ပၢင်ပွႆးမႁႃသတိပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇသင်ၶၸဝ်ႈ ၼႂ်းၸိုင်ႈတႆး ၵမ်းထူၼ်ႈ 51 ၼႆႉ ၸတ်းႁဵတ်းတီႈ ၸႄႈဝဵင်းမိူင်းၼၢႆးသေ သင်ၶၸဝ်ႈ ၼႂ်းၸိုင်ႈတႆး ယေႃးတူဝ် ၶဝ်ႈႁူမ်ႈ 400 တူၼ်ပၢႆ။

ဝၼ်းတီႈ 28/02/-03/03/2017 ယၢမ်းၵၢင်ၼႂ် ထိုင် တၢမ်းၶမ်ႈ သင်ၶၸဝ်ႈၾၢႆႇတိုဝ်းၵမ် - ၵမ်မ ထၢၼ်းသထူင်ႇမူႇလမိၼ်းၵုၼ်းဢွၼ်ႁူဝ်ၼမ်း ၼႃႈ ၸတ်းႁဵတ်းပၢင်ပွႆးမႁႃသတိပထၢၼ်ႇ ပၢင်ၵုမ် လူင် ၺီႇလႃႇၶၢမ်ႇသင်ၶၸဝ်ႈ ၸိုင်ႈတႆး ပွၵ်ႈ ၵမ်းထူၼ်ႈ 51 တီႈဝတ်ႉၵမ်မထၢၼ်းၵုင်းမူၼ်း ၸႄႈ ဝဵင်းမိူင်းၼၢႆး ၸိုင်ႈတႆး ပွတ်းၸၢၼ်း။ ယိူင်း ဢၢၼ်းပၢင်ၵုမ်ဢၼ်ၸတ်းႁဵတ်းသမ်ႉ မိူၼ်ၼင်ႇ တိူၵ်ႈ ၵမ်မထၢၼ်းသတိပထၢၼ်ႇ ၸႄႈဝဵင်းၽႂ် ၸႄႈဝဵင်းမၼ်း ဢဝ်မႃးဢုပ်ႇဢူဝ်းလႅၵ်ႈလၢႆႈ တၢင်ႇလၢတ်ႈ ၼႄၵၼ် လွင်ႈၶိုၼ်ႈယႂ်ႇမႂ်ႇသုင်၊ လွင်ႈယူပ်ႈ ယွမ်းလႄႈ လွင်ႈတမ်းဝၢင်းၼႃႈၵၢၼ်ၵႂႃႇထႅင်ႈတၢင်းၼႃႈ ၸဵမ်ၸိူဝ်းၼႆႉ။


ၸဝ်ႈတူၼ်ႈၶူး ဢုတ်ႉတရ ၽူႈမၢႆလူင် တိူၵ်ႈၵမ်မထၢၼ်း လၢတ်ႈဝႃႈ “ ဢၼ်လႆႈၸတ်းႁဵတ်း ပၢင်ၵုမ် လူင် သတိပထၢၼ်ႇၼႆႉ ယူႇတီႈသင်ၶၸဝ်ႈၸိုင်ႈတႆးႁဝ်း တေဢဝ်မႃးဢုပ်ႇလၢတ်ႈလႅၵ်ႈလၢႆႈ ထတ်း သၢင်ၶိုၼ်း လွင်ႈၶိုၼ်ႈယႂ်ႇမႂ်ႇသုင်၊ လွင်ႈယူပ်ႈယွမ်းလႄႈ တမ်းဝၢင်းၼႃႈ ၵၢၼ်တႃႇတၢင်းၼႃႈ ထႅင်ႈ ၸဵမ်ၸိူဝ်းၼႆႉ။ ပေႃးထိုင်မႃး ဝၼ်းတီႈလိုၼ်းသုတ်း လူႇတၢၼ်းယၢတ်ႇၼမ်ႉၸိုင် သင်ၶၸဝ်ႈ ႁဝ်း တင်းသဵင်ႈ ၸင်ႇတေတႅပ်းတတ်းၶေႃႈဢုပ်ႇၵုမ်ၵၼ်။ ၵမ်မထၢၼ်းသတိပထၢၼ်ႇ မူႇလမိၼ်းၵုၼ်း ၼႆႉ ယူႇတီႈၸဝ်ႈတူၼ်ၶူးလူင် မိူင်းၼွင် ႁပ်ႉႁွင်းသေ ၵေႃႇတင်ႈၶိုၼ်းမႃး” ဝႃႈၼႆ။


ပၢင်ၵုမ်လူင် ၺီႇလႃႇၶၢမ်ႇ သတိပထၢၼ်ႇ တီႈၸႄႈဝဵင်းမိူင်းၼၢႆးၼႆႉ တႄႇဢဝ်ဝၼ်းတီႈ 28/02/ 2017 ပဵၼ်ဝၼ်းသင်ၶႁွတ်ႈထိုင်(ၶွၼ်ႈတုမ်ၵၼ်)၊ ဝၼ်းတီႈ 01/03/2017 ပၢင်ၵုမ်သင်ၶၸဝ်ႈ၊  ဝၼ်း တီႈ 02/03/2017 သမ်ႉ ပၢင်ၵုမ်ၵူၼ်းမိူင်းလႄႈ ဝၼ်းတီႈ 03/02/2017 ပဵၼ်ဝၼ်း တၢၼ်းယၢတ်ႇ ၼမ်ႉ ဝႃႈၼႆ။


မိူဝ်ႈပူၼ်ႉမႃး ဝၼ်းတီႈ 30/11/2016  သင်ၶၸဝ်ႈတင်းၶွမ်ႊမတီႊပွင်ပဵၼ်ပၢင်ပွႆး ၸတ်းႁဵတ်း ပၢင် ၵုမ်ၶိုၵ်ႉၶၵ်ႉ တီႈဝတ်ႉၵမ်မထၢၼ်း ၸႄႈဝဵင်းလၢင်းၶိူဝ်း  ၸိုင်ႈတႆး ပွတ်းၸၢၼ်း ဢုပ်ႇဢူဝ်းလႆႈ ၸႂ် တႅပ်းတတ်းၵၼ်ဝႃႈ ပၢင်ပွႆးၺီႇလႃႇၶၢမ်ႇ မူႇလမိၼ်းၵုၼ်းၼႆႉ ယူႇတီႈ ၵျွင်းၵမ်မထၢၼ်း ဝဵင်းမိူင်း ၼၢႆး ႁပ်ႉပဵၼ်ငဝ်ႈၸဝ်ႈသတ်ႉထႃးသေ ၸတ်းႁဵတ်းပၢင်ပွႆးၵႂႃႇ။ ယွၼ်ႉဝႃႈ ပီၼႆႉ တိူၵ်ႈၵမ်မထၢၼ်း ၸႄႈ လၢၼ်ႉ တေႁပ်ႉႁဵတ်း၊  ယွၼ်ႉငဝ်းလၢႆး ပၢင်တိုၵ်းသိုၵ်း ဢမ်ႇၼိမ်သဝ်းလႄႈ ဢမ်ႇပဵၼ် ၸတ်းႁဵတ်း ၼႆယဝ်ႉ။


ပၢင်ၵုမ်လူင်ၺီႇလႃႇၶၢမ်ႇမူႇလမိၼ်းၵုၼ်း ၵမ်းထူၼ်ႈ 50 ပီၵွၼ်းၶမ်းတႄႉ လႆႈၸတ်း ႁဵတ်းတီႈ ဝတ်ႉ/ၵျွင်းၵမ်မထၢၼ်း ၸႄႈဝဵင်းလၢင်းၶိူဝ်း ၸႄႈတွၼ်ႈလၢင်းၶိူဝ်း မိူဝ်ႈဝၼ်းတီႈ 16-18/03/2016။


သုၼ်တိုဝ်းၵမ် ၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆး ပတ်းပိုၼ်ႉ မီး 18 တီႈ (ၼႂ်း 18 ၸႄႈဝဵင်း) ၼႆယဝ်ႉ။