ်။ ယဝ်ႉၵေႃႈ ၼႃႈၵၢၼ်ဢၼ်တေႁဵတ်းသၢင်ႈၵႂႃႇ တၢင်းၼႃႈၼၼ်ႉ လႆႈၶိုၼ်းမႃးဢုပ်ႇဢူဝ်းၵၼ်၊ ၼႃႈၵၢၼ် တႃႇတေႁဵတ်းသၢင်ႈၵႂႃႇၸွမ်းၵၼ်ၵေႃႈတိုၵ်ႉမီးၼမ်ယူႇ၊ လႆႈဢုပ်ႇဢူဝ်းၵၼ်ၸိူင်ႉၼႆ ႁဝ်းၵေႃႈယိၼ်းလီၸွမ်း။

ထၢမ်-လႆႈၶေႃႈတႅပ်းတတ်းသင်ၽွင်ႈၶႃႈ?။

တွပ်ႇ-ၶေႃႈတႅပ်းတတ်းၵေႃႈ မိူၼ်ၼင်ႇတေဢဝ်ပပ်ႉၵူႈမိုဝ်းပၢင်လူင် ၼၼ်ႉပဵၼ်လၵ်းၵၢၼ်ၵႂႃႇ၊ လွင်ႈလၵ်းၵၢၼ်ၾႅတ်ႊၻရႄႊၼႆႉ ႁဝ်းတေလႆႈႁဵတ်းၸိူင်ႉႁိုဝ်၊ လႆႈတူၵ်းလူင်းၵၼ်ၵႂႃႇၸိူင်ႉၼၼ်။

ထၢမ်-ပီႈၼွင်ႉၵူၼ်းမိူင်းၵေႃႈ ဢွၼ်ၵၼ်ထၢမ်မႃးဝႃႈ မိူဝ်ႈဝၼ်းတီႈ 31 (March 2017) NLD ႁဵတ်းလူင်ပွင်ၸိုင်ႈမႃးၶွပ်ႈတဵမ်ပီၼႆႉ မီးၶၢဝ်ႇဢွၵ်ႇမႃးဝႃႈ မူႇၸုမ်း WNO လႄႈလုၵ်ႈၸုမ်း UNFC တင်းႁႃႈမူႇႁႃႈၸုမ်း ဝႃႈတေလႆႈၸႂ်ၵႂႃႇလူင်းလၢႆးမိုဝ်းၵိုတ်းယိုဝ်းတူဝ်ႈမိူင်း NCA ၊ လွင်ႈၼႆႉၸွင်ႇၸႂ်ႈၶႃႈ၊ ငဝ်းလၢႆးလွင်ႈၼႆႉ 

ပဵၼ်ၸိူင်ႉႁိုဝ်ၶႃႈ?။

တွပ်ႇ-လွင်ႈၼႆႉ ႁဝ်းလႆႈငိၼ်းၶၢဝ်ႇမႃးဝႃႈၸိူင်ႉၼၼ် ႁဝ်းၵေႃႈတူၵ်းၸႂ်။ ႁဝ်းတူၵ်းၸႂ်ဝႃႈ ၵွပ်ႈသင်လႄႈပဵၼ်မႃး ၸိူင်ႉၼႆ၊ ပေႃးဝႃႈတီႈတႄႉမၼ်း မူႇၸုမ်းႁဝ်းၵေႃႈၶဝ်ႈပႃးၼႂ်း UNFC ဝႆႉယူႇ၊ ၽူႈတၢင်တူဝ် UNFC ႁဝ်းၵေႃႈ လိူၵ်ႈတင်ႈဝႆႉယူႇ၊ တႃႇတေဢုပ်ႇၵၼ်ၵၢၼ်မိူင်း၊ တႃႇဢုပ်ႇၸွမ်းလူင်ပွင်ၸိုင်ႈမၢၼ်ႈၶဝ်ၼႆႉ ႁဝ်းၵေႃႈၶဝ်ႈဝႆႉ DPN (တူဝ်တႅၼ်းၾၢႆႇဢုပ်ႇဢူဝ်းၵၢၼ်မိူင်း ၸုမ်းၸၢဝ်းၶိူဝ်း) ယူႇ၊ ၵူၺ်းၵႃႈ DPN ၼႆႉသမ်ႉပႆႇမွၵ်ႇလၢတ်ႈမႃးတီႈ ၸိူဝ်းလုၵ်ႈၸုမ်း UNFC ႁဝ်းၼႆႉၸိူင်ႉႁိုဝ်။ ၵမ်းၼႆႉ ၾၢႆႇလူင်ပွင်ၸိုင်ႈၶဝ်ဢွၵ်ႇၶၢဝ်ႇမႃးၸိူင်ႉၼႆ ႁဝ်းၵေႃႈပဵၼ်ဢၼ်တူၵ်းၸႂ် ၵႂင်ၸႂ်ၵၼ်။

