ပႃႇတီႇသိူဝ်ၽိူၵ်ႇ SNDP ၸတ်းပၢင် ဢုပ်ႇဢူဝ်းသၢင်ႈၵၢၼ်ၵူၼ်းၼုမ်ႇ ၼႂ်းတူင်ႇဝူင်းပၢႆးမိူင်း ၽူႈယႂ်ႇၵူၼ်းလူင် တူဝ်တႅၼ်းၵူၼ်းၼုမ်ႇ 16 ၸႄႈဝဵင်းၶဝ်ႈႁူမ်ႈ။

ဝၼ်းတီႈ 27/04/2017 တီႇမူဝ်ႇၶရႅတ်ႉတိၵ်ႉ ပႃႇတီႇၸၢဝ်းၶိူဝ်းတႆး ႁိုဝ်ပႃႇတီႇ သိူဝ်ၽိူၵ်ႇ SNDP ၸတ်းႁဵတ်း
ပၢင်ႇဢုပ်ႇဢူဝ်း သႂ်ႇၸိုဝ်ႈဝႃႈ - “ပၢင်ဢုပ်ႇဢူဝ်းသၢင်ႈၵၢၼ် ၵူၼ်းၼုမ်ႇ ၼႂ်းတူင်ႇဝူင်းပၢႆးမိူင်း ” ၸတ်းႁဵတ်းၵႂႃႇ တီႈႁူင်းလိုဝ်ႈသဝ်း ၵေႃးလီႇ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။


ၼႂ်းပၢင်ၼႆႉ ႁူဝ်ပဝ်ႈပႃႇတီႇသိူဝ်ၽိူၵ်ႇ လုင်းၸၢႆးဢၢႆႈပဝ်း ၊ ၵႅမ်ႁူဝ်ပဝ်ႈ လုင်းၸၢႆးသွင်သီႇ ၊ ၽူႈပွင်ၵၢၼ်ငဝ်ႈငုၼ်း ၼၢင်းဝႃၼူႉ ၸိူဝ်းၼႆႉ ဢိၵ်ႇတူဝ်တႅၼ်းၵူၼ်းၼုမ်ႇ 16 ၸႄႈဝဵင်း ႁူဝ်ၵူၼ်း 43 ၵေႃႉ ၶဝ်ႈႁူမ်ႈ။


ၼႂ်းပၢင်ၼႆႉ ဢုပ်ႇဢူဝ်းၵၼ် လၢႆလွင်ႈမိူၼ်ၼင်ႇ ထတ်းသၢင်ၶိုၼ်းလွၵ်းဢူၼ်ႈလွၵ်းၶႅင်ပႃႇတီႇ၊ ငဝ်းလၢႆးၵၢၼ်
မိူင်းယၢမ်းလဵဝ်၊ လွင်ႈပၼ်ႁႃယႃႈမဝ်းၵမ်၊ လွင်ႈပၢႆးပၺ်ၺႃလႄႈ ပၼ်တၢင်းႁၼ်ထိုင် တႃႇတမ်းၽႅၼ် မိူဝ်းၼႃႈ ၸိူဝ်းၼႆႉ။


