ပၼ်ႁႃလူင်ဢၼ်သုမ်ႇငမ်းယူႇၼိူဝ်ႁူဝ်ၽူႈႁၵ်ႉၸၢတ်ႈလႄႈ ၵူၼ်းၶိူဝ်းတႆးတင်းသဵင်ႈယၢမ်းလဵဝ် ၵဵဝ်ႇၵပ်းငဝ်းလၢႆး မိူင်းတႆးဢၼ်ပဵၼ်ယူႇယၢမ်းၼႆႉ ဢမ်ႇဝႃႈၾၢႆႇၵၢၼ်မိူင်း ၸိူဝ်းပဵၼ်ပႃႇတီႇလႄႈသင် ၵၢၼ်သိုၵ်း ၸိူဝ်းပဵၼ်သိုၵ်းတႆး လႄႈသင် ၵူၼ်းမိူင်းၸိူဝ်းႁႃၵိၼ်လဵင်ႉတွင်ႉယူႇလႄႈသင် လမ်မိုတ်ႈလပ်းသိင်ႇၵူႈသီႇၼႃႈပႅတ်ႇၾၢႆႇ လိူဝ်သေ ဢမ်ႇႁၼ် ႁၢင်ႈၾၢင်လမ်းငဝ်းလႄႈ တေယင်ႇလၢမ်းၶၢတ်ႈသင်ၼိူဝ်ၵၢၼ်မိူင်း ၵၢၼ်ဢၼႃးၵူတ်ႉ(ဢၼႃႇၵၢတ်ႈ)ပုၼ်ႈတူဝ် ၵဝ်ႇလႆႈသင် သေဢိတ်းယဝ်ႉ။


ဝၢႆးသေမီးၶေႃႈလႆႈၸႂ်ၵိုတ်းတိုၵ်းၵၼ်လၢႆၸုမ်း တင်းၸုမ်းၸိူဝ်းယိပ်းၵွင်ႈၵၢင်ၵမ်ႈၽွင်ႈသေတႃႉ ၵမ်ႈၽွင်ႈယင်းတိုၵ်ႉ ၶိုင်ႈၶိုင်ႈၵၢင်ၵၢင်ယူႇ ဢမ်ႇႁူႉဝႃႈၸုမ်းၸဝ်ႈၵဝ်ႇၵိုတ်းယဝ်ႉႁိုဝ်ပႆႇၵိုတ်း။ ၵွပ်ႈဝႃႈ ဢွၼ်တၢင်းၵေႃႈလႆႈလူင်းလၢႆးမိုဝ်း ၵိုတ်းတိုၵ်းမႃးယဝ်ႉ။ ၵူၺ်းၵႃႈ သမ်ႉႁႂ်ႈလူင်းလၢႆးမိုဝ်းထႅင်ႈၼႆၼၼ်ႉ မၢင်ၸုမ်းယုမ်ႇယမ်ဝႃႈႁဝ်းပေႃးလူင်းလၢႆးမိုဝ်း ယဝ်ႉလူး (ပၢၼ်လူင်ပွင်ၸိုင်ႈသိုၵ်းမၢၼ်ႈၶိၼ်ႇၺုၼ်ႉ) သမ်ႉတေလူင်းထႅင်ႈႁဵတ်းသင် ဝႃႈၼႆသေတႃႉ လူင်ပွင်ၸိုင်ႈ မၢၼ်ႈ သမ်ႉဝႃႈတၵ်းလူင်းလၢႆးမိုဝ်းၸွမ်းၶေႃႈတႅပ်းတတ်း (NCA) ၸင်ႇမၵ်းမၼ်ႈပဵၼ်တၢင်းၵၢၼ်ၼႆလႄႈ ၵႂၢမ်းၶဝ်ႈ ၸႂ်လႅပ်ႈႁၢင်ႈယင်းပႆႇပွင်ႇပိုင်ႈၵၼ်။


