ၸိုင်ႈတႆးပွတ်းဢွၵ်ႇၶူင်း ၸႄႈဝဵင်းမိူင်းၶၢၵ်ႇ ၼၼ်ႉ သိုၵ်းမၢၼ်ႈ ပႂ်ႉၵဵတ်ႉ တဵၵ်းၵဵပ်းယွၼ်းငိုၼ်း၊ ပေႃႉထုပ်ႉ ၵူၼ်းမိူင်း လႆႈသူင်ႇယႃတူဝ် တီႈႁူင်းယႃလူင် မိူင်းၶၢၵ်ႇ။

ဝၼ်းတီႈ 6/3/2017 ပူၼ်ႉမႃးၼႆႉ ၶုၼ်သိုၵ်းသီႇတူႇ သိုၵ်းမၢၼ်ႈ ဢၼ်ပႂ်ႉၵဵတ်ႉတီႈ ၼမ်ႉမွႆးဢႃးၶိူဝ်ႇ ၼၼ်ႉ ႁွင်ႉဢဝ် ၸၢႆးယီႈ ၵူၼ်းဝၢၼ်ႈမိူင်းၼုင်း သေ ထဵတ်ႈထၢမ် ၵႂၢမ်းဢမ်ႇပွင်ႇၵၼ်လႄႈ ပေႃႉထုပ်ႉ ၊ ၸဵပ်းသႅပ်ႇပဵၼ်လိူတ်ႈ ပဵၼ်ယၢင်၊ လႆႈသူင်ႇယႃတူဝ် တီႈ ႁူင်းယႃလူင် ဝဵင်းမိူင်းၶၢၵ်ႇ။


ၸၢႆးယီႈၼႆႉပဵၼ်လုၵ်ႈၸုမ်းပႃႇတီႇႁူဝ်သိူဝ်သေဢမ်ႇၵႃး ပဵၼ်ၵူၼ်းသႂ်ႇၸႂ်တူင်ႉၼိုင်ၸွႆႈထႅမ်ၼႃႈၵၢၼ်ပႃႇတီႇ ၵေႃႉၼိုင်ႈဝႃႈၼႆ။


“ၼႂ်းၵႄႈ မိူင်းၵႃ မိူင်းၼုင်းၼႆႉ မီးမွၵ်ႈ 12 လၵ်းၵူၺ်းၶႃႈ။ သိုၵ်းမၢၼ်ႈ တပ်ႉမိူင်းၶၢၵ်ႇ မႃးပၵ်းတပ်ႉ 2 တီႈ တီႈႁိမ်းမိူင်းၼုင်းၼၼ်ႉ ပၵ်းလၢၼ်ႇတီႈၼမ်ႉပုင်ႇ၊ လၢၼ်ႇၼမ်ႉမွႆးဢႃးၶိူဝ်ႇ သေ ယွၼ်း ငိုၼ်း ၵူၼ်းဝၢၼ်ႈ၊ ပေႃးပဵၼ်လူတ်ႉၶိူင်ႈ ၼမ်ႉလမ်း ၼိုင်ႈႁဵင်၊ ပေႃးပဵၼ်ၵႃး ၼိုင်ႈလမ်း 5 ႁဵင်။ ပေႃးဢမ်ႇ မေႃလၢတ်ႈတေႃႇၶဝ် သမ်ႉ ၺႃးပေႃႉထုပ်ႉ လႄႈ ယၢပ်ႇၽိုတ်ႇၼႃႇၶႃႈ ပေႃး ဢမ်ႇၶႂ်ႈႁတ်းၵႂႃႇမႃးဢေႃႈ” - ၼႆ ပႃႈၼၢင်းဢိူၺ်ႈၵဵင်ၶမ်း လၢတ်ႈ။


ယၢမ်းလဵဝ် ပဵၼ်ၽွင်းၶၢဝ်းပွႆးၽြႃးထၢတ်ႈမိူင်းၼုင်း၊ ၵူၼ်းဝၢၼ်ႈ လႆႈၸႂ်ယႂ်ႇ ၶၢႆၶဝ်ႈမုၼ်းၶဝ်ႈပွင်း ၽွင်းပွႆးလိူၼ်သီႇ။ ယွၼ်ႉသိုၵ်းမၢၼ်ႈ ပၵ်းပႂ်ႉ ယွၼ်းငိုၼ်း ၸွမ်းၵဵတ်ႉ ၸွမ်းလၢၼ်ႇ လႄႈ တႃႇတေ ၵႂႃႇမႃး ႁဵတ်းၵၢၼ်တၢင်းလီ  ၵေႃႈ ယၢပ်ႇၸႂ် ႁႅင်းၼႃႇ ဝႃႈၼႆ။


မိူင်းၼုင်းၼႆႉ မီးၸဵင်ႇႁွင်ႇဝၼ်းတူၵ်း ဝဵင်းမိူင်းၶၢၵ်ႇ ယၢၼ်မွၵ်ႈ 20 လၵ်း။ လင်ႁိူၼ်းၵူၼ်းဝၢၼ်ႈ မိူင်းၼုင်း မီး 200 ပၢႆ။ၵမ်ႈၼမ် ႁဵတ်းၵိၼ် ၵၢၼ်သူၼ် ႁႆႈၼႃး။ ၶူဝ်းၶွင် ဢၼ်ဢွၵ်ႇ ၼႂ်းသူၼ် ၼႂ်း ႁိူၵ်ႈ ၵမ်ႈၼမ် ဢဝ်ၵႂႃႇၶၢႆ တၢင်းမိူင်းၵႃ - မိူင်းပွၵ်ႉ။ ၵမ်ႈၽွင်ႈ ဢဝ်ၵႂႃႇၶၢႆ ၼႂ်းဝဵင်းမိူင်းၶၢၵ်ႇ။