ၼႂ်းဢိူင်ႇယၢင်းလေႃး တီႈႁူင်းတွတ်ႈၶႅပ်းမၢႆ 1 လႄႈမၢႆ 2 ၼၼ်ႉ ၵွပ်ႈမီးၵၢၼ်ဢဝ်ဝႂ်ၶႅပ်းၵၢင်ၸႂ်လူင်ႈၼႃႈ ၼပ်ႉႁူဝ်ပၢၵ်ႇသေ ပႃႇတီႇႁူဝ်သိူဝ် ၸႄႈဝဵင်းၵဵင်းတုင် ၵႂႃႇသၢၼ်ၶတ်းႁႄႉႁၢမ်ႈ။ တိုၵ်းသူၼ်းထိုင်ပီႈၼွင်ႉ ၵူၼ်းမိူင်းဝႃႈ ပေႃးပဵၼ်လႆႈ ၶႂ်ႈႁႂ်ႈၵႂႃႇတွတ်ႈတီႈႁူင်းတွတ်ႈၶႅပ်း။


ၽူႈပွင်ၵၢၼ်ငဝ်ႈငုၼ်းပႃႇတီႇႁူဝ်သိူဝ် ၸႄႈဝဵင်းၵဵင်းတုင် ၼၢင်းမူၼ်းတုၺ်ႈ လၢတ်ႈဝႃႈ-"မိူဝ်ႈၼႆႉ ၵၢၼ်ဢဝ်ၶႅပ်းဝႂ် ၵၢင်ၸႂ်လူင်ႈၼႃႈၼမ်တႄႉတႄႉ။ ပဵၼ်တီႈၼႂ်းဢိူင်ႇယၢင်းလေႃး။ ပီႈၼွင်ႉၵူၼ်းမိူင်းၼႆႉ လူဝ်ႇမီးပွႆးလႄႈၶဝ်ၵႂႃႇ တွတ်ႈၶႅပ်းမူတ်း။ တေႃႈလဵဝ်ႁဝ်းၵႂႃႇႁၢမ်ႈလႄႈၶဝ်ၵိုတ်းယဝ်ႉ၊ ၸွမ်းၼင်ႇႁဝ်းၵႂႃႇဢဝ်သၢႆမၢႆမၼ်းမႃးၼၼ်ႉ ဢဝ်ၵႂႃႇယဝ်ႉ 341 ၵေႃႉ၊ တီႈယၢင်းလေႃးၼႆႉ မီးႁူင်းတွတ်ႈၶႅပ်း 5 ဢၼ်၊ ႁူင်းတွတ်ႈၶႅပ်းမၢႆ 1, 2, 3, 4, 5 ။ ဢၼ်ၶဝ် (ၶွမ်ႊမသျိၼ်ႊၵၢၼ်လိူၵ်ႈတင်ႈ)ဢဝ်ၵႂႃႇၼႆႉ ပဵၼ်တီႈႁူင်းတွတ်ႈၶႅပ်းမၢႆ 1 လႄႈမၢႆ 2" -ဝႃႈၼႆ။


ၵၢၼ်တွတ်ႈၶႅပ်းၵၢင်ၸႂ်လူင်ႈၼႃႈ ၼႂ်းၸႄႈဝဵင်းၵဵင်းတုင်ၼႆႉ တႄႇႁဵတ်းမႃးၸဵမ်မိူဝ်ႈဝၼ်းတီႈ 23 မႃးတေႃႇထိုင်ဝၼ်းတီႈ 31 ၼႆႉ။ ယူႇတီႈပႃႇတီႇႁူဝ်သိူဝ် (SNLD) တိုၵ်းသူၼ်းထိုင် ပီႈၼွင်ႉၵူၼ်းမိူင်းဝႃႈ ပေႃးပဵၼ်လႆႈ ၶႂ်ႈႁႂ်ႈၵႂႃႇတွတ်ႈၶႅပ်းၵၢင်ၸႂ်တီႈႁူင်းတွတ်ႈၶႅပ်း ၼႂ်းဝၼ်းတီႈ 1 ဢေႊပရိူဝ်ႊၼႆႉ။


