ၵူၼ်းဝၢၼ်ႈၵူၼ်းသူၼ် ဝၢၼ်ႈၼွင်ၶူဝ် ဢဵၼ်ႁႅင်း ႁိမ်း 300 ႁူမ်ႈၵၼ် ဢွၵ်ႇၼႄၵၢင်ၸႂ် တေႃႇၸုမ်း ပျီႇတူႉၸိတ်ႉမဵဝ်ႉမ လွင်ႈတေၵုမ်းၵမ်တႃႈႁိူဝ်း ၶွင်ၵူၼ်းဝၢၼ်ႈၼွင်ၶူဝ်။

ဝၼ်းတီႈ 18/04/2017 ယၢမ်းႁူဝ်ၶမ်ႈ 16:30 မူင်း ၵူၼ်းဝၢၼ်ႈၼွင်ၶူဝ် ဢိူင်ႇ 19 ဝၢၼ်ႈ ၸႄႈဝဵင်း မူႇၸေႊ
ႁူမ်ႈၵၼ်ဢွၵ်ႇၼႄၵၢင်ၸႂ်သၢၼ်ၶတ်းတေႃႇၸုမ်းပျီႇတူႉၸိတ်ႉမဵဝ်ႉမ တီႈတႃႈႁိူဝ်း မၢၼ်ႈၼွင်ၶူဝ် လွင်ႈ
ပျီႇတူႉၸိတ်ႉ တေၶဝ်ႈႁိမ်ၵုမ်းၵမ်တႃႈႁိူဝ်း ယွၼ်ႉၵူၼ်းဝၢၼ်ႈဢမ်ႇယွမ်းႁပ်ႉ ၸုမ်းပျီႇတူႉၸိတ်ႉၵုမ်းၵမ်။ တုၵ်းယွၼ်း ႁႂ်ႈပဵၼ်ၶွင်ၵူၼ်းဝၢၼ်ႈၵုမ်းၶိုၼ်းမိူၼ်ပၵ်းၵဝ်ႇပိူင်ၵဝ်ႇ။


ၸၢႆးသွႆႇ ၽူႈၵွၼ်းဝၢၼ်ႈၼွင်ၶူဝ် လၢတ်ႈဝႃႈ “ ၵူၼ်းဝၢၼ်ႈၼွင်ၶူဝ် ၼႄၵၢင်ၸႂ် ဢမ်ႇႁပ်ႉလႆႈ ၸုမ်းပျီႇ တူႉၸိတ်ႉမဵဝ်ႉမၼႆႉ ၶဝ်တေမႃးႁဵတ်းမႃးသၢင်ႈၼႂ်း ၼင်လိၼ် ႁဝ်း ၵွပ်ႈပိူဝ်ႈဝႃႈ ၶဝ်ဢမ်ႇ မႃးထၢမ်ၽႂ် သေၵေႃႉ၊
ဢမ်ႇထၢမ်ၶေႃႈၵၢင်ၸႂ်ၽႂ်သေၵေႃႉ၊ ၶဝ်မႃးႁဵတ်းၼႆႉ ၵူၼ်းဝၢၼ်ႈ ၵူၼ်းသူၼ်ႁဝ်း တိုၼ်းဝႃႈ ဢမ်ႇႁပ်ႉၶၢမ်ႇလႆႈ” ဝႃႈၼႆ။


သိုပ်ႇလၢတ်ႈထႅင်ႈဝႃႈ ယူႇတီႈၵူၼ်းဝၢၼ်ႈၵူၼ်းသူၼ်သေ ၵုမ်းၵမ်မႃးတီႈတႃႈႁိူဝ်းၼႆႉ မီးမႃးပီ ယၢဝ်းၶၢဝ်းႁိုင်ယဝ်ႉ။ ၸဵမ်မိူဝ်ႈပၢၼ်ပူႇပၢၼ်မွၼ်ႇႁဵတ်းမႃး။ ယွၼ်ႉၼၼ် တုၵ်းယွၼ်းဝႃႈ ႁႂ်ႈၵူၼ်း ဝၢၼ်ႈၼွင်ၶူဝ် လႆႈၶိုၼ်း
ၵုမ်းႁဵတ်းၵႂႃႇပၵ်းၵဝ်ႇပိူင်ၵဝ်ႇ။ ယူႇတီႈတၢင်ႇမူႇတၢင်ႇၸုမ်းသေ တေမႃးယူႇၼိူဝ်ႁဝ်း ၵုမ်းၵမ်ၵႂႃႇၼႆႉ ႁဝ်းၶႃႈ
တိုၼ်းဢမ်ႇယွမ်းႁပ်ႉလႆႈ ဝႃႈၼႆ။


