သင်ၶလႄႈတၵ်ႉၵႃႇဝဵင်းတၢင်ႉယၢၼ်း ဝဵင်းမူႇၸေႊ ႁူမ်ႈၵၼ်ၸတ်းႁဵတ်းပၢင်ပွႆးယွင်ႈၵုၼ်းယေႃးမုၼ် ၸဝ်ႈတူၼ်ၶူးသုၶမ်း၊ ၽူႈပိုၼ်ၽႄႈသႃသၼႃထုင်ႉသၼ်လွႆ လႄႈ ပၢင်ပွႆးလူႇတၢၼ်းၵျွင်းသွမ်းမႂ်ႇ သွင်ၸၼ်ႉ တီႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။

ဢိင်ၼိူဝ်ၸဝ်ႈတူၼ်ၶူးသုၶမ်း တူၼ်ၸဝ်ႈဢၼ်လႆႈႁပ်ႉၸုမ်ႈၶူး ဢၵ်ၵမႃႁႃၵမ်မတ်ထႃၼႃၸႃရိယ ဢၼ်လူင်ပွင်ၸိုင်ႈမိူင်းႁူမ်ႈတုမ် မွပ်ႈယိုၼ်ႈပၼ် မိူဝ်ႈၽွင်းလိူၼ်မၢတ်ႊၶျ် (2017)ၼႆႉသေ သင်ၶၸဝ်ႈ ဝဵင်းတၢင်ႉယၢၼ်း၊ သင်ၶၸဝ်ႈဝဵင်းမူႇၸေႊ ဢွၼ်ႁူဝ်ၼမ်းၼႃႈ တၵ်ႉၵႃႇသတ်ႉထႃး ပေႃႈမႄႈၵူၼ်းမိူင်း ဝဵင်းတၢင်ႉယၢၼ်း တင်းဝဵင်းမူႇၸေႈသေ ႁူမ်ႈၵၼ်ၸတ်းႁဵတ်းပၢင်ပွႆး ယွင်ႈၵုၼ်းယေႃးမုၼ်။ ပၢင်ပွႆးၼႆႉ ၸတ်းႁဵတ်းၶၢဝ်းတၢင်း 3 ဝၼ်း၊ တင်ႈတႄႇဝၼ်းတီႈ 30-31/03/2017 ထိုင်ဝၼ်းတီႈ 01/04/2017 (လိူၼ်ႁႃႈမႂ်ႇ 3 ၶမ်ႈတေႃႇထိုင် 5 ၶမ်ႈ) တီႈဝတ်ႉ/ၵျွင်းၽြႃးလူင်မႁႃမုၼိ ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။


ပၢင်ပွႆးဝၼ်းႁႅၵ်ႈ ဝၼ်းတီႈ 30 ၼိမၼ်တၼႁပ်ႉၸဝ်ႈတူၼ်ၶူးသုၶမ်း ယေႃးတူဝ်ၶဝ်ႈဝဵင်းတၢင်ႉယၢၼ်း။ ဝၢႆးၼၼ်ႉ ပိုတ်ႇၽၵ်းတူၶဝ်ႈပွႆးလႄႈႁွင်ႈၼႄၶူဝ်းပိုၼ်း။ ဝၼ်းတီႈ 31 ပိုတ်ႇဝတ်ႉ/ၵျွင်းသွမ်းမႂ်ႇသွင်ၸၼ်ႉလႄႈ ပိုတ်ႇႁၢၼ်ႉဝေသၼ်ႇတြႃႇ။ ဝၼ်းတီႈ 1 လိူၼ်ဢေႊပရိူဝ်ႊ တၵ်ႉၵႃႇသတ်ႉထႃး ပေႃႈဢွၵ်ႇမႄႈယေႃးတင်းလၢႆ တေထၢပ်ႈၵၢမ်ႇယေႃးမုၼ် ၸဝ်ႈတူၼ်ၶူးသုၶမ်း၊ တွၼ်ႈၵၢင်ဝၼ်း လူႇတၢၼ်းယၢတ်ႇၼမ်ႉၶႂမ်ႈတဝ်ႈ ပိုၼ်ၽႄႈၵုသူလ်ၼႃးမုၼ်-ၼႆယဝ်ႉ။


ၶၢဝ်းတၢင်းပၢင်ပွႆးသၢမ်ဝၼ်းၼႆႉ မီးပၢင်ပွႆးထွမ်ႇလိၵ်ႈၾင်းထမ်း/တြႃးၵူႈၶမ်ႈၶိုၼ်း။ တွၼ်ႈၵၢင်ၶိုၼ်းၼႆႉ ယင်းမီးပၢင်မူၼ်ႈသိူဝ်းပႃးထႅင်ႈ၊ မီးၽူႈႁွင်ႉၽဵင်းၵႂၢမ်းတႆးလၢႆလၢႆၵေႃႉ မႃးၶဝ်ႈႁူမ်ႈပၢင်ပွႆးလႄႈ ႁွင်ႉပၼ်ၽဵင်းၵႂၢမ်းဢၼ်ၸဝ်ႈတူၼ်ၶူးသုၶမ်း လႆႈတႅမ်ႈမႃးမီးမွၵ်ႈ 50 ႁူဝ်ၼၼ်ႉ- ၼႆယဝ်ႉ။