ယေႃးမုၼ် ၽူႈဢႃယုသုင် 75 ၶိုၼ်ႈၼိူဝ် ၸၢဝ်းတႆးဝဵင်းၸေႊလၢၼ်ႉ ၸတ်းပၢင်ၶဝ်ႈႁူမ်ႈ ႁပ်ႉဢဝ် ၵုသူလ် 115 ၵေႃႉ။

ဝၼ်းတီႈ 18/04/2017 ယၢမ်းဝၢႆးဝၼ်း 14:30 မူင်းပၢႆ ၸဝ်ႈတူၼ်ၶူးသုပၺ်ၺႃ  ဢွၼ်ႁူဝ်ၼမ်း ၼႃႈ ပေႃႈမႄႈပီႈၼွင်ႉတၵ်ႉၵႃႇသတ်ႉထႃး ၼႂ်းဢိူင်ႇၸေႊလၢၼ်ႉသေ ၸတ်းႁဵတ်းပၢင် ၼွမ်းတမ်ႇ လမ်ႇႁူဝ်ၵူၼ်းထဝ်ႈ ၽူႈဢႃယုသုင် 75 ပီၶိုၼ်ႈၼိူဝ်၊ ၸတ်းႁဵတ်းတီႈဝတ်ႉၵမ်ႇမထၢၼ်း ဢိူင်ႇၸေႊ လၢၼ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၸၢႆးမၢဝ်းဢွၼ်ႇ ၽူႈၸွႆႈၶပ်းၶိုင်ပၢင်ၵၼ်ႇတေႃး ၵူၼ်းထဝ်ႈ လၢတ်ႈဝႃႈ “ ပၢင်ၵၼ်ႇတေႃးၵူၼ်းထဝ်ႈ ၼႆႉ လႆႈၸတ်းႁဵတ်းမႃး ၶၢဝ်းတၢင်း 9 ပီယဝ်ႉ။ ၵူၼ်းထဝ်ႈ ၽူႈဢႃယုသုင် ဢၼ်မႃးၶဝ်ႈႁူမ်ႈ ပီၼႆႉ မီး 115 ၵေႃႉ၊ ၵူၼ်းထဝ်ႈၵမ်ႈၼမ် ပဵၼ်ၵူၼ်းၼႂ်းဢိူင်ႇၸေႊလၢၼ်ႉ။ ယိူင်းဢၢၼ်းဢၼ် ႁဝ်းၶႃႈ ၸတ်းႁဵတ်း ပၢင်ၵၼ်ႇတေႃးၵူၼ်းထဝ်ႈၼႆႉ ၸွမ်းၼင်ႇၾိင်ႈႁိတ်ႈႁွႆးၸၢဝ်းပုတ်ႉထႁဝ်း။ ပေႃးထိုင်မႃး လိူၼ်ႁႃႈ ဝၢႆးပီမႂ်ႇၼိုင်ႈဝၼ်းၸိုင် ႁဝ်းၶႃးၸတ်းႁဵတ်းမႃးၵူႈပီ”  ဝႃႈၼႆ။

ပၢင်ဢဝ်တၢင်းလီၼႆႉ မီးပီႈၼွင်ႉၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇၸေႊလၢၼ်ႉ ၸဵမ်ၵူၼ်းၼုမ်ႇ ၵူၼ်းထဝ်ႈလုၵ်ႈဢွၼ်ႇ ၶဝ်ႈႁူမ်ႈၵၼ်ႇတေႃး ၼႂ်းဝၼ်းမိူဝ်ႈၼႆႉ မီး 300 ပၢႆ။

မိူဝ်ႈပီ 2016 ၼၼ်ႉ ၵူၼ်းထဝ်ႈၽူႈဢႃယုသုင် ၸိူဝ်းမႃးၶဝ်ႈႁူမ်ႈပၢင်ၵၼ်ႇတေႃး မီး 107 ၵေႃႉ၊ ပီၼႆႉ ၼမ်လိူဝ်မႃးထႅင်ႈ။ 

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 18/04/2017