ၸၢႆးဢၢႆႈပဝ်ႈ ႁူဝ်ပဝ်ႈပႃႇတီႇသိူဝ်ၽိူၵ်ႇ လၢတ်ႈဝႃႈ - “ ၾၢႆႇပၢႆးပၺ်ၺႃ ၼႂ်းၵူၼ်းၼုမ်ႇတႆးႁဝ်း တေလႆႈဝႃႈ
တိုၵ်ႉတူၵ်းလိုၼ်းယူႇ ၵၢၼ်ပၢႆးမိူင်းၵေႃႈယဝ်ႉ၊ ပၢႆးပၺ်ၺႃၵေႃႈယဝ်ႉ၊ တူင်ႇဝူင်းၵူၼ်းၵေႃႈယဝ်ႉ ပေႃးမႃးတူၺ်း ၶၢင်၊ ၶျၢင်း၊ ရၶႅင်ႇၶဝ်ၼႆႉ ၵႂႃႇၵႆယဝ်ႉ ။  လွင်ႈၾၢႆႇပၢႆးမိူင်းၵေႃႈ ႁဝ်းတိုၵ်ႉသုမ်းပိူၼ်ႈယူႇ  ၵွပ်ႈၼၼ် လူဝ်ႇသိုပ်ႇ
ၶတ်းၸႂ်ၵႂႃႇ ၼမ်ၼမ်။ ၾၢႆႇၼိုင်ႈၵေႃႈ လွင်ႈယႃႈမဝ်းၵမ်ၼႆႉ ၵူၼ်းၼုမ်ႇႁဝ်းလူဝ်ႇၾၢင်ႉသတိသေ လူဝ်ႇ ဢွၼ်ၵၼ် ဝႄႈ ယွၼ်ႉမၼ်းဢမ်ႇပၼ်ၽွၼ်းလီသင် ၸၢင်ႈဢဝ်ၸိူဝ်ႉၶိူဝ်းႁဝ်းမူၺ်ႉပႅတ်ႈၵူၺ်း ” ဝႃႈၼႆ ။


ၼၢင်းဝႃႇၼူႉ ၽူႈပွင်ၵၢၼ်ငဝ်ႈငုၼ်း SNDP လၢတ်ႈဝႃႈ -“ပေႃးႁဝ်းၶႂ်ႈၵတ်ႉၶႅၼ်ႇၵၢၼ်မိူင်း ၶႅၼ်ႇၾၢႆႇပၵ်းပိူင်
ၸိုင် ဢၼ်ပဵၼ်ၽူႈၶဵၼ်ႁဝ်းၼႆႉ မၼ်းပဵၼ်မၢၼ်ႈၶႃႈယဝ်ႉ  ၵွပ်ႈပိူဝ်ႈၼၼ်လႄႈ လိၵ်ႈမၢၼ်ႈ၊ ၵႂၢမ်းမၢၼ်ႈ၊ ပၵ်းပိူင် မိူင်းႁူမ်ႈတုမ်ၼႆႉႁဝ်းလူဝ်ႇႁူႉ ၊ ပိုၼ်းႁဝ်းၵေႃႈလူဝ်ႇႁူႉ၊ ႁဵတ်းၼၼ်ၸင်ႇႁဝ်းတေၶိုတ်းပိူၼ်ႈလႆႈ ၵွပ်ႈၼၼ် ယွၼ်းႁႂ်ႈပေႃႈမႄႈပီႈၼွင်ႉႁဝ်း ဢွၼ်ၵၼ်ပၼ်ႁႅင်းပၢႆးပၺ်ၺႃ လုၵ်ႈဢွၼ်ႇၼမ်ၼမ်  ႁႂ်ႈပဵၼ်မႃး၊ မီးမႃး ၽူႈဢွၼ်ႁူဝ်ၸိူဝ်ႉၸၢတ်ႈ  မိူဝ်းၼႃႈၼမ်ၼမ်သေၵမ်း ” ဝႃႈၼႆ။


ၶေႃႈထတ်းသၢင်၊ ၶေႃႈပၼ်တၢင်းႁၼ်ထိုင် ဢၼ်လုၵ်ႉမႃးတီႈၵူၼ်းၼုမ်ႇ ၼႂ်းပၢင်ဢုပ်ႇၵုမ်ၼႆႉ တေဢဝ်ၵႂႃႇ
ထတ်းသၢင် ဢုပ်ႇဢူဝ်းၼႂ်းပၢင်ၵုမ်လူင်ငဝ်ႈငုၼ်း ပိူဝ်ႈတႃႇတေ တႅပ်းတတ်းလႄႈ တမ်းဝၢင်းၽႅၼ်ၵၢၼ်
သိုပ်ႇၵႂႃႇ - ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/သၢႆမွၵ်ႇႁွမ်
28/04/2017