ႁူဝ်ပဝ်ႈလူင် RCSS/SSA ၸွမ်သိုၵ်းယွတ်ႈသိုၵ်း ဢႃယု ၶွပ်ႈတဵမ် 60 ပီ ၸတ်းပၢင်ပွႆးဝၼ်းၵိူတ်ႇ ပဵၼ်ပွၵ်ႈၵမ်းႁႅၵ်ႈ၊ မၼ်းၸဝ်ႈလၢတ်ႈဝႃႈ ထိုင်ၶၢဝ်းယၢမ်း ပိၼ်ႇလႅၵ်ႈပၢႆးဝူၼ်ႉ- ဝႃႈၼႆ။

ဝၼ်းတီႈ 08/02/2017 ယၢမ်းဝၢႆးဝၼ်း 15:30 မူင်း ငဝ်ႈငုၼ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉ သိုၵ်းၸိုင်ႈတႆး RCSS/SSA ၸတ်းႁဵတ်း ပၢင်ပွႆးယုၵ်ႉယွင်ႈဝၼ်းၵိူတ်ႇ ၸွမ်သိုၵ်းယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA တီႈငဝ်ႈငုၼ်းလွႆတႆးလႅင်း မီႈပီႈၼွင်ႉၶႅၵ်ႇ ၼွၵ်ႈမိူင်း/ၼႂ်းမိူင်းၶဝ်ႈႁူမ်ႈ တင်းၼမ်။


ၸွမ်သိုၵ်းယွတ်ႈသိုၵ်း လၢတ်ႈဝႃႈ “ ၼႂ်းၸူဝ်ႈပၢၼ်ၵဝ်ၶႃႈၼႆႉ ပွႆးဝၼ်းၵိူတ်ႇဢၼ်ဝႃႈၼၼ်ႉ တိုၵ်ႉၸတ်းႁဵတ်းပွၵ်ႈၼႆႉၵူၺ်း။ မိူဝ်ႈၵွၼ်ႇဢမ်ႇယၢမ်ႈလၢတ်ႈၼႄ ဝၼ်းၵိူတ်ႇၵဝ်ၶႃႈသေပွၵ်ႈ။  ၵူၺ်းဝၼ်းမိူဝ်ႈၼႆႉတႄႉ ပိုတ်ႇလၢတ်ႈပိုၼ်ၽၢဝ်ႇယဝ်ႉ။ ၵွပ်ႈပိူဝ်ႈသင်ၼႆၵူၼ်းႁဝ်းၼႆႉ မၼ်းယူႇၸွမ်းသီႇပၢၼ်၊ ပၢၼ်တီႈၼိုင်ႈၼႆႉ ယူႇႁူမ်ႈငဝ်ႈပေႃႈမႄႈ တႄႇၵိူတ်ႇမႃး တေႃႇထိုင်ဢႃယု 20 ပီ။ ပၢၼ်တီႈသွင်သမ်ႉ ဢႃယု 20-40 ၼႆႉ တေလႆႈပိုင်ႈဢိင်တူဝ်ၸဝ်ႈၵဝ်ႇ၊ ႁႃတၢင်းႁူႉ၊ ႁႃၵၢၼ်၊ ႁႃၼႃႈႁိူၼ်း၊ ႁႃငိုၼ်းတွင်း၊ ႁႃၸိုဝ်ႈသဵင် တွၼ်ႈတႃႇပူၵ်းပွင်ၽဝႃႉၸဝ်ႈၵဝ်ႇ။ ပၢၼ်တီႈသၢမ်သမ်ႉ ဢႃယု 40-60 ပီ ပဵၼ်ပၢၼ်ဢွၼ်ႁူဝ်ၼမ်းၼႃႈပိူၼ်ႈ၊ ပၢၼ်တီႈသီႇ သမ်ႉ ပေႃးဢႃယု 60 ပီၶိုၼ်ႈ ၵႂႃႇၼၼ်ႉတႄႉ လူဝ်ႇပိၼ်ႇလႅၵ်ႈပၢႆးဝူၼ်ႉသေ ၸိၸမ်ႈၼေတၢင်း လုၵ်ႈဢွၼ်ႇႁဝ်း ႁႂ်ႈၵႂႃႇတၢင်းဢၼ် ထုၵ်ႇမႅၼ်ႈ” ဝႃႈၼႆ။


ၾၢႆႇၼိုင်ႈၵေႃႈပီၼႆႉ တပ်ႉသိုၵ်းမိူင်းတႆး MTA ဝၢင်းၶိူင်ႈ ၶွပ်ႈၶူပ်ႇ 20 ပီ။  မိူဝ်ႈပီ 1996 လိူၼ်ၼိုင်ႈ ဝၼ်းတီႈ 7 ၼၼ်ႉဝၢင်းၶိူင်ႈ ပၼ်လူင်ပွင်ၸိုင်ႈသိုၵ်ႈမၢၼ်ႈၼဢၽ။ ၵူၺ်းၵႃႈ ၸွမ်သိုၵ်းယွတ်ႈ သိုၵ်းတႄႉ ဢမ်ႇယွမ်းၵၢၼ်ႉ ဝၢင်းၶိူင်ႈ သိုပ်ႇၸုၵ်းၼိူဝ်ၵၢၼ်ၸိူဝ်ႉၸၢတ်ႈမႃး တေႃႇယၢမ်း လဵဝ်။


