ထူဝ်ႈလူင်လမ်းၼိုင်ႈ တၢင်ႇၵူၼ်းၵႂႃႇဝႆႈၽြႃးတၢင်းမိူင်းပၢႆ ၸႄႈတွၼ်ႈလႃႈသဵဝ်ႈပွၵ်ႈၶိုၼ်း ပိၼ်ႈၶႂမ်ႈၼႂ်း ၸႄႈဝဵင်းမိူင်းယႆ ၸိုင်ႈတႆးပွတ်းႁွင်ႇ၊ ဢွၼ်ႇယိင်းဢႃယုမွၵ်ႈ 7 ၶူပ်ႇလူႉတၢႆထင်တီႈ၊ ဝၢတ်ႇၸဵပ်းႁိမ်းသၢဝ်းၵေႃႉ။


မိူဝ်ႈဝၼ်းဢႃးတိတ်ႉတီႈ 12/03/2017 ၶၢဝ်းယၢမ်းမွၵ်ႈၵၢင်ၼႂ် 11 မူင်း၊ ထူဝ်ႈလူင် (လေးလူင်းထူဝ်း)လမ်းၼိုင်ႈ ဢၼ်တေႃႉတၢင်ႇပီႈၼွင်ႉဝၢၼ်ႈႁိၼ်လမ်၊ ဝၢၼ်ႈပၢင်ႇလႄႈဝၢၼ်ႈၵုင်းၼိဝ်ႉ ႁူမ်ႈၵူၼ်း 20 ၵေႃႉ ၸိူဝ်းၵႂႃႇဝႆႈၽြႃးမိူင်းပၢႆမႃးပွၵ်ႈၶိုၼ်းၼၼ်ႉ မႃးၵိူတ်ႇၽေးဢုပၢတ်ႈပိၼ်ႈၶႂမ်ႈ တီႈႁိမ်းဝၢၼ်ႈတႃႈပွၵ်း ၼႂ်းၸႄႈဝဵင်းမိူင်းယႆ၊ ယၢၼ်ၵႆမိူင်းယႆမွၵ်ႈ 4 လၵ်း။ ႁဵတ်းႁႂ်ႈလုၵ်ႈဢွၼ်ႇယိင်း ဢႃယုမွၵ်ႈ 7 ၶူပ်ႇၵေႃႉၼိုင်ႈ လူႉတၢႆထင်တီႈ၊ တႃႇၵူၼ်း 19 ၵေႃႉၸိူဝ်းၼၼ်ႉ လႆႈတိူဝ်ႉဝၢတ်ႇၸဵပ်း ၶႅၼ်ႁၵ်းမိုဝ်းႁၵ်း ၸဵပ်းၼႂ်းၸိူဝ်းၼႆႉသေ လႆႈၶိုၼ်ႈႁူင်းယႃ- ၼႆယဝ်ႉ။

ဢွၼ်ႇယိင်းၵေႃႉလူႉတၢႆၼၼ်ႉ ၸိုဝ်ႈႁွင်ႉဝႃႈယိင်းဢေးၶွင်ႇ၊ တိူဝ်ႉၸပ်းပဵၼ်ၽေးတီႈၵွၵ်းႁူဝ်။ ထႅင်ႈ 19 ၵေႃႉၼၼ်ႉ လႆႈၵႂႃႇၶဝ်ႈယူတ်းယႃတူဝ် တီႈႁူင်းယႃတင်းမူတ်း၊ ၼႂ်းၼၼ်ႉ ဢၼ်ၶႅၼ်ႁၵ်းမိုဝ်းႁၵ်းသေၸဵပ်းတၢင်းၼႂ်း မီး 2 ၵေႃႉ၊ ဢၼ်လႆႈယဵပ်ႉမီးလုၵ်ႈဢွၼ်ႇ 2 ၵေႃႉလႄႈၼၢင်းယိင်း 8 ၵေႃႉ၊ ၸဵပ်းၸမ်ႉတၢင်းၼႂ်း 3 ၵေႃႉ-ၼႆယဝ်ႉ။


လွင်ႈတၢင်းဢၼ်ၵႃးထူဝ်ႈလူင် ပိၼ်ႈပွၵ်ႈၼႆႉ ၵူၼ်းၼႂ်းပိုၼ်ႉတီႈၶဝ်ဝႃႈ- ယွၼ်ႉပိူဝ်ႈတၢင်းၵႅပ်ႈၵေႃႈပိူင်ၼိုင်ႈ၊ မိူဝ်ႈၵၢင်ၼႂ်ၼၼ်ႉ ၾူၼ်ၵေႃႈတူၵ်းဢိတ်းဢိတ်းသေ ႁဵတ်းႁႂ်ႈတၢင်းမိုၼ်ႈ၊ ၵႃးလေးလူင်းထူဝ်းၼႆႉၵေႃႈ ဢဝ်မၢၵ်ႇမၼ်းပလၢတ်ႈသေပိၼ်ႈလူင်းၵႂႃႇၶၢင်ႈတၢင်း ႁိမ်းၾင်ႇၼႃး- ၼႆယဝ်ႉ။


