ၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈဝဵင်းပၢင်လူင် ႁူမ်ႈၵၼ်ၸတ်းႁဵတ်း ဝၼ်းၸိူဝ်ႉၸၢတ်ႈၸိုင်ႈတႆး ၶိုၵ်ႉယႂ်ႇလူင် ပဵၼ်ပွၵ်ႈၵမ်းႁႅၵ်ႈ ဢၼ်လႆႈၸတ်းႁဵတ်း ၼႂ်းၸႄႈဝဵင်းပၢင်လူင် မီးပီႈၼွင်ႉတီႈၸမ်/ၵႆ ၶဝ်ႈႁူမ်ႈ ၼပ်ႉမိုၼ်ႇ ။

ဝၼ်းတီႈ 07/02/2017 ယၢမ်းၵၢင်ၼႂ် 09:00 မူင်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင်၊ ၸုမ်းၵူၼ်းၼုမ်ႇတႆး၊ ၸုမ်းလုၵ်ႈႁဵၼ်းၸၼ်ႉၸွမ်ပၢင်လူင် လႄႈ ပေႃႈမႄႈပီႈၼွင်ႉၵူၼ်းမိူင်း ႁူမ်ႈၵၼ် ၸတ်းႁဵတ်း ဝၼ်းၸိူဝ်ႉၸၢတ်ႈၸိုင်ႈတႆး ၶိုၵ်ႉယႂ်ႇလူင် တီႈပၢင်ႇဝတ်ႉ၊ မူၺ်ႇတေႃႇ- ပိတၵၢတ်ႈ ၵိင်ႇၽႄၸႄႈဝဵင်းပၢင်လူင်၊ ၸႄႈဝဵင်းလွႆလႅမ် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၸတ်းႁဵတ်း ပဵၼ်ပွၵ်ႈၵမ်းႁႅၵ်ႈ။ ၼႂ်းပၢင်ၵႅဝ်ႈၼႆႉ မီးၽူႈယႂ်ႇၵူၼ်းလူင် မိူၼ်ၼင်ႇ ၽူႈၵွၼ်းၸႄႈတွၼ်ႈလွႆလႅမ်၊ ၽူႈ ၵွၼ်းၸႄႈဝဵင်းလွႆလႅမ်၊ ၵိင်ႇၽႄၸႄႈဝဵင်းပၢင်လူင်လႄႈ ႁူမ်ႈလူၺ်ႈ ၾၢႆႇႁၢပ်ႇၵၢၼ်လူင်ပွင်ၸိုင်ႈ မၢၼ်ႈ ၵူႈႁွင်ႈၵၢၼ် ၸဵမ်ၸိူဝ်းၼႆႉ ၶဝ်ႈႁူမ်ႈတင်းၼမ်လၢႆ ။


ၸၢႆးသုၼ်ယုၵ်ႉ ႁူဝ်ပဝ်ႈၵေႃပွင်ပဵၼ်ပၢင်ပွႆး ဝၼ်းၸိူဝ်ႉၸၢတ်ႈၸိုင်ႈတႆးလၢတ်ႈဝႃႈ “ ပီၼႆႉ ယူႇတီႈၸုမ်းတူင်ႉၼိုင်တူင်ႇဝူင်းတႆးႁဝ်းၼႂ်းၸႄႈဝဵင်းပၢင်လူင် ႁူမ်ႈၵၼ်ၸတ်းႁဵတ်း ၼႂ်းၸႄႈဝဵင်း ပၢင်လူင် တီႈပၢင်ဝတ်ႉမူၺ်ႇတေႃႇ- ပိတၵၢတ်ႇၼႆႉ ပဵၼ်ပွၵ်ႈၵမ်းဢွၼ်တၢင်းသုတ်း၊ ယွၼ်ႉဝႃႈ ၵၢပ်ႈပၢၼ်ဝၢၼ်ႈမိူင်းလႅၵ်ႈလၢႆႈမႃး သၢႆငၢႆပၼ်မႃးယဝ်ႉလႄႈ ၸင်ႇလႆႈမႃးၸတ်းႁဵတ်းတီႈ ၼႂ်းဝဵင်း။ မိူဝ်ႈၵူႈပွၵ်ႈၼၼ်ႉ ယူႇတီႈၸုမ်းလုၵ်ႈႁဵၼ်းၸၼ်ႉၸွမ်ပၢင်လူင် ဢွၼ်ႁဵတ်းတီႈ ၼႂ်းႁူင်း ႁဵၼ်းၸၼ်ႉ ၸွမ်မႃးၵူႈပီ ဝႃႈၼႆ ။


