ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းသီႇပေႃႉ တၢင်းပွတ်းဢိူင်ႇဝၢၼ်ႈမေႃႈ ၼၼ်ႉ မီးၵူၼ်းဝၢၼ်ႈ ၵေႃႉၼိုင်ႈ ၵိၼ်ယႃႈမႃႉမဝ်းယွင်ႇသေ ပေႃႉႁႅမ်ၵေႃႉပဵၼ် ပီႈၼၢင်း လႄႈမႄႈၸဝ်ႈၵေးၸူး ၊ ထိုင်တီႈ ၽူႈမီးပုၼ်ႈၽွၼ်း လႆႈတီႉမတ်ႉ ၵုမ်းၶင်တူဝ်။

ဝၼ်းတီႈ12/3/2017 ယၢမ်းႁူဝ်ၶမ်ႈ 7:30 မူင်း ၼၼ်ႉ ၵူၼ်းဝၢၼ်ႈမေႃႈ၊ ဢိူင်ႇဝၢၼ်ႈမေႃႈ၊ (ၾၢႆႇၸၢၼ်း ဝဵင်းသီႇပေႃႉ မွၵ်ႈ 50 လၵ်း) ၵေႃႉၼိုင်ႈ ၸိုဝ်ႈႁွင်ႉ ၸၢႆးဢၢႆႈၸၢႆး ဢႃႇယု 37 ပီ၊  မဝ်းယႃႈမႃႉ သေ ပေႃႉႁႅမ်ၵေႃႉပဵၼ်ပီႈၼၢင်း၊ ၽွင်းၼၼ်ႉ ၵေႃႉပဵၼ်မႄႈၶဝ် ၶဝ်ႈႁႄႉႁၢမ်ႈ လႄႈ ပေႃႉထုပ်ႉပႃး ၵေႃႉပဵၼ်မႄႈ ပႃႈသႃႇ ဢႃယု 60 ပၢႆ- တိူဝ်ႉၸဵပ်းလိူဝ်ႁႅင်း လႄႈ ထိုင်တီႈ ၸဝ်ႈၼႃႈတီႈ ၽူႈမီးပုၼ်ႈၽွၼ်း ၼႂ်းတပ်ႉသိုၵ်းၸိုင်ႈတႆး SSPP/SSA တီႉမတ်ႉ သူင်ႇပၼ်ငဝ်ႈငုၼ်း ။


ဢိင်ၼိူဝ်လွင်ႈၼႆႉသေ ၵူၼ်းၼႂ်းပိုၼ်ႉတီႈ ၸၢႆးယွတ်ႈၼုမ်ႇ လၢတ်ႈဝႃႈ  - “ၸၢႆးဢၢႆႈၸၢႆး ၼႆႉ ၼွၵ်ႈသေ ပေႃႉႁႅမ်ပီႈၼၢင်း၊ မႄႈၸဝ်ႈၵေးၸူးမၼ်းၸၢႆးယဝ်ႉ ယင်းထုပ်ႉၶူဝ်းႁိူၼ်းၽိူၼ်ဝၢၼ်ႇ၊ ၶူဝ်းၵုၼ်ႇဢၼ်ၶၢႆ ၵိုၵ်းႁိူၼ်း လူႉသုမ်း တင်းၼမ်လူးၵွၼ်ႇ” - ဝႃႈၼႆ။


ဢၢႆႈၸၢႆးၼႆႉ ယၢမ်ႈၵႂႃႇႁူင်းႁဵၼ်းၸၼ်ႉၸွမ် ဝဵင်းလႃႈသဵဝ်ႈ တၼ်းထိုင် ပီ 2 ။ ၵိုတ်းယင်ႉ ၵၢၼ်ႁဵၼ်းသေ ၵႂႃႇႁဵတ်းၵၢၼ်မႆႉ ၸွမ်းပေႃႈလဵင်ႉလၢဝ်းၶႄႇ တၢင်းၵဵင်းတွင်းသေ တိတ်း ၸပ်း ယိၼ်ႉယႃႈမႃး။ မိူဝ်ႈပီ 2015 ၼၼ်ႉၵေႃႈ ၸဝ်ႈၼႃႈတီႈ SSPP/SSA ယၢမ်ႈတီႉမၼ်းၸၢႆး ယဵတ်ႈၶွၵ်ႈ ‘ၶွၵ်ႈၼမ်ႉယမ်း’ (ၶွၵ်ႈဢၼ် SSPP/SSA တိုတ်းတွၼ်ယိၼ်ႉ ၵူၼ်းၸပ်းယႃႈ ) မႃးပွၵ်ႈၼိုင်ႈ။


ပႃႇတီႇမႂ်ႇသုင်ၸိုင်ႈတႆး /တပ်ႉသိုၵ်းၸိုင်ႈတႆး SSPP/SSA ၼႆႉယၢမ်ႈဢွၵ်ႇလိၵ်ႈပိုၼ်ၽၢဝ်ႇ ဝႆႉလၢႆလၢႆၵမ်းဝႃႈ ၵူၼ်းမိူင်း၊ ၵူၼ်းသိုၵ်း၊ ၽူႈမီးၸၼ်ႉၵူႈၵေႃႉ ၽႂ်တေဢမ်ႇလႆႈၵဵဝ်ႇၶွင်ႈ ယႃႈမဝ်းၵမ်။ ပေႃးႁူပ်ႉႁၼ်ၸိုင် တေတီႉမတ်ႉ ပၼ်တူတ်ႈ(တၢမ်ႇ)ၵႂႃႇ ၸွမ်းၼင်ႇ ပၵ်းပိူင်တမ်းဝၢင်းဝႆႉၼၼ်ႉ ၼၵ်းၼၵ်းၼႃၼႃ - ဝႃႈၼႆ။