ဝၼ်းတီႈ06-07/02/2017 ၸုမ်းၵေႃတႆး Kaw Dai Organization ၸတ်းႁဵတ်း ပွႆးလူင်းပၢင်သွၼ် တီႈႁူင်းႁဵၼ်း ယုၵ်ႉၼမ်ႉၵတ်ႉၵူၼ်းၼုမ်ႇတႆး ဝဵင်းၵႃလိ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ မီးၽူႈယႂ်ႇၵူၼ်းလူင် မိူၼ်ၼင်ႇ ၶူးပူင်သွၼ်လူင် လုင်းၸၢႆးၾႃႈ ၊ ၽူႈယႂ်ႇၵူၼ်း လူင်ၼႂ်းတပ်ႉၸုမ်း7 ပေႃႈမႄႈလုၵ်ႈႁဵၼ်း ၶူးသွၼ်ဢိၵ်ႇလုၵ်ႈႁဵၼ်း ၶဝ်ႈႁူမ်ႈ 300 ပၢႆ ။

ၽူႈၵပ်းသၢၼ်ၵေႃတႆး ၸၢႆးၽူင်းၶွင်ႇ တူၵ်ႇတၵ်ႉၼႂ်း ပွႆးလူင်းပၢင်သွၼ် ပၢင်ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇဝႃႈ - ပၢႆးပၺ်ၺႃလမ်ႇလွင်ႈတွၼ်ႈတႃႇၸိူဝ်ႉၸၢတ်ႈ တႃႇဝၢၼ်ႈမိူင်းတႄႉတႄႉ  ၼင်ႇႁိုဝ် ၸိူဝ်ႉၸၢတ်ႈ တေၶိုၼ်ႈယႂ်ႇ ၶိုတ်းၸၼ်ႉၼၼ်ႉ လူဝ်ႇၵူၼ်းမီးပၺ်ၺႃၼမ်  တႃႇတေမီးမႃး ၵူၼ်းမီး ပၺ်ၺႃၼမ်ၼၼ်ႉၵေႃႈ  ၵူႈၵေႃႉတၵ်းမီးပုၼ်ႈၽွၼ်းၸွႆႈၵၼ်ပူၵ်းပွင် - ဝႃႈၼႆ ။


“ လွင်ႈပၢႆးပၺ်ၺႃၼႆႉ မၼ်းလမ်ႇလွင်ႈတႄႉတႄႉ ၼႂ်းတႆးႁဝ်းၵေႃႈယင်းတိုၵ်ႉလူဝ်ႇထႅင်ႈတင်းၼမ်  ၶႂ်ႈႁႂ်ႈပီႈၼွင်ႉတႆးႁဝ်း သႂ်ႇၸႂ်ၵၢၼ်ပၢႆးပၺ်ၺႃၵူႈၵေႃႉ၊ ၵူႈၸုမ်း၊ ၵူႈတီႈ  ဢမ်ႇဝႃႈ ပႃႇတီႇၵၢၼ်မိူင်း၊ တပ်ႉသိုၵ်း ပိူင်လူင်မၼ်းပဵၼ်ၵူၼ်းမိူင်း ႁႂ်ႈဢွၼ်ၵၼ်သႂ်ႇၸႂ် ပၢႆးပၺ်ၺႃ ၊ ၸိူဝ်ႉၶိူဝ်းၼမ်ၼမ်  ယွၼ်ႉပိူဝ်ႈၸိူဝ်ႉၶိူဝ်းဝၢၼ်ႈမိူင်းၼႆႉ လူဝ်ႇၵူၼ်းၵတ်ႉ ၵူၼ်းမီးပၺ်ၺႃတင်းၼမ်  ႁႂ်ႈသွၼ်ဝႃႈ တႃႇပူၵ်းပွင်ပၢႆးပၺ်ၺႃၼႆႉ ပဵၼ်ပုၼ်ႈၽွၼ်းႁဝ်းၵူႈၵေႃႉယဝ်ႉ ဝႃႈၼႆ ”။


ပွႆးလူင်းပၢင်သွၼ်ၼႆႉ လူင်းၸွမ်းၵၼ် 3 ၸုပ်ႈမိူၼ်ၼင်ႇ - 1.ပၢင်ယုၵ်ႉၼမ်ႉၵတ်ႉ ၵူၼ်းၼုမ်ႇတႆး ၵႃလိ ၸုပ်ႈတီႈ 10 Internship Program  လုၵ်ႈႁဵၼ်းမီး 48ၵေႃႉ။ 2.ၵၢၼ်ယုၵ်ႉၼမ်ႉၵတ်ႉ ၽႃသႃ ဢိင်းၵလဵတ်ႈ(ဢင်းၵိတ်း) တႃႈၵုင်ႈ ၸုပ်ႈ (8) Intensive English Program လုၵ်ႈႁဵၼ်းမီး 19 ၵေႃႉလႄႈ ၵၢၼ်ယုၵ်ႉၼမ်ႉၵတ်ႉ ၽူႈသၢင်ႈတူင်ႇဝူင်းၵူၼ်း ၵႃလိ ၸုပ်ႈ2 Community Worker လုၵ်ႈႁဵၼ်းမီး 28ၵေႃႉ ။


ၸုမ်းၵေႃတႆးၼႆႉ ၵေႃႇတင်ႈမႃးမိူဝ်ႈပီ 1999 ၊ပူင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ မိူၼ်ၼင်ႇ ၵၢၼ်ၶၢဝ်ႇ၊ ၵၢၼ်မိူင်း၊ ၵၢၼ်တူင်ႇဝူင်းၵူၼ်း၊ လိၵ်ႈဢဵင်းၵလဵတ်ႈ၊ပိုၼ်ႉထၢၼ်Computer ၊ၵၢၼ်ပူၵ်း ပွင်ဢိူင်ႇဝၢၼ်ႈပိုၼ်ႉတီႈ ၸဵမ်ၸိူဝ်းၼႆႉ လိူဝ်ၼၼ်ႉၶပ်းၶိုင်ပၼ်ႁႂ်ႈ လုၵ်ႈႁဵၼ်းလႆႈတိုဝ်ႉတၢင်း ၵႂႃႇ ႁဵၼ်းၼွၵ်ႈမိူင်း။ ၸိူဝ်းပွၵ်ႈမႃး ၸွႆႈတူင်ႉၼိုင်ၼႂ်းၸုမ်းၶိုၼ်းမီး 30 ပၢႆယဝ်ႉ – ဝႃႈၼႆ ။