လွင်ႈၵူၼ်းၸိူဝ်းဝၢတ်ႇၸဵပ်းၸိူဝ်းၼႆႉ ယူႇတီႈၽွင်းတႅၼ်းမိူင်းယႆ ၸၢႆးႁၵ်ႉ တင်းမုၵ်ႉၸုမ်းၸွႆႈထႅမ်ၶႅၵ်ႇလီပၢင်ၸႃႉ၊ ၵူၼ်းၼႂ်းပႃႇတီႇႁူဝ်သိူဝ်ၸိူဝ်းၼႆႉ ဢွၼ်ၵၼ်ၸွႆႈထႅမ်တေႃႉတၢင်ႇသူင်ႇၵႂႃႇ ယူတ်းယႃတီႈ ႁူင်းယႃလူင်ၵူၼ်းမိူင်း မိူင်းယႆ၊ ၽူႈမီးပုၼ်ႈၽွၼ်းၾၢႆႇယူတ်းယႃၶဝ်ၵေႃႈ တူၺ်းထိုင်ပၼ်ၶိုတ်းတၼ်းၶၢဝ်းယၢမ်းဝႆႉယူႇ- ၼႆယဝ်ႉ။


တွၼ်ႈတႃႇလွင်ႈၵိၼ်ယႅမ်ႉလႄႈသင်၊ လွင်ႈၵူၼ်းထူပ်းၽေးဢုပၢတ်ႈၶဝ် တေပွၵ်ႈမိူဝ်းလႆႈတၢင်းႁိူၼ်း တၢင်းယေးၼၼ်ႉ ယူႇတီႈၸုမ်းၶႅၵ်ႇလီပၢင်ၸႃႉၶဝ်ၵေႃႈ ႁၢင်ႈႁႅၼ်းပၼ်ယူႇ။ ယူႇတီႈၽွင်းတႅၼ်းမိူင်းယႆၵေႃႈ လႆႈၸွႆႈထႅမ်ပၼ်တီႈမုၵ်ႉၸုမ်းၶႅၵ်ႇလီပၢင်ၸႃႉ တွၼ်ႈတႃႇတေႁၢင်ႈႁႅၼ်းပၼ်ၸိူဝ်းၶဝ်ပွၵ်ႈမိူဝ်းၶိုၼ်းၼၼ်ႉ တႃႇငိုၼ်းႁႃႈမိုၼ်ႇ- လႆႈႁူႉၼင်ႇၼႆ။


ထူဝ်ႈလူင်လမ်းၼႆႉ တၢင်ႇၵူၼ်းဝၢၼ်ႈႁိၼ်လမ်၊ ဝၢၼ်ႈပၢင်ႇလႄႈဝၢၼ်ႈၵုင်းၼိဝ်ႉ ၵႂႃႇဝႆႈၽြႃးတီႈမိူင်းပၢႆ ၼႂ်းတိုဝ်ႉတၢင်းပွႆးလိူၼ်သီႇ တီႈမိူင်းပၢႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ၵူၺ်းၵႃႈ မိူဝ်ႈပွၵ်ႈၶိုၼ်း ၸွမ်းတၢင်းၼၼ်ႉ လႆႈမႃးၵိူတ်ႇၽေးဢုပၢတ်ႈ ႁဵတ်းႁႂ်ႈမီးလွင်ႈလူႉသုမ်းသၢႆၸႂ် ၶူဝ်းၶွင်ပွၵ်ႈၼႆႉ။


ၵဵဝ်ႇၵပ်းလွင်ႈၽေးဢုပၢတ်ႈ တၢင်းလူတ်ႉၵႃး/ထူဝ်ႈရႃႇၵျီႇ ၼႂ်းမိူင်းတႆးၼႆႉ ပူၼ်ႉမႃးမိူဝ်ႈ 20/02/2017 ၼၼ်ႉၵေႃႈ ထူဝ်ႈလူင်တၢင်ႇလုၵ်ႈႁဵၼ်း ဢၼ်လုၵ်ႉဝၢၼ်ႈႁမ်းငၢႆး တေမိူဝ်းတွပ်ႇလိၵ်ႈ တီႈဝဵင်းမိူင်းၵိုင် ၵိူတ်ႇၽေးဢုပၢတ်ႈ ပိၼ်ႈၶႂမ်ႈတီႈၼိူဝ်သဵၼ်ႈတၢင်းႁမ်းငၢႆး-မိူင်းၵိုင်၊ ႁဵတ်းႁႂ်ႈၵူၼ်းတၢႆထင်တီႈတင်းမူတ်း 5 ၵေႃႉ၊ ၼႂ်းၼၼ်ႉပဵၼ်လုၵ်ႈႁဵၼ်း 4 ၵေႃႉ၊ ၵူၼ်းႁေႃႈလူတ်ႉၵႃး 1 ၵေႃႉ၊ ဝၢတ်ႇၸဵပ်း 17 ၵေႃႉ၊ ဢၼ်လွတ်ႈၽေးမီး 2 ၵေႃႉ- ၼႆယဝ်ႉ ။


ထူဝ်ႈလူင်လမ်းဢၼ်ပိၼ်ႈၶႂမ်ႈပွၵ်ႈၼၼ်ႉ တင်းမူတ်းမီးၵူၼ်းၶီႇ 24 ၵေႃႉ။ ၼႂ်းၼၼ်ႉပဵၼ်မေႃသွၼ်၊ မႄႈလုၵ်ႈႁဵၼ်း၊ ၵူၼ်းၸွမ်းလူတ်ႉၵႃး၊ ၵူၼ်းႁေႃႈၵႃး ၸိူဝ်းၼႆႉ။ ၼႂ်းၵူၼ်းတိူဝ်ႉဝၢတ်ႇၸဵပ်း 17 ၵေႃႉၼၼ်ႉ ပဵၼ်မေႃသွၼ် 2 ၵေႃႉ၊ လုၵ်ႈႁဵၼ်း 13 ၵေႃႉလႄႈမႄႈလုၵ်ႈႁဵၼ်း 1 ၵေႃႉ ဢိၵ်ႇၵူၼ်းၸွမ်းလူတ်ႉၵႃး 1 ၵေႃႉ။