ထၢမ်-ပွင်ႇဝႃႈတေႃႇထိုင်မိူဝ်ႈလဵဝ်ၼႆႉ ဢၼ်တႅပ်းတတ်းဝႆႉဝႃႈ တေၵႂႃႇလူင်းလၢႆးမိုဝ်း NCA ၸိူဝ်းၼႆႉ ဢမ်ႇပႆႇမီးသင်ၶႃႈၼေႃႈ?။

တွပ်ႇ-ပႆႇမီးသင်ၶႃႈ။ ဢိင်ၼိူဝ် UNFC (ၶွင်ႊသီႊၾႅတ်ႊၻရႄႊႁူမ်ႈတုမ်ၵူႈၸၢဝ်းၶိူဝ်း) ႁဝ်းတႄႉၵေႃႈ 

တိုၵ်ႉတေၶတ်းၸႂ်ၵႂႃႇၸွမ်းၶေႃႈတူၵ်းလူင်း ဢၼ်တုၵ်းယွၼ်းဝႆႉ 9 ၶေႃႈၼၼ်ႉယူႇၶႃႈ။

ထၢမ်-မိူၼ်ၼင်ႇၾၢႆႇ UNFC ၼႆႉၵေႃႈဝႃႈ ယင်းတိုၵ်ႉမီးတၢင်းမုင်ႈမွင်းၼိူဝ် NCA ယူႇ။ သင်ၸိူဝ်ႉဝႃႈ လႆႈၸႂ်ၵၼ် 9 ၶေႃႈၼႆၵေႃႈ တေၵႂႃႇၸွမ်းဢၼ်ၼႆႉယူႇ။ ၾၢႆႇၼိုင်ႈၵေႃႈ တၢင်းၼႂ်းပွတ်းဢွၵ်ႇၶူင်းၵေႃႈ 

မီးၸုမ်းဢူၺ်းလီပွတ်းႁွင်ႇ၊ ၸုမ်းဝႃႉ UWSA ၵေႃႈ ၶႂ်ႈဢွၼ်ႁူဝ်ၵၢၼ်မိူင်းသေ ၶႂ်ႈၵႂႃႇတၢင်းၼိုင်ႈ။ လွင်ႈၼႆႉ ႁၼ်ထိုင်ၸိူင်ႉႁိုဝ်ၶႃႈ?။

တွပ်ႇ- ၼၼ်ႉတႄႉတၢင်းယိူင်းဢၢၼ်းၽႂ်မၼ်း၊ တေဢမ်ႇမိူၼ်ၵၼ်၊ တၢင်းႁၼ်ထိုင်ၵေႃႈဢမ်ႇမိူၼ်ၵၼ်။ 

တၢင်းႁၼ်ထိုင်ၼႆႉ မၼ်းၸၢင်ႈပိူင်ႈၵၼ် မၼ်းၸၢင်ႈတႅၵ်ႇယႅၵ်ႈၵၼ်ယူႇ။

ထၢမ်-ပိူင်လူင်မၼ်း ၵူၼ်းဢၼ်ယူႇႁူမ်ႈၵၼ်ၼႂ်းမိူင်းၸိုင်ႈတႆးႁဝ်းၶႃႈၼႆႉ ပေႃးမီးတၢင်းတႅၵ်ႇယႅၵ်ႈၵၼ်ၸိူင်ႉၼႆ ၼင်ႇႁိုဝ်ပေႃးတေဢမ်ႇတႅၵ်ႈယႅၵ်ႈၵၼ်၊ ၼင်ႇႁိုဝ်ပေႃးတေပဵၼ်ပၢၵ်ႇလဵဝ်သဵင်လဵဝ်ၵၼ် ၽွမ်ႉႁူမ်ႈၵၼ်ၵႂႃႇၼႆႉ ၵိုင်ႇလီပဵၼ်ၸိူင်ႉႁိုဝ်ၽွင်ႈၶႃႈ?။