ဢမ်ႇၵွမ်ႉၵႃႈၼၼ်ႉၵူၺ်း ၸုမ်းၸိူဝ်းလူင်းလၢႆးမိုဝ်းမႃးပွၵ်ႈ 1 ယဝ်ႉၵေႃႈလီ၊ ပွၵ်ႈ 2 (NCA) ၵေႃႈယဝ်ႉ ပၢင်တိုၵ်းၵေႃႈ ယင်းတိုၵ်ႉမီးယူႇပဵၼ်တီႈပဵၼ်တီႈ ႁၢင်ႇႁၢင်ႇထီႇထီႇ ဢမ်ႇဝွတ်ႈဢမ်ႇဝၢႆး တင်းၸုမ်းဢၼ်လူင်းလၢႆးမိုဝ်းၵိုတ်းတိုၵ်း ပၢၼ် ၶိၼ်ႇၺုၼ်ႉလႄႈ ပၢၼ်လူင်ပွင်ၸိုင်ႈၵူၼ်းမိူင်း NCA ။ ယွၼ်ႉၼၼ် တႃႇတေထိုင်ၸၼ်ႉဢုပ်ႇၵၢၼ်မိူင်း လွင်ႈမိူင်းႁူမ်ႈ တုမ်ၼၼ်ႉ ယူဝ်ၶႄးပဵၼ်ၾၼ်လူမ်းလူမ်း ႁႅင်ႉႁႅင်ႉၵူၺ်းႁိုဝ်ၼႆယူႇ။


ပေႃးတူၺ်းဢဝ်ပၢင်ၵုမ်ပၢင်လူင် ႁူဝ်ပၢၵ်ႇ ပီ 21  မိူဝ်ႈဝၼ်းတီႈ 31/08/2016 ဢၼ်ၸတ်းတီႈၼေႇပျီႇတေႃႇ ပူၼ်ႉမႃး ၼၼ်ႉ ၸဵမ်ပိုင်းၵေႃႈ ဢမ်ႇႁၼ်လႆႈၸိပ်းသူတ်ႉၼမ်ႉဝၢၼ်ၼမ်ႉၸဵမ်း ၼမ်ႉၸႂ်ပၢင်လူင်။ တေႃႉတႄႉဝႃႈ ပဵၼ်ပၢင်ႁူပ်ႉ ထူပ်းၵၼ်ၵူၺ်းလႄႈလိူဝ်သေၵႂင်တၢင်း သဵၼ်ႈတၢင်းငမ်းယဵၼ်မိူင်းႁူမ်ႈတုမ်ယဝ်ႉ ယင်းဝူင်ႇဝွၵ်ႇထိုင် ၵၢၼ်ႁႃငိူၼ်ႈ မၢၵ်ႇယုမ်ႁႆလူင်ဝႆႉယူႇ။


တႃႇတေၸတ်းႁဵတ်းပၢင်ၵုမ်လူင်ပၢင်လူင် ႁူဝ်ပၢၵ်ႇ ပီ 21 ထႅင်ႈၼၼ်ႉၵေႃႈ လူင်ပွင်ၸိုင်ႈပၼ်ၵၢၼ်ႁႂ်ႈၵူႈၸုမ်းလူင်း သူၼ်းတုမ်ၼႂ်းၶိူဝ်းၵူၼ်းၽႂ်မၼ်းဝႆႉၼင်ႇၼၼ် လၢႆၸုမ်းၸိူဝ်းၶတ်းၸႂ်တႄႉတႄႉ ၵူၺ်းၵႃႈတေဢွၵ်ႇႁူဝ်ဢွၵ်ႇၵွႆႈ ဢမ်ႇမီးၽႂ်ယင်ႇလၢမ်းလႆႈ။