ၵဵဝ်ႇၵပ်းလွင်ႈၼႆႉ ၸွမ်သိုၵ်းယွတ်ႈသိုၵ်းလၢတ်ႈၼႄဝႃႈ “  ၵၢၼ်ဝၢင်းၶိူင်ႈဢၼ်ဝႃႈၼၼ်ႉ မိူၼ်ၸိူင်ႉ ၼင်ႇၵၢၼ်းသေ ဢဝ်ႁူဝ်ႁဝ်းယိုၼ်ႈပၼ် ၽူႈၶဵၼ်တႅပ်း ႁဝ်းယုမ်ႇယမ်ၸိူင်ႉၼၼ်။ ၵွပ်ႈၼႆလႄႈ ၶႃႈႁဝ်းလူင်းႁိူၼ်းမႃး မီးၶေႃႈဢ တိတ်ႉထၢၼ်ဝႃႈ တေႁဵတ်းၵၢၼ်ပုၼ်ႈတႃႇၸိူဝ်ႉၸၢတ်ႈဝၢၼ်ႈမိူင်း၊ ၽႃသႃ၊ သႃသၼႃ၊ ပုၼ်ႈ တႃႇတေပူတ်းပွႆႇဢဝ် ၽႅၼ်လိၼ်ၸိုင်ႈတႆးႁဝ်း ႁႂ်ႈပေႃးလႆႈလွတ်ႈ လႅဝ်း ၵွၼ်းၶေႃ” ဝႃႈၼႆ။


ဝၼ်းၵိူတ်ႇၸွမ်သိုၵ်းယွတ်ႈသိုၵ်း ၶွပ်ႈတဵမ် 60 ပီ ဝၼ်းၸိူဝ်ႉၸၢတ်ႈၸိုင်ႈတႆး သမ်ႉ ၶွပ်ႈတဵမ် 70 ပီ၊ ပီႈၼွင်ႉၶႅၵ်ႇ မိူင်းၶႄႇ မိူင်းမၢၼ်ႈ၊ မိူင်းတႆးလႄႈ မိူင်းထႆး ႁူမ်ႈလူၺ်ႈ ၵေႃႉသိုၵ်းၵေႃႉ ႁၢၼ် ၶဝ်ႈႁူမ်ႈ တိူင်ႇၵၢဝ်ႇယွၼ်းသူးပၼ်ၸွမ်သိုၵ်းယွတ်ႈသိုၵ်း၊ တႆႈတဵၼ်းတႃႇ 61 လႅမ်ႈ ၵိၼ်ၶဝ်ႈ ၶမ်ႈႁူမ်ႈ မူႇၵၼ်။
ၼွၵ်ႈလိူဝ်ၼၼ်ႉ ၸုမ်းၾိင်ႈငႄႈ ၵႃႈဝႅၼ်လဝ်ႇမူၼ်ႈပၼ် ပီႈၼွင်ႉၶႅၵ်ႇ။ ၽူႈႁွင်ႉၽဵင်ႈၵႂၢမ်းတႆး ၸိုဝ်ႈ သဵင်ယႂ်ႇ လၢႆလၢႆၵေႃႉ ႁွင်ႉၽဵင်းၵႂၢမ်းယုၵ်ႉယွင်ႈဝၼ်းၵိူတ်ႇၸွမ်းသိုၵ်းယွတ်ႈသိုၵ်း။


ပိုၼ်းၵႅပ်ႈၸွမ်သိုၵ်းယွတ်ႈသိုၵ်း

ၸိုဝ်ႈ - ၸွမ်သိုၵ်းယွတ်ႈသိုၵ်း

ၸိုဝ်ႈတၢင်ႇဢၼ် - ၵျေႃႇဢူင်း

ၸိုဝ်ႈပေႃႈ - ၸရေးလုင်းသၢင်ႇလူႇ

ၸိုဝ်ႈမႄႈ - ပႃႈလွႆၶမ်း

ဝၼ်း/လိူၼ်/ပီၵိူတ်ႇ- 08/02/2017 (ငဝ်ႈၸိုင်ႈလွႆတႆးလႅင်း ၸတ်းႁဵတ်းပွႆးဝၼ်းၵိူတ်ႇၼႆသေတႃႉ ၼႂ်းပပ်ႉ ၸဝ်ႈၶိုၼ်းသႂ်ႇ တႅမ်ႈတႄႉဝႃႈ ဝၼ်းၵိူတ်ႇၸွမ်သိုၵ်းယွတ်ႈသိုၵ်း ပဵၼ်ဝၼ်းတီႈ 24/04/1959။