ပီၼႆႉ ယူႇတီႈၸွမ်ၸိုင်ႈမိူင်းႁူမ်ႈတုမ် ဢူးထိၼ်ႇၵျေႃႇၵေႃႈ သူင်ႇၽိုၼ်လိၵ်ႈယုၵ်ႉယွင်ႈ ဝၼ်းၸိူဝ်ႉ ၸၢတ်ႈၸိုင်ႈတႆး ၶွပ်ႈတဵမ် 70 ပီ၊ ယူႇတီႈၽူႈၵွၼ်းၸႄႈတွၼ်ႈလွႆလႅမ် ဢူးၵူဝ်ႇၵူဝ်ႇဢွင်ႇ လူႇဢၢၼ်ႇ၊ ၽူႈၵွၼ်းၸႄႈဝဵင်းလွႆလႅမ် ဢူးသဵင်ႇတွင်းသမ်ႉ လူဢၢၼ်ႇၽိုၼ်လိၵ်ႈ ၸွမ်ၽွင်းလူင်မိူင်းတႆး တွၵ်ႊတိူဝ်ႊ ဢူးလိၼ်းထုတ်ႉ သူင်ႇပၼ်။ ၽူႈတႅၼ်းသၽႃးၸႄႈမိူင်း ဝဵင်းလွႆလႅမ် ၶဵတ်ႇလိူၵ်ႈတင်ႈ မၢႆ (2) ၼၢင်းမျႃႉထူၺ်း လူဢၢၼ် ၽိုၼ်လိၵ်ႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) သူင်ႇပၼ်လႄႈ ႁူဝ်ပဝ်ႈၵေႃပွင်ပဵၼ်ပၢင်ပွႆး ၸၢႆးသုၼ်ယုၵ်ႉ လူဢၢၼ်ႇ လွင်ႈပိုၼ်းပဵၼ်မႃး ဝၼ်းၸိူဝ်ႉၸၢတ်ႈၸိုင်ႈတႆး ၸဵမ်ၸိူဝ်းၼႆႉ ဝႃႈၼႆ ။


ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႇၶူပ်ႇတဵမ် 70 ပီ ဝဵင်းပၢင်လူင်ၼႆႉ မီးပီႈၼွင်ႉတီႈၸမ်/ၵႆ မႃးၶဝ်ႈႁူမ်ႈ တင်းၼမ်လၢႆ မိူၼ်ၼင်ႇ ဝဵင်းလၢႆးၶႃႈ၊ မိူင်းပွၼ်၊ လွႆလႅမ်လႄႈ ပၢင်လူင် ၸဵမ်ၸိူဝ်း ၼႆႉ။ ၼွၵ်ႈလိူဝ်ၼၼ်ႉ တီႈပၢင်ပွႆးသမ်ႉ တေမီးပၢင်လဵၼ်ႈတၢင်းလဵၼ်ႈ၊ ႁွင်ႉၽဵင်းၵႂၢမ်းလႄႈ တၢင်းၵႃးတႆး လဝ်ႇမူၼ်ႈပၼ် ၸဵမ်ၸိူဝ်းၼႆႉ ဝႃႈၼႆ ။


ၼွၵ်ႈလိူဝ်ၼၼ်ႉ ၼႂ်းမိူင်းတႆး လၢႆလၢႆတီႈၵေႃႈ ၸတ်းႁဵတ်းပဵၼ်ဢၼ်ယႂ်ႇလူင် မိူၼ်ၼင်ႇ  ဝဵင်းမူႇၸေႊ၊ ငဝ်ႈငုၼ်းဝၢၼ်ႈႁႆး SSPP/SSA ၊ ၼမ်ႉၶမ်း၊ ၵျွၵ်ႉမႄး၊ သႅၼ်ဝီ၊ တၢင်ႉယၢၼ်း၊ သီႇပေႃႉ၊ ပၢင်လွင်း၊ ၵေးသီး၊ ၶူဝ်လမ်၊ မိူင်းၼၢႆး၊ ဝဵင်းလိူဝ်ႇ၊ ငဝ်ႈငုၼ်းလွႆတႆးလႅင်းလႄႈ ဢိၵ်ႇထႅင်ႈ လၢႆလၢႆ ၸႄႈဝဵင်း ။


မိူဝ်ႈ 1947 လိူၼ် February ဝၼ်းတီႈ 11 ၵွၼ်ႇၼႃႈတေလူင်းလၢႆးမိုဝ်းလိၵ်ႈႁူမ်ႈမၢႆ ပၢင်လူင်ၼၼ်ႉ ၸဝ်ႈၶုၼ်ပၢၼ်းၸိင်ႇ ၸဝ်ႈၾႃႉၼမ်ႉသၼ်ႇ ႁူဝ်ပဝ်ႈၶွင်သီႇၸိုင်ႈတႆး လူင်းလၢႆးမိုဝ်းမၵ်ႈမၼ်ႈပိုၼ် ၽၢဝ်ႇ 3 ပိူင် - (1) ၾႅပ်ႉၿိဝ်ႊရီႊ 7 ဝၼ်း၊ ဝၼ်းၸိူဝ်ႉၸၢတ်ႈၸိုင်ႈတႆး၊ (2) လိူင်ၶဵဝ်လႅင် ၼႂ်းၵၢင်ဝူင်း လိူၼ် မၵ်းမၼ်ႈတုင်းၸိူဝ်ႉၸၢၼ်ႈ ႁိုဝ် ဢလၢမ်ႇတႆး ၸွမ်ပိဝ်တႆး။ (3) ၽဵင်းၵႂၢမ်းၶိူဝ်းႁဝ်း ၶိူဝ်းရႃႇၸႃႇ ႁႂ်ႈပဵၼ်ၵႂၢမ်းတင်ႇတုင်းၸၢတ်ႈ(ႁိုဝ်) ၵႂၢမ်းၸိူဝ်ႉၸၢတ်ႈ။