လွင်ႈတပ်ႉမတေႃႇသိုၵ်းမၢၼ်ႈ တတ်းမၵ်းတမ်းဝၢင်းပၼ် ႁႂ်ႈႁဵတ်းပၢင်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး တီႈမိူင်းတေႃႉမိူင်းထႃး ဢမ်ႇၼၼ် တီႈမိူင်းပၼ်ႇၼၼ်ႉ ဢမ်ႇၸၢင်ႈႁဵတ်းလႆႈ၊ ၵွပ်ႈယၢပ်ႇလွင်ႈၵႂႃႇမႃး တီႈယူႇသဝ်းၵိၼ်ယႅမ်ႉ။ လွင်ႈၼႆႉ ဢိင်ၼိူဝ်ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်သေ ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸဝ်ႈသိုၵ်းလူင်ၸၢႆးလႃႉ တွပ်ႇလၢတ်ႈၼင်ႇၼႆ။

ထၢမ်-လွင်ႈတေႁဵတ်းပၢင်ၵုမ်လူင် တီႈမိူင်းတေႃႉ-မိူင်းထႃး ဢၼ်ၾၢႆႇတပ်ႉသိုၵ်းမၢၼ်ႈၶဝ်ၶပ်းၶိုင်တမ်းဝၢင်း ပၼ်ၼၼ်ႉ လႆႈငိၼ်းဝႃႈတၢင်း RCSS ဢမ်ႇၽွမ်ႉၼႆ၊ လွင်ႈၼႆႉလၢတ်ႈၼႄပၼ်ငဝ်းလၢႆးမၼ်းဢိတ်းၼိုင်ႈ ပဵၼ်ၸိူင်ႉႁိုဝ်ၽွင်ႈၶႃႈ?။


တွပ်ႇ-မိူဝ်ႈဝၼ်းတီႈ 15/02/2017 ႁဝ်းၵႂႃႇထူပ်း UPDJC ၾၢႆႇတပ်ႉသိုၵ်းမၢၼ်ႈၶဝ် တီႈႁူင်းႁဵၼ်းတူၼ်ႈတီး။ ၶဝ်ဝႃႈႁႂ်ႈႁဝ်းၵႂႃႇႁဵတ်းတီႈမိူင်းတေႃႉ-မိူင်းထႃး၊ ဢမ်ႇၼၼ် တီႈၼမ်ႉပၼ်ႇ တီႈမိူင်းပၼ်ႇ။ ၵွပ်ႈၼၼ် ႁဝ်းဝႃႈလွင်ႈၼႆႉ ႁဝ်းတူၵ်းလူင်းၵၼ် တေႁဵတ်းတီႈတူၼ်ႈတီး၊ ၵွပ်ႈၼၼ် ႁဝ်းယွၼ်းႁဵတ်းတီႈတူၼ်ႈတီးၵူၺ်း၊ ႁဝ်းၶႃႈလႆႈဢုပ်ႇဢူဝ်းၶဝ်ၸိူင်ႉၼၼ်။


ၶဝ်တုမ်ႉတွပ်ႇဝႃႈ တပ်ႉမတေႃႇမၵ်းမၼ်ႈသေ ၵမ်ႉထႅမ်ပၼ်ၼႆႉ ပဵၼ်တီႈၸိူဝ်းၼႆႉၵူၺ်း၊ လိူဝ်သေၸိူဝ်းၼၼ်ႉ ဢမ်ႇၸၢင်ႈဢုပ်ႇဢူဝ်းၸွမ်း။ ပေႃးဝႃႈၸိူင်ႉၼၼ် ႁဝ်းၶိုၼ်းႁဵတ်းလိၵ်ႈသေၶိုၼ်းတၢင်ႇတီႈ ၸွမ်သိုၵ်းၶိၼ်ႇၸေႃႇဢူး၊ ဢၼ်ပဵၼ်ၽူႈတၢင်တူဝ် တပ်ႉမတေႃႇသေၶဝ်ႈပႃးၼႂ်း UPDJC  ဝၼ်းတီႈ 16 ၊ မၼ်းလၢတ်ႈဝႃႈ လွင်ႈၼႆႉဢမ်ႇၸၢင်ႈဝူၼ်ႉပၼ်၊ ႁႂ်ႈႁဵတ်းၵႂႃႇၸွမ်းၼင်ႇဢၼ်တပ်ႉမတေႃႇဝႃႈၼၼ်ႉၵူၺ်း။