ပေႃးမႃးၶူၼ်ႉၶွၵ်းၸူၵ်းဢဝ်လွၼ်ႉၵႂၢမ်းၽူႈၼမ်းတႆး ၸဝ်ႈပိုၼ်းတႆး (ၽူႈၼမ်း ၼႂ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်း ၸိုင်ႈတႆး) လၢတ်ႈဝႆႉဝႃႈ “ဢုပ်ႇၵေႃႈတၵ်းလႆႈဢုပ်ႇတိုၵ်းၵေႃႈတၵ်းလႆႈတိုၵ်း” ၼႆၼၼ်ႉ မႅၼ်ႈယူႇ။ ၵူၺ်းၵႃႈ တေယဝ်ႉ မိူဝ်ႈလႂ် တေယဝ်ႉၸိူင်ႉႁိုဝ်ၼႆသမ်ႇ ၵႂႃႇၶုၵ်းၸႂ်လႆႈဢၼ် ၸဝ်ႈၶုၼ်ႇသႃႇ လၢတ်ႈဝႃႈ “ႁဝ်းတၵ်းတေလႆႈမီးငိုၼ်း တၵ်းတေလႆႈမီးၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်းၼမ်ၼမ်ၵွၼ်ႇ”။ ႁူမ်ႈဝႃႈၼၼ်သေတႃႉ ၸဝ်ႈသႅင်သိုၵ်းၵေႃႈ လၢတ်ႈဝႃႈ “ပေႃးႁဝ်းဢမ်ႇမီးပၺ်ၺႃ ၵတ်ႉလႅၼ်ႇၵၢၼ်ၵူႈပၢႆးပၢႆး ဢမ်ႇမေႃလဵၼ်ႈၸွမ်းငဝ်းလၢႆး ဢမ်ႇမေႃဝၢင်းၽႅၼ် ၵၢၼ်ႁၢင်ႈ ပၢႆးသိုၵ်း ပၢႆးတိုၵ်း ၼႆႁဝ်းၵေႃႈတၵ်းတေဢမ်ႇပူၼ်ႉတူင်ႇႁႅဝ်ႉလူင်ပိူၼ်ႈလႆႈ” တေႃႈၼင်ႇၼၼ် ၸဝ်ႈၵွၼ်းၸိူင်းၵေႃႈ ၵၢဝ်ႇလၢတ်ႈဝႆႉဝႃႈ “ပေႃးႁဝ်းဢမ်ႇမီးသိလ်ထမ်း ဢမ်ႇသိုဝ်ႈသႂ်ႇတေႃႇၵူၼ်းမိူင်း ၵူၼ်းမိူင်းဢမ်ႇပဵၼ်ၸႂ်ႁဝ်း ဢမ်ႇႁၵ်ႉႁဝ်း ဢမ်ႇပဵၼ်ၾၢႆႇႁဝ်းၸိုင် ႁဵတ်းႁိုဝ်ၵေႃႈႁဝ်းတၵ်းတေဢမ်ႇပေႉပိူၼ်ႈ”။ ၵူၺ်းၵႃႈၸိူင်ႉႁိုဝ်ၵေႃႈလီ ၸဝ်ႈၼွႆႉ(သေႃးယၼ်ႇတ) ၽူႈၵေႃႇတင်ႈတပ်ႉသိုၵ်းၼုမ်ႇသိုၵ်းႁၢၼ်ႁဵတ်းၵၢၼ်ၸိုင်ႈတႆးၵွၼ်းၶေႃ (21/05/1958 ဢဝ်ပဵၼ်ဝၼ်းၸိုင်ႈတႆး လုၵ်ႉၾိုၼ်ႉ) မႃးတေႃႇဝၼ်းမိူဝ်ႈၼႆႉၼၼ်ႉဝႃႈ “ပေႃးတပ်ႉသိုၵ်းႁဝ်းဢမ်ႇမီး တီႈပၵ်းမၼ်ႈ ပဵၼ်ငဝ်ႈၸိုင်ႈ ဢမ်ႇမီးတီႈယူႇ ပဵၼ်လၵ်းပဵၼ်လႅင်ႇၸိုင် တႃႇၸုမ်းၶၢဝ်ႇ/ၵူၼ်းၼွၵ်ႈမိူင်း/လူင်ပွင်ၸိုင်ႈမိူင်းၼႂ်းလူၵ်ႈၼႆႉ တေႁူႉၸၵ်းႁဝ်း တေမႃးဢုပ်ႇႁဝ်းၵေႃႈဢမ်ႇလႆႈ ႁဝ်းဢမ်ႇၸၢင်ႈတိတ်းတေႃႇၽႂ်လႄႈ ႁဝ်းတိုၼ်းတေဢမ်ႇၸၢင်ႈ လႆႈၶိုၼ်းမိူင်း ၵွပ်ႈၼႆ ႁဝ်းတၵ်းတေ လႆႈယိုတ်းဢဝ်ပွတ်းဢွၵ်ႇၶူင်းပဵၼ်ငဝ်ႈၸိုင်ႈႁဝ်း” ဝႃႈၼႆ။


ၵႂၢမ်းၽူႈၼမ်ႊၶဝ်ၸဝ်ႈလၢတ်ႈမႃးၸိူဝ်းၼႆႉ ႁူမ်ႈဝႃႈပူၼ်ႉမႃးလၢႆသိပ်းပီယဝ်ႉၵေႃႈ မၢင်ၶေႃႈမၢင်လႂ် ယင်းတိုၵ်ႉမီးၵႃႈၶၼ် ယႂ်ႇလူင်ယူႇ။


မွၼ်းၶိူဝ်း