တီႈၵိူတ်ႇ - ဝၢၼ်ႈၵုၼ်ယူမ်း ဢိူင်ႇမိူင်းယၢႆး ၵိင်ႇၽႄၸႄႈဝဵင်းမိူင်းၼွင်၊ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။

ၵၢၼ်ႁဵၼ်းပၢႆးပၺ်ၺႃ - ႁူင်းႁဵၼ်းလူင်ပွင်ၸိုင်ႈ ၸၼ်ႉၵၢင်၊ တီႈဝဵင်းပၢင်လူင်။

ၼႃႈႁိူၼ်း - ၵူပ်ႉၵူႈတႄႇၼႃႈႁိူၼ်းၸွမ်း ၼၢင်းလႃႉၵျီႇ၊ တေႃႈလဵဝ်သမ်ႉ ၼႃႇႁိူၼ်းၵိုၵ်ႉဝႆႉၸွမ်း ၼၢင်းလိူၼ်ၶမ်း။

လုၵ်ႈလၢင်း - ၸၢႆး 3 ၵေႃႉ၊ ယိင်း 2 ၵေႃႉ ။

ၸူဝ်ႈပၢၼ်ႁၢပ်ႇပၢၼ်ၸိူဝ်ႉၸၢတ်ႈ

ပီ 1976 လႆႈၶဝ်ႈႁဵတ်းသိုၵ်း ၼႂ်းတပ်ႉသိုၵ်း SURA၊ ၶိုၼ်ႈပၢင်ၾိုၵ်းသွၼ် ၾၢႆႇၵပ်းသိုပ်ႇ/သၢႆလူမ်း။ ယဝ်ႉၵေႃႈ လႆႈႁၢပ်ႇၵၢၼ်ဝႆႉတီႈလုမ်းၵပ်းသိုပ်ႇ ၸဝ်ႈၵွၼ်းၸိူင်း။

ပီ 1980 ၶိုၼ်ႈပၢင်သွၼ် ၵၢၼ်သိုၵ်း၊ ၵၢၼ်မိူင်း။ ဝၢႆးလူင်းပၢင်သွၼ်ယဝ်ႉ လႆႈႁၢပ်ႇပုၼ်ႈၽွၼ်း ၾၢႆႇသိုၵ်း။

ပီ 1982 လႆႈႁပ်ႉပုၼ်ႈၽွၼ်ႈၽူႈၵွၼ်း ၼႂ်းတပ်ႉၵွင် 101 သေ တူင်ႉၼိုင်တၢင်းပွတ်း လၢင်းၶိူဝ်း၊ မိူင်းၼၢႆး၊ ၼမ်ႉၸၢင်၊ ၶူဝ်လမ်၊ ၵဵင်းတွင်း။

ပီ 1990 လႆႈႁပ်ႉပုၼ်ႈၽွၼ်းတူင်ႉၼိုင် တၢင်းပွတ်းဢွၵ်ႇၶူင်း ၸႄႈဝဵင်းမိူင်းတူၼ်။

ပီ 1994 တိုၵ်ႉပေႉတီႈလွႆႁိၼ်ၵွင်သေ ၵူၼ်းမိူင်းတင်းၼမ်ႁူႉၸၵ်း။

ပီ 1996 ဝၢႆးသေ MTA ဝၢင်းၶိူင်ႈယဝ်ႉ၊ ၶိုၼ်းမေးၵေႃႇတင်ႈၶိုၼ်း SURA ။ မိူဝ်ႈၽွင်းၼၼ်ႉ ၼႂ်းၸိုင်ႈတႆး ပွတ်းၸၢၼ်း ၼႂ်းၸႄႈဝဵင်း 11 ၸႄႈဝဵင်းၼၼ်ႉ ဝၢၼ်ႈၵူၼ်း 1500 လႆႈထုၵ်ႇလိုပ်ႈၶၢႆႉ။

ပီ 1999 လႆႈတင်ႈငဝ်ႈငုၼ်းလွႆတႆးလႅင်း တီႈလႅၼ်လိၼ်တႆး-ထႆး။

ပီ 2000 ၶွတ်ႇၽွတ်ႈၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ။

ပီ 2011 လႆႈၵိုတ်းတိုၵ်းလူင်းလၢႆးမိုဝ်းၸွမ်းလူင်ပွင်ၸိုင်ႈမၢၼ်ႈ။

ပီ 2015 လူင်းလၢႆးမိုဝ်းၵိုတ်းတိုၵ်းပတ်ႉပိုၼ်ႉတူဝ်ႈမိူင်း NCA တင်းလူင်ပွင်ၸိုင်ႈမၢၼ်ႈ။