ပႃႇတီႇႁူဝ်သိူဝ်သၢၼ်ၶတ်း လွင်ႈဢဝ်ၶႅပ်းၵၢင်ၸႂ်လူင်ႈၼႃႈ တိုၵ်းသူၼ်းၵူၼ်းမိူင်းတႆး တွတ်ႈၶႅပ်းၵၢင်ၸႂ်
ၼႂ်းၸႄႈဝဵင်းၵဵင်းတုင်၊ ၸႄႈဝဵင်းၵေးသီး ပွတ်းမိူင်းသူႈၸိူဝ်းၼႆႉ ဢိင်ၼိူဝ်ၶွမ်ႊမသျိၼ်ႊၵၢၼ်လိူၵ်ႈတင်ႈၶဝ် မီးၵၢၼ်ဢဝ်ၶႅပ်းၵၢင်ၸႂ်လူင်ႈၼႃႈသေ ပႃႇတီႇႁူဝ်သိူဝ်သၢၼ်ၶတ်း။ လၢတ်ႈဝႃႈ ဢမ်ႇၸႂ်ႈလၢႆးတၢင်းၵၢၼ်လႄႈ ၽိတ်းလၵ်းပိူင်၊ တေသၢၼ်ၶတ်းၵႂႃႇႁၢဝ်ႈႁႅင်း။
ၽူႈၶၢၼ်ပၢၵ်ႇပႃႇတီႇႁူဝ်သိူဝ် (SNLD) ၸၢႆးလဵၵ်ႉ လၢတ်ႈဝႃႈ-"ၶႅပ်းၵၢင်ၸႂ်လူင်ႈၼႃႈၼႆႉ 1.ၵူၼ်းဢွၵ်ႇတၢင်း၊ မိူၼ်ၼင်ႇလုၵ်ႈသိုၵ်းတေဢွၵ်ႇတၢင်း။ 2.ၵူၼ်းထဝ်ႈၵူၼ်းၵႄႇ ၸိူဝ်းဢၼ်ဢမ်ႇၵႂႃႇလႆႈမႃးလႆႈ ဝၼ်းလိူၵ်ႈတင်ႈၼၼ်ႉ ၵူဝ်ၵႂႃႇဢမ်ႇလႆႈ။ 3.ၶႃႈႁၢပ်ႇၵၢၼ်လူင်ပွင်ၸိုင်ႈ ၸိူဝ်းမီးၼႃႈၵၢၼ်လမ်ႇလွင်ႈသေ တေလႆႈဢွၵ်ႇတၢင်း။ မီးၸိူဝ်းၼၼ်ႉၵူၺ်း တေလႆႈတွတ်ႈၶႅပ်းၵၢင်ၸႂ်လူင်ႈၼႃႈ။ ၼွၵ်ႈသေၼၼ်ႉ ပေႃးၵူၼ်းၵႂႃႇလႆႈ မႃးလႆႈ၊ ယူႇလီၵိၼ်ဝၢၼ်ယူႇသေ သႂ်ႇၶႅပ်းၵၢင်ၸႂ်လူင်ႈၼႃႈၼႆႉ ပွင်ႇဝႃႈၸႂ်ႉတိုဝ်းဢမ်းၼၢၸ်ႈဢမ်ႇတူၵ်းထုၵ်ႇ လၢႆးတၢင်းမၼ်း၊ လွင်ႈၼႆႉ ယူႇတီႈႁဝ်းၶႃႈ ဢမ်ႇၸၢင်ႈႁပ်ႉႁၼ်လီလႆႈ၊ လွင်ႈၼႆႉမၼ်းပူၼ်ႉပႅၼ်လၵ်းမၢႆ။ လွင်ႈၼႆႉ ႁဝ်းၵေႃႈၸၢင်ႈတေသၢၼ်ၶတ်းၵႂႃႇႁၢဝ်ႈႁၢဝ်ႈႁႅင်းႁႅင်းယူႇ"- ဝႃႈၼႆ။
ဢိင်ၼိူဝ် ပၢင်လိူၵ်ႈတင်ႈသွမ်ႈ တေၸတ်းဝၼ်းတီႈ 01/04/2017 (မိူဝ်ႈၽုၵ်ႈ)ၼႆႉသေ ယူႇတီႈငဝ်ႈငုၼ်း တီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ၵေႃႈ တိုၵ်းသူၼ်းပေႃႈမႄႈၵူၼ်းမိူင်း ၸိူဝ်းမီးသုၼ်ႇလႆႈတွတ်ႈၶႅပ်းၵၢင်ၸႂ် ဢွၼ်ၵၼ်ၵႂႃႇတွတ်ႈၶႅပ်း၊ ယႃႇႁႂ်ႈပွႆႇလုတ်ႈႁၢမ်းသုၼ်ႇလႆႈၽႂ်မၼ်း ဢၼ်ထုၵ်ႇလႆႈထုၵ်ႇမီး။
