ပႃႇတီႇႁူဝ်သိူဝ် SNLD လူင်းႁူပ်ႉထူပ်းသူၼ်းတုမ် ပေႃႈမႄႈပီႈၼွင်ႉၵူၼ်းမိူင်းတႆး တၢင်းပွတ်း မိူင်းသူႈ၊ ၵေးသီးလႄႈ ၵဵင်းတုင် ၶဝ်ႈလိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းႁူဝ်လိူၼ် ဢေႊပရိူဝ်ႊ ပီ 2017 ၼႆႉ။

ဝၼ်းတီႈ 28/02/2017 ယၢမ်းၵၢင်ၼႂ် ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး/ ပႃႇတီႇႁူဝ်သိူဝ် (SNLD) လူင်းႁူပ်ႉထူပ်းသူၼ်းတုမ် ပေႃႈမႄႈပီႈၼွင်ႉၵူၼ်းမိူင်း ၼႂ်းၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း တီႈဝၢၼ်ႈၵဵင်းၽွင်း ဢိူင်ႇယၢင်းလေႃး၊ သပ်းလႅင်းသူၼ်းတုမ်ၼႄ လွင်ႈမူႇပိူင်ပႃႇတီႇ၊ လွၵ်ႈလၢႆးတွတ်ႈၶႅပ်းၵၢင်ၸႂ် ၸဵမ်ၸိူဝ်းၼႆႉ ဝႃႈၼႆ။


ၸၢႆးထုၼ်း ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းၵဵင်းတုင် လၢတ်ႈဝႃႈ “ ယူႇတီႈပႃႇတီႇႁူဝ်သိူဝ် ႁဝ်းၶႃႈ သေ လူင်းသူၼ်းတုမ်ပီႈၼွင်ႉၵူၼ်းမိူင်းႁဝ်း တၢင်းၵဵင်းတုင်ၼႆႉ ႁဝ်းၶႃႈ လႆႈလူင်းသူၼ်းတုမ် တႄႇဢဝ် ဝၼ်းတီႈ 17/02/2017 မႃး၊ ႁဝ်းၶႃႈ သပ်းလႅင်းပၼ်ပေႃႈမႄႈပီႈၼွင်ႉၵူၼ်းမိူင်းတႄႉ လွင်ႈမူႇပိူင် ၾႅတ်ႊတရႄႊပႃႇတီႇႁဝ်း၊ လွင်ႈလွၵ်းလၢႆးတွတ်ႈၶႅပ်းၵၢင်ၸႂ် ၸဵမ်ၸိူဝ်းၼႆႉ” ဝႃႈၼႆ။


ပႃႇတီႇႁူဝ်သိူဝ် ၸႄႈဝဵင်းၵဵင်းတုင် SNLD လူင်း သူၼ်းတုမ် ၼႂ်းၸႄႈဝဵင်းၵဵင်းတုင် မိူၼ်ၼင်ႇ ဢိူင်ႇ ၵၢတ်ႇထၢႆႈ၊ ဢိူင်ႇဝတ်ႉသၢဝ်း၊ ဢိူင်ႇယၢင်းလေႃး လႄႈ ဢိူင်ႇ မိူင်းၶွၼ် ၸိူဝ်းၼႆႉ ဝႃႈၼႆ။


ယူႇတီႈပႃႇတီႇသိူဝ်ၽိူၵ်ႇ SNDP ၸႄႈဝဵင်းၵဵင်းတုင်သမ်ႉ တေႃႈလဵဝ် တိုၵ်ႉႁၢင်ႈႁႅၼ်ႈတႃႇ လူင်းႁူပ်ႉ ထူပ်း ပေႃႈမႄႈပီႈၼွင်ႉၵူၼ်းမိူင်းၼႂ်းၵဵင်းတုင် ဢမ်ႇႁိုင်ၼၢၼ်းၼႆႉ တေလူင်းပိုၼ်ႉတီႈႁူပ်ႉထူပ်း ၵူၼ်းမိူင်းသေ သူၼ်းတုမ်ၼင်ႇၵဝ်ႇ ဝႃႈၼႆ။


ၸၢႆးသိူဝ်ႁၢၼ် ၾၢႆႇယိပ်းသဵၼ်ႈမၢႆၵေႃပွင်ၵၢၼ်ငဝ်ႈငုၼ်း ပႃႇတီႇသိူဝ်ၽိူၵ်ႇလၢတ်ႈဝႃႈ  “ ဢမ်ႇႁိုင် ဢမ်ႇၼၢၼ်းၼႆႉ ႁဝ်းၶႃႈ တေလူင်းႁူပ်ႉထူပ်းပေႃႈမႄႈပီႈၼွင်ႉၵူၼ်းမိူင်းႁဝ်း ၼႂ်းၸႄႈဝဵင်းၵဵင်းတုင် ယဝ်ႉ၊ ယွၼ်ႉတေႃႈလဵဝ် ႁဝ်းၶႃႈ တိုၵ်ႉဢွၼ်ၵၼ်ႁၢင်ႈႁႅၼ်းဝႆႉယူႇ၊ ယူႇတီႈပႃႇတီႇႁဝ်းၶႃႈသေ  တေ လူင်းသပ်းလႅင်းသူၼ်းတုမ် ပၼ်ပီႈၼွင်ႉႁဝ်းၶႃႈသမ်ႉ မိူၼ်ၼင်ႇ  လွင်ႈၾႅတ်ႊတရႄႊ၊ ၶွတ်ႇၽွတ်ႈ ၵေႃၸဝ်ႈႁႆႈၸဝ်ႈၼႃးလႄႈ ၵၢၼ်လိူၵ်ႈတင်ႈ ၸဵမ်ၸိူဝ်းၼႆႉ” ဝႃႈၼႆ။


ၼႂ်းၸႄႈဝဵင်းၵဵင်းတုင် မီးပႃႇတီႇၵၢၼ်မိူင်း ဢၼ်တေၶဝ်ႈလိူၵ်ႈတင်ႈသွမ်ႈ တင်းမူတ်း 6 ဢၼ်။ မိူၼ်ၼင်ႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇၼူၵ်ႉယုင်း၊ ပႃႇတီႇသၢင်ႇသီႈ၊ ပႃႇတီႇဢႃးၶႃႇလႄႈ ပႃႇတီႇလႃးႁူႇ ၸဵမ်ၸိူဝ်းၼႆႉ ဝႃႈၼႆ။


ၵူၺ်းၵႃႈ ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်းၼႂ်းႁူဝ်လိူၼ်ဢေႊပရိူဝ်ႊၼႆႉ ယူႇတီႈပႃႇ တီႇၵွင်ၸႆး ESSDDP တေဢမ်ႇၶဝ်ႈလိူၵ်ႈတင်ႈသွမ်ႈ ဝႃႈၼႆ။
ၼေႃႇၽူႈတႅၼ်းပႃႇတီႇႁူဝ်သိူဝ် ဢၼ်တေၶဝ်ႈလိူၵ်ႈတင်ႈသွမ်ႈ ၼႂ်းၸႄႈဝဵင်းၵဵင်းတုင်သမ်ႉ လုင်းၸၢႆးလူင်၊ ၼေႃႇၽူႈတႅၼ်းပႃႇတီႇသိူဝ်ၽိူၵ်ႈသမ်ႉ လုင်းၸၢႆးယွတ်ႈႁွင် ဝႃႈၼႆ။


ၼွၵ်ႈလိူဝ်သေၼႆႉ ၼႂ်းမိူင်းတႆး ဢၼ်လုတ်ႈႁၢမ်းပဝ်ႇတီႈၼင်ႈသၽႃး တင်းမူတ်းမီး 8 တီႈၼင်ႈ မိူၼ်ၼင်ႇ ၸႄႈဝဵင်းမိူင်းသူႈ 3 တီႈၼင်ႈ၊ ၸႄႈဝဵင်းၵေးသီး 3 တီႈၼင်ႈ၊ ၸႄႈဝဵင်းၵဵင်းတုင် 1 တီႈ ၼင်ႈလႄႈ ၸႄႈဝဵင်းယွင်ႁူၺ်ႈ 1 တီႈၼင်ႈ ၸဵမ်ၸိူဝ်းၼႆ။ ၼွၵ်ႈသေ ယွင်ႁူၺ်ႈ ပႃႇတီႇႁူဝ်သိူဝ်၊ သိူဝ်ၽိူၵ်ႇ တေၶဝ်ႈၶေႉၶႅင်ႇၵၼ် 7 တီႈၼင်ႈ။ ပႃႇတီႇမၢၼ်ႈ ၼူၵ်ႉယုင်း၊ သၢင်ႇသီႇၵေႃႈ တေၶႅင်ႇ ၵူႈတီႈၼင်ႇၵဝ်ႇ ဝႃႈၼႆ။