ၸဝ်ႈႁႆႈၸဝ်ႈၼႃးမိူင်းသီႇပေႃႉ ၼႄၵၢင်ၸႂ်တုၵ်းယွၼ်းၶိုၼ်းတီႈလိၼ် ဢၼ်လူင်ပွင်ၸိုင်ႈမၢၼ်ႈယိုတ်းဝႆႉ
ပီယၢဝ်းၶၢဝ်းႁိုင်ၼၼ်ႉ ယွၼ်ႉဢမ်ႇမီးလွင်ႈၸႂ်ႉတိုဝ်းၼႆသေ ႁႂ်ႈပၼ်ၶိုၼ်းၸဝ်ႈၶွင် ၸဝ်ႈႁႆႈၸဝ်ႈၼႃး ၶိုၼ်း။
 

ဝၼ်းတီႈ 27/04/2017 ၸဝ်ႈႁႆႈၸဝ်ႈၼႃးဝၢၼ်ႈၶႃလိုင်ႈ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ဢဵၼ်ႁႅင်း မွၵ်ႈ 30 ၶဝ်ႈႁူမ်ႈ ၼႄၵၢင်ၸႂ်။ တုၵ်းယွၼ်းႁႂ်ႈၵူတ်ႇထတ်းပၼ်ၶိုၼ်းတီႈလိၼ် ဢၼ်မီးႁူင်း ၸၢၵ်ႈမႆႉ မၢႆ 112 ၶၼ်ၶၼ်ဝႆးဝႆး၊ ႁႂ်ႈႁူဝ်ပဝ်ႈသၽႃးၸႄႈမိူင်း ၵူတ်ႇထတ်းပၼ်သေ ၶိုင်ပၼ်ႁႂ်ႈ ၸဝ်ႈႁႆႈ ၸဝ်ႈၼႃး လႆႈၶိုၼ်းလိၼ်သူၼ်ၸဝ်ႈၵဝ်ႇ။


ၵူၼ်းမိူင်း ၶဝ်ႈႁူမ်ႈဢွၵ်ႇၼႄၵၢင်ၸႂ် ၵေႃႉၼိုင်ႈလၢတ်ႈဝႃႈ “တႃႇႁဵတ်းႁူင်းၸၢၵ်ႈမႆႉ မၢႆ 112 ၼႆသေ
လူင်ပွင်ၸိုင်ႈယိုတ်းဢဝ်လိၼ်သူၼ်ၵူၼ်းဝၢၼ်ႈ တၢင်းၵႂၢင်ႈမီး မွၵ်ႈ 11 ဢေႊၶိူဝ်ႊၸဵမ်မိူဝ်ႈပူၼ်ႉမႃး 30 ပီ။
ပဵၼ်သူၼ်ၵူၼ်းဝၢၼ်ႈၶႃလိုင်ႈ 15 ၵေႃႉ ။ ယၢမ်းလဵဝ် ႁူင်းၸၢၵ်ႈမႆႉၵေႃႈဢမ်ႇႁဵတ်းၵၢၼ် ၵိုတ်း လိုဝ်ႈမႃးမီးမွၵ်ႈ 7 ပီယဝ်ႉလႄႈ ႁဝ်းၶႃႈ ၵူၼ်းဝၢၼ်ႈတုၵ်းယွၼ်း ႁႂ်ႈၸႅၵ်ႇသူၼ်လိၼ်ၼၼ်ႉ ပၼ်ၵူၼ်း ဝၢၼ်ႈၶိုၼ်း” ဝႃႈၼႆ။

 
တႃႇႁႂ်ႈလႆႈၽုၵ်ႇသွမ်ႈၵိၼ်ၶိုၼ်း ၼိူဝ်လိၼ်သူၼ် ၸဝ်ႈၵဝ်ႇၼႆသေ မိူဝ်ႈပီ 2014 ၼၼ်ႉၵေႃႈ ၸဝ်ႈႁႆႈ ၸဝ်ႈၼႃး 15 ၵေႃႉ လူင်းလၢႆးမိုဝ်း သူင်ႇၽိုၼ်လိၵ်ႈတုၵ်းယွၼ်း ၶိုၼ်းတီႈၾၢႆႇတႅၵ်ႈၼႃႈလိၼ် လူင်ပွင် ၸိုင်ႈယဝ်ႉ
ၵမ်းၼိုင်ႈ။


ဝၢၼ်ႈၶႃလိုင်ႈၼႆႉမီးၼိူဝ်သဵၼ်ႈတၢင်းဢွၵ်ႇဝဵင်းသီႇပေႃႉၵႂႃႇတၢင်းလႃႈသဵဝ်ႈ။ တိတ်းၸပ်းလၢၼ်ႇထူဝ်း ၵဵတ်ႉ။


မိူဝ်ႈဝၼ်းတီႈ 26/04/2017 ၽူႈတႅၼ်းသၽႃးၸႄႈမိူင်းတင်း ပေႃႈမႄႈပီႈၼွင်ႉၵူၼ်းမိူင်း ပႃးၾၢႆႇတႅၵ်ႈ ၼႃႈလိၼ် တီႈၵႄႈၵၢင် ဢိူင်ႇၼမ်ႉလၼ်ႈ တင်း ဢိူင်ႇၼမ်ႉမေႃႇသူၺ်ႇ ၸႄႈဝဵင်းသီႇပေႃႉ သၢၼ်မိုဝ်း ၵၼ်ၵႂႃႇ တႅၵ်ႈတီႈလိၼ် ဢၼ်တပ်ႉၶမယ 506 ယိုတ်းဝႆႉၼၼ်ႉ။ ႁႂ်ႈၵူၼ်းမိူင်းပေႃးလႆႈႁူႉ ၸႅင်ႈလႅင်းဝႃႈ တီႈလိၼ်ဢၼ်
တပ်ႉယိုတ်း လိူဝ်ၵႃႈႁိုဝ် ၸဵမ်ၸိူဝ်းၼႆႉ။

ၸုမ်းၶၢဝ်ႇၽူႈတွႆႇႁွၵ်ႈ 28/04/2017