ၶဝ်ဝႃႈၼႆႁင်းႁဝ်းၶႃႈလႄႈ ႁဝ်းၶႃႈၸင်ႇလႆႈမႃးတႅမ်ႈလိၵ်ႈ မိူဝ်ႈဝၼ်းတီႈ 19 သေ ၶိုၼ်းတၢင်ႇထိုင်တီႈ ၼၢင်းဢွင်ႇသၢၼ်းၸုၵျီႇ၊ မိူဝ်ႈဝၼ်းတီႈ 20 ၼႆႉ လိၵ်ႈထိုင်တီႈၼၢင်းဢွင်ႇသၢၼ်းၸုၵျီႇ၊ ၶဝ်ႁပ်ႉလႆႈသေၶိုၼ်းတွပ်ႇမႃးဝႃႈ ဢၼ်သူယွၼ်းႁဵတ်းတီႈတူၼ်ႈတီးလႂ်၊ ပၢင်လူင်လႂ်ၸိူဝ်းၼႆႉလႂ် မၼ်းတေလႆႈဢုပ်ႇဢူဝ်းငူင်ႉငီႉၵၼ်တင်း တပ်ႉမတေႃႇၵူၺ်း၊ တပ်ႉမတေႃႇၶဝ်ၵမ်ႉထႅမ်သေ တတ်းမၵ်းဝႆႉတႃႇတီႈႁဵတ်းပၢင်ဢုပ်ႇၵုမ် NC ၼႆႉ ပဵၼ်တီႈၸိူဝ်းၼႆႉၵူၺ်းလႄႈ ႁႂ်ႈႁဵတ်းၸွမ်းၶဝ်။


ၵွပ်ႈၼႆ မိူဝ်ႈဝၼ်းတီႈ 23 ၼႆႉ ႁဝ်းၶႃႈၶိုၼ်းႁဵတ်းလိၵ်ႈသူင်ႇၵႂႃႇၸူး တီႈၵိူဝ်းၵုမ်ၶွင်ၸိုင်ႈမိူင်း လႄႈႁူဝ်ပဝ်ႈ UPDJC ၵေႃႈပဵၼ် ၼၢင်းဢွင်ႇသၢၼ်းၸုၵျီႇ။ ႁဝ်းၶႃႈလႆႈလၢတ်ႈၵႂႃႇဝႃႈ ပေႃးႁႂ်ႈႁဝ်းႁဵတ်းတီႈၼမ်ႉပၼ်ႇႁႃႉ မိူင်းပၼ်ႇႁႃႉ၊ မိူင်းတေႃႉ-မိူင်းထႃးႁႃႉၸိူဝ်းၼႆႉ မၼ်းပဵၼ်ၼႂ်းထိူၼ်ႇၼႂ်းၶိူဝ်း၊ ႁဝ်းၶႃႈဢမ်ႇၸၢင်ႈႁဵတ်း။ ဢၼ်ႁဝ်းၶႃႈတေႁဵတ်း ပၢင်ဢုပ်ႇဢူဝ်းၵၢၼ်မိူင်း ၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး) ႁဝ်းၼႆႉ ႁဝ်းတေႁွင်ႉမွၵ်ႇၽူႈၶဝ်ႈဢုပ်ႇဢူဝ်းၸွမ်း မွၵ်ႈၵူၼ်း 400-500 ၵေႃႉ။ ၵွပ်ႈၼၼ် လွင်ႈၵႂႃႇမႃးဢွၵ်ႇတၢင်းၵေႃႈယၢပ်ႇ၊ တီႈၵိၼ်တီႈယႅမ်ႉ တီႈယူႇတီႈသဝ်း ၵေႃႈယၢပ်ႇ၊ မၼ်းဢမ်ႇၸၢင်ႈႁဵတ်း၊ ဢၼ်တေၸၢင်ႈႁဵတ်းလႆႈၼႆႉ မၼ်းပဵၼ်တီႈတူၼ်ႈတီးတင်း တီႈပၢင်လူင်ၵူၺ်း၊ ၵွပ်ႈၼၼ် ၶႂ်ႈႁႂ်ႈဝူၼ်ႉပၼ် 2 တီႈၼႆႉ။


