ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA သုင်ႇလိၵ်ႈယိုၼ်ႈထိုင် ၼႂ်းဝၼ်းပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ ( 70 )တဵမ်  ဝဵင်းသီႇပေႃႉ ၸိုင်ႈတႆးပွတ်းႁွင်ႇ ။

ဝၼ်းတီႈ 07/02/2017 ယူႇတီႈ ၵေႃပွင်ၵၢၼ် လႄႈ ၽူႈယႂ်ႇၵူၼ်းလူင် ဝဵင်းသီႇပေႃႉ ဢွၼ်ႁူဝ် ၸတ်းႁဵတ်း ဝၼ်းၸိူဝ်ႉၸၢတ်ႈၸိုင်ႈတႆး ၸွမ်းၼင်ႇဢၼ်ယၢမ်ႈႁဵတ်းမႃးၵူႈပီသေ ၊ ၼႂ်းဝၼ်းၸိူဝ်ႉ ၸၢတ်ႈၼၼ်ႉၵေႃႈ မီးပႃးပၢင်ႈၵႅဝ်ႈလႄႈ မီးၽူႈယႂ်ႇၵူၼ်းလူင် လူဢၢၼ်ႇၼႄ ၽိုၼ်လိၵ်ႈယိုၼ်ႈထိုင် ၸိူဝ်းၼၼ်ႉ လၢႆၸဝ်ႈလၢႆၵေႃႉ ဝႃႈၼႆ။


ၽိုၼ်လိၵ်ႈဢၼ် ပႃႇတီႇမႂ်ႇသုင်ၸိုင်ႈတႆး သူင်ႇယိုၼ်ႈထိုင် ဝၼ်းၸိူဝ်ႉၸၢတ်ႈၸိုင်ႈတႆး တႄႉလၢတ်ႈ ဝႃႈ - ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇထိုင်မႃး (70) တဵမ် လႄႈ  ပီႈၼွင်ႉတႆးႁဝ်းၶႃႈ ၵူႈတီႈၵူႈတၢင်း ၸဵမ်ၼႂ်းမိူင်း ၼွၵ်ႈမိူင်း ဢွၼ်ၵၼ် ႁၢင်ႈႁႅၼ်းႁူမ်ၸူမ်းႁပ်ႉတွၼ်ႈ  ဢဝ်ၵုင်မုၼ်ၼူိဝ် ဝၼ်းၸိူဝ်ႉၸၢတ်ႈ - တူၵ်ႇတၵ်ႉၶိုၼ်း ပိုၼ်းဝၼ်းၸိူဝ်ႉၸၢတ်ႈ ၶၢဝ်းတၢင်း 70 ပီ။


တႄႇမႃးၸဵမ်မိူဝ်ႈ - 07-februeary -1947  ၽွင်းလႆႈယူႇႁူမ်ႈၵိုၵ်း ဢိင်းၵလဵတ်ႈ၊ ၸိူဝ်းၽူႈဢွၼ်ႁူဝ်ၵူႈၸိူဝ်ႉၸၢတ်ႈၸၢဝ်းၶိူဝ်း  ၼႂ်းၸိုင်ႈတႆး ၽွမ်ႉႁူမ်ႈၵၼ် ဢွၵ်ႇပဵၼ်သဵင်လဵဝ်  တႅပ်းတတ်း၊ ၶွတ်ႇၽွတ်ႈၶွင်ႇသီႇၸိုင်ႈတႆး ၊ မၵ်းမၼ်ႈတုင်းၸိူဝ်ႉၸၢတ်ႈၸိုင်ႈတႆး၊ ၼႄလွင်ႈ ၶွတ်ႇလိူတ်ႈၽွမ်ႉႁူမ်ႈၵၼ်မႃး။


ၼႂ်းလိၵ်ႈယိုၼ်ႈထိုင်ၼၼ်ႉ ပိူင်ယႂ်ႇမီး 4 ၶေႃႈ-


1) 07/02/1947 ပဵၼ်ဝၼ်း တူဝ်တႅၼ်းၸဝ်ႈၾႃႉ/တူဝ်တႅၼ်းၵူၼ်းမိူင်းလႆႈၸႂ် ၶွတ်ႇၽွတ်ႈၶွင်ႇ သီႇၸိုင်ႈတႆးသေ ၽိုၼ်ႉဝၢႆႇၶုၼ်ဢိင်းၵလဵတ်ႈ၊ ပေႃးဢမ်ႇမီး 07/02/1947 ၼႆႉၵေႃႈ တေ ဢမ်ႇမီး 12/02/1947 ဝၼ်း မိူင်းႁူမ်ႈတုမ်။


2) ၶႂ်ႈႁႂ်ႈၵူၼ်းၸုပ်ႈလင် တွင်းၵုိမ်း သုိပ်ႇတႅမ်ႈပိုၼ်းဝႃႈ 07/02/1947 ၼႆႉ ပဵၼ်ဝၼ်း တူၵ်းသုမ်းၵၢၼ်မိူင်း မႃးလႄႈ  ၸင်ႈလႆႈပဵၼ်သိုၵ်းပဵၼ်သိူဝ်၊ ၵူၼ်းမိူင်းတႆးတုၵ်ႉယၢၵ်ႈမႃး ဝႃႈၼႆ။


3) ၶႂ်ႈႁႂ်ႈၵူၼ်းမိူင်းတႆး တူင်ႉတိုၼ်ႇ ႁူမ်ႈၵၼ်တုၵ်းယွၼ်းသုၼ်ႇလႆႈ ယႃႇႁႂ်ႈပဵၼ် ၵႆႇၼိုင်ႈတူဝ် ၶၼ်ၼိုင်ႈငွၼ်ႈ။


4) ႁႂ်ႈၸွႆႈၵၼ် ဝူၼ်ႉသၢင်ႈၶိုင်ပွင် ယႃႈႁႂ်ႈၸိူဝ်ႉၸၢတ်ႈတူၵ်းလႃႈ တူၵ်းလိုၼ်း။


လိူဝ်သေၼၼ်ႉ ၼႂ်းၽိုၼ်လိၵ်ႈယိုၼ်ႈထိုင်ၼၼ်ႉ ၵေႃႈ တူၵ်ႇလၢတ်ႈပႃး ၵဵဝ်ႇၵပ်းလူၺ်ႈလွင်ႈ လိၵ်ႈႁူမ်ႈမၢႆပၢင်လူင် ဢၼ်ၽူႈၼမ်းမိူင်းသၼ်လွႆတႆး၊ ၶၢင်၊ ၶျၢင်းသေ  တူၵ်းလူင်း တင်းၸွမ် ႁၢၼ်ဢွင်ႇသၢၼ်း  မီးယူႇ 9 ၶေႃႈ ၸိူဝ်းၼၼ်ႉဝႃႈၼႆ ။


ၸွမ်ၸိုင်ႈ ဢူးထိၼ်ႇေၵျႃႇၵေႃႈ  ယိုၼ်ႈလိၵ်ႈယေႃးမုၼ် ၼႂ်းတိုဝ်ႉတၢင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 70 ပီ၊ တူၵ်ႇတၵ်ႉ ႁႂ်ႈသၢၼ်မိုဝ်းၵၼ် သၢင်ႈလွင်ႈငမ်းယဵၼ်၊ တႃႇႁႂ်ႈမီးသုၼ်ႇလႆႈသုၼ်ႇပဵၼ် ၽဵင်ႇပဵင်း ဝႃႈၼႆ။