ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ဢွၵ်ႇၶေႃႈပိုၼ်ၽၢဝ်ႇၵမ်ႉထႅမ်လွင်ႈ ပေႃႈမႄႈပီႈၼွင်ႉ ၵူၼ်းမိူင်း ၸႄႈဝဵင်းသီႇပေႃႉ ၸိူဝ်းပိုင်ႈဢိင်ယူႇၸွမ်းသၢပ်ႇမႄႈၼမ်ႉတူႈ 400 ပၢႆ ၶွၼ်ႈတုမ်ၵၼ် တီႈၾင်ႇၼမ်ႉတူႈသေ တုၵ်းယွၼ်းပိူဝ်ႇတႃႇ မႅတ်ႇပႅင်းထိင်းသိမ်း၊ ၵႅတ်ႇၵင်ႈမႄႈၼမ်ႉ၊ ၶူဝ်းတိုၼ်း သၽႃဝလႄႈ တုၵ်းယွၼ်းႁႂ်ႈၵိုတ်းၶူင်းၵၢၼ်သၢင်ႈၾၢႆၼိူဝ်မႄႈၼမ်ႉတူႈ။

ဝၼ်းတီႈ 21/03/2017 ယၢမ်းၵၢင်ၼႂ် 09:00-11:00 မူင်း ၵူၼ်းဝၢၼ်ႈၸိူဝ်းယူႇသဝ်း ၸွမ်းသၢႆမႄႈ ၼမ်ႉတူႈ 20 ဝၢၼ်ႈ မိူၼ်ၼင်ႇ ဝၢၼ်ႈတႃႈလူင်၊ ဝၢၼ်ႈတႃႈတေႈ၊ ဝၢၼ်ႈတူၼ်ႈၵႃႈ၊ ဝၢၼ်ႈဝဵင်းၵဝ်ႇ၊ ဝၢၼ်ႈၼွၵ်ႈၵၢတ်ႇ၊ ဝၢၼ်ႈမႂ်ႇ၊ ဝၢၼ်ႈၸၢင်ႈလဵၵ်း၊ ဝၢၼ်ႈတူၼ်ႈတီး၊ ဝၢၼ်ႈပဵင်းသၢႆး၊ ဝၢၼ်ႈဝၢင်ၵိူဝ်၊ ဝၢၼ်ႈၵွင်း-ဝၢၼ်ႈမႂ်ႇ၊ ဝၢၼ်ႈတိုင်းၶႄႈ တိုင်းၸၢမ်၊ ဝၢၼ်ႈၵွင်းပဵင်း၊ ဝၢၼ်ႈၼႃးၶၢႆး၊ ဝၢၼ်ႈႁၢႆး၊ ဝၢၼ်ႈႁူဝ်မေႃႇ၊ ဝၢၼ်ႈၼႃးၵိဝ်ႇ၊ ဝၢၼ်ႈပၢင်ၼိူဝ်လႄႈ ဝၢၼ်ႈၵုင်းယၢင်း ၸဵမ်ၸိူဝ်းၼႆႉ ပေႃႈမႄႈပီႈ ၼွင်ႉၵူၼ်းမိူင်း ၶွၼ်ႈတုမ်ၵၼ်တီႈတႃႈတေႈ ၾင်ႇမႄႈၼမ်ႉတူႈ ၾၢႆႇႁွင်ႇဝဵင်းသီႇပေႃႉ ၸိုင်ႈတႆးပွတ်း ႁွင်ႇ တုၵ်းယွၼ်းသၢၼ်ၶတ်း ဢွၵ်ႇလိၵ်ႈၽိုၼ်ၽၢဝ်ႇ ႁႂ်ႈၵိုတ်းယိုတ်းလွင်ႈၵေႃႇ သၢင်ႈၾၢႆၼိူဝ် မႄႈၼမ်ႉတူႈ။


