ၵေႃလိၵ်ႈလၢႆးၼမ်ႉၶမ်း ၸတ်းပၢင်သွၼ်လိၵ်ႈတႆးလႄႈ ၾိင်ႈႁိတ်ႈႁွႆးတႆး ၽွင်းၶၢဝ်းမႆႈ
ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း ၸတ်းႁဵတ်းပၢင်သွၼ်လိၵ်ႈတႆးၶၢဝ်းမႆႈလႄႈ
ၾိင်ႈႁိတ်ႈႁွႆးတႆး လၢႆဝၢၼ်ႈ လၢႆပွၵ်ႉ ၼႂ်းၸႄႈဝဵင်းၼမ်ႉၶမ်း မီးၽူႈၶိုၼ်ႈႁဵၼ်း ၼပ်ႉပၢၵ်ႇ။
ဝၼ်းတီႈ 26 / 04/ 2017 ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼမ်ႉၶမ်း ၸတ်းႁဵတ်းပၢင်
ဢုပ်ႇဢူဝ်း လွင်ႈလႆႈပိုတ်ႇပၢင်သွၼ်လိၵ်ႈတႆးၶၢဝ်းမႆႈလႄႈ ၾိင်ႈႁိတ်ႈႁွႆးတႆး ဢၼ်ပိုတ်ႇလၢႆဝၢၼ်ႈ
လၢႆပွၵ်ႉ ၼႂ်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ မိူၼ်ၼင်ႇ ဝၢၼ်ႈႁူဝ်ၵၢတ်ႇ၊ ဝဵင်းသႃႇ၊ ၵုၼ်လူင်၊ မၢၼ်ႈၵွင်း၊ ၵုင်းသႃႇ ၸိူဝ်းၼႆႉ ။
ၸၢႆးသၢမ်မူၼ်ႇ ႁူဝ်ပဝ်ႈၵေႃလိၵ်ႈလၢႆး လၢတ်ႈဝႃႈ -“ ပၢင်သွၼ်ႁဝ်းၶႃႈၼႆႉ မီးယိူင်းဢၢၼ်း လူင် 4 ၶေႃႈ မိူၼ်ၼင်ႇ ၵဵပ်းႁွမ် ၊ ယုၵ်ႉယွင်ႈ၊ လိၵ်ႈလၢႆးလႄႈ ၾိင်ႈငႄႈၸိူဝ်းၼႆႉ ၵွပ်ႈၼၼ်လႄႈႁဝ်း
လူဝ်ႇဢွၼ် ၵၼ် မီးယိၼ်ႉ ၵႂႃႇၼႂ်းတၢင်းတီႈလီ ယိၼ်ႉၶႂ်ႈႁဵၼ်းၶႂ်ႈသွၼ် ယိၼ်ႉႁၵ်ႉၸိူဝ်ႉၶိူဝ်း
ၸိူဝ်းၼႆႉ” ဝႃႈၼႆ။
ပၢင်သွၼ်ၼႆႉ ပူင်သွၼ်ပၼ် တႃႇၶၢဝ်းတၢင်း 30 - 45 ဝၼ်း။ မေႃသွၼ်မီး 9 ၵေႃႉ မိူၼ်ၼင်ႇ ၸၢႆးၸၢမ်ႇထုၼ်း၊ ၸၢႆးလိူၼ်မၢဝ်း၊ ၼၢင်းယေႈလႅင်းႁွမ် ၊ ၼၢင်းၽူၺ်းလႅင်း ၸိူဝ်းၼႆႉ ။ ပူင်သွၼ် ပၼ်လိၵ်ႈတႆးလႄႈ ၾိင်ႈႁိတ်ႈႁွႆးတႆး မိူၼ်ၼင်ႇ ပဝ်ႇပီႇၼမ်ႉတဝ်ႈ၊ တွႆႇတိင်ႇ ၊ ႁႆႇၵွင် ၊ လၢႆးၶဵၼ်းႁူဝ် - ၸိူဝ်းၼႆႉ ။
ၸၢႆးၼေႃႇ ၽူႈၶဝ်ႈပႃးပွင်ပဵၼ်ပၢင်သွၼ် လၢတ်ႈဝႃႈ - “ လိၵ်ႈတႆးႁႂ်ႈလႆႈသွၼ်ၵူႈတီႈ လိၵ်ႈလၢႆး ၼႆႉ ပဵၼ်ပိုၼ်ႉထၢၼ်ၸိူဝ်ႉၶိူဝ်းဢၼ်ၼိုင်ႈ ပေႃးဢမ်ႇမီးပိုၼ်ႉထၢၼ်လိၵ်ႈလၢႆးၾိင်ႈထုင်းၸိုင် ၸိူဝ်ႉၶိူဝ်း
ႁဝ်းၵေႃႈ မၼ်းဢမ်ႇတဵမ်ထူၼ်ႈလႆႈ ၊ ၽူႈလူင်ႉလႅၼ်ႇလိၵ်ႈတႆးႁဝ်း ၵေႃႈႁႂ်ႈသိုပ်ႇၶူၼ်ႉၶႂႃႉ တႅမ်ႈဢွၵ်ႇပပ်ႉႁဵၼ်း လိၵ်ႈတႆးၵႂႃႇထႅင်ႈတိၵ်းတိၵ်းသေၵမ်း ” ဝႃႈၼႆ။
တီႈဝဵင်းၼမ်ႉၶမ်းၼႆႉ ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆးသေ ၸတ်းႁဵတ်းပၢင်သွၼ် လိၵ်ႈတႆး လႄႈ ၾိင်ႈႁိတ်ႈႁွႆးတႆးမႃးၵူႈပီ ၼိုင်ႈပီလႂ်မီးပၢင်သွၼ် 2 ပွၵ်ႈ ၶၢဝ်းမႆႈလႄႈၶၢဝ်းၾူၼ် ဝႃႈၼႆ။
ၸုမ်းၶၢဝ်ႇၽူႈတွႆႇႁွၵ်ႈ / သၢႆမွၵ်ႇႁွမ်
28/04/2017
Tags: Education, News
