ပႃႇတီႇႁူဝ်သိူဝ် SNLD မွၵ်ႇႁွင်ႉ မေႃၵႂၢမ်းတႆး ၸိုဝ်ႈသဵင်ယႂ်ႇလၢႆလၢႆၵေႃႉ လူင်းပိုၼ်ႉတီႈ ႁွင်ႉၵႂၢမ်း မူၼ်ႈၸႂ် ၵူၼ်းမိူင်းတႆး ပၼ်ႁႅင်း တႃႇပၢင်လိူၵ်ႈတင်ႈသွမ်ႈ။

တႄႇဢဝ်ဝၼ်းတီႈ 20-22/03/2017 ယၢမ်းၵၢင်ၼႂ် 09:00-15:00 မူင်း ၽူႈႁွင်ႉၵႂၢမ်းတႆး ၸိုဝ်ႈ သဵင် ယႂ်ႇ မိူၼ်ၼင်ႇ ၸၢႆးလၢဝ်သႂ်၊ ၸၢႆးသႅင်ၸွမ်ၾႃႉ၊ ၸၢႆးဢွင်ႇထီးၶမ်း၊ ထႅၼ်ႈလႅဝ်း၊ လၢဝ်ၼုမ်ႇႁွမ်၊ ယိင်း ယိင်းၶိူဝ်း၊ သၢႆၾူၼ်၊ ၸၢႆးလဵၵ်ႉ လႄႈ ၸၢႆးၽွၼ်းမၢဝ်း ဢိၵ်ႇလၢႆလၢႆၵေႃႉ ႁူမ်ႈၵၼ်  တေလူင်းပိုၼ်ႉ တီႈ ႁွင်ႉၽဵင်းၵႂၢမ်း လဝ်ႇမူၼ်ႈတူၼ်ႈၸႂ် ပၼ်ႁႅင်းၵူၼ်းမိူင်း ၼႂ်းၸႄႈဝဵင်း မိူင်းသူႈ၊ ၵေးသီးလႄႈ ၵိင်ႇၸႄႈဝဵင်းမိူင်းၼွင် ၼႂ်းၸိုင်ႈတႆး ပွတ်းၸၢၼ်း။ တိုၵ်းသူၼ်းႁႂ်ႈၵူၼ်းမိူင်းတႆး တွတ်ႈၶႅပ်းပၼ်သဵင် ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းဝၼ်းတီႈ 01/04/2017 တေထိုင်ၼႆႉ ဝႃႈၼႆ။


ၸၢႆးသၢႆၾူၼ် ၽူႈႁွင်ႉၽဵင်းၵႂၢမ်းတႆးၸိုဝ်ႈသဵင်ယႂ်ႇ လၢတ်ႈဝႃႈ “ ယူႇတီႇႁဝ်းၶႃႈ ၽူႈႁွင်ႉၽဵင်း ၵႂၢမ်းလၢႆ လၢႆၵေႃႉ ႁူမ်ႈၵၼ်သေ တေၵႂႃႇပၼ်ႁႅင်းလဝ်ႇမူၼ်ႈတူၼ်ႈၸႂ် ပီႈၼွင်ႉႁဝ်းၶႃႈ တၢင်းပွတ်းၸၢၼ်း။ ဢွၼ်တၢင်းသုတ်းတႄႉ ႁဝ်းၶႃႈတေၵႂႃႇပၼ်ႁႅင်း ပီႈၼွင်ႉႁဝ်းၶႃႈတၢင်းပွတ်းၵေးသီး၊ ယဝ်ႉၵေႃႈ မိူင်းၼွင်လႄႈ မိူင်းသူႈ။ လွင်ႈႁူပ်ႉထူပ်းပၼ်ႁႅင်းပီႈၼွင်ႉႁဝ်းၶႃႈသမ်ႉ ယူႇတီႈၸုမ်းပၢႆးမွၼ်းတႆး ႁဝ်းၶႃႈ လႆႈဢဝ်ႁႅင်းတူဝ်ႁႅင်းၸႂ်သေ  ဢဝ်ၼမ်ႉၸႂ်ၸေႇတၼႃႇသေလူင်းလဝ်ႇမူၼ်ႈတူၼ်ႈၸႂ် ပၼ်ႁႅင်း ပီႈၼွင်ႉႁဝ်းၶႃႈၵႂႃႇ တႃႇပၢင်လိူၵ်ႈတင်ႈသွမ်ႈ ဢၼ်တေထိုင်မႃးၼႆႉ။ ၵူၺ်းၵႃႈ တၢင်းပွတ်း ဢွၵ်ႇၶူင်း ၸႄႈဝဵင်းၵဵင်းတုင်တႄႉ ႁဝ်းၶႃႈ ဢမ်ႇတၼ်းလႆႈၵႂႃႇလဝ်ႇ မူၼ်ႈပၼ်ႁႅင်းပီႈ ၼွင်ႉႁဝ်းၶႃႈ ယဝ်ႉ” ဝႃႈၼႆ။


ၶပ်ႉမၢႆပၢင်ပွႆးတႄႉ ဝၼ်းတီႈ 20/03/2017 တေၸတ်းႁဵတ်းတီႈတူၼ်ႈမႆႉႁုင်း ၼွင်ၵေႃႈ ၸႄႈဝဵင်းၵေးသီး။ ဝၼ်းတီႈ 21/03/2017 တေၸတ်းႁဵတ်းတီႈ ပၢင်ႇပွႆးၾၢႆႇဢွၵ်ႇဝဵင်း မိူင်းၼွင်။ ဝၼ်းတီႈ 22/03/2017 သမ်ႉ တေၸတ်းႁဵတ်းတီႈ ပွၵ်ႉ 4 ၸႄႈဝဵင်းမိူင်းသူႈ ၼႆယဝ်ႉ။


မိူဝ်ႈပီ 2015 ပူၼ်ႉမႃးၼၼ်ႉ ယူႇတီႈၸုမ်းပၢႆးမွၼ်းတႆး ၽူႈႁွင်ႉၽဵင်းၵႂၢမ်းတႆး လၢႆလၢႆၵေႃႉ ႁူမ်ႈၵၼ်သေ ဢတ်းဢွၵ်ႇၽဵင်းၵႂၢမ်း ပၼ်ႁႅင်းပႃႇတီႇႁူဝ်သိူဝ်၊ လူင်းသူၼ်းတုမ် ႁွင်ႉၽဵင်းၵႂၢမ်း ပၼ်ႁႅင်း မႃးၸိူင်ႉၼႆၼင်ႇၵဝ်ႇ။


ပႃႇတီႇၵၢၼ်မိူင်း ဢၼ်တေၶဝ်ႈၶႅင်ႇၵၼ် ၼႂ်းၸႄႈဝဵင်းမိူင်းသူႈ၊ ၵေးသီးၼႆႉဢၼ်တေၶဝ်ႈၶႅင်ႇမီး ပႃႇတီႇတႆး 2 ပႃႇတီႇ၊ မိူၼ်ၼင်ႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ ယင်းမီးပႃႇတီႇမၢၼ်ႈ မိူၼ်ၼင်ႇ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈၸိူဝ်းၼႆႉ။