"ၵၢၼ်တွတ်ႈၶႅပ်းၵၢင်ၸႂ်လူင်ႈၼႃႈၼႆႉ ပွၵ်ႉလႂ်ဢိူင်ႇလႂ်ၵေႃႈ သမ်ႉဢမ်ႇမီးသၢႆမၢႆမၼ်းဝႆႉဝႃႈဝႃႈ ၽႂ်တေလႆႈတွတ်ႈလၢႆၵေႃႉ၊ ၽႂ်မႃးၵေႃႈၶဝ်ပၼ်တွတ်ႈၵူႈၵေႃႉ ႁဵတ်းၼၼ်။ ပေႃးပဵၼ်လႆႈတႄႉ ဢမ်ႇၶႂ်ႈႁႂ်ႈၵႂႃႇတွတ်ႈၶႅပ်းဝႂ်လူင်ႈၼႃႈ၊ ႁႂ်ႈမႃးသႂ်ႇတီႈႁူင်းတွတ်ႈၶႅပ်းဢဝ်၊ ပေႃးမႃးတွတ်ႈတီႈႁူင်းတွတ်ႈၶႅပ်း မၼ်းတေမီးလွင်ႈၽဵင်ႇပဵင်း"- ၼၢင်းမူၼ်းတုၺ်ႈ လၢတ်ႈ။


ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်းမိူဝ်ႈၽုၵ်ႈ ဝၼ်းတီႈ 01/04/2017 ၼႆႉ ႁူင်းတွတ်ႈၶႅပ်းၵၢင်ၸႂ် ၼႂ်းၸႄႈဝဵင်းၵဵင်းတုင် တင်းမူတ်းမီး 57 ႁူင်း။ ပႃႇတီႇၵၢၼ်မိူင်း ၼႂ်းၸႄႈဝဵင်းၵဵင်းတုင် ဢၼ်ၶဝ်ႈၶႅင်ႇၵၼ် တင်းမူတ်းမီး 6 ပႃႇတီႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇဢႃးၶႃႇ၊ ပႃႇတီႇလႃးႁူႇ၊ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈၸိူဝ်းၼႆႉ။


ၼႂ်းၸႄႈဝဵင်းၵဵင်းတုင်ၼႆႉ ႁူဝ်ၵူၼ်းမီးသုၼ်ႇတွတ်ႈၶႅပ်းၵၢင်ၸႂ် မီးမိူၼ်ၼင်ႇ ၼႂ်းဝဵင်းၵဵင်းတုင် ပွၵ်ႉၼိုင်ႈမီး 12,476 ၵေႃႉ၊ ပွၵ်ႉႁႃႈမီး 6,545 ၊ ယၢင်းလေႃး 5,689 ၊ လွႆလူင် 2,443 ၊ ၵၢတ်ႇထၢႆႈ 4,334 ၊ ပၢင်မတ်း 1,279 ၊ ဢိူင်ႇမိူင်းပၼ်ႇ 2,269 ၊ ပၢင်ၸူႉ 2,264 ၊ ၼမ်ႉၶၢၵ်ႉ 1,569 ၊ မိူင်းဢိၼ်း 1,275 ၊ ၼွင်တွင်း 813 ၊ ၼမ်ႉဢိၼ်း 1,210 ၊ ၼႃးပေႃ 801 ၊ မိူင်းၶွၼ် 4,807 ၊ ဝတ်ႉသၢဝ်း 2,326 ၊ ပဵင်းတၢဝ်ႉ 3,332 ၊ မိူင်းတပ်ႉတႂ်ႈ 1,366 ၊ မိူင်းတပ်ႉၼိူဝ် 1,322 ၊ တင်းမူတ်းႁူဝ်ၵူၼ်း 56,120 ၵေႃႉ။