ၸၢႆးႁေႃသႅင် ၽူႈၶၢၼ်ပၢၵ်ႇၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လၢတ်ႈဝႃႈ “ ႁဝ်းၶႃႈယူႇ ၾၢႆႇ ၵူၼ်းမိူင်း၊  ဢၼ်ၵူၼ်းမိူင်း သၢၼ်ၶတ်းၶူင်းၵၢၼ်သၢင်ႈၾၢႆၼႆႉ ႁဝ်းၶႃႈၵမ်ႉထႅမ်ၸွမ်း။ ၵွပ်ႈသင်ၼႆ သင်ဝႃႈၾၢႆယႄးယႂႃႇတွၼ်ႈၼိူဝ်ၼႆႉယဝ်ႉၵႂႃႇယဝ်ႉၸိုင် ဝၢၼ်ႈတႃႈလူင်ဢၼ်မီးႁူဝ်ၵူၼ်း ႁူၵ်းပၢၵ်ႇ ပၢႆၼၼ်ႉ တိုၼ်းတေၸူမ်ယူႇတႂ်ႈၼမ်ႉတင်းပိုၵ်းယဝ်ႉ။ လူင်ပွင်ၸိုင်ႈထုၵ်ႇလႆႈၵိုတ်း ပႅတ်ႈၽႅၼ် ၵၢၼ်ၾၢႆၸိူဝ်းၼႆႉယဝ်ႉ။ ၵွပ်ႈၵူၼ်းမိူင်းယုမ်ႇယမ်ဝႆႉၸႂ်ဝႃႈ တေပဵၼ်လူင်ပွင်ၸိုင်ႈ ဢၼ်တေဢဝ် ႁူမ်ႇလူမ်ႈ ႁႄႉၵင်ႈၽေးၶဵၼ် ပၼ်ၶဝ်ၼႆလႄႈ ၸင်ႇလႆႈလိူၵ်ႈၶဝ်ၶိုၼ်ႈမႃးပဵၼ် လူင်လွင်ၸိုင်ႈၵူၼ်း မိူင်း။ ၵွပ်ႈၼၼ် လူင်ပွင်ၸိုင်ႈထုၵ်ႇလႆႈထွမ်ႇသဵင် ႁူဝ်ၸႂ်ၵူၼ်းမိူင်းသေ ၵိုတ်းပႅတ်ႈၶူင်း ၵၢၼ်ဢၼ် တေပဵၼ်ၽေးၶဵၼ်တေႃႇၵူၼ်းမိူင်းၼႆႉ” ဝႃႈၼႆ။


မႄႈၼမ်ႉတူႈၼႆႉ ယၢမ်းလဵဝ်ယူႇၼႂ်းၽႅၼ်ၵၢၼ်ဢၼ်တေသၢင်ႈၾၢႆ ႁဵတ်းႁႂ်ႈပဵၼ်လွင်ႈလွၵ်ႇ ငိုတ်ႈတေႃႇၵူၼ်းမိူင်း ၼပ်ႉႁူဝ်ႁဵင်၊ တူဝ်မီးၸႂ်လႄႈ ၸိူဝ်ႉ ၽၼ်းလၢၵ်ႇလၢႆ ၸိူဝ်းပိုင်ႈ ဢိင်မႄႈ ၼမ်ႉတူႈၼႆႉ တေလႆႈလူႉသုမ်းၸူမ်ႁၢႆတင်းၼမ်လၢႆ။


ၼၢင်းလၢဝ်ၶမ်း ၽူႈၶဝ်ႈပႃးတူင်ႉၼိုင်ၾၢႆႇႁၵ်ႉသႃမႄႈၼမ်ႉ လၢတ်ႈဝႃႈ “လူင်ပွင်ၸိုင်ႈ ထုၵ်ႇလႆႈထွမ်ႇ သဵင်ၵူၼ်းမိူင်း၊  ၵွပ်ႈဝႃႈ ၵူၼ်းမိူင်းလိူၵ်ႈ ၶဝ်ၶိုၼ်ႈမႃး ။ လူင်ပွင်ၸိုင်ႈ ဢမ်ႇထုၵ်ႇ လီသိုပ်ႇၶပ်းၶိုင်သၢင်ႈ ၾၢႆဢၼ်ၵူၼ်းမိူင်း သၢၼ်ၶတ်း ၼႆႉသင်” ဝႃႈၼႆ။


ၼွၵ်ႈလိူဝ်ၼၼ်ႉ ပႃႇတီႇၵၢၼ်မိူင်းတႆး မိူၼ်ၼင်ႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ ဢၼ်ၶဝ်ႈႁူမ်ႈ ၸွမ်းၼၼ်ႉ ၵေႃႈလၢတ်ႈဝႃႈ တေယူႇတၢင်းၾၢႆႇၵူၼ်းမိူင်း၊ ထွမ်ႇသဵင်ၵၢင်ၸႂ်ၵူၼ်းမိူင်းသေ ႁူမ်ႈၵႅတ်ႇ ၶႄၽေးၶဵၼ်းဢၼ်တေမႃးယႃႉၵဝ်း ဝႃႈၼႆ။