တႃႈႁိူဝ်းဝၢၼ်ႈၼွင်ၶူဝ် မႄႈၼမ်ႉမၢဝ်းၼႆႉ မိူၼ်ၼင်ႇ ၵူၼ်းဝၢၼ်ႈၵူၼ်းသူၼ် ၵူၼ်းၼႂ်းပိုၼ်ႉတီႈ လႆႈပိုင်ႈဢိင်တႃႇ ၶၢမ်ႈၵႂႃႇမႃးႁႃၵိၼ်လဵင်ႉတွင်ႉ၊ လွင်ႈၵၢၼ်ၽုၵ်ႇသွမ်ႈ ၼႂ်းႁႆႈၼႂ်းသူၼ် တီႈၼႂ်း ၵုၼ်။ ယွၼ်ႉဝႃႈ
တႃႈႁိူဝ်းၼႆႉ ဝၢႆႇႁိူဝ်းၵႂႃႇတၢင်းမူႇၸေႊၵေႃႈလႆႈ၊ ၵႂႃႇတၢင်းဝဵင်းၼမ်ႉၶမ်းၵေႃႈလႆႈ။

ၵဵဝ်ႇၵပ်းလွင်ႈၵူၼ်းဝၢၼ်ႈၼွင်ၶူဝ် ဢွၵ်ႇၼႄၵၢင်ၸႂ်ၼႆႉ မိူဝ်ႈဝႃး ယူႇတီႈၸုမ်းပျီႇတူႉ ၸိတ်ႉ မဵဝ်ႉမ ၶဝ်သမ်ႉ
ယိပ်းၵွင်ႈၵၢင်ႇ မႃးလွၵ်ႇငိုတ်ႈတီႈတႃႈႁိူဝ်းဝႃႈ ႁႂ်ႈၵိုတ်း ၵၢၼ်ၵႂႃႇမႃးၼႆလႄႈ  ယူႇတီႈၵူၼ်းဝၢၼ်ႈလႆႈဢွၵ်ႇၼႄၵၢင်ၸႂ် ၵမ်းလဵဝ်။


မိူဝ်ႈပူၼ်ႉမႃး ဝၼ်းတီႈ 04/04/2017 ၵူၼ်းဝၢၼ်ႈၼွင်ၶူဝ် 10 ၵေႃႉ လႆႈၵႂႃႇဢုပ်ႇဢူဝ်း ငူပ်ႉငီႉၵၼ် တင်း
ၸုမ်းပျီႇတူႉၸိတ်ႉမဵဝ်ႉမ ယဝ်ႉၵမ်းၼိုင်ႈ တုၵ်းယွၼ်းယႃႇႁႂ်ႈၵဵပ်းၶွၼ်ႇၼမ်လိူဝ်ႁႅင်း။


ပျီႇတူႉၸိတ်ႉလၢတ်ႈဝႃႈ - လႆႈသိုဝ်ႉတႃႈႁိူဝ်းဝႆႉၵႃႈယႂ်ႇယဝ်ႉလႄႈ တိုၼ်းတေလႆႈၵဵပ်းၶွၼ်ႇၼမ်ယူႇ ဝႃႈၼႆ။


ပျီႇတူႉၸိတ်ႉမဵဝ်ႉမ တႄႇၵုမ်းတႃႈႁိူဝ်းၼွင်ၶူဝ် ၼႂ်းဝၼ်းတီႈ 17 လိူၼ်ဢေႊၿရိူဝ်ႊ 2017။


ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 19/04/2017