တွပ်ႇ-တၢင်းႁၼ်ထိုင်ၶႃႈႁဝ်းတႄႉ ဝၼ်းၼိုင်ႈမႃးၸဝ်ႉၸဝ်ႉ ႁဵတ်းႁိုဝ်ၵေႃႈတေလႆႈမႃးၶိုၼ်းၶွၼ်ႈတုမ်ၵၼ်ယူႇ။ ပေႃးၵူၼ်းမိူင်းတႆး ဢမ်ႇမႃးၶွၼ်ႈတုမ်ၵၼ်တင်းမူတ်း မၼ်းတေဢမ်ႇယဝ်ႉလႆႈ၊ ၵႂႃႇၽႂ်ၵႂႃႇမၼ်းဢၼ်ဝႃႈၼၼ်ႉ မၼ်းတိုၼ်းဢမ်ႇပဵၼ်လႆႈၶႃႈ။

ထၢမ်-ဢိင်ၼိူဝ်ငဝ်းလၢႆးၵၢၼ်မိူင်းတေႃႈလဵဝ်သေ ၶႂ်ႈၾၢၵ်ႇၵႂၢမ်းထိုင်ပီႈၼွင်ႉဝႃႉ လႄႈပီႈၼွင်ႉၵူၼ်းမိူင်းႁဝ်း 

ၸိူင်ႉႁိုဝ်ၽွင်ႈၶႃႈ?။

တွပ်ႇ-မိူၼ်ၼင်ႇငဝ်းလၢႆးမိူဝ်ႈလဵဝ်ၼႆႉ မူႇၸုမ်းႁဝ်းတၢင်းၼႆႉၵေႃႈ ၶတ်းၸႂ်ႁဵတ်းၵၢၼ်လွင်ႈငမ်းယဵၼ်ၵႂႃႇယူႇ၊ တႃႇၵူၼ်းဝၢၼ်ႈၵူၼ်းမိူင်းႁဝ်း ပေႃးတေလႆႈလွင်ႈငမ်းယဵၼ်ၼၼ်ႉ ႁဝ်းၵေႃႈၶတ်းၸႂ်ၵႂႃႇယူႇၼႆ ၶႂ်ႈသင်ႇလၢတ်ႈမီးၸိူင်ႉၼႆၶႃႈ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 8-9/04/2017 ၶၢဝ်းတၢင်းသွင်ဝၼ်းၼၼ်ႉ ၽူႈၼမ်းၸိၵ်းၸွမ်ၸၢဝ်းၶိူဝ်း ၸိူဝ်းယိပ်းၵွင်ႈၵၢင်ႇ လုၵ်ႉၽိုၼ်ႉ ၸိူဝ်းလူင်းလၢႆးမိုဝ်းၵိုတ်းယိုဝ်းတူဝ်ႈမိူင်း (NCA) လႄႈ ၸိူဝ်းပႆႇလႆႈလူင်းလၢႆးမိုဝ်း NCA ဢၼ်ပဵၼ်လုၵ်ႈၸုမ်း ၶွင်ႊသီႊၾႅတ်ႊၻရႄႊႁူမ်ႈတုမ်ၵူႈၸၢဝ်းၶိူဝ်း (UNFC) ႁူမ်ႈတင်းမူတ်း 15 ၸုမ်း ၸတ်းႁဵတ်းပၢင်ၵုမ်ၵၼ် တီႈၼႂ်းဝဵင်းၵဵင်းမႆႇ ၸိုင်ႈထႆး။ ဢိင်ၼိူဝ်တိုဝ်ႉတၢင်းၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ 

လႆႈတွင်ႈထၢမ်တႃႉဢၢႆႈၺုၼ်ႉ တူဝ်တႅၼ်းၸုမ်းၸိူဝ်ႉၸၢတ်ႈဝႃႉ ဢၼ်မႃးၶဝ်ႈႁူမ်ႈပၢင်ၵုမ်။

ၸုမ်းၶၢဝ်ႇၽူႈတွႆႇႁွၵ်ႈ (11/04/2017)