ၸိုင်ႈတႆးပွတ်းၸၢၼ်း တီႈဝဵင်းလူင်တူၼ်ႈတီးၼၼ်ႉ ၽူႈလူင်ႉလႅၼ်ႇလိၵ်ႈလၢႆးတႆး ႁူပ်ႉထူပ်း ဢုပ်ႇဢူဝ်းၵၼ် ႁႃသဵၼ်ႈတၢင်း၊ ဝၢင်းၽႅၼ်ၵၢၼ် ယုၵ်ႉမုၼ်းပၢႆးပၺ်ၺႃတႆး ႁႂ်ႈၶိုၼ်ႈသင်ႉၶိုၼ်ႈသုင် ။

ဝၼ်းတီႈ 25-26/02/2017 ၵဝ်ႉငဝ်ႈပူၵ်းပွင် ပၢႆးပၺ်ၺႃလႄႈ မုၼ်းလႅင်းဝၢၼ်ႈဢိူင်ႇ ၸိုင်ႈတႆး ၸတ်းႁဵတ်း ပၢင်ႁူပ်ႉထူပ်းဢုပ်ႇဢူဝ်းၵၼ် တႃႇႁႃလၢႆးတၢင်းပူၵ်းပွင် ပၢႆးပၺ်ၺႃတႆး တီႈဝဵင်းတူၼ်ႈတီး ၸိုင်ႈတႆးပွတ်း ၸၢၼ်း။ ၽူႈမီးပိုၼ်းႁူႉပၢႆးႁၼ် မိူၼ်ၼင်ႇ ၸဝ်ႈၶူးလူင် Dr.ၶမ်းမၢႆ ထမ်မသႃမိ ၊Dr. ၸၢႆးၼေႃႇၶိူဝ်း၊ Dr.ၸၢႆးသၢင်ႇဢၢႆႈ၊ Dr.ၶမ်းမိူင်း၊ ၵေႃလိၵ်ႈလၢႆးတႆး၊ ၽူႈတူင်ႉၼိုင်လွင်ႈပၢႆးပၺ်ၺႃ ဢိၵ်ႇၽူႈသူၼ်ၸႂ် ၶဝ်ႈႁူမ်ႈမွၵ်ႈ 100 ပၢႆ။


တီႈပၢင်ဢုပ်ႇဢူဝ်းၵၼ်ၼၼ်ႉ ၽူႈလူင်ႉလႅၼ်ႇလိၵ်ႈလၢႆးတႆးၶဝ်ၸဝ်ႈ ဢုပ်ႇၵုမ်ၵၼ်ႁႃလွၵ်းလၢႆး ပိူဝ်ႈတႃႇ ပူၵ်းပွင်ယုၵ်ႉမုၼ်း ႁႂ်ႈပၢႆးပၺ်ၺႃၼႂ်းၸိုင်ႈတႆး ၶိုၼ်ႈယႂ်ႇမႂ်ႇသုင်ၶၢဝ်းယၢဝ်း၊ ၼင်ႇႁိုဝ်ပၢႆးပၺ်ၺႃ ၼႂ်းဝၢၼ်ႈ ၼႂ်းသူၼ် ၼႂ်းဝၢၼ်ႈၼႂ်းဢိူင်ႇ ၸွမ်းဝၢၼ်ႈၼွၵ်ႈၼႃးပၢင်ႇ တေႁုၼ်ႈမုၼ်း ၶိုၼ်ႈယႂ်ႇမႂ်ႇသုင်မႃး ၶိုတ်းပဵင်း ပိူၼ်ႈလႆႈ ၸိူဝ်းၼႆႉမႃးဢုပ်ႇၵုမ်ထတ်းသၢင်ၵၼ်ၶိုၼ်းဝႃႈ တေဝၢင်းၽႅၼ်ၸိူင်ႉႁိုဝ်?၊ တေႁူမ်ႈၵၼ်ၸိူင်ႉႁိုဝ်?၊ တေပူင်သွၼ် ၸိူင်ႉႁိုဝ်?ၸဵမ်ၸိူဝ်းၼႆႉ ဝႃႈၼႆ။


ယိူင်းဢၢၼ်းဢၼ်လႆႈၸတ်းႁဵတ်းတႄႉၵေႃႈ ၼင်ႇႁိုဝ် တေၵေႃႇတင်ႈလႆႈၶွမ်ႊမတီႊႁူမ်ႈႁဵတ်းသၢင်ႈ၊ လွင်ႈ ၵၢၼ်ႁဵၼ်းၵၢၼ်သွၼ်ၼႆႉ ႁႂ်ႈလႆႈပဵၼ်တႃႇတၢင်ၸိူဝ်ႉၶိူဝ်းတႆး၊ ပေႃႇလသီႇမၼ်းၵေႃႈ ႁႂ်ႈပဵၼ်တႃႇတႆး၊ ပိူင်သွၼ် မၼ်းၵေႃႈ ႁႂ်ႈၶိုၼ်းသိုပ်ႇၵမ်ႉတႃႇၸိူဝ်ႉၶိူဝ်းႁဝ်းၵႂႃႇ။


ၽူႈလူင်ႉလႅၼ်ႇလိၵ်ႈလၢႆးပၢႆပေႇတႆး ၻွၵ်ႊတိူဝ်ႊၸၢႆးၼေႃႇၶိူဝ်းလၢတ်ႈဝႃႈ - “ မိူဝ်ႈလဵဝ်တၢင်ႇၸၢဝ်းၶိူဝ်း မိူၼ်ၼင်ႇၶၢင်၊ မွၼ်း၊ ယၢင်းၸိူဝ်းၼႆႉ ပိူၼ်ႈဢွၼ်ၵၼ်ႁၢင်ႈႁႅၼ်းဝႆႉလွင်ႈပၢႆးပၺ်ၺႃယဝ်ႉ။ ပေႃးႁဝ်းဢမ်ႇမႃး ထူပ်းၵၼ်၊ ဢမ်ႇမႃးႁူမ်ႈမိုဝ်းၵၼ်ၸိုင် မိူဝ်းၼႃႈမႃးႁဝ်းတေတူၵ်းလိုၼ်းပိူၼ်ႈၵႂႃႇတိၵ်းတိၵ်းယဝ်ႉ၊ ၵွပ်ႈၼၼ် လႄႈ ၶႂ်ႈႁႂ်ႈပီႈၼွင်ႉၵူၼ်းမိူင်းတႆးၵူႈၵေႃႉ ဢွၼ်ၵၼ်သႂ်ႇၸႂ် ပၢႆးပၺ်ၺႃ တၢင်းႁူႉတၢင်းႁၼ် ၵၼ်ၼမ်ၼမ် သေၵမ်း ” ဝႃႈၼႆ။


ပၢင်ႁူပ်ႉထူပ်းဢုပ်ႇဢူဝ်းၵၼ် ၵဵဝ်ႇၵပ်းလွင်ႈပၢႆးပၺ်ၺႃမိူင်းတႆးၼႆႉ မိူဝ်ႈဝၼ်းတီႈ 19-21/12/2016 ၼၼ်ႉၵေႃႈဢုပ်ႇဢူဝ်းၵၼ်ယဝ်ႉၵမ်းၼိုင်ႈ။ တီႈပၢင်ၵုမ်ၼၼ်ႉ မီးတူဝ်တႅၼ်းၵေႃလိၵ်ႈလၢႆးလႄႈၾိင်ႈငႄႈတႆး ၵူႈၸႄႈဝဵင်း၊ ၸုမ်းတူင်ႉၼိုင်တူင်ႇဝူင်းၵူၼ်း ၵူႈၸႄႈဝဵင်း၊ ၽူႈလူင်ႉလႅၼ်ႇၵဵဝ်ႇၵပ်းလိၵ်ႈလၢႆးတႆး ၻွၵ်ႊတိူဝ်ႊ ၸၢႆးသၢင်ႇဢၢႆႈ၊ ၻွၵ်ႊတိူဝ်ႊ ၸၢႆးသၢင်ႇၽေႇ၊ ၻွၵ်ႊတိူဝ်ႊၸၢႆးၼေႃႇၶိူဝ်း၊ သြႃႇၸၢႆးၶမ်းမိူင်း၊ ၶူးပူင်သွၼ်လူင် လုင်းၸၢႆးၾႃႈ ၸိူဝ်းၼႆႉမႃးၶဝ်ႈႁူမ်ႈမွၵ်ႈ 100 ပၢႆ။