"မိူဝ်ႈၽုၵ်ႈၼႆႉ ပီႈၼွင်ႉၵူၼ်းဝၢၼ်ႈၵူၼ်းမိူင်း ၸိူဝ်းမီးသုၼ်ႇတွတ်ႈၶႅပ်းၵၢင်ၸႂ် ဢႃယု 18 ၶိုၼ်ႈၼိူဝ်ၼႆႉ ထုၵ်ႇလီႁူႉၸၵ်းဝႃႈၼႆႉပဵၼ်သုၼ်ႇလႆႈႁဝ်း၊ ၼႂ်းၶၢဝ်းတၢင်း 5 ပီ ၸင်ႇတေလႆႈမႃးပဵၼ်ၼိုင်ႈပွၵ်ႈ၊ ႁဝ်းဢမ်ႇထုၵ်ႇယူႇမဝ်ၵိၼ်မၢင်၊ ပေႃးႁဝ်းၵုမ်ႇဝႃႈ ၶိင်းထဝ်ႈ/ၼၢႆးထဝ်ႈတီႈႁိူၼ်းၵႂႃႇၵေႃႈလႆႈယဝ်ႉ၊ ၼႃႈႁိူၼ်းႁဝ်းမီးၵူၼ်း 5 ၵေႃႉ 7 ၵေႃႉ၊ ၵႂႃႇသေ 2 ၵေႃႉ 3 ၵေႃႉၵေႃႈၸူးယဝ်ႉ၊ ပေႃးတေဝႆႉၸႂ်ၸိူင်ႉၼၼ်ၸိုင် သုၼ်ႇလႆႈသုၼ်ႇပဵၼ်ႁဝ်းဢၼ်ႁို်င်ႁိုင်ၼၢၼ်းၼၢၼ်း ၸင်ႇလႆႈၼိုင်ႈပွၵ်ႈၼၼ်ႉ မၼ်းတေသုမ်းပႅတ်ႈထႅင်ႈ ၵမ်းၼိုင်ႈ။ ပေႃးသုမ်းပႅတ်ႈထႅင်ႈၵမ်းၼႆႉၼႆ တေႃႇထိုင်ပီ 2020 ႁဝ်းတေၸုတ်ႈႁၢမ်းထႅင်ႈသုၼ်ႇလႆႈႁဝ်း။ ၵွပ်ႈၼႆ ႁႂ်ႈႁူႉၸၵ်းဝႃႈၼႆႉပဵၼ်ပုၼ်ႈၽွၼ်း၊ ၼႆႉပဵၼ်သုၼ်ႇလႆႈ ပိူဝ်ႈတႃႇတေဢဝ်လႆႈၼႆသေ တူင်ႉတိုၼ်ႇၵၼ်"- ဝႃႈၼႆ။
ၼွၵ်ႈသေၼၼ်ႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် ယင်းတိုၵ်းသူၼ်းထႅင်ႈဝႃႈ-" ၶႅပ်းၵၢင်ၸႂ်လူင်ႈၼႃႈ ဢၼ်ပိူၼ်ႈႁဵတ်းမႃးဢမ်ႇၸႂ်ႈလၢႆးတၢင်းၵၢၼ်ၼၼ်ႉၵေႃႈ ၼင်ႇႁိုဝ်ႁဝ်းၶႃႈတေပေႉပုၼ်ႈၶဝ်လႆႈၼၼ်ႉ ၵူႈၵေႃႉၶိင်းၵူၼ်း ႁႂ်ႈဝႆႉပဵၼ်ၵၢၼ်လမ်ႇလွင်ႈသေ ႁႂ်ႈလႆႈမိူဝ်းတွတ်ႈၶႅပ်းၵၢင်ၸႂ်၊ လိူၵ်ႈဢဝ်ၽူႈတၢင်တူဝ်ၸိုၼ်ႈၸၢင်ႇ ပိူဝ်ႈတႃႇႁဝ်းသေၵမ်း၊ ၶႂ်ႈယွၼ်းသင်ႇထိုင်ပီႈၼွင်ႉပေႃႈမႄႈၵူၼ်းမိူင်းတႆး ၼင်ႇၼႆ"- ၼႆယဝ်ႉ။
Tags: News, Politic
