ဝၼ်းထိ 7 လိူၼ် ၾႅပ်ႉပိဝ်ႊရီႊ ဝၼ်းၸိူဝ်ႉၸၢတ်ႈၸိုင်ႈတႆး 70 ပီတဵမ်ၼၼ်ႉ တီႈငဝ်ႈငုၼ်း ပႃႇတီႇ မႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ငဝ်ႈငုၼ်းဝၢၼ်ႈႁႆး မီးပၢင်လႅၵ်ႈလၢႆႈတၢင်းႁူႉ 2 ပၢင် ပီၼႃႈ မႃး ၵေႃႈတေၶတ်းၸႂ်ၸတ်းပၢင်လႅၵ်ႈတၢင်းႁူႉၵၼ်ၵႂႃႇထႅင်ႈ တိၵ်းတိၵ်းဝႃႈၼႆ ။

ပၢင်လႅၵ်ႈလၢႆႈတၢင်းႁူႉ ၵဵဝ်ႇၵပ်းလူၺ်ႈ လွင်ႈငမ်းယဵၼ်

ပၢင်လႅၵ်ႈလၢႆႈတၢင်းႁူႉ ၵၢၼ်ၸိူဝ်ႉၸၢတ်ႈလႄႈၼၢင်းယိင်း

ပၢင်လႅၵ်ႈလၢႆႈတၢင်းႁူႉ 2 ပၢင် ဢၼ်ၸတ်းၼႂ်းဝၼ်းၸိူဝ်ႉၸၢတ်ႈၸိုင်ႈတႆးတဵမ် 70 ပီၼၼ်ႉ  ယူႇတီႈ SSPP/SSA သေၸတ်းပၢင် ၵဵဝ်ႇၵပ်းလူၺ်ႈ လွင်ႈငမ်းယဵၼ် ၊ ထႅင်ႈပၢင်ၼိုင်ႈသမ်ႉ ၸုမ်းၼၢင်းယိင်း SSWO  ၸတ်းပၢင်လႅၵ်ႈတၢင်းႁူႉ တႂ်ႈႁူဝ်ၶေႃႈဝႃႈ “ၵၢၼ်ၸိူဝ်ႉၸၢတ်ႈ လႄႈၼၢင်းယိင်း”  ။


ယၢမ်းဝၢႆးဝၼ်း 01:00 တေႃႇ 04:30  ငဝ်ႈငုၼ်းဝၢၼ်ႈႁႆး ၸတ်းႁဵတ်း ပၢင်လႅၵ်ႈလၢႆႈပိုၼ်ႉႁူႉ ၵဵဝ်ႇၵပ်းလူၺ်ႈ ၵၢၼ်ငမ်းယဵၼ် မီးၽူႈယႂ်ႇၵူၼ်းလူင် လႄႈ ၵူၼ်းမိူင်း ၵူၼ်းသိုၵ်းမႃးၶဝ်ႈႁူမ်ႈ ႁိမ်းၸမ် 200 ဝႃႈၼႆ ။


ၶူးပူင်သွၼ်ၸဝ်ႈၼိုင်ႈ သပ်းလႅင်းၼႄ ၵဵဝ်ႇၵပ်းၵၢၼ်ငမ်းယဵၼ်မိူင်းမၢၼ်ႈ တႄႇၸဵမ် မိူဝ်ႈပီ 2011  တေႃႇပေႃးထိုင် 2017 ၼႆႉၶဝ်လႅၵ်ႈလၢႆႈၸိူင်ႉႁိုဝ်မီးၸိူင်ႉႁိုဝ်။ မိူဝ်ႈပၢၼ်လူင်ပွင်ၸိုင်ႈတဵင်းၸိင်ႇ မၼ်းႁဵတ်းၸိူင်ႉႁိုဝ်။  ယွၼ်ႉသင်လႄႈ မီးမႃး ꨟNCA  ။ လိူဝ်သေၼၼ်ႉ ထိုင်မႃးပၢၼ် တေႃႇဢွင်ႇသၢၼ်းၸုႉၵျီႇ သမ်ႉ ႁဵတ်းသင်လႄႈ ၸႂ်ႉၸိုဝ်ႈ ပၢင်ၵုမ်လူင် ပၢင်လူင် ၸိူဝ်းၼႆႉ ။


ဝၢႆးသေ ၽူႈပူင်သွၼ်သပ်းလႅင်းၵႂႃႇယဝ်ႉ ၽူႈယႂ်ႇၵူၼ်းလူင် လႄႈ ၶူးပူင်သွၼ် ဢိၵ်ႇၽူႈၶဝ်ႈႁူမ်ႈ မီးလွင်ႈ တွင်ႈထၢမ်ၵၼ် ၵဵဝ်ႇၵပ်းလူၺ်ႈၵၢၼ်ငမ်းယဵၼ် ။


မုၵ်ႉၸုမ်းၼၢင်းယိင်းၸိုင်ႈတႆး SSWO သေ လႆႈဢွၼ်ႁူဝ် ၸတ်းႁဵတ်း ပၢင်လႅၵ်ႈပိုၼ်ႉႁူႉၼၢင်းယိင်း လႄႈ ဝၼ်းၸိူဝ်ႉၸၢတ်ႈၸိုင်ႈတႆး ပဵၼ်မႃးၸိူင်ႉႁုိဝ် ၸဵမ်ၸိူဝ်းၼႆႉ ဝႃႈၼႆ ။


ဝၼ်းတီႈ 07/02/2017 ယၢမ်းၵၢင်ၼႂ်ၼၼ်ႉသမ်ႉ ယူႇတီႈမုၵ်ႉၸုမ်းၼၢင်းယိင်းၸိုင်ႈတႆး ဢွၼ်ႁူဝ်ၸတ်းႁဵတ်းပၢင်လႅၵ်ႈပိုၼ်ႉႁူႉ ‘ပၢင်လႅၵ်ႈလၢႆႈပိုၼ်ႉႁူႉၼၢင်းယိင်း ၼႂ်းဝၼ်းၸိူဝ်ႉၸၢတ်ႈ’  ။ ၶၢဝ်းယၢမ်းၵၢင်ၼ်ႂ 9:00 တေႃႇထိုင် ၵၢင်ဝၼ်း 12:00  မူင်း။ မီးၵူၼ်းၶဝ်ႈႁူမ်ႈယူႇ မွၵ်ႈ 30 ပၢႆဝႃႈၼႆ ။


ၵဵဝ်ၵပ်းလွင်ႈၼႆႉ ၽူႈၸတ်းၵၢၼ် ၾၢႆႇၼၢင်းယိင်း SSWO  လၢတ်ႈဝႃႈ-“ ယိူင်းဢၢၼ်းတႄႉယွၼ်ႉ ပိူဝ်ႈလုၵ်ႈဢွၼ်ႇယိင်း ႁဝ်းၵမ်ႈၽွင်ႈ ႁႂ်ႈလႆႈႁူႉၸၵ်း ပိုၼ်းၸႅင်ႈလႅင်းလီ မိူၼ်ၼင်ႇ ဝၼ်းတႆးႁႃႉ ၊ ဝၼ်းၶိူဝ်းတႆး ၊  ဝၼ်းမိူင်းတႆး၊ ဝၼ်းၸိူဝ်ႉၸၢတ်ႈၸိုင်ႈတႆး  ၼႆႉ ပဵၼ်ဢၼ်လ်ႂ တႄႉတႄႉ၊ လိူဝ်သေၼၼ်ႉၵေႃႈ ႁဝ်းၶႃႈလႅၵ်ႈလၢႆႈပိုၼ်ႉႁူႉ ၵဵဝ်ႇၵပ်းလူၺ်ႈ ပိုၼ်းဝၼ်း ၸိူဝ်ႉၸၢတ်ႈ ၼႆႉ ဢၼ်ၶဝ်ႁူႉသမ်ႉမီးၸိူင်ႉႁိုဝ် ဢၼ်ႁဝ်းႁူႉသမ်ႉမီးၸိူင်ႉႁိုဝ် ဢၼ်ၶဝ်ႁူႉလႄႈ ဢၼ်ႁဝ်းႁူႉ သမ်ႉပဵၼ်ဢၼ်လ်ႂၽိတ်းထုၵ်ႇ ၸိူဝ်းၼႆႉ ပိၼ်ႇပၢႆႇလႅၵ်ႈလၢႆႈၵၼ်ၵႂႃႇ ” ဝႃႈၼႆ ။


လုၵ်ႈႁဵၼ်းၵေႃႉၼိုင်ႈၵေႃႈလၢတ်ႈဝႃႈ- “ဢၼ်ႁဝ်းၶႃႈလႆႈမႃးလဵပ်ႈႁဵၼ်းလႅၵ်ႈလၢႆႈပိၼ်ႇပၢႆႇၵၼ်ၸိူင်ႉ ၼႆၼႆႉ ႁဵတ်းႁႂ်ႈႁဝ်းၶႃႈ မီးလွင်ႈႁူပွင်ႇတႃလႅင်းမႃး  ၶႂ်ႈဝႃႈတႄႉ ဢၼ်ႇလ်ႂပဵၼ်ဢၼ်တႄႉ ဢၼ်လ်ႂ ပိူၼ်ႈႁဵတ်းႁႂ်ႈတႃႁဝ်းမူဝ်းဢၼ်ဝႃႈၼၼ်ႉၵေႃႈ မေႃၸႅၵ်ႇယႅၵ်ႈ ၸႅၵ်ႇၽႄမႃး ၊ လိူဝ်သေ ၼၼ်ႉဢမ်ႇ ၵႃး လွင်ႈလႆႈမႃးလဵပ်ႈႁဵၼ်းပွၵ်ႈၼႆႉၵေႃႈ တၢင်းႁူႉဢၼ်ႁဝ်းၶႃႈ ႁူႉလႄႈ ဢမ်ႇမိူၼ်ၵၼ်ၼၼ်ႉၵေႃႈ  ၸၢင်ႈႁူႉဢၼ်ၸႅင်ႈလႅင်းၵႂႃႇ ဢမ်ႇငဝ်းငဝ်းသင် ပဵၼ်ဢၼ်မီးၽွၼ်းလီတႄႉတႄႉၶႃႈယဝ်ႉ ” ဝႃႈၼႆ ။


ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ႁဝ်းၶႃႈၼႆႉ ပဵၼ်ဝၼ်းလမ်ႇလွင်ႈ ပဵၼ်ဝၼ်းမၢႆတွင်း ပုၼ်ႈတႃႇၵူၼ်း မိူင်း တႆးႁဝ်း ဢၼ်ၼိုင်ႈလႄႈ  မိူဝ်းၼႃႈမႃးၵေႃႈ လီမီးပၢင်လႅၵ်ႈလၢႆႈပိုၼ်ႉႁူႉ ဢမ်ႇဝႃႈၵဵဝ်ႇၵပ်း သင် ၵေႃႈယဝ်ႉ ႁႂ်ႈႁဝ်းတေ ဢမ်ႇမိူၼ်ၵူၼ်းတႃမူဝ်းၼၼ်ႉ လီလႆႈမီး ပၢင်လႅၵ်ႈလၢႆႈပိုၼ်ႉ ၵူႈၸိူဝ်ႉၵူႈယင်ႇ ယူႇ ၽူႈမီးၸၼ်ႉ ၼႂ်းပႃႇတီႇမႂ်ႇသုင်ၸိုင်ႈတႆး ၸဝ်ႈၼိုင်ႈလၢတ်ႈ ဝႃႈၼႆ ။