ၵူၼ်းမိူင်းၼႂ်းပိုၼ်ႉတီႈ ၸႄႈဝဵင်းမိူင်းၽျၢၵ်ႈ ဢမ်ႇႁၼ်လီ ၵၢၼ်ၶုတ်းၶမ်း ၼႂ်းၸႄႈဝဵင်းမိူင်းၽျၢၵ်ႈ၊ ၵွပ်ႈဝႃႈ 

ႁဵတ်းႁႂ်ႈတုမ်ႉတိူဝ်ႉၵူၼ်းဝၢၼ်ႈ၊ ၵေးၼမ်ႉလူင် ဢၼ်လႆလူင်းႁိမ်းဝဵင်းမိူင်းၽျၢၵ်ႈ ဢၼ်ၵူၼ်းမိူင်း လႆႈၸႂ်ႉတိုဝ်းမႃးၼၼ်ႉၵေႃႈ ၶုၼ်ႇဢူၼ် ၸႂ်ႉဢမ်ႇလႆႈ။

ၵဵဝ်ႇၵပ်းလွင်ႈၼႆႉ ၽူႈပွင်ၵၢၼ်ငဝ်ႈငုၼ်း ပႃႇတီႇသိူဝ်ၽိူၵ်ႇ (SNDP) ၸႄႈဝဵင်းမိူင်းၽျၢၵ်ႈ လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ- ဢွင်ႈတီႈၶုတ်းၶမ်းၼႆႉ ပဵၼ်တီႈႁိမ်းဝၢၼ်ႈၵွင်းမူး ဢိူင်ႇၵွင်းမူး ၸႄႈတွၼ်ႈမိူင်းၽျၢၵ်ႈ။ 

ၸွမ်းၼင်ႇ ဢၼ်လႆႈႁပ်ႉလွင်ႈၵူၼ်းဝၢၼ်ႈတၢင်ႇလၢတ်ႈမႃးၼၼ်ႉ ၵၢၼ်ၶုတ်းၶမ်းၼႆႉ မၼ်းတုမ်ႉတိူဝ်ႉၵူၼ်းဝၢၼ်ႈတႄႉတႄႉ။ ဢွင်ႈတီႈၶုတ်းၶမ်းၼႆႉ မီးႁိမ်းဝၢၼ်ႈၵူၼ်းၵူၺ်းလႄႈ တုမ်ႉတိူဝ်ႉပႃးသူၼ်ႁိူၵ်ႈၵူၼ်းဝၢၼ်ႈ- ဝႃႈၼႆ။

"လွင်ႈၶုတ်းၶမ်းၼႆႉ ၶွမ်ႊပၼီႊဢူးဢႃးၶျၢင်ႇ ၶဝ်လုၵ်ႉတႃႈလိူဝ်ႇမႃးႁဵတ်း။ ဝၢၼ်ႈၵွင်းမူးၼႆႉ ပဵၼ်ဝၢၼ်ႈ ပီႈၼွင်ႉလႃးႁူႇ (မူးသိူဝ်း)တင်းပီႈၼွင်ႉဢႃးၶႃႇ ယူႇသဝ်းလေႃးလႄးၵၼ်။ လိူဝ်သေၼၼ်ႉ ၸွမ်းႁိမ်းႁွမ်း 

ၵေးၼမ်ႉလူင် ဢၼ်လႆလူင်းႁိမ်းဝဵင်းမိူင်းၽျၢၵ်ႈၵေႃႈ ၶဝ်လၵ်ႉႁဵတ်းထႅင်ႈ၊ ၶဝ်ဢဝ်ႁိူဝ်းမႃးၸႂ်ႉၼမ်ၼႅၼ်ႇ၊ 

ႁဵတ်းႁႂ်ႈၼမ်ႉၵေႃႈၶုၼ်ႇ၊ တႃႇၵူၼ်းမိူင်းၵေႃႈထူပ်းတၢင်းတုၵ်ႉၶယၢပ်ႇၽိုတ်ႇ။ ၵွပ်ႈၼၼ် လွင်ႈၶုတ်းၶမ်းၼႆႉ 

ႁဵတ်းႁႂ်ႈၵူၼ်းမိူင်းဢမ်ႇႁၼ်လီ"- ဝႃႈၼႆ။

မႄႈၼမ်ႉလူင်ၼႆႉ လႆႈလူင်းႁိမ်းဝဵင်းမိူင်းၽျၢၵ်ႈ ဝူင်ႈၵၢင်ဝဵင်းမိူင်းၽျၢၵ်ႈ- ဝဵင်းတႃႈလိူဝ်ႇ၊ လႆႈလတ်းၽၢၼ်ႇ သဵၼ်ႈတၢင်းလူင် မိူင်းႁူမ်ႈတုမ်။ ပေႃးပဵၼ်တီႈဢၼ်ၸမ်တၢင်းလူင်ၼၼ်ႉ ၶွမ်ႊပၼီႊၶဝ်ၶုတ်းၵၢင်ၶိုၼ်း- 

ၼႆယဝ်ႉ။

ဢွၼ်ၼႃႈမိူဝ်ႈၶဝ်ပႆႇၶုတ်းၶမ်းၼၼ်ႉ ၾၢႆႇၶွမ်ႊပၼီႊၶဝ်မႃး တွၼ်ႈပၼ်ၵူၼ်းဝၢၼ်ႈ တီႈဝၢၼ်ႈၼႃးၵွင်းမူး 

ၼိုင်ႈႁိူၼ်းငိုၼ်းႁူၵ်းမိုၼ်ႇ တင်းၼိူဝ်ႉမူၼိုင်ႈၸွႆႉ၊ ၵူၼ်းမိူင်းၵေႃႈဢမ်ႇပွင်ႇၸႂ်သေႁပ်ႉဢဝ် လူင်းလၢႆးမိုဝ်းပၼ်ၶဝ်။ ဝၢၼ်ႈၵွင်းမူးၼႆႉ လင်ႁိူၼ်းၵူၼ်းမီးမွၵ်ႈ 60 လင်၊ မီးမွၵ်ႈ 2-3 ႁိူၼ်းၵူၺ်း ဢၼ်လႅပ်ႈဢမ်ႇႁပ်ႉ 

ၶူဝ်းၶွင် ဢၼ်တၢင်းၶွမ်ႊပၼီႊၶဝ်ပၼ်ၼၼ်ႉ။ လွင်ႈဝႃႈ ပေႃးၸမ်ဝၢၼ်ႈ ၶုတ်းၶမ်းဢမ်ႇလႆႈၼၼ်ႉ ၵူၼ်းမိူင်း

ၸင်ႇလႆႈႁူႉမႃး မိူဝ်ႈလဵဝ်ၵူၺ်း။ မိူဝ်ႈလဵဝ် ၶဝ်တႄႇၶုတ်းမႃး လႆႈမွၵ်ႈ 4-5 လိူၼ်ယဝ်ႉ- ၸၢႆးၶမ်းၸၼ် လၢတ်ႈ။

 

လွင်ႈၼႆႉ ၸဝ်ႈၼႃႈတီႈၾၢႆႇၽွင်းငမ်း ၼႂ်းပိုၼ်ႉတီႈၶဝ်ၵေႃႈ ဢမ်ႇသူၼ်ၸႂ်သင်။ ၵွပ်ႈၼၼ် တေတၢင်ႇထိုင် 

လူင်ပွင်ၸိုင်ႈ၊ သင်လူင်ပွင်ၸိုင်ႈ ဢမ်ႇယွမ်းႁဵတ်းၵၢၼ်ၵေႃႈ တေၵွင်ႉသၢၼ်တင်းၸုမ်းသိုဝ်ႇ Media 

သေႁဵတ်းၵၢၼ်ၵႂႃႇ- ၸၢႆးၶမ်းၸၼ် လၢတ်ႈၼႄပႃးၼင်ႇၼႆ။

ဝၢၼ်ႈၵွင်းမူး ဢွင်ႈတီႈၶုတ်းၶမ်းၼႆႉမီးၾၢႆႇၸၢၼ်းမိူင်းၽျၢၵ်ႈ၊ ယၢၼ်ဝဵင်းမိူင်းၽျၢၵ်ႈမွၵ်ႈ 10 လၵ်း၊ ယူႇၼႂ်း

ဢိူင်ႇၵွင်းမူး ၸႄႈဝဵင်းမိူင်းၽျၢၵ်ႈ ၸိုင်ႈတႆးပွတ်းဢွၵ်ႇ။ ဝဵင်းမိူင်းၽျၢၵ်ႈ မီးၼႂ်းဝူင်ႈၵၢင်ဝဵင်းၵဵင်းတုင်-

တႃႈၶီႈလဵၵ်း၊ ယၢၼ်ၵႆဝဵင်းၵဵင်းတုင် မွၵ်ႈ 50 လၵ်း။ 

ၸုမ်းၶၢဝ်ႇၽူႈတွႆႇႁွၵ်ႈ (28/04/2017)