ပေႃးဝႃႈႁဝ်းဢမ်ႇလႆႈႁဵတ်း NC ၵေႃႈ မၼ်းဢမ်ႇၸၢင်ႈၵႂႃႇဢုပ်ႇဢူဝ်းသင်ၸွမ်း ၼႂ်းပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်းထူၼ်ႈ 2 ဢၼ်တေၸတ်းတၢင်းၼႃႈၼႆႉ။ တႃႇႁဝ်းတေၶဝ်ႈႁူမ်ႈၵေႃႈ မၼ်းတေယၢပ်ႇယဵၼ်း တွၼ်ႈတႃႇႁဝ်းၶႃႈၼႆ လႆႈတႅမ်ႈလိၵ်ႈထိုင်မၼ်းၼၢင်း မိူဝ်ႈဝၼ်းတီႈ 23 ၼင်ႇၼႆ။


ထၢမ်-သင်ၸိူဝ်ႉဝႃႈ ၶဝ်တွပ်ႇမႃးဝႃႈဢမ်ႇပၼ်ႁဵတ်းတီႈတူၼ်ႈတီး၊ ပၢင်လူင်ၼႆတိၵ်းတိၵ်း ၾၢႆႇ RCSS သမ်ႉႁၢင်ႈႁႅၼ်းၶပ်းၶိုင်ဝႆႉၸိူင်ႉႁိုဝ်ၶႃႈ၊ ၸွင်ႇတေပဵၼ်ႁဵတ်းၶႃႈ?။


NC ၼႆႉ မၼ်းဢမ်ႇၸႂ်ႈၵၢၼ် RCSS ၵူၺ်း၊ ပဵၼ်ၵၢၼ်ၵူၼ်းၶိူဝ်းတႆးႁဝ်းတင်းမူတ်း၊ ဢဝ်ၵၢင်ၸႂ်ၵူၼ်းၶိူဝ်းတႆး ႁဝ်းဝႃႈ။ ႁဵတ်းႁိုဝ်ၵေႃႈ ႁဝ်းၶႃႈတႄႉၵွပ်ႈဝႃႈႁဵတ်းၵၢၼ်ပိူဝ်ႈတႃႇ ၵူၼ်းၶိူဝ်းတႆးႁဝ်းၶႃႈလႄႈ တေဢဝ်ၵၢင်ၸႂ်ၵူၼ်း မိူင်းတႆးသေ သိုပ်ႇႁဵတ်းသၢင်ႈၵႂႃႇၵူၺ်း။


ထၢမ်-လွင်ႈတေႁဵတ်းတီႈတူၼ်ႈတီး ႁိုဝ်တီႈပၢင်လူင်ၼႆႉ ဢွၼ်ၼႃႈၼႆႉ ၸွင်ႇလႆႈဢုပ်ႇဢူဝ်း တူၵ်းလူင်းၵၼ်သင်ဝႆႉတီႈ လူင်ပွင်ၸိုင်ႈၶႃႈႁႃႉ?။


တွပ်ႇ-ဢမ်ႇလႆႈဢုပ်ႇဢူဝ်းၵၼ်သင်ဝႆႉၶႃႈ?။


ထၢမ်-သင်ဝႃႈဢမ်ႇလႆႈႁဵတ်းပၢင်ၵုမ်ၼႆႉ တေတုမ်ႉတိူဝ်ႉသုၼ်ႇလႆႈၵူၼ်းမိူင်းတႆး မွၵ်ႈၵႃႈႁိုဝ်ၶႃႈ?။


တွပ်ႇ-ပၢင်ဢုပ်ႇဢူဝ်းၵၢၼ်မိူင်းၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး) ဢၼ် RCSS မီးသုၼ်ႇဢွၼ်ႁဵတ်းယူႇၼႆႉ သင်ဝႃႈႁဝ်းၶႃႈဢမ်ႇလႆႈႁဵတ်းၸိုင် ၵၢင်ၸႂ်ၵူၼ်းမိူင်းတႆး ၶႂ်ႈလႆႈၶႂ်ႈပဵၼ် ၶႂ်ႈသၢင်ႈဝၢၼ်ႈမိူင်းႁဝ်းပိူင်လႂ်၊ ၶႂ်ႈႁႂ်ႈမၼ်းဢွၵ်ႇမႃးၾၢင်ႁၢင်ႈၸိူင်ႉႁိုဝ်၊ ဢၼ်ၵဵဝ်ႇၵပ်းလူၺ်ႈလွင်ႈၽဵင်ႇပဵင်း၊ လွင်ႈတႅပ်းတတ်းတူဝ်ၵဝ်ႇ၊ မိူင်းႁူမ်ႈတုမ်ၸိုၼ်ႈၸၢင်ႇ၊ မိူင်းၾႅတ်ႊၻရႄႊၼၼ်ႉ ၵၢင်ၸႂ်ၵူၼ်းမိူင်းႁဝ်းၼၼ်ႉ ႁဝ်းၶႃႈဢမ်ႇၸၢင်ႈဢဝ်ၵႂႃႇ တၢင်ႇတီႈ ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်း 2 လႄႈ တေသုမ်းသုၼ်ႇလႆႈႁဝ်းတႄႉတႄႉ။


ၵွပ်ႈၼၼ်လႄႈ သင်ၸိူဝ်ႉဝႃႈႁဝ်းၶႃႈဢမ်ႇလႆႈႁဵတ်းသၢင်ႈပွင် ၵၢၼ်ဢုပ်ႇဢူဝ်းၵၼ်ၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး)ၼႆႉ ႁဝ်းၶႃႈတေႁဵတ်းႁိုဝ်ၼႆၼၼ်ႉ ၶႂ်ႈႁႂ်ႈၵူၼ်းမိူင်းတႆးႁဝ်း ပၼ်တၢင်းဝူၼ်ႉတၢင်းၶႆႈၸႂ်မႃး တီႈႁဝ်းၶႃႈ။ ႁဝ်းၶႃႈတႄႉ တေႁဵတ်းပုၼ်ႈတႃႇၵူၼ်းမိူင်းတႆးလႄႈ တေႁဵတ်းၸွမ်းၼင်ႇၵၢင်ၸႂ်ၵူၼ်းၶိူဝ်းတႆးႁဝ်းၵႂႃႇ၊ ၶႂ်ႈၾၢၵ်ႇၶေႃႈၵႂၢမ်းထိုင်ၼင်ႇၼႆ။


ထၢမ်-ၵဵဝ်ႇၵပ်းလွင်ႈၾၢႆႇတပ်ႉမတေႃႇၶဝ် ႁၢမ်ႈႁႄႉမႃးၼႆႉ ယူႇတီႈၾၢႆႇ RCSS ၶႂ်ႈမွၵ်ႇလၢတ်ႈထိုင်လူင်ပွင်ၸိုင်ႈလႄႈ တပ်ႉမတေႃႇ ၸိူင်ႉႁိုဝ်ၽွင်ႈၶႃႈ?။


တွပ်ႇ-ပေႃးဝႃႈတႄႉမၼ်း လိၼ်မိူင်းႁူမ်ႈတုမ်တင်းမူတ်းၼႆႉ ပေႃးဝႃႈႁဝ်းၵူၼ်းမိူင်းႁူမ်ႈတုမ်တင်းမူတ်း ႁူမ်ႈၵၼ်ပိူင်ႇ(ပဵၼ်ၸဝ်ႈၶွင်)ယူႇၸိုင် လွင်ႈၼႆႉႁဝ်းၶႃႈၵႂႃႇၸတ်းတီႈလႂ်ၵေႃႈ ၸၢင်ႈၸတ်းလႆႈ မီးသုၼ်ႇၸတ်းလႆႈယူႇ။ ၵွပ်ႈၼၼ် ဢၼ်ပဵၼ်မိူင်းလူင်ၶွင်ၸႄႈမိူင်းတႆး၊ ဢၼ်ပဵၼ်တီႈတူၼ်ႈတီးလႄႈ မိူင်းၵိုၵ်းပိုၼ်းႁဝ်းၶႃႈတီႈပၢင်လူင်ၸိူဝ်းၼႆႉ ၵိုင်ႇလီပၼ်သုၼ်ႇႁဝ်းၶႃႈၸတ်းယူႇၼႆ ႁဝ်းၶႃႈၶႂ်ႈႁႂ်ႈတပ်ႉမတေႃႇၶဝ် တင်းလူင်ပွင်ၸိုင်ႈ ပွင်ႇၸႂ်ၼိူဝ်ႁဝ်းၶႃႈၼင်ႇၼႆ။