ၶႅပ်းၵၢင်ၸႂ်တီႈႁူင်းတွတ်ႈၶႅပ်းမၢႆ 6 တီႈပွၵ်ႉၼိုင်ႈ ၼႂ်းဝဵင်းၵဵင်းတုင်၊ ဢၼ်မီးၼႂ်းတပ်ႉသိုၵ်းမၢၼ်ႈ ၶပရၼၼ်ႉ ပႃႇတီႇသၢင်ႇသီႈပေႉၼပ်ႉႁူဝ်ပၢၵ်ႇ၊ ပႃႇတီႇတၢင်ႇဢၼ်ဢမ်ႇတဵမ်သိပ်း။ တၢင်းၼွင်သူင် မိူင်းဢိၼ်းၵေႃႈ ငဝ်းလၢႆးဢမ်ႇၶႅမ်ႉ။

ၾၢင်ႁၢင်ႈႁူင်းတွတ်ႈၶႅပ်းၵၢင်ၸႂ်တီႈၼိုင်ႈ ၼႂ်းၸႄႈဝဵင်းၵဵင်းတုင်

ပၢင်လိူၵ်ႈတင်ႈသွမ်ႈ လိူၼ်ဢေႊပရိူဝ်ႊ ဝၼ်းတီႈ 1 (မိူဝ်ႈၼႆႉ)တီႈၼႂ်းဝဵင်းၵဵင်းတုင် ၸိုင်ႈတႆးပွတ်းဢွၵ်ႇ၊ ႁူင်းတွတ်ႈၶႅပ်းမၢႆ 6 တီႈပွၵ်ႉၼိုင်ႈ (ဢၼ်မီးၼႂ်းတပ်ႉၶပရ)ၼၼ်ႉ ၼပ်ႉယဝ်ႉတူဝ်ႈၵႂႃႇမွၵ်ႈယၢမ်းဝၢႆးဝၼ်း 2 မူင်း။ ပႃႇတီႇၸိူဝ်းလႆႈၶႅပ်းၵၢင်ၸႂ်ၵႂႃႇမီး ပႃႇတီႇႁူဝ်သိူဝ် (SNLD) 1 ၶႅပ်း၊ ပႃႇတီႇဢႃးၶႃႇ 2 ၶႅပ်း၊ ပႃႇတီႇသိူဝ်ၽိူၵ်ႇ 2 ၶႅပ်း၊ ပႃႇတီႇ NLD 8 ၶႅပ်း၊ ပႃႇတီႇသၢင်ႇသီႈ (USDP) 385 ၶႅပ်း၊ ပႃႇတီႇလႃးႁူႇ ဢမ်ႇလႆႈသေၶႅပ်း။


တီႈႁူင်းတွတ်ႈၶႅပ်းၵၢင်ၸႂ်မၢႆ 6 တီႈပွၵ်ႉၼိုင်ႈၼႆႉ သၢႆမၢႆၵူၼ်းမီးသုၼ်ႇလႆႈတွတ်ႈၶႅပ်းတင်းမူတ်း 692 ၵေႃႉ။ ၵူၺ်းၵႃႈ ၵူၼ်းမႃးတွတ်ႈၶႅပ်းတင်းမူတ်းႁူမ်ႈၵၼ်မီး 402 ၵေႃႉ။ လိူဝ်ၸိူဝ်းၼၼ်ႉ ဢမ်ႇမႃးတွတ်ႈၶႅပ်းႁႃႉ ဢမ်ႇၼၼ် ပဵၼ်ၶႅပ်းဝႂ်လူႉၵွႆႁႃႉ ပႆႇလႆႈႁူႉ- ၸုမ်းၶၢဝ်ႇၽူႈတွႆႇႁွၵ်ႈ ဢၼ်ႁွတ်ႈပွတ်းၵဵင်းတုင် လၢတ်ႈ။


ၼွၵ်ႈသေၼၼ်ႉ တီႈမိူင်းဢိၼ်း ၼွင်သူင် ႁူင်းတွတ်ႈၶႅပ်းမၢႆ 4 ၵေႃႈ ႁူဝ်ၵူၼ်းမီးသုၼ်ႇတွတ်ႈၶႅပ်းတင်းမူတ်း 324 ၵေႃႉ။ ၵူၺ်းၵႃႈ ၶၢဝ်းယၢမ်းၵၢင်ဝၼ်း ၵူၼ်းမိူင်းတိုၵ်ႉမႃးတွတ်ႈၶႅပ်း 145 ၵေႃႉၵူၺ်း ၶွမ်ႊမသျိၼ်ၵၢၼ်လိူၵ်ႈတင်ႈ ၶဝ်ဝႃႈ တေဢိုတ်းပိၵ်ႉႁူင်းတွတ်ႈၶႅပ်းယဝ်ႉ၊ ၶဝ်တေဢၢၼ်ႇၶႅပ်းဝႂ်ယဝ်ႉ။ ၵူၺ်းၵႃႈ ၵူၼ်းၼႂ်းပႃႇတီႇၶဝ်ၵႂႃႇ တုၵ်းယွၼ်းဝႆႉ ႁႂ်ႈပႂ်ႉထိုင် 4 မူင်းဝၢႆးဝၼ်း၊ ၶဝ်ၵေႃႈဢိင်ဢၢင်ႈဝႃႈ ပူႇၵႄႇၶဝ်ဝႃႈ ၵူၼ်းၸိူဝ်းၼႆႉဢမ်ႇမီး၊ ၶဝ်ႈၶၢႆႉၵႂႃႇယူႇတၢင်ႇတီႈယဝ်ႉ- ဝႃႈၼႆ။


မိူဝ်ႈပီ 2015 ၼၼ်ႉ တီႈၼွင်သူင် မိူင်းဢိၼ်းၼႆႉ ပႃႇတီႇၼူၵ်ႉယုင်းပေႉ၊ မိူဝ်ႈၼၼ်ႉ ဢမ်ႇမီးၵူၼ်းပႂ်ႉႁူင်း တွတ်ႈၶႅပ်း၊ ပႃႇတီႇႁူဝ်သိူဝ်ၵေႃႈဢမ်ႇလႆႈၶႅပ်းၵၢင်ၸႂ်။ ပီႈၼႆႉၽိူဝ်ႇမီးၵူၼ်းၵႂႃႇပႂ်ႉႁူင်းတွတ်ႈၶႅပ်းယဝ်ႉ သမ်ႉဢမ်ႇပေႃးမီးၵူၼ်းမႃးသႂ်ႇ၊ မိူဝ်ႈဢမ်ႇမီးၵူၼ်းပႂ်ႉႁူင်းတွတ်ႈၶႅပ်းသမ်ႉ တီႈၼၼ်ႈသမ်ႉဝႃႈၵူၼ်းမီးယူႇ။


လွင်ႈၼႆႉ ၽိူဝ်ႇမီးၵူၼ်းပႂ်ႉႁူင်းတွတ်ႈၶႅပ်းယဝ်ႉ သမ်ႉဝႃႈႁူဝ်ၵူၼ်း 179 ၵေႃႉၼႆႉဢမ်ႇမီးယဝ်ႉ၊ မၼ်းပဵၼ်လႆႈယူႇႁႃႉ ၼႆႉပဵၼ်ၶေႃႈထၢမ်။ ယွၼ်ႉပိူဝ်ႈၶႃႈႁၢပ်ႇၵၢၼ်ၶုၼ်ၶဝ် ဢမ်ႇလူင်းထိုင်ပိုၼ်ႉတီႈလႄႈပဵၼ်ႁႃႉ၊ ဢမ်ႇၼၼ်ၵေႃႈ ၶႃႈႁၢပ်ႇၵၢၼ်ၶုၼ်ၸိူဝ်းၼႆႉ ပႃးၾၢႆႇသေၾၢႆႇလႄႈမၼ်းပဵၼ်ႁႃႉ- လုၵ်ႈၸုမ်းပႃႇတီႇႁူဝ်